Laglagipen ti Aldaw ni Jehova

“Asidegen ti aldaw ni Jehova idiay lubong ti pangukoman.”​—JOEL 3:14.

1. Apay a ti um-umay a nasantuan a gubat nga impakaammo ni Jehova ket naidumanto manipud kadagiti “nasantuan” a gubat ti sangatauan?

“IWARAGAWAGYO daytoy, dakayo a tattao, kadagiti nasnasion, ‘Santipikarenyo ti gubat!’” (Joel 3:9) Kaipapanan kadi daytoy ti nasantuan a gubat? Iti itataliaw kadagiti Krusada, dagiti narelihiusuan a gubat, ken ti dua a sangalubongan a gubat​—a naaddaan ti Kakristianuan iti kangrunaan nga akem​—mabalin nga agkintayegtayo iti panangpanunot laeng iti maysa a “nasantuan” a gubat. Nupay kasta, ti nasantuan a gubat iti padto ni Joel ket saan a gubat dagiti nasnasion. Daytat’ saan a napnuan-gura a dangadang maipaay iti teritoria wenno sanikua, a maaramat ti relihion kas pambar. Dayta ket nalinteg a gubat. Daytat’ gubat ti Dios tapno imurianna ti daga manipud kinaagum, riribuk, kinarugit, ken panangparigat. Alangonento dayta ti nainkalintegan a kinasoberano ni Jehova iti intero a masakopan ti panamarsuana. Dayta a gubat dalusannanto ti dalan maipaay iti Pagarian ni Kristo tapno kibinenna ti sangatauan agturong iti Milenio ti unibersal a talna, rang-ay, ken kinaragsak nga impakpakauna dagiti mammadto ti Dios.​—Salmo 37:9-11; Isaias 65:17, 18; Apocalipsis 20:6.

2, 3. (a) Ania “ti aldaw ni Jehova” a naipadto idiay Joel 3:14? (b) Apay a dagiti nasion maikaridanto iti pakaipasanguanda kabayatan dayta nga aldaw?

² Ania, ngarud, ti “aldaw ni Jehova” a naipakpakauna idiay Joel 3:14? “Ay ilala pay ti aldaw,” iriaw a mismo ni Jehova, “agsipud ta asidegen ti aldaw ni Jehova, ket umayto kas pannakadadael nga aggapu iti Mannakabalin-amin!” Kasano a maysa dayta a pannakadadael? Idi agangay inlawlawag ti mammadto: “Umariwekwek, umariwekwek a tattao idiay lubong a pangukoman, ta asidegen ti aldaw ni Jehova idiay lubong ti pangukoman.” (Joel 1:15; 3:14) Isu daytoy ti aldaw a ni Jehova iwayatna ti panangukomna kadagiti awanan-dios a bunggoy ti sangatauan a mangilaksid iti nainkalintegan a kinasoberanona iti langit ken daga. Pangngeddeng ni Jehova a dadaelenna ti sataniko a sistema ti bambanag a nakabaybayag a nangputipot iti sangatauan kadagiti gamatna.​—Jeremias 17:5-7; 25:31-33.

³ Ti narugit a sistema ditoy daga ket masapul a sumango iti dayta a panangukom. Ngem talaga kadi a kasta kadakes ti sistema ti lubong? Ti maysa nga ikikita iti rekordna ket umdasen! Imbaga ni Jesus ti prinsipio idiay Mateo 7:16: “Babaen kadagiti bungada mabigbigyonto ida.” Saan kadi a nagbalin dagiti dadakkel a siudad ti lubong a deposito dagiti droga, krimen, panagbuteng, imoralidad, ken polusion? Kadagiti adu a daga dagiti kabbaro a wayawaya ket laplapdan pay laeng ti napolitikaan a pannakariro, kinakirang ti taraon, ken kinapanglaw. Nasurok a maysa a bilion a tattao ti agbibiag babaen kadagiti rasion para kadagiti agbisbisin. Ad-adda pay, ti epidemia ti AIDS, a pinakaro dagiti droga ken imoral nga estilo ti panagbiag, ti mangikabil iti nasipnget nga ulep iti dakkel a paset ti daga. Nangnangruna nanipud bimtak ti Gubat Sangalubongan I idi 1914, addan panagpababa iti sangalubongan a rukod ti tunggal aspeto ti biag.​—Idiligyo ti 2 Timoteo 3:1-5.

