Pannakikomunikar Idiay Kristiano a Ministerio

“Inkayo ngarud ket agaramidkayo kadagiti ad-adalan kadagiti tattao iti amin a nasion.”​—MATEO 28:19.

1. Ania nga inted ni Kristo a bilin ti mangipabigbig iti pannakasapul ti pannakikomunikar?

TI BILIN ni Jesus, a naadaw iti ngato, ti mangipasango kadatayo iti karit ti pannakikomunikar kadagiti tao idiay ministeriotayo bayat nga agbalaybalaytayo, agsarungkar, ken makipaset kadagiti amin a parupa ti panangikasaba ti Pagarian. Nairaman iti dayta a komision isu ti rebbengen a mangipakaammo ti kinapudno maipapan ken Jehova a Dios, ken Jesu-Kristo ken ti Mesianiko a Pagarian nga iturturayan itan ni Jesus.​—Mateo 25:31-33.

2. Tapno makikomunikar a siiepektibo, aniat’ kasapulantayo?

² Kasanotay a makikomunikar a siiepektibo? Umuna, masapul a mamatitayo iti impormasion nga ikumkomunikartayo. Iti sabali a pannao, masapul nga addaantayo iti nabileg a pammati a ni Jehova isut’ maymaysa a pudno a Dios, a ti Biblia isut’ pudno a Sao ti Dios, ken ti Pagarian ti Dios isut’ kakaisuna a namnama ti sangatauan. Iti dayta a pamay-an, ti isursurotayo ket agtaud iti puso, ken maipangagtayo ti balakad ni Pablo ken Timoteo: “Agawaam a sireregta ti agparang a naanamongan iti sanguanan ti Dios, a kas mangmangged nga awan ti ibainna, nga aramatem iti umiso ti sao ti kinapudno.”​—2 Timoteo 2:15.

Pannakikomunikar nga Awan Sasao

3-5. (a) Kasanotay ti makikomunikar uray di agsasao? (b) Aniada a kapadasan ti mangpaneknek iti daytoy?

³ Ti komunikasion masansan iramanna dagiti sarita. Ngem, kinaagpaysuanna, makikumkomunikartayo kadagiti tao uray sakbay pay a pagtagariantay ida. Kasano? Babaen iti takdertayo ken iti wagas ti panagkawes ken panaglanglangatayo. Adu a tawenen ti napalabas maysa a misionero a nagturpos iti Watchtower Bible School of Gilead ti agbibiahe babaen iti barko nga agturong idiay destinona. Kalpasan iti sumagmamano nga aldaw idiay baybay, maysa a ganggannaet ti nagsaludsod kenkuana no apay nga isut’ naiduma unay kadagiti dadduma a nakalugan. Ti misionero ket mangikumkomunikar iti maysa a banag a nakadidillaw​—nga isut’ addaan naiduma a pagalagadan ken nalaka nga asitgan​—babaen laeng iti langana ken ti tignayna. Nangipresenta daytoy iti nasayaat a gundaway para iti misionero tapno mamaneknek.

⁴ Kasta met, maysa a kabsat a babai nga agtaktakder idiay lansangan a mangiyup-oprisi kadagiti literatura ti Biblia kadagiti aglablabas ti nainggayyeman nga immisem iti maysa a babai nga umas-asideg kenkuana. Daytoy a babai ti nangrugi nga umulog a mapan iti estasion ti tren. Kalpasanna nagbaliw ti panunotna, sinublianna ti kabsat, ket nagkiddaw iti panagadal ti Biblia. Aniat’ namagsiddaaw kenkuana? Nupay isut’ saan a naiyoprisian ti literatura ti Biblia, isut’ immawat iti nainggayyeman nga isem manipud iti Saksi a mangar-aramid iti panangasaba idiay lansangan.

