Asidegen ti Aldaw ni Jehova

“Denggenyo daytoy, dakayo a lallakay, ket ipangagyo dakayo amin nga agnaed iti daga.”​—JOEL 1:2.

1, 2. Gapu iti ania a kasasaad idiay Juda a pinaltiingan ni Jehova ni Joel a mangisawang iti nabileg a padtona?

“AY ILALA pay ti aldaw! ta asidegen ti aldaw ni Jehova, ket umayto kas pannakadadael nga aggapu iti Mannakabalin-amin.” Anian a makaklaat nga anunsio! Mensahe ti Dios dayta iti ilina nga impakaammo ni mammadto a Joel.

² Naisurat dagita a sasao ti Joel 1:15 sadi Juda, nalabit idi agarup tawen 820 K.K.P. Dagiti nalasbang a turturod sinaknapanda ti daga. Nawadwad ti bungbunga ken bukbukel. Nawayang ken nalangto dagiti pagaraban. Ngem, adda nagdakes a mapaspasamak. Nagraira ti panagrukbab ken Baal sadi Jerusalem ken iti daga ti Juda. Dagiti umili sibabartek a nagrukbabda iti daytoy a didiosen. (Idiligyo ti 2 Cronicas 21:4-6, 11.) Ipalubos kadi ni Jehova nga agtultuloy amin daytoy?

3. Ania ti impakdaar ni Jehova, ket ania ti saganaan dagiti nasion?

³ Nabatad ti sungbat ti Joel a libro ti Biblia. Alangonen ni Jehova a Dios ti kinasoberanona ken santipikarenna ti naganna. Asideg idin ti dakkel nga aldaw ni Jehova. Ukomenen ti Dios amin a nasion idiay “nababa a tanap ti Josafat.” (Joel 3:12, NW) Agsaganada ngaruden a makiginnubat ken Jehova a Mannakabalin-amin. Sangsanguentay met ti dakkel nga aldaw ni Jehova. Gapuna, usigentayo ti naimpadtuan a sasao ni Joel para iti kaaldawantayo ken iti napalabas.

Idadarup Dagiti Insekto

4. Kasanot’ kakaro ti pasamak nga impakdaar ni Joel?

⁴ Babaen iti mammadtona, kuna ni Jehova: “Denggenyo daytoy, dakayo a lallakay, ket ipangagyo dakayo amin nga agnaed iti daga. Adda aya daytoy kadagiti aldawyo, wenno kadagiti aldaw dagiti ammayo? Isu saritaenyo kadagiti annakyo, ket dagiti annakyo sawendanto met koma kadagiti annakda, ket dagiti annakda iti sabali a kaputotan.” (Joel 1:2, 3) Manamnama idi dagiti panglakayen ken dagiti amin nga umili ti banag a dida pay napaspasaran iti panagbiagda wenno iti kaaldawan dagidi ammada. Karkarna unay daydi ta saritaendanto agingga iti maikatlo a kaputotan! Ania daytoy a nakaskasdaaw a pasamak? Tapno maammuantayo, ipapantayo nga addatayo iti panawen ni Joel.

5, 6. (a) Deskribirenyo ti didigra nga impadto ni Joel. (b) Siasino ti Gubuayan dayta a didigra?

⁵ Imdenganyo! Adda daranudor a mangngeg ni Joel iti adayo. Agsipnget ti tangatang, ket ti nakaam-amak a daranudor pumigpigsa bayat nga agsaknap ti kinasipnget. Pagammuan bumaba ti kasla asuk nga ulep. Pangen dayta dagiti riniwriw nga insekto. Ket anian a didigra ti ipaayda! Ita, usigenyo ti Joel 1:4. Saan laeng a dagiti nagpayak nga agakar-akar a dudon ti mangbukel kadagitoy dumarup nga insekto. Ay, saan! Um-umay met dagiti mabisin a rineprep nga agkarkarayam, awan payakda a dudon. Gapu ta impalais ida ti angin, bigla a simmangpet dagiti dudon, ket ti ungorda kasla kadagiti karuahe. (Joel 2:5) Gapu iti kinarawetda, minilion kadakuada nakaparpartak a pagbalinenda a langalang ti lugar a kasla paraiso.