4. Ania a karit ti ipurruak ni Jehova kadagiti nasnasion?

⁴ Nupay kasta, ur-urnongenen ni Jehova manipud amin a nasion ti maysa nga ili a siraragsak a mangawat kadagiti pannursuro maipapan kadagiti dalanna ken magna kadagiti danana. Daytoy mangbukel iti intero a lubong nga ili pinandaydan dagiti kampilanda a pinagbalin a dingding ti arado, nga inwaksidan dagiti naranggas nga awid ti lubong. (Isaias 2:2-4) Wen, kamkampilan a nagbalin a dingding ti arado! Ngem saan kadi nga isu daytoy ti kasungani ti pukkaw nga inwaragawag ni Jehova idiay Joel 3:9, 10? Sadiay mabasatayo: “Iwaragawagyo daytoy, dakayo a tattao, kadagiti nasnasion, ‘Santipikarenyo ti gubat! Pitpitenyo dagiti dingding ti aradoyo a pagbalinen a kampilan ken dagiti kumkumpayyo a pagputed a pagbalinen a gaygayang.’” Ay, ditoy karkariten ni Jehova dagiti agtuturay ti lubong a mangiyeg iti nagtitipon a bileg ti armadada maibusor kenkuana idiay Armagedon. Ngem dida makapagballigi! Maipababadanto la ketdi iti naan-anay a pannakaabak.​—Apocalipsis 16:16.

5. Aniantot’ resultana inton maapiten “ti ubas ti daga”?

⁵ Iti panangsupringda ken Soberano nga Apo Jehova, dagiti mannakabalin nga agtuturay namangonda kadagiti pempen dagiti nakabutbuteng nga igam​—ngem barengbareng dayta! Ibilin ni Jehova idiay Joel 3:13: “Ikabilyo ti kumpay, ta ti apiten natangkenanen. Umaykayo, sumalogkayo, ta ti pagpespesan ti arak napnon. Dagiti tangke agliplippiasda; ta aglaplapusananen ti kinadakesda.” Dagidiay a sasao katupagda ti Apocalipsis 14:18-20, a sadiay ti maysa nga anghel nga addaan natadem a kumpay ket nabilin a “mangurnong kadagiti rinaay dagiti ubas ti daga, ta dagiti ubasna naluomdan.” Inggedged ti anghel ti kumpayna ket impisukna dagidiay sumupsupring a nasion “idiay dakkel a pagpespesan ti pungtot ti Dios.” Iti piguratibo, timbug ti dara manipud pagpespesan a nagtenganna dagiti preno dagiti kabayo, iti kaatiddug ti 1,600 nga estadio​—agarup 300 a kilometro! Anian a nakabutbuteng a namnama para kadagiti nasion a di mangdayaw ken Jehova!

Managtungpal-Linteg nga Umili

6. Kasanot’ panangmatmat dagiti Saksi ni Jehova kadagiti nasion ken dagiti agtuturayda?

⁶ Kaipapanan kadi daytoy a dagiti Saksi ni Jehova ket dida raraemen dagiti nasion ken dagiti agturayda? Adayo iti dayta! Pagladingitanda laeng ti kinarugit a silalatak a makita ti amin, ken ipakdaarda ti napartak iyaadanina nga aldaw ni Jehova maipaay iti panangiwayatna iti pangngeddengna. Maigiddato, sipapakumbaba nga agtulnogda iti bilin ni apostol Pablo idiay Roma 13:1: “Paiturayan koma ti amin a tao kadagiti nangatngato nga agtuturay.” Kadagitoy a natauan nga agtuturay, itedda ti maitutop a pammadayaw ngem saan a panagdayaw. Kas managtungpal-linteg nga umili, surotenda dagiti pagalagadan ti Biblia maipapan iti kinasingpet, kinapudno, ken kinadalus ken ibangonda dagiti nasayaat a moral a kababalin kadagiti bukodda a pamilia. Tulonganda dagiti sabsabali a makaadal no kasanoda met a maaramidan daytoy. Sitatalna a makipagnaedda iti amin a tao, a dida makinamnamin kadagiti panagprotesta wenno napolitikaan nga iyaalsa. Pagregreggetan dagiti Saksi ni Jehova ti agbalin a mapagulidanan iti panagtulnog iti linlinteg dagiti nangatngato nga agtuturay, bayat nga agpannurayda iti Kangatuan nga Agturay, ti Soberano nga Apo Jehova, nga isublina ti perpekto a talna ken nalinteg a gobierno iti daytoy a daga.

