Panagsanay Idiay Gilead iti Nasantuan Unay a Pammati
“NASANAY a naimbag dagiti estudiantetayo iti nasantuan unay a pammati.” Dagitoy ti panglukat a sasao iti programa ti panagturpos ti maika-95 a klase ti Watchtower Bible School of Gilead, a naangay idi Domingo, Setiembre 12, 1993. Iti dayta nga agsapa, indauluan ni George Gangas ti 4,614 a naawis a sangaili ken kameng ti pamilia ti Bethel a nagtitipon idiay Jersey City Assembly Hall iti panglukat a kararag. Innem a pulo ket lima a tawenen a kameng ti pamilia ti Bethel ni Kabsat Gangas. Agtawen itan iti 97 ket isu ti kalakayan a kameng ti Bagi a Manarawidwid.
Ni Albert Schroeder, kameng met ti Bagi a Manarawidwid ken tsirman ti programa, kunana: “Iti uneg ti lima a bulan, naibatay ti kurso iti Gilead iti nasantuan unay a pammati.” Ngem ania kadi ti “nasantuan unay a pammati”? Inlawlawagna a daytoy “nasantuan unay a pammati,” a nadakamat idiay Judas 20, isu ti pakabuklan ti kinapudno iti Biblia. Isu a ti kurso iti Gilead ket naibatay iti Sao ni Jehova, ti Biblia, ti kangrunaan a libro a nausar.
Umawat Dagiti Estudiante iti Kanayonan a Pannursuro
Ni John Stuefloten, kameng ti Watchtower Farms Committee, ti immuna a nagsarita. Sinalaysayna ti tema a “Pannakagunggona iti Impluensia Dagiti Masirib.” Kuna ti Biblia a dagiti ‘makikuyog kadagiti masirib a tattao agbalindanto met a masirib.” (Proverbio 13:20) Bayat ti panagsanayda idiay Gilead, nasurok a 900 nga oras ti binusbos dagiti estudiante a nangusig iti Biblia. Sinaludsod ni Kabsat Stuefloten kadagiti estudiante: “Kasanonakay nga apektaran ti impluensia ni Jehova iti masanguanan? Maibaonkayo iti 18 a pagilian nga addaan iti ragup a populasion nga agarup 170 milion a tao. Isu a kasanoyo nga impluensiaan dagidiay a tattao?” Babaen ti panangiyanninaw iti sirib ni Jehova, matulongan dagiti kabbaro a misionero dagiti sabsabali nga agdayaw ken ni Jehova, ti Gubuayan ti awan patinggana a sirib.
“Panagbalin nga Isuamin Kadagiti Amin a Tattao” ti tema ti simmaruno a palawag, a binukel ni Lloyd Barry a kameng ti Bagi a Manarawidwid. (1 Corinto 9:22, King James Version) Agarup 45 a tawenen ti napalabas, ni Kabsat Barry a mismo ket maysa kadagiti estudiante iti maika-11 a klase ti Gilead. Ita siyayaman ti maika-95 a klase nga immawat iti praktikal a balakad ti sigud a misionero a nagserbi iti ganggannaet a daga iti adu a tawen. Pinaregtana dagiti estudiante a makibagay a dagus kadagiti tao iti baro a ganggannaet a teritoriada babaen ti panangsursuro iti kultura ken pagsasaoda. Kunana a ti kasayaatan a panangaramid iti daytoy ket babaen ti pannakipulapol ken pannakipagtrabaho kadagiti umili kasta met babaen ti panangsursuro ken panangsurot kadagiti kaugalianda no la ketdi tumutop.
