“Iwagsaktayo Met ti Amin a Pakadagsenan”

“Naliday ken naupayak unay,” inyasug ni Maria. Iti panangtukoyna iti kadagsen dagiti Nakristianuan a responsabilidad, innayon daytoy a Kristiano a babai: “Makakitkitaak kadagiti gagayyemko a mapakpaksuyan. Mariknak met ti bannog ken pakadagsenan. Pangngaasiyo ta tulongandak a makaawat no apay.”

MARIKNAYO met kadi nga addakay iti sidong ti pannakapadagsen, nabannog unay tapno ipaayanyo ti umdas a panangtaming dagiti teokratiko a responsabilidadyo? Agparang kadi no dadduma a kasla maysa a nadagsen nga awit ti Kristiano a ministerio, maysa a di maibaklay a dadagsen? Adu a matalek a Kristiano ti aglasat kadagiti panawen ti pannakaupay, gapu ta kankanayon a napalikmutantayo kadagiti negatibo a puersa a mangsebseb iti rag-otayo. Ti panagbalin a pudno a Kristiano ita ket talaga a maysa a karit. Ngarud, sagpaminsan marikna dagiti dadduma a ti Kristiano a ministerio ket maysa a nadagsen nga awit.

Panangsukisok iti Makagapu

Pagminaren dagiti Kasuratan a saan a nangisaad ni Jehova kadagiti di nainrasonan a kiddaw kadatayo. Kuna ni apostol Juan a “dagiti bilbilin” ti Dios “saanda a makapadagsen.” (1 Juan 5:3) Umasping ti panagkuna ni Jesus kadagiti pasurotna: “Alaenyo ti sangolko kadakayo ket agsursurokayo kaniak, ta siak naemmaak ken napakumbabaak iti panagpuspusok, ket makasarakkayto ti inana maipaay kadagiti kararuayo. Ta ti sangolko nalaka ken nalag-an ti awitko.” (Mateo 11:29, 30) Nalawag unay a saan a pagayatan ni Jehova a madagsenantayo wenno maparigattayo iti serbisiotayo kenkuana.

Kasano, ngarud, a mabalin a matmatan ti maysa a matalek a Kristiano dagiti responsabilidadna kas nabantot a dadagsen? Nalabit, sumagmamano a bambanag ti nairaman. Paliiwenyo dagitoy a sasao ni apostol Pablo: “Iwagsaktayo ti amin a pakadagsenan . . . , ket tarayentayo koma a siaanus ti tarayen a naikabil iti sanguanantayo.” (Hebreo 12:1) Dagiti sasao ni Pablo ipabigbigda a ti maysa a Kristiano mabalin a mangipabaklay iti bagina kadagiti di kasapulan nga awit. Mabalin a saan met nga iraman daytoy dagiti nakaro a basol. Ngem mabalin nga agbiddut ti maysa a Kristiano iti panangaramidna ti pangngeddeng a mamagrikut unay iti biagna, a mamagbalin a narigat unay para kenkuana a tarayen ti lumba a naikabil iti sanguanantayo.

Natimbeng a Panangmatmat kadagiti Material a Bambanag

Usigentayo, kas pangarigan, ti sekular a trabaho. Kadagiti adu a daga, mabalin nga awan sabali a pagpilian ti maysa a Kristiano no di ti agtrabaho iti atiddug a tiempo. Masansan, nupay kasta, agtrabaho laeng dagiti tattao tapno makapagballigi wenno makaurnong kadagiti pagnam-ayan. Babaen ti panangtingitingda manen kadagiti aktual a kasapulanda, nasarakan ti dadduma a Kristiano a nainsiriban ti panangaramid kadagiti panagbalbaliw iti kasasaad ti trabahoda. Daytoy ti kasasaad ni Debbie ken ti asawana, agpadada a Saksi ni Jehova. Kunaenna: “Nagbaliw ti kasasaadmi iti pinansial, ket diak kasapulanen ti agtultuloy nga agtrabaho iti amin-tiempo. Ngem narigat nga isardeng dayta.” Di nagbayag nangrugina a marikna ti panagsikor iti kinaadu ti trabahona. Ilawlawagna: “Sabado laeng ti libre nga aldaw tapno agtrabahoak idiay balay. Masansan kasla diak kayat ti rumuar iti tay-ak ti serbisio. Madi ti riknak maipapan iti daytoy, ket binuribornak ti konsiensiak, ngem inay-ayatko ti trabahok! Kamaudiananna, kasapulan a sanguek ti kinapudno. Adda laeng maymaysa a solusion. Insardengko ti trabahok.” Pudno, ti kasta a dakkel a panagbalbaliw ti mabalin a saan a posible kadagiti dadduma. Nupay kasta, ti naannad a panangusig iti oras ti trabahoyo mabalin nga ipanayagna ti panagkasapulan kadagiti sumagmamano a panagbalbaliw.