Panangiwayat iti Pangngeddengna

7, 8. (a) Iti ania a pamay-an nga agkintayegto dagiti nasnasion ken bumabanto ti kinasipnget kadakuada? (b) Asinoda ti iladawan ni Joel ita, ken maigiddiat iti lubong nga en heneral, kasano a nabendisionan dagitoy?

⁷ Iti nabagas a piguratibo a pagsasao, ited pay ni Jehova daytoy nga ad-adda a panangiladawan iti pannakaiwayat ti pangngeddengna: “Ti init ken ti bulan agkudrepda, ket dagiti bitbituen ipaidamda ti silnagda. Ket manipud iti Sion agungurto ni Jehova, ket manipud Jerusalem iyebkasnanto ti timekna. Ket ti langit ken ti daga agkintayegdanto; ngem ni Jehova isu ti pagkamanganto ti ilina, ken sarikedked kadagiti annak ti Israel.” (Joel 3:15, 16) Ti kasla narimat, narang-ay a kasasaad ti sangatauan agbalinto a nalidem, mangipartaan ti peggad, ket daytoy nga agsisina a sistema ti lubong ti maikisapto, a kasla rinugpo ti maysa a dakkel a ginggined!​—Haggeo 2:20-22.

⁸ Paliiwenyo ti naragsak a pammasiguro a ni Jehova ket agbalin a pagkamangan ken salindeg maipaay iti ilina! Apay a kasta? Agsipud ta isuda ti maymaysa nga ili​—maysa nga internasional nga ili​—a nangipangag kadagiti sasao ni Jehova: “Dakayo a tattao mabigbigyonto a siak ni Jehova a Diosyo.” (Joel 3:17) Yantangay ti nagan ni Joel kaipapananna ti “Ni Jehova ket Dios,” maitutop unay nga iladawanna dagiti napulotan a Saksi ni Jehova kadagiti moderno a panawen, a situtured nga agserbi iti panangipakaammo iti kinasoberano ni Jehova. (Idiligyo ti Malakias 1:11.) Iti isusubli kadagiti panglukat a sasao ti padto ni Joel, masarakantayo no kasano a sibabagas nga ipakpakaunana ti aramid ti ili ti Dios ita.

Maysa a Bunggoy dagiti Dudon

9, 10. (a) Ania a saplit ti impakpakauna ni Joel? (b) Kasano nga ikallangogan ti Apocalipsis ti padto ni Joel maipapan iti saplit, ken aniat’ epekto daytoy a saplit iti Kakristianuan?

⁹ Imdenganyo itan “ti sao ni Jehova a dimteng ken Joel”: “Denggenyo daytoy, dakayo a lallakay, ket ipangagyo, dakayo amin nga agnaed iti daga. Adda aya daytoy kadagiti aldawyo, wenno uray kadagiti aldaw dagiti ammayo? Maipapan iti daytoy saritaenyo kadagiti annakyo, ket dagiti annakyo sawendanto met koma kadagiti annakda, ket dagiti annakda iti sabali a kaputotan. Iti natidda ti lukton kinnan ti dudon; ket ti tidda ti dudon kinnan ti lukton; ket ti nabati ti lukton, kinnan ti arabas ket ti tidda ti arabas kinnan ti dangaw.”​—Joel 1:1-4.