⁵ Maikatlo nga ehemplo: Maysa a grupo dagiti agtutubo a Saksi ti nangan iti maysa a restauran ket nasdaawda idi maysa a ganggannaet ti immasideg iti lamisaanda ket binayadanna ti kinnanda. Apay nga inaramidna dayta? Isut’ nasdaaw iti panagtigtignayda. Uray dida nagtagtagarian ti ganggannaet, naikomunikar dagitoy nga agtutubo a Kristiano nga isudat’ managbuteng-Dios nga indibidual. Nalawag, iti taktakdertayo, panaglanglanga, ken kinamannakigayyem, makikomunikartayo uray sakbay a makapagsaotayo.​—Idiligyo iti 1 Pedro 3:1, 2.

Ti Pannakirinnason Napateg iti Komunikasion

6. Iyilustraryo no kasano a ti pannakirinnason ket nakapatpateg iti pannakikomunikar.

⁶ Tapno makikomunikar babaen iti sasao kadagiti tattao maipapan iti naimbag a damag, masapul a sisasaganatayo, a saan nga agsao a sigugubsang, no di ket makirinnason kadakuada. Maulit-ulit a mabasatayo a nakirinnason ni Pablo kadagidiay nangiramananna ti naimbag a damag. (Aramid 17:2, 17; 18:19) Kasanotay a masurot ti ulidanna? Bueno, dagiti kumarkaro a kasasaad ti lubong ti mabalin a nangituggod kadagiti adu tapno pagduduaanda ti kaadda ti maysa a mannakabalin-amin ken naayat a Dios a maseknan iti sangatauan. Mabalintay ti makirinnason kadakuada, nupay kasta, nga adda panawen dagiti bambanag iti Dios. (Eclesiastes 3:1-8) Ngarud, kunaen ti Galacia 4:4 nga idi nadanon ti umiso a panawen ti Dios, imbaonna ti Anakna ditoy daga. Daytoy ti rinibribo a tawen kalpasan ti damo a panangikarina ti kasta. Umasping unay, inton umay ti umiso a tiempona, pagpatinggaennanto ti panagsagaba ken kinadakes. Kasta pay met, ipakita ti Sao ti Dios nga Isut’ addaan kadagiti nainkapilitan a rason iti panangipalubosna nga agtultuloy ti kinadakes iti nabayag unay. (Idiligyo iti Exodo 9:16.) Ti pannakirinnason a buyogen dagitoy a pannakaawat, ken panangsuportar iti dayta babaen kadagiti ilustrasion ken nabileg a Nainkasuratan a pammaneknek, ti mangtulong kadagiti napasnek a tattao a makabigbig a ti panagraira ti kinadakes ti di mabalin nga usaren a rason iti kaawan ni Jehova wenno ti dina pannakaseknan.​—Roma 9:14-18.

7, 8. Kasano a mabalinnatay a tulongan ti pannakirinnason a makikomunikar iti maysa a Napeklan a Judio?

⁷ Ipantayon a bayat ti panagbalaybalayyo, kunaen ti bumalay kadakayo: “Maysaak a Judio. Saanak nga interesado.” Kasano ti panangituloyyo? Impadamag ti maysa a kabsat a lalaki ti balligina iti panangusarna iti daytoy nga iyaasideg: ‘Siguradoak nga umanamongka kaniak a maysa pay laeng ni Moises kadagiti kadadakkelan a propeta nga inusar ti Dios. Ken ammom kadi a kunana kas nairekord idiay Deuteronomio 31:29: “Pagaammok a kalpasan ti ipapatayko . . . sumiasikayto iti dalan nga imbilinko kadakayo; ket ti didigra talipuposennakayto”? Pudno a propeta ni Moises, gapuna dagiti saona masapul a matungpalda. Mabalin kadi a natungpalda idi imbaon ti Dios ti Mesias kadagiti Judio ket isu daytat’ gapuna no apay nga isut’ di inawat dagiti Judio? Mabalin a kasta idi ti kaso. Ita no pudno daytoy ken nagbiddutda, maysa kadi dayta a rason no apay a rebbeng nga aramidenyo met ti isu met la a biddut?’