Kalpasanna, sinalaysay ni Dean Songer, kameng ti Factory Committee, ti makapainteres a tema a “Pannakawayawaya iti Rebbengen.” Kalpasan ti nasurok a 35 a tawen a panagserbina iti amin a tiempo, maawatan ni Kabsat Songer ti kaipapanan ti panangsurot iti simple, addaan kalat a panagbiag, a naipamaysa iti panangtungpal iti teokratiko nga aramid, a nawaya kadagiti material a pakaringgoran. Ket isu dayta ti kababagas ti balakadna kadagiti estudiante. Dagiti kumakanta iti templo ni Jehova nawayawayaanda kadagiti rebbengen a kadawyan kadagiti dadduma a Levita tapno maipamaysada a tungpalen ti naisangsangayan nga akemda. (1 Cronicas 9:33) Kasta met, nawayawayaanen dagiti misionero ti Gilead kadagiti gagangay a banag kas iti sekular a trabaho tapno maipamaysada ti naisangsangayan a serbisioda. Iti paggibusan ti palawagna, namalakad ni Kabsat Songer: “Salimetmetanyo ti panagbiagyo a simple ken naipamaysa iti kalat. Kas nawayawayaanen iti pagrebbengan, rebbengyo ti agserbi iti aldaw ken rabii, a mangidaydayaw ken ni Jehova.”
Ni Daniel Sydlik, kameng ti Bagi a Manarawidwid, ti simmaruno a nagsarita iti tema a “Panangisuro Kadagiti Dadduma No Kasano a Maragpat ti Kasayaatan iti Biag.” Pinaregtana dagiti estudiante a “saan laeng a doktrina ti isuroda kadagiti tao no di pay ket situtured nga ipakitada ti rumbeng nga aramidenda tapno maitunosda ti biagda iti pagayatan ti Dios.” Dagiti naimbag a mannursuro rumbeng a mangparegta ken manggutugotda. “Madadaankay koma a tumulong kadagiti tattao a mangpatanor kadagiti Nakristianuan a galad imbes a dagiti laeng paglintegan ken pagalagadan ti isuroyo,” kinunana, sana ingngudo: “Kangrunaan iti amin, patpatgek a kakabsat, isuroyo ti bagiyo ken isuroyo kadagiti dadduma no kasano ti agayat, ta isu dayta ti naan-anay a singgalut ti panagkaykaysa.”—1 Corinto 13:1-3; Colosas 3:14.
Kalpasan ti sumagmamano a bulan a panagsanayda, nagbalin a kaay-ayo unay dagiti estudiante ti dua nga instruktorda iti Gilead. Ni Jack Redford, sigud a misionero a mismo, ti immuna a nagsarita iti tema nga “Umiso ti Piniliyo.” Iti nagkauna a lubong dagiti Judio, sakbay a nagbalin a Kristiano nga apostol, natan-ok, mararaem, nabileg, ken adda mabalin ni Pablo. Ngem idiay Filipos 3:8, imbilang ni Pablo amin dagitoy kas “nagabsuon a rugit,” wenno “basura,” sigun iti Phillips a patarus. Naipamaysa ti pusona iti ministeriona, ket umiso ti pinilina. Iti kasupadina, babaen dagiti pilida iti biag, ipakpakita ti kaaduan a tao ita nga ibilangda dagiti material a sanikuada a napatpateg ngem ti biag nga agnanayon. Umiso ti pinili dagiti misionero ti Gilead. Kas paggibusan, kuna ni Jack Redford: “Awan a pulos ti maidiaya ti lubong ti Diablo kadakayo a maipadis iti panagserbi kas misionero. Saluadanyo dayta nagpateg a pribilehio, ket bay-anyo ti lubong a mangsaluad iti basurana!”