¹⁰ Daytoy ket naidaddaduma a kampania, daydiay malaglagipto iti amin a panawen. Agsasagadsad a bunggoy dagiti insekto, kaaduan kadakuada dagiti dudon, ti mangrebba iti daga. Aniat’ kaipapanan daytoy? Agsao met ti Apocalipsis 9:1-12 maipapan iti saplit dagiti dudon, nga inyeg ni Jehova iti sidong ti “maysa nga ari, ti anghel ti abut a mangliwengliweng,” nga awan sabali no di ni Kristo Jesus. Dagiti naganna nga Abaddon (Hebreo) ken Apollyon (Griego) kaipapananda ti “Pannakadadael” ken “Manangdadael.” Dagiti dudon iladawanda dagiti napulotan a natda a Kristiano nga, itan iti aldaw ti Apo, mapanda tapno rebbaenda dagiti pagpaaraban ti Kakristianuan babaen naan-anay a panangibutaktakda iti ulbod a relihion ken panangiwaragawagda iti panangibales ni Jehova iti dayta.

11. Kasano a nabadangan dagiti moderno-aldaw a dudon, ken siasino a nangnangruna dagiti puntiria ti irarautda?

¹¹ Kas impabigbig ti Apocalipsis 9:13-21, ti saplit dagiti dudon ket sinaruno ti dakkel a saplit dagiti nakakabayo. Anian ti kinapudno daytoy ita, bayat a ti sumagmamano a ribo dagiti nabatbati a napulotan a Kristiano ket binadangan ti nasurok nga uppat a milion a “sabsabali a karnero” ket agkakaduada a mangbukel iti di magawidan a nakakabayo! (Juan 10:16) Agkaykaysada iti panangiwaragawag kadagiti makasilud a panangukom ni Jehova kadagiti idolatroso ti Kakristianuan ken kadagidiay a ‘di agbabawi kadagiti panangpapatayda wenno kadagiti espiritistiko nga aramidda wenno iti pannakiabigda wenno kadagiti panagtakawda.’ Dagiti klero​—agpada ti Katoliko ken Protestante​—a siaaktibo a nangsuportar kadagiti aduan pammapatay a gubat daytoy a siglo, kasta met kadagiti manangrames-ubbing a papadi ken dagiti tiritir nga ebanghelisador ti TV, ket nairamanda kadagidiay nakaiturongan dagitoy a mensahe ti panangukom.

12. Apay a dagiti pangulo ti Kakristianuan maikarida nga umawat kadagiti mensahe ti panangukom, ket aniat’ mabiiten a mapasamak kadakuada, kasta met kadagiti amin a kameng ti Babilonia a Dakkel?

¹² Kadagita a narugit a “lallaki” iti sotana, umaweng ti panangummong ni Jehova: “Agriingkayo, dakayo a managbartek, ken agsangitkayo; ket agdung-awkayo, dakayo amin nga agiinum ti arak, maipuon iti nasam-it nga arak, ta isu naisina iti ngiwatyo.” (Joel 1:5) Iti daytoy maika-20 a siglo, ti relihion ti Kakristianuan sinukatannan iti panangipabus-oy ti lubong ti nadalus a moral a pagalagadan ti Sao ti Dios. Kasla nasam-it ti mangipauneg kadagiti wagas ti lubong para iti ulbod a relihion ken kadagiti mannakimisana, ngem anian nga ani ti naespirituan ken pisikal a sakit ti inapitda! Din agbayag, kas nadeskribir idiay Apocalipsis 17:16, 17, “sikapto” ti Dios ti panangbales dagiti napolitikaan a pannakabalin iti intero a sangalubongan nga imperio ti ulbod a relihion, ti Babilonia a Dakkel, ket pagwalangwalangendanto. Iti daytanto laeng, bayat a makitana ti pannakaiwayat ti pangngeddeng ni Jehova maibusor kenkuana, a “mamunawan” manipud pannakabartekna.