Mabalin nga adda pay sabsabali a pamay-an ti panangpabang-ar kadagiti bagbagitayo kadagiti di napateg a pakadagsenan. Ania ngata no kissayantayo ti panagsursursortayo, dagiti panagay-ayam, wenno sabsabali pay a paglinglingayan​—mairaman ti mabusbos a tiempo iti panagbuya ti telebision? Ken uray kalpasan pannakagun-od ti matarigagayan a kinatimbeng kadagitoy a paset, ti kankanayon a panangibagay ti mabalin a makiddaw tapno mataginayon ti kasta a kinatimbeng.

Napateg ti Kinanainkalintegan

Ti kinanainkalintegan kadagiti kakasta a bambanag ti tumulong kadatayo a mairuam no tumaud dagiti baro a kasasaad. Ngarud, mataginayontayo ti maysa a positibo a panangmatmat iti ministeriotayo.​—Efeso 5:15-17; Filipos 4:5.

Mariknayo kadi a marigatankayo a mangaramid ti kas kaadu ti maar-aramidan dagiti sabsabali iti serbisio ti Dios? Makainayon met daytoy ti panagdanag ken pannakapaay iti biagyo. Nupay ti nasayaat nga ulidan dagiti sabsabali ket pudno a mangparegta kadakayo nga agaramid ti ad-adu pay, ti kinanainkalintegan ti mangtulong kadakayo a mangituyang kadagiti kalat a mabalinanyo a gun-oden maitunos kadagiti bukodyo a kasasaad ken kabaelan. Kunaen dagiti Kasuratan kadatayo: “Ngem suoten ti tunggal maysa ti aramidna met laeng, ket iti kasta addanto ragsakna iti maipuon met la kenkuana, ket saan a maipuon iti sabali. Ta tunggal maysa awitennanto ti awitna met laeng.”​—Galacia 6:4, 5.

Dagiti kustombre ken tradision iti maysa a lugar mabalin a nayonanna met dagiti babantottayo. Idi kaaldawan ni Jesus napaksuyan dagiti tattao iti panangpadasda a tungpalen dagiti adu a narelihiusuan a linteg ken tradision nga intuyang dagiti tattao. Ita, ti ili ni Jehova ket nawayawayaanen manipud kadagiti ulbod a narelihiusuan a tradision. (Idiligyo ti Juan 8:32.) Kaskasdi, ti maysa a Kristiano agbalin a di maiparbeng a makumikom kadagiti kustombre ti maysa a lugar. Kas pangarigan, no dadduma dagiti pasken a kas kadagiti kasar ket buklen dagiti aglablabes a kustombre. Mabalin a saan met a dakes dagitoy a kustombre, ken mabalin a naidumdumada ken makapainteres. Nupay kasta, mabalin nga awan panawen wenno awanan pinansial a kabaelan ti maysa a Kristiano tapno maaramidanna amin dagita a bambanag, ket ti panangikarkarigatanna nga aramiden ti kasta ti mangnayon kadagiti sabsabali pay a di napateg a babantot.

Usigenyo ti napasamak idi sinarungkaran ni Jesus ti babai a managan Marta. Imbes a naan-anay a magunggonaan manipud nadiosan a kinasiribna, “ni Marta . . . naringgoran kadagiti adu a panagsagana.” Isut’ napadagsenan unay kadagiti adu a bambanag. (Lucas 10:40) Ngem siaanus nga insingasing ni Jesus a mabalin a pagbalinenna a simple dagiti urnos ti panagpakanna tapno isut’ magunggonaan manipud panangisurona. (Lucas 10:41, 42) Iladawan a naimbag daytoy a ti nasayaat a pangngeddeng ken ti kinanainkalintegan ti tumulong kadakayo iti pananggun-od ti umiso a kinatimbeng iti Kristiano a ministerioyo.​—Santiago 3:17.

Ti nasayaat a pangngeddeng kasapulan met no pilienyo dagiti kakaduayo. Ipakdaar ti Proverbio 27:3: “Ti bato nadagsen ket ti darat maganting​—ngem ti pungtot ti maag nadagdagsen ngem isuda a dua.” Awan dumana, dagiti nasinged a kakaduayo addaandanto ti napigsa nga impluensia iti wagas ti panagpampanunotyo. Ti kankanayon a pannakikadua kadagidiay napartak nga agsapul ti biddut ken uyawenda dagiti sabsabali idiay kongregasion mabalin a makaimula kadagiti bukel ti pannakaupay ken negatibo a panagpanunot kadakayo. (1 Corinto 15:33) No mailasinyo a maysa a parikut daytoy, dagiti sumagmamano a nainsiriban a panangbalbaliw kadagiti kalanglangenyo palag-anenna ti awityo.