⁸ Laglagipenyo, met, nagsagaba unay dagiti Judio iti ima ti Kakristianuan, nangnangruna bayat daytoy a siglo. Gapuna amangan no kayatyo nga ibaga iti bumalay nga awan pasettayo iti dayta. Kas pangarigan, amangan no kayatyo a kunaen: ‘Ammoyo kadi nga idi agturturay ni Hitler, saan nga inkaso dagiti Saksi ni Jehova ti panangilaksidna kadagiti Judio? Nagkedkedda met nga agkuna: “Maidayaw ni Hitler” ken agserbi iti armadana.’a

9, 10. Kasano a mausar ti pannakirinnason tapno tulongan ti maysa a manamati iti umap-apuy nga impierno?

⁹ Iti panagregget a makikomunikar iti maysa a mamati iti umap-apuy nga impierno, mabalinyo nga irason a no ti maysa ket agsagaba nga agnanayon idiay impierno, isut’ addaan ngarud iti di matay a kararua. Ti manamati iti umap-apuy nga impierno ti dagdagus nga umanamong. Kalpasanna mabalinyo a dakamaten ti salaysay ti pannakaparsua da Adan ken Eva ket siaanus nga isaludsodyo no nadlawna iti dayta a salaysay ti pannakadakamat ti kasta a di matay a kararua. Iti panangitultuloyyo iti pannakirinnasonyo, mabalinyo nga iturong ti atensionna idiay Genesis 2:7, a sadiay ibaga kadatayo ti Biblia a ni Adan nagbalin a kararua. Ken paliiwenyo no ania ti imbaga ti Dios nga ibunga ti basol ni Adan: “Iti ling-et ita rupam mangankanto iti taraon agingga nga agsublika iti daga, ta isu ti nakabuklam. Ta tapukka ket iti tapuk agsublikanto.” (Genesis 3:19) No kasta, ti kararua a ni Adan nagsubli iti tapuk.

¹⁰ Mabalinyo met nga awisen ti atension iti kinapudno a di pulos masarakan iti intero a salaysay ti Genesis a dinakamat ti Dios ti agnanayon a panagsagaba idiay umap-apuy nga impierno. Idi pinakdaaran ti Dios ni Adan iti di pannangan iti naiparit a bunga, kunana: “Iti aldaw a pannanganmo iti dayta mataykanto a di bumurong.” (Genesis 2:17) Awan nadakamat nga umap-apuy nga impierno! No ti pudno a resulta ti basol para ken Adan ket, saan nga ipapatay, ‘panagsubli iti tapuk,’ no di ket agnanayon a panagsagaba, di koma aya inlawlawag a naimbag ti Dios daytoy? No kasta, ti naannad ken naanus a pannakirinnason ti nalabit mangtulong iti napasnek nga indibidual a makakita kadagiti di panagtutunos ti pammatina. Sapay koma ta ditay liwayan ti kinapateg ti pannakirinnason bayat nga iranudtayo kadagiti sabsabali ti kinapudno ti Sao ti Dios.​—Idiligyo iti 2 Timoteo 2:24-26; 1 Juan 4:8, 16.

Dagiti Kualidad a Kasapulan iti Epektibo a Komunikasion

11-13. Aniada a Nakristianuan a kualidad ti makatulong kadatayo tapno makikomunikar a siiepektibo?

¹¹ Ita, aniada a kualidad ti rebbengtay a sukayan tapno maikomunikartayo dagiti kinapudno ti Pagarian iti kaiipektiboan a pamay-an? Bueno, aniat’ ibaga kadatayo ti ulidan ni Jesus? Idiay Mateo 11:28-30, mabasatayo dagiti saona: “Umaykayo kaniak, dakayo amin nga agrigrigat ken madagdagsenan, ket paginanaenkayto. Alaenyo ti sangolko ken agsursurokayo kaniak, ta siak naemmaak ken napakumbabaak iti panagpuspusok, ket makasarakkayto ti inana a maipaay kadagiti kararuayo. Ta nalaka ti sangolko ken nalag-an ti awitko.” Sadiay makitatayo ti maysa kadagiti tulbek ti balligi ni Jesus iti pannakikomunikar. Isut’ naemma ken napakumbaba iti panagpuspusona. Natakkuatan dagiti nasingpet-panagpuspusona a tattao nga isut’ makapabang-ar. Nangituyang met ni apostol Pablo ti maysa nga ulidan, ta, kas imbagana kadagiti panglakayen manipud Efeso, manipud iti umuna nga aldaw ti ipapanna kadakuada, isut’ nagserbi iti Apo “iti isuamin a kinapakumbaba ti nakem.”​—Aramid 20:19.