“Maysa a Dakkel ken Nabileg nga Ili”

13. Iti ania a pamay-an a ti bunggoy dagiti dudon kaslada “dakkel ken nabileg” iti Kakristianuan?

¹³ Itultuloy ti mammadto ni Jehova nga iladawan ti bunggoy dagiti dudon kas “maysa a dakkel ken nabileg nga ili,” ket kasta met ti panagkita ti Babilonia a Dakkel. (Joel 2:2) Dagiti klerona, kas pangarigan, dung-awanda ti kinapudno a dagiti relihion ti Kakristianuan ket napaayda a mangkumberte kadagiti Budhista idiay Japan. Kaskasdi, ita, nasurok a 160,000 a Saksi ni Jehova a Hapones ti dumapdappat iti dayta a pagilian ket mangidadauloda kadagiti personal a panangiyadal iti Biblia iti nasurok a 200,000 a pagtaengan dagiti tattao. Idiay Italia dagiti 180,000 a Saksi ni Jehova ket mabigbigbigda itan kas maikadua iti bilang kadagiti Katoliko. Barengbareng ti panangdung-aw ti monsinior ti Romano Katoliko idiay Italia iti kinapudno a dagiti Saksi ni Jehova ket al-alaenda manipud iti simbaan ‘ti di kumurang ngem 10,000 a matalek a Katoliko’ iti tinawen.a Dagiti Saksi maragsakanda a mangabrasa kadagiti kakasta a tattao.​—Isaias 60:8, 22.

14, 15. Kasanot’ panangiladawan ni Joel iti bunggoy dagiti dudon, ken iti ania a pamay-an a naitungpalen daytoy ita?

¹⁴ Iti panangiladawanna iti bunggoy dagiti dudon dagiti napulotan a Saksi, kuna ti Joel 2:7-9: “Agtarayda kas maingel a tattao. Kumalay-atda iti bakud a kasla tattao ti gubat. Ket isuda magnada tunggal maysa iti dalanna, ket saanda a dadaelen dagiti intarda. Ket awan met ti agdudungpar kadakuada. Magnada tunggal maysa iti danana; ket rimmubsida kadagiti ig-igam dagiti kabusor, ket saan a madadael ti turongda. Lumagtoda iti ili. Agtarayda iti rabaw ti bakud. Agkalay-atda kadagiti balbalay. Sumrekda kadagiti tawtawa a kasla mannanakaw.”

¹⁵ Maysa la ketdi, a nabagas a panangiladawan, kadagiti buyot dagiti napulotan a “dudon,” a dinanggayan itan ti nasurok nga uppat a milion a kakaduada, dagiti sabsabali a karnero! Awan “bakud” ti narelihiusuan a panagbibinnusor ti makaatipa kadagitoy. Situtured, “agtultuloyda a magna a siuurnos iti daytoy met laeng a dalan” ti publiko a panangasaba ken sabsabali pay a Nakristianuan nga aramid. (Idiligyo ti Filipos 3:16.) Imbes nga agkumpromisoda, sitatallugoddan a mangsango iti ipapatay, kas inaramid dagiti rinibo a Saksi a ‘natnag kadagiti gayang’ gapu ta nagkedkedda a mangidayaw ken Katoliko a Hitler ti Nazi nga Aleman. Ti bunggoy dagiti dudon nakaiteden iti naan-anay a panangsaksi “idiay siudad” ti Kakristianuan, a kinalay-atda amin a lapped, simrekda, kaiyariganna, kas maysa a mannanakaw kadagiti balay bayat a nagiwarasdan kadagiti binilion a publikasion ti Biblia baeten iti panagbalaybalay a trabahoda. Pagayatan ni Jehova a maited daytoy a pammaneknek, ket awan pannakabalin idiay langit wenno ditoy daga ti makapasardeng iti dayta.​—Isaias 55:11.

“Napno iti Nasantuan nga Espiritu”

16, 17. (a) Kaano a naaddaan naipangpangruna a kaitungpalan dagiti sasao ti Joel 2:28, 29? (b) Aniada a naimpadtuan a sasao ni Joel ti saan a naan-anay a naitungpal idi umuna a siglo?

¹⁶ Kuna ni Jehova kadagiti Saksina: “Dakayo a tattao mabigbigyonto a siak addaak iti nagtengngaan ti [naespirituan] nga Israel, ken siak ni Jehova a Diosyo nga awan sabalin.” (Joel 2:27) Ti ilina dimteng iti daytoy napateg a panangbigbig idi a rinugian ni Jehova nga itungpal dagiti sasaona idiay Joel 2:28, 29: “Maaramidto nga ibukbukkonto ti espirituk iti isuamin a lasag, ken dagiti annakyo a lallaki ken babbai agipadtodanto.” Napasamak daytoy idi Pentecostes 33 K.P., idi a dagiti naguummong nga adalan ni Jesus ket napulotanda “ket napnoda amin iti nasantuan nga espiritu.” Iti bileg ti nasantuan nga espiritu, nangasabada, ket iti maysa nga aldaw, “agarup tallo ribo a kararua ti nainayon.”​—Aramid 2:4, 16, 17, 41.