Agbalin a Nanakman iti Pannakipagna iti Dios

Idiay Mikias 6:8, masarakantayo daytoy a manggutugot a saludsod: “Ket ania aya ti iparebbeng ni Jehova kenka no di ti . . . agbalin a nanakman iti pannakipagna iti Diosmo?” Ti kinanakman ket nadepinar kas panagbalin a sipapanunot kadagiti bukod a limitasion. Dagidiay a di mangbigbig kadagiti limitasionda ti manglapunos kadagiti bagbagida iti adu unay nga annongen. Napasamak daytoyen kadagiti nataengan a Kristiano, uray kadagiti manangaywan, a nagbunga iti pannakaupay, pannakapaay, ken pannakapukaw ti rag-o. Ni Kenneth, maysa a Kristiano a panglakayen, binigbigna: “Nakitak nga agturturong ti bagik iti panagsennaay, ket kunak, ‘Diak ipalubos a mapasamak daytoy kaniak.’ Gapuna a kinedngak ti sumagmamano nga annongek ket impamaysak dagiti kabaelak nga aramiden.”

Uray ni napakumbaba a mammadto a Moises narigatan met iti panangilasinna kadagiti bukodna a limitasion. Gapuna a ni Jetro, ti katuganganna a lalaki, impabigbigna ken Moises maipapan ti adu unay a trabaho nga ikarkarigatanna a tamingen nga is-isuna. “Ania daytoy nga ar-aramidem kadagiti tattao?” inyimtuod ni Jetro. “Saan a naimbag ti ar-aramidem. Di bumurong a mapaksuyankanto . . . ta daytoy nga annongen napalalo ti dagsenna kenka. Dika mabalin nga aramiden a siksika laeng. . . . Mangtudingkanto iti aggapu kadagiti umili kadagiti tumutop a lallaki, . . . ket tunggal dakkel a banag iyamangdanto kenka, ngem amin a babassit a bambanag isudanto ti mangtaming kas uk-ukom. Iti kasta nalaglag-anto kenka, ket isuda makipagannongdanto kenka.” Dagdagus nga imbingay ni Moises ti trabahona kadagiti sabsabali, ket ngarud nakasarak ti gin-awa manipud agbalbalin a nadagsen unay nga awit.​—Exodo 18:13-26.

Iti sabali pay a gundaway kuna ni Moises ken Jehova: “Diak kabaelan, nga awiten a maymaysa, ti amin dagitoy a tattao, ta napalalo a nadagsen kaniak.” Manen, ti sungbat ket ti panangibingay. Mabalin a daytoy met ti solusion iti panagtutuokyo no mariknayo a nalapunoskayo kadagiti adu unay nga annongen.​—Numeros 11:14-17.

Ni Jehova Tulongannatayo a Mangbagkat iti Awit

Kuna ni Jesus a ti sangolna ket naasi ken ti awitna ket nalag-an ngem adda met dagsenna. Ti sangol nga inyawis ni Jesus nga ibaklaytayo ket saan a sangol ti kinasadut. Daytat’ sangol ti naan-anay a dedikasion iti Dios kas maysa nga adalan ni Jesu-Kristo. No kasta, adda pasurotna a rukod ti dagsen wenno rigat ti panagbalin a pudno a Kristiano. (Mateo 16:24-26; 19:16-29; Lucas 13:24) Bayat a kumarkaro dagiti kasasaad ti lubong, umadu dagiti pakarigatan. Nupay kasta, addaantayo ti rason nga agbalin a positibo iti panangmatmattayo agsipud ta ti awis ni Jesus ipasimudaagna a kabaelan dagiti sabsabali nga ibaklay ti sangolna a kaduana ket tulonganna ida.a Ngarud, agingganto pay met laeng a sursurotentayo ti panangiwanwan ni Kristo, ti awittayo ket agtalinaed a nalag-an gapu ta tulongannatayo.

Maseknan ti Dios kadagidiay mangay-ayat kenkuana, ken aywananna dagiti puso ken pampanunot amin dagidiay sikakararag a mangiyallatiw kadagiti babantotda kenkuana. (Salmo 55:22; Filipos 4:6, 7; 1 Pedro 5:6, 7) “Bendito ni Jehova, nga inaldaw-aldaw a mangbagkat iti awittayo, ti pudno a Dios ti pannakaisalakantayo,” kuna ti salmista. (Salmo 68:19) Wen, mangnamnamakayo koma nga inaldaw-aldaw met a bagkaten ni Jehova ti awityo no iwaksiyo ti amin a pakadagsenan ket tarayenyo a siaanus ti tarayen a naikabil iti sanguananyo.

[Footnote]

[Ladawan iti panid 24]

Dagiti masirib a panglakayen situtulokda a mangibingay kadagiti sumagmamano a trabaho ken mangiranud iti awitda