¹² Babaen ti kanayon a panangiparangarangtayo ti kinaemma ken kinapakumbaba ti nakem, masarakan dagiti sabsabali a makapabang-artayo met, ket nalaklaka para kadatayo ti makikomunikar kadakuada. Aniaman a sabali pay a kababalin ti mabalin a mangpataud ti lapped iti nagbaetantayo ken dagidiay pagreggetantayo a pakikomunikaran. Pudno, “ti kinasirib ket adda kadagidiay napakumbaba.”​—Proverbio 11:2.

¹³ Tapno maiparanud a siiepektibo ti impormasion, kasapulantay met ti agbalin a naanus ken nataktika. Sigurado a nataktika ni apostol Pablo idi a namaneknek kadagiti pilosopo a nagtataripnong iti sangona idiay Mars’ Hill. Imparangna ti naimbag a damag iti pamay-an a maawatanda. (Aramid 17:18, 22-31) No tarigagayantayo ti makikomunikar a sibaballigi kadagiti managdengngegtayo, rebbengtay nga ipangag ti inted ni apostol Pablo a balakad kadagiti taga Colosas idi kunana: “Ti saoyo kankanayon koma a nadayag, di pulos awan ramramanna; adalenyo no kasano ti kasayaatan a pannakisarita iti tunggal maysa a masabetyo.” (Colosas 4:6, The New English Bible) Ti panagsaotayo kanayon koma a makaay-ayo. Ti kasta a panagsao ti manglukat kadagiti panunot dagiti managdengngegtayo, bayat a dagiti di nainkalintegan a kumento ti mangserra kadagiti panunotda.

14. Kasano a ti nakalma, mannakipatang nga iyaasideg ti mabalin a makatulong kadatayo a makikomunikar kadagiti sabsabali?

¹⁴ Kayattay ti agparang a kanayon a sikakalma. Daytoy ti mangtulong kadagiti managdengngegtayo nga agbalin a nasimbeng. Ti panagbalin a sikakalma kayatna a sawen ti saan a pannakakumikom a bukbukodan ti panagsao. Imbes ketdi, buyogen ti di agdardaras a kababalin ken nainggayyeman a salsaludsod, ikkantay ti gundaway dagiti managdengngegtayo a mangiyebkas kadagiti bagbagida. Nangnangruna no mangaskasabatayo iti impormal a nainsiriban a paregtaentayo daydiay tao nga agsao. Kas maysa a pangarigan, maysa a Saksi ti naminsan nakatugawna ti maysa a padi a Romano Katoliko iti eroplano. Iti nasurok a maysa nga oras, nagusar ti Saksi kadagiti nataktika a saludsod, ket ti padi, iti isusungbatna, ti ad-adut’ panagsaritana. Ngem idi agsinadan, nakaalan ti padi kadagiti sumagmamano a publikasion ti Biblia. Ti kasta a naanus nga iyaasideg ti mangtulong kadatayo a mangwatwat iti sabali pay a kasapulan a kualidad, nga isu ti empatia.

15, 16. Kasano a ti empatia tulongannatayo a makikomunikar?