¹⁷ Iti dayta naragsak nga okasion, inadaw met ni Pedro ti Joel 2:30-32: “Ket iparangkonto dagiti pagsidsiddaawan kadagiti langit ken iti daga, dara, ken apuy ken monmonmon nga asuk. Ti init met laeng agbalinto a sipnget, ket ti bulan agbalin a dara, sakbay ti iyaay ti dakkel ken nakabutbuteng nga aldaw ni Jehova. Ket maaramidto nga asinoman nga umawagto iti nagan ni Jehova maisalakanto.” Dagidiay a sasao ket naaddaan bassit a kaitungpalan idi a nadadael ti Jerusalem idi 70 K.P.

18. Kaano a nangrugi a napasamak ti dakdakkel a kaitungpalan ti Joel 2:28, 29?

¹⁸ Addanto, nupay kasta, ad-adda a pannakaipakat ti Joel 2:28-32. Pudno, daytoy a padto naaddaanen karkarna a kaitungpalan sipud Setiembre 1919. Iti dayta a tiempo maysa a malaglagip a kumbension ti ili ni Jehova ti naangay idiay Cedar Point, Ohio, E.U.A. Nalawag a naiparangarang ti espiritu ni Jehova, ken napabara dagiti napulotan nga adipenna a mangiyussuat iti kampania a sangalubongan a panangsaksi a dumanon iti agdama a kaaldawantayo. Anian nga engrande a panagsaknap ti nagresulta! Ti nasurok a 7,000 a timmabuno iti kumbension idiay Cedar Point ti dimmakkelen iti dagup a 10,650,158 a timmabuno iti Pananglaglagip iti ipapatay ni Jesus idi Marso 30, 1991. Kadagitoy, 8,850 laeng ti nangipakita a napulotanda a Kristiano. Anian a nagdakkel ti rag-o amin dagitoy iti pannakakitada iti sangalubongan a bunga nga inyeg ti agtaginayon nga espiritu ni Jehova!​—Isaias 40:29, 31.

19. Maigapu iti kinaasidegen ti aldaw ni Jehova, aniat’ rebbeng a kababalin ti tunggal maysa kadatayo?

¹⁹ Iti masungad isu “ti iyaay ti dakkel ken nakabutbuteng nga aldaw ni Jehova” a mangrebba iti sistema ti bambanag ni Satanas. (Joel 2:31) Makaparagsak, “siasinoman nga umawag iti nagan ni Jehova maisalakanto.” (Aramid 2:21) Kasano a kasta? Kuna kadatayo ni apostol Pedro a “ti aldaw ni Jehova umayto a kasla mannanakaw” ken inayonna: “Idinto ta amin dagitoy a banag marunawdanto iti kastoy, ania a kita dagiti tattao ti pagbalinanyo koma iti amin a kita ti nasantuan a kababalin ken ar-aramid ti nadiosan a debosion, nga ur-urayenyo ken laglagipenyo ti iyaay ti aldaw ni Jehova.” Ti pananglaglagip nga asidegen ti aldaw ni Jehova, agrag-otayo met a makakita iti kaitungpalan ti kari ni Jehova a nalinteg a “baro a langlangit ken maysa a baro a daga.”​—2 Pedro 3:10-13.

[Footnote]

Mailawlawagmo Kadi?

◻ Ania “ti aldaw ni Jehova”?

◻ Kasano a maapit ‘ti ubas ti daga,’ ken apay?

◻ Iti ania a pamay-an a ti saplit dagiti dudon pinarigatnan ti Kakristianuan sipud 1919?

◻ Kasano a naibukbok ti espiritu ni Jehova iti ilina idi 33 K.P., ken sa manen idi 1919?