Adda 32 a tawenen nga instruktor ti Gilead ni Ulysses Glass. Binagbagaanna dagiti estudiante babaen ti tema a “Ti Laeng Dios ti Makaaramid iti Kayo,” nga imbatayna ti palawagna iti Salmo 1:3. Ti moderno a teknolohia saan a pulos a makabukel iti kayo, a dinisenio ti Dios. No an-anagen, mayarig dagiti pudno a Kristiano kadagiti pinuon ti kayo, nga immula ken sibsibugan ni Jehova. Kuna ni Kabsat Glass nga iti uneg ti lima a bulan, “kanayon a masibsibugan [dagiti estudiante] iti ubbog ti danum ti biag iti Sao ti Dios,” kas kaykayo iti naespirituan a kakaykayuan wenno paraiso. Nupay kasta, kas misionero, masapul a saluadanda ti “naespirituan a ramutda tapno saan a madadael.” Imbalakadna nga ‘itultuloy[da] ti uminum iti danum ti biag nga aggapu ken Jehova agsipud ta ti laeng Dios ti makaaramid iti kayo.’
Ni Carey Barber, kameng ti Bagi a Manarawidwid, ti nangipaay iti maudi a palawag. Kalpasan ti 70 a tawen a panagserbina iti amin a tiempo, sitatalek a makapagpalawag ni Kabsat Barber iti tema nga “Ipaayyo ken Jehova ti Naipamaysa a Debosion.” Saan nga ipapaay ti kaaduan a tao ti naipamaysa a debosion ken Jehova. (Deuteronomio 5:9) Nupay kasta, impakita ni Kabsat Barber nga uray pay imperpektotayo, “mabalintay ti agserbi a naan-anay iti Dios.” Innayonna: “Awan ti pudpudno a makaibaga iti: ‘Sinulisognak ngamin ti Diablo a mangaramid iti dayta.’” Ngem kabaelannatay a parmeken ti Diablo no ditay sarangten. (Santiago 4:7) Ti panagtalinaed a naagawa iti aramid ni Jehova ti kasayaatan a pamay-an tapno masarangettayo ni Satanas ken ti lubongna ken maipaaytayo ti naipamaysa a debosion ken Jehova.
Nadutokan kas Misionero
Naggibus ti programa iti agsapa iti opisial a pannakadutok dagiti 46 nga estudiante kas misionero. Inawat ti 23 a pagassawaan dagiti diplomada nga iti pasetna, kunaenna a dagiti nagturpos “maikarida la unay a mangisuro, mangitandudo iti kinaimbag ken agtrabaho a maipaay iti manayon a talna ken iti linteg ti naan-anay nga urnos ken kinalinteg kadagiti amin a tao.” Awan duadua nga ipasnek ti maika-95 a klase ti Gilead a tungpalen daytoy natan-ok a mision iti 18 a pagilian a nakaitudinganda. Naikeddeng a maibaonda iti nadumaduma a paset ti lubong, a pakairaman dagiti pagilian iti Asia, Africa, Europa, Latin America, ken ti Carribbean.
Iti kamalmanna, kalpasan ti napaababa a Panagadal iti Pagwanawanan nga indaulo ni Charles Woody, kameng ti Service Department Committee, imparang dagiti kabbaro a nagturpos iti Gilead ti programada a natemaan iti “Insagananakami ti Gilead a Mangisuro kas Misionero.” Naggibus ti sesion iti drama a “Dagiti Pagpilian a Naipasango Kadatayo.”
Kalpasan daytoy makaparegta a programa, nakasaganan dagiti kabbaro a misionero a maibaon iti uppat a suli ti daga a mangiranud kadagiti sabsabali iti “nasantuan unay a pammati.”
[Kahon iti panid 26]
Estadistika ti Klase
Bilang dagiti pagilian a nairepresentar: 7
Bilang dagiti pagilian a nakaitudingan: 18
Bilang dagiti estudiante: 46
Bilang dagiti agassawa: 23
Promedio nga edad: 30.06
Promedio a tawen iti kinapudno: 12.92
Promedio a tawen iti amin-tiempo a ministerio: 9.4
[Ladawan iti panid 26]
Ti Maika-95 a Nagturpos a Klase ti Watchtower Bible School of Gilead
Iti listaan ditoy baba, dagiti intar nanumeruanda manipud sango nga agpalikud, ket dagiti nagan nailistada manipud kannigid nga agpakannawan iti kada intar.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.