Ad-adu Pay a Misionero Para iti Sangalubongan a Panagani
TI Setiembre ket bulan ti panagani para kadagiti mannalon, ngem adayo a napatpateg a trabaho ti panagani ti nangawis iti dakkel a tallaong idiay Assembly Hall dagiti Saksi ni Jehova sadi Jersey City, iti laeng ballasiw ti Karayan Hudson manipud Siudad ti Nueva York, idi Setiembre 8, 1991. Nagturpos ti maika-91 a klase ti Watchtower Bible School of Gilead. Agarup 4,263 a kameng ti pamilia ti Bethel ken dagiti naawis a sangaili ti adda sadiay, kaduada ti sabali pay a 1,151 a nagdengngeg babaen kadagiti naikonekta a linia ti telepono idiay farms sadi Wallkill ken Patterson.
Ti presidente ti Eskuelaan ti Gilead, ni Frederick W. Franz, ngangngani 98 ti tawennan, linukatanna ti programa babaen iti makaabbukay-rikna ken naimpusuan a kararag. Ni Albert D. Schroeder, maysa a kameng ti Bagi a Manarawidwid ken dati a registrar ken instruktor ti eskuelaan, ti nagserbi kas chairman ti programa ti panagturpos. Impalagipna kadagiti managdengngeg ti Salmo 2:1, 2 ken sabsabali pay a padto a mangipakpakauna iti daytoy a panawen ti pannakagunggon ken riribuk kadagiti nasion. Daytoy a kasasaad ti pannakawarawara kinaipapananna ti pannakalukat ti adu a baro a tay-ak maipaay iti trabaho a panagani.
Ti umuna a palawag iti dayta nga aldaw ket impaay ni George M. Couch, maysa a kameng ti Komite ti Bethel. Ti temana ket “Bilangenyo dagiti Bendisionyo.” Pinalagipanna dagiti estudiante ti Gilead a saan a pulos a nasapa unay tapno rugianda daytoy nga ugali. Inkumentona a dagiti estudiante a mismo ket talaga a nabendisionanda ngem dagitoy a bendision dimtengda laeng kalpasan adu a panagbannog. Umasping unay, ni 97 ti tawenna a Jacob nakigabbo iti maysa nga anghel iti agpatnag—gapu laeng iti iyaawat iti maysa a bendision. (Genesis 32:24-32) Ginutugot ni Kabsat Couch dagiti estudiante a dida agtalinaed kadagiti negatibo a kapanunotan no di ket agbalinda a bendision kadagiti sabsabali babaen panangsukayda iti talna ti panunot baeten panagkararag ken determinasion.
Ni John E. Barr iti Bagi a Manarawidwid simmaruno a nagsao iti tema a “Maaddaan Ayat iti Nagbabaetanyo.” Dagiti pasurot ni Jesus situtulokda a matay para iti maysa ken maysa. “Mariknayo kadi daytoy a kita ti ayat nga agubbog kadagiti pusoyo?” inyimtuodna kadagiti estudiante. ‘No awan daytoy nga ayat,’ kunana, ‘awan mamaaytayo. Talaga a kasta.’ (1 Corinto 13:3) Imbinsabinsa ni Kabsat Barr dagiti sumagmamano a praktikal a pamay-an tapno maipakita ti ayat. Pinaregtana dagiti estudiante a tratuenda dagiti padada a misionero buyogen ti panagraem, a kankanayon a birukenda dagiti naintaktikaan a pamay-an iti panangisaoda kadagiti bambanag. ‘Lipatenyo dagiti babassit a di pagkikinnaawatan,’ imbalakadna kadakuada, nga insitarna ti 1 Pedro 4:8. Impabigbigna nga uray kadagiti aldaw a panagluto dagiti misionero ket gundaway a maipakitada ti ayat babaen panangmatmatda iti trabaho kas ad-adda ngem basta maiwakas laeng a trabaho. Pinalagipanna dagiti estudiante: “Ditay pulos agsardeng iti iyuutang iti ayat kadagiti kakabsattayo a lallaki ken babbai.”—Roma 13:8.