¹⁵ Ti empatia kayatna a sawen ti panangisaadtayo kadagiti bagbagitayo iti lugar dagiti sabsabali. Naan-anay nga inapresiar ni apostol Pablo ti pannakasapul ti empatia, kas makita manipud insuratna kadagiti taga Corinto: “Ta idinto a siwayawayaak kadagiti isuamin, pinaadipenak kadagiti isuamin, tapno mairagpatko dagiti ad-adu. Iti kasta kadagiti Judio nagbalinak a Judio, tapno mairagpatko dagiti Judio; kadagiti adda iti babaen ti linteg nagbalinak a kasla adda iti babaen ti linteg, idinto nga awanak iti babaen ti linteg, tapno mairagpatko dagiti adda iti babaen ti linteg. Kadagiti awan lintegda kaslaak la awan lintegna, idinto nga addaanak ti linteg ti Dios iti babaen ti linteg ni Kristo, tapno mairagpatko dagiti awan ti lintegda. Kadagiti nakapuy nagbalinak a kas nakapuy, tapno mairagpatko dagiti nakapuy. Nagbalinak nga isuamin kadagiti isuamin, tapno iti isuamin a pamay-an maisalakanko dagiti dadduma.”​—1 Corinto 9:19-22.

¹⁶ Tapno matulad ni apostol Pablo kadagitoy a banag, kasapulantay ti agbalin a nataktika, mannakatarus, ken managpaliiw. Ti empatia ti tumulong kadatayo a mangikomunikar ti kinapudno kadagiti managdengngegtayo sigun iti wagas ti panagpanunot ken panagriknada. Ti publikasion a Panakirinnason Manipud kadagiti Kasuratan mangted naruay a tulong iti daytoy a benneg. Kanayon nga itugotyo dayta idiay ministerio.

Ayat​—Maysa a Katulongan iti Pannakikomunikar

17. Dagup dagiti amin a Nakristianuan a kualidad, ania ti kapapatgan iti panangikomunikar a siiepektibo ti kinapudno, ken kasano a naipakita daytoy?

¹⁷ Ti kinaemma, kinapakumbaba ti pakinakem, kinaanus, ken empatia ket napategda para iti epektibo a komunikasion iti panangiranud kadagiti impormasion. Kangrunaanna, nupay kasta, ti di agimbubukodan nga ayat ti mangtulong kadatayo nga agbalin a naballigi iti panangdanon kadagiti puso dagiti sabsabali. Naasian ni Jesus kadagiti tattao gapu ta “nalidayda ken nawarawarada a kasda la karnero nga awan ti pastorda.” Ayat ti nangtignay ken Jesus a mangikuna: “Umaykayo kaniak, dakayo amin nga agrigrigat ken madagdagsenan, ket paginanaenkayto.” (Mateo 9:36; 11:28) Gapu ta ay-ayatentayo ida a datayo met kayattayo a painanaan dagiti tattao ken tulongan ida a magna iti dalan nga agturong iti biag. Ti mensahetayo ket mensahe ti ayat, gapuna a kanayon koma nga iyebkastay daytoy iti naayat a pamay-an. Daytoy nga ayat iparangarangna ti bukodna babaen iti nainggayyeman nga isem, babaen iti kinaasi ken kinaalumanay, babaen iti kinaragsak ken kinabara.

18. Kasanotay a matulad ni Pablo, kas panangtuladna iti Apo?

¹⁸ Iti daytoy a banag ni apostol Pablo ket naimbag a tumutulad iti Apona, ni Jesu-Kristo. Apay nga isut’ nakabalballigi iti panangibangonna kadagiti kongregasion? Gapu iti regtana? Wen. Ngem kasta met gapu iti ayat nga imparangarangna. Paliiwenyo dagiti ebkas ti panagayatna no maipapan iti baro a kongregasion idiay Tesalonica: “Nagbalinkami a naemma iti tengngayo, a kas iti ina nga agtagibi dungdunguenna dagiti annakna met laeng. Kasta met, iti panangdungdungngomi kadakayo, ket siaayatkami a mangipaay kadakayo, saan laeng a ti naimbag a damag ti Dios, no di ket dagiti pay kararuami, ta nagbalinkayo a patgenmi unay.” Ti panangtulad ken Pablo ti mangtulong kadatayo kadagiti panagreggettayo a makikomunikar.​—1 Tesalonica 2:7, 8.