Ti “Kasanot’ Panagtalekyo?” ket isu ti makapainteres a tema a binukel ni David A. Olson iti Service Department Committee. Intampokna ti dua a paset ti panagtalek: ken Jehova ken iti organisasionna, nga iti dayta addaantayo kadagiti di mabilang a rason. (Proverbio 14:6; Jeremias 17:8); ken iti bagitayo. Addaan dagiti misionero iti rason maipaay iti maysa a rukod ti panagtalek iti bagi, kas iti naglabasandan kas ministro ken ti panagtalek nga impaay kadakuada ni Jehova ken ti organisasionna. Impakita ni apostol Pablo ti kasta a panagtalek gapu kadagiti umasping a rason. (1 Corinto 16:13; Filipos 4:13) Nupay kasta, namallaag ni Kabsat Olson, maibusor iti nalabes a panagtalek nga iyaw-awis ti lubong, kas makita iti maysa a nalatak a mannurat a naipadamag a nagkuna: “Masansan nga iyebkasko no ania ti kuna ti bagik. Inayon dayta ti rekado ti pannakipatangko.” Nupay kasta, ti panagtalek a timbengen ti kinapakumbaba ket maparayrayna ti panagtalek iti biang dagiti sabsabali. Pudno la ketdi daytoy iti kaso ni Pablo.—Filipos 1:12-14.
Ni Lyman A. Swingle iti Bagi a Manarawidwid simmaruno a ginutugotna dagiti estudiante: “Mapankayo kadagiti Tay-ak a Maani, Dakayo nga Agturpos iti Gilead!” Kunana a daytoy ket maysa nga aldaw ti panagani para iti Eskuelaan ti Gilead ken para iti sangalubongan a panagkakabsat, bayat a dagiti agturpos mapanda ket danggayanda dagiti rinibo a nagturposen nga adda pay laeng iti misionero a trabaho—dadduma manipud kadagiti umuna, maikadua, ken maikatlo a klase kadagiti 1940’s! Kinuna ni Kabsat Swingle nga idi awan makaammo a ti misionero a trabaho ket agtultuloy iti sabali pay a 50 a tawen, wenno ti Nazismo, Fascismo, ken sabsabali pay a panangtuben ti gobierno iti panangasaba a trabaho ket malaylay. “No agsiddaawtayo iti naaramidan ni Jehova iti napalabas,” insaludsodna, “ania met ngay iti masanguanan?” Isut’ nagngudo babaen ti makapabara nga awag kadagiti estudiante: “Idiay tay-ak!”
Kalpasanna dagiti dua a kangrunaan nga instruktor iti Eskuelaan ti Gilead nagpalawagda iti maika-91 a klase iti maudi a gundaway. Nagsao ni Jack D. Redford iti tema a “Gun-odenyo ti Sirib.” Ti Eskuelaan ti Gilead, kunana kadagiti estudiante, isurona ti pannakaammo ken pannakaawat, ngem masapul a gun-odenda ti sirib, ti abilidad a mangusar iti pannakaammoda iti umiso a pamay-an. Inggunamgunamna kadagiti estudiante nga ilaksidda ti panangipapan a nasursurodan amin a banag idiay Gilead. “Ti napateg isu ti no ania ti maadalyo kalpasan ti panageskuela.” Dagiti bambanag a masapul a maadalda pay ket: makilangen a mannakikappia kadagiti tattao, panangibaga iti “ladingitek” iti asawa, kapada a misionero, ken kadagiti lokal a kakabsat a lallaki ken babbai; agbalin a naannad iti panagtalek kadagiti umuna a panangipapan ken panangibilang a tunggal parikut ket kumplikado, nga agkasapulan iti napauneg a pannakaawat kadagiti sirkumstansia sakbay panangipaay iti nainsiriban a balakad; ken raemen dagiti lokal a kakabsat iti abilidadda a manglasat kadagiti narikut a kasasaad.—Proverbio 15:28; 16:23; Santiago 1:19.
Ni Ulysses V. Glass, ti registrar ti Eskuelaan ti Gilead, inaramidna ti Filipos 3:16 a tema ti palawagna. Kinumendaranna ti klase gapu iti irarang-ayda ken pinaregtana ida nga agtultuloy maitunos iti dayta a kasuratan. Nupay dagiti estudiante rebbeng nga agtultuloy a gun-odenda ti umiso a pannakaammo, kunana, saandanto a pulos nga ammo amin a banag. Inyilustrarna ti punto iti maysa a de numero a relo. Ti makinkukua mabalin nga ammona no kasanona a pagandaren dayta nupay dina ammo no kasano a talaga ti panagandarna. Umasping unay, dagiti misionero rebbeng a dida tagtagibassiten dagidiay a, nupay saan a pumada kadakuada ti kauneg ti pannakaammoda, ammoda no ania ti napateg—no kasano a pagbutngan ni Jehova. (Proverbio 1:7) Pinalagipanna ti klase iti kinapateg ti panangsalimetmet iti ‘simple a mata.’ (Mateo 6:22) Ti naespirituan a mata mabalin a madangran kas met iti pisikal a mata. Dadduma, kas pangarigan, addaan akikid a panagkita—naisentroda unay kadagiti sumagmamano a detalye tapno makitada ti sibubukel a buya—bayat a dagiti dadduma, iti kasunganina met, ket makitada laeng dagiti makinruar nga isyu ket dida mailasin dagiti kangrunaan nga isyu a kasapulanda nga asikasuen.