19. Apay a rebbeng a ditay palubosan ti di manangipangag a teritoria a mangupay kadatayo?

¹⁹ No inaramidtayon ti kabaelantayo a makikomunikar ket mapaaytayo a makagun-od kadagiti matarigagayan a resulta, maupaytayo kadi? Nikaanoman. Dagiti Estudiante ti Biblia (kas pannakaawag idi dagiti Saksi ni Jehova) kinunada a tapno maawatda ti kinapudno, dagiti tattao masapul nga adda kadakuada dagiti tallo nga n. Kasapulanda ti agbalin a nasingpet, napakumbaba, ken nabisinan. Ditay manamnama dagiti di napasnek a tattao, dagidiay di nasingpet, a mangipangag a siaanamong iti kinapudno; ket ditay met manamnama dagiti napalangguad wenno natangsit a tattao a dumngeg iti naimbag a damag. Kasta pay met, uray medio nasingpet ken napakumbaba met ti maysa a tao, nalabit a dina awaten ti kinapudno no isut’ di nabisinan iti naespirituan.

20. Apay a kanayon a maibaga a saan a barengbareng dagiti panagreggettayo?

²⁰ Awan duadua nga adu kadagiti masabetyo idiay teritoriayo ti agkurang iti maysa wenno ad-adu pay kadagiti tallo nga n. Ni mammadto a Jeremias naaddaan met ti isu met la a kapadasan. (Jeremias 1:17-19; Idiligyo iti Mateo 5:3) Kaskasdi, dagiti panagreggettayo ket saanda a barengbareng. Apay a saan? Agsipud ta iwarwaragawagtayo ti nagan ni Jehova ken ti Pagarianna. Babaen ti panangasabatayo ken ti kaaddatayo a mismo, pakpakdaarantayo dagiti nadangkes. (Ezequiel 33:33) Ken ditay liplipatan a babaen kadagiti panagreggettayo a makikomunikar kadagiti sabsabali, gunggonaantayo dagiti bagbagitayo. (1 Timoteo 4:16) Pagtalinaedentayo a napigsa ti pammatitayo ken nalawag ti namnamatayo iti Pagarian. Kasta met, taginayonentayo ti kinatarnawtayo ken iti kasta makipaset iti panangsantipikar iti nagan ni Jehova a Dios, a paragsaken ti pusona.​—Proverbio 27:11.

21. Aniat’ maikuna iti pakagupgupanna?

²¹ Iti pananggupgup: Ti komunikasion isut’ epektibo a panangiranud kadagiti impormasion. Ti arte ti komunikasion ket nasken, ken adu a pannakadangran ti ibungana no kumapuy ti pannakikomunikar. Nakitatayon a ni Jehova a Dios ken ni Jesu-Kristo isuda dagiti kangrunaan a mannakikomunikar ken nangdutok ni Jesu-Kristo iti maysa a kalasugan ti komunikasion iti kaaldawantayo. Nadlawtay met a babaen iti panaglanglanga ken kababalintayo, makikumkomunikartayo, a mangiyaw-awat kadagiti mensahe kadagiti sabsabali. Naadaltayo a napateg ti akem ti pannakirinnason iti panagtarigagaytay a makikomunikar kadagiti tattao ken tapno makikomunikar a siiepektibo, kasapulantay ti agbalin a naemma ken napakumbaba, mangipakita iti empatia, panangwatwat ti kinaanus, ken, kangrunaanna, matignay babaen iti puso a napno ti ayat. No sukayantayo dagitoy a kualidad ken suroten dagiti ulidan ti Biblia, agbalintayo a naballigi a Kristiano a mannakikomunikar.​—Roma 12:8-11.

[Footnote]

Kasanot’ Panangsungbatyo?

◻ Kadagiti ania a pamay-an a ti komunikasion ket mangrugi sakbay a maiyebkas ti sao?

◻ Aniadat’ sumagmamano nga ehemplo ti komunikasion babaen iti epektibo a pannakirinnason?

◻ Aniada a kualidad ti namagbalin kada Jesu-Kristo ken Pablo a makikomunikar a siiepektibo?

◻ Apay a masapul a ditay maupay no nabuntog ti idadateng dagiti resulta?