Ti maudi a palawag iti agsapa ket napauluan “Pannakabigbig ken Panagtrabaho a Kadua ti Organisasion ni Jehova,” nga impaay ni Theodore Jaracz iti Bagi a Manarawidwid. Inkumento ni Kabsat Jaracz a nupay rinibo dagiti organisasion ken kagimongan ditoy lubong, maymaysa laeng kadagitoy amin ti saan nga agtaud iti lubong. Kasano a mailasin dayta a maymaysa a mangirepresentar ken Jehova? Ti Sao ti Dios mangipaay kadagiti pagilasinan a marka. Ipakita ti Biblia a dagiti nailangitan a parsuana ket organisadoda unay. (Salmo 103:20, 21; Isaias 40:26) Ti naindagaan nga organisasion ni Jehova ket mailasin met babaen iti kinaurnosna kasta met babaen iti pannakaisinana manipud iti lubong, ti nainget nga ikakapetna kadagiti prinsipio ti Biblia, ti nangato a tukad ti moral a kinadalusna, ken ti ayat kadagiti miembrona. Pinarayray ni Kabsat Jaracz dagiti estudiante a tulonganda ti aginggat’ kaadu a mabalinanda kadagiti pakaitudinganda tapno Nainkasuratan a mailasinda ti organisasion ni Jehova. Mainaig iti dayta, isut’ nangaramid iti makaparagsak a pakaammo: Ti Eskuelaan ti Gilead ket din agbayag maminduanton ti kadakkelna, iti agarup 50 nga estudiante inton maika-93 a klase! Kasta met, dagiti klase ti Gilead Extension School idiay Alemania ket agarup maigiddanto ti panangrugina. Napaut ken napigsa ti panagpalakpak!
Kas tampok ti agsapa, inawat amin dagiti 24 nga estudiante ti Gilead dagiti diplomada. Din agbayag agturongdan kadagiti 12 a nagduduma a pagilian iti intero a lubong. Ti klase insangona ti naimpusuan a resolusion, a nagyamanda iti Bagi a Manarawidwid ken iti pamilia ti Bethel. Kalpasan ti pangngaldaw, ni Kabsat Charles J. Rice iti Watchtower Farms Committee indauluanna ti napaababa a Panagadal ti Pagwanawanan. Kalpasanna nangaramid dagiti nagturpos iti nabiag a programa, nga impabuyada dagiti dadduma a kapadasanda idiay tay-ak ti serbisio kabayatan ti lima a bulan a kursoda idiay Wallkill, Nueva York. Kalpasan dayta, dagiti agibumbunannag a mangibagbagi kadagiti sumagmamano a lokal a kongregasion imparangda ti drama a napauluan Dagiti Agtutubo a Manglaglagip iti Namarsuada Itan.
Tapno serraan ti programa, ni Kabsat George Gangas, maysa a 95 ti tawenna a kameng ti Bagi a Manarawidwid, nangidatag iti nabnabiag a kararag ken Jehova. Pimmanaw dagiti nagdengngeg buyogen ragsak, nga awan duadua tunggal maysa ket natignay tapno maaddaan dakdakkel pay a paset iti sangalubongan a trabaho a panagani.
[Kahon iti panid 22]
Estadistika ti Klase
Bilang dagiti pagilian a naibagi: 6
Bilang dagiti pagilian a nakaitudingan: 12
Bilang dagiti estudiante: 24
Bilang dagiti agassawa: 12
Promedio nga edad: 33.4
Promedio a tawen iti kinapudno: 16.13
Promedio a tawen iti amin-tiempo a ministerio:11.3
[Ladawan iti panid 23]
Ti Maika-91 a Nagturpos a Klase ti Watchtower Bible School of Gilead
Iti listaan ditoy baba, dagiti intar nanumeruanda manipud sango nga agpalikud ken dagiti nagan nailistada manipud kannigid nga agpakannawan iti kada intar.
(1) McDowell, A.; Youngquist, L.; Skokan, B.; Wargnier, N.; Miller, Y.; Muñoz, M. (2) Bales, M.; Perez, D.; Attick, E.; Vainikainen, A.; Mostberg, K. (3) DePriest, D.; DePriest, T.; Perez, R.; Wargnier, J.; Muñoz, J.; Miller, J. (4) McDowell, S.; Bales, D.; Skokan, M.; Attick, C.; Youngquist, W.; Vainikainen, J.; Mostberg, S.