⁶ Umab-abante met dagiti arabas​—dagiti igges nga agbalinto a kulibangbang. Ti dakkel a buyot dagiti mabisin nga arabas lamutenda ti bulong dagiti mula, a saggaysa, agingga a mapukaw ti kinalasbang dagiti mula. Ket ti teddada, kanen dagiti dudon. Ket ti itedda dagiti dudon, sigurado nga ibusen dagiti nakaparpartak nga ipes. Ngem paliiwenyo daytoy: Iti Joel kapitulo 2, bersikulo 11, inawagan ti Dios ti buyot dagiti dudon kas “buyotna.” Wen, isu ti Naggapuan dagiti dumarup a dudon a mangrarit iti daga ken mamataud iti nakaro a bisin. Kaano? Sakbay unay “ti aldaw ni Jehova.”

“Agriingkayo, Dakayo a Managbartek”!

7. (a) Ania ti kasasaad dagiti panguluen ti relihion iti Juda? (b) Kasano a ti kasasaad dagiti panguluen ti Kakristianuan itatta ket umasping iti kasasaad dagidi panguluen ti relihion iti Juda?

⁷ Ti makarimon a bunggoy, dagiti panguluen ti relihion iti Juda ti nakaiturongan daytoy a bilin: “Agriingkayo, dakayo a managbartek, ken agsangitkayo; ket agdung-awkayo, dakayo amin nga agiinum ti arak, maipuon iti nasam-it nga arak; ta isu naisina iti ngiwatyo.” (Joel 1:5) Wen, naibaga kadagiti naespirituan a mammartek iti Juda nga ‘agriingda,’ agpausawda. Ngem dikay ipapan a historia laeng daytoy idi ugma. Uray pay itan, sakbay ti dakkel nga aldaw ni Jehova, dagiti klero ti Kakristianuan piguratibo a nabartekda unay iti nasam-it nga arak, isu a dida ikankano daytoy a bilin a naggapu iti Kangatuan. Anian a pannakaklaatdanto inton mausawanda iti naespirituan a pannakabartekda iti dakkel ken nakaam-amak nga aldaw ni Jehova!

8, 9. (a) Kasano a dineskribir ni Joel dagiti dudon ken ti epekto ti idadarupda? (b) Iti panawentayo, siasino ti iladladawan dagiti dudon?

⁸ Kitaenyo dayta nagdakkel a buyot dagiti dudon! “Maysa a nasion simmang-at iti dagak, nabileg, ken saanda a mabilang; dagiti ngipenna isuda dagiti ngipen ti leon, ket adda kenkuana dagiti sangi ti leon a kabaian. Winarawarana ti ubasko, inukisanna ti kayok a higos: isu inukisanna a naan-anay, ket impurruakna; dagiti sangsangana naaramidda a napudaw. Agsangitka kas maysa a birhen a nabariksan iti lupot a nakersang a maipaay iti asawa iti kinaubingna.”​—Joel 1:6-8.

⁹ Padto laeng kadi daytoy maipapan iti “nasion” dagiti dudon, pinangen a dudon, a mangraut iti Juda? Saan, saan la a dayta ti kaipapananna. Iti Joel 1:6 ken Apocalipsis 9:7, nailadawan ti ili ti Dios kas dudon. Ti agdama ita a pangen dagiti dudon awan sabali no di ti buyot dagiti napulotan a dudon ni Jehova, nga ita kaduada ti agarup 5,600,000 a “sabsabali a karnero” ni Jesus. (Juan 10:16) Dikay kadi maragsakan ta pasetnakayo daytoy dakkel a bunggoy dagiti agdaydayaw ken Jehova?

10. Ania ti epekto ti idadarup dagiti dudon iti Juda?

¹⁰ Iti Joel 1:9-12, mabasatayo ti maipapan kadagiti epekto ti idadarup dagiti dudon. Ti nagsasaruno a pangen naan-anay a dinadaelda ti daga. Gapu ta awanen ti trigo, arak, ken lana, saanen a makapagserbi dagiti di matalek a papadi. Nagdung-aw uray ti daga, ta inibus dagiti dudon ti bukbukel, ket dagiti kayo naibus ti bungada. Gapu ta nararit dagiti kaubasan, awanen ti arak para kadagiti artek ni Baal, a mammartekda met iti naespirituan!

“Agasugkayo, Dakayo a Papadi”

11, 12. (a) Siasino dagiti agkunkuna a papadi ti Dios ita? (b) Kasano a maap-apektaran dagiti panguluen ti relihion iti Kakristianuan iti agdama nga idadarup dagiti dudon?

¹¹ Imdenganyo ti mensahe ti Dios kadagita a nasubeg a papadi: “Agbarikeskayo iti lupot a nakersang, ket agasugkayo, dakayo a papadi; agdung-awkayo, dakayo a managannong iti altar.” (Joel 1:13) Iti immuna a kaitungpalan ti padto ni Joel, dagiti papadi a Levita nagannongda iti altar. Ngem iti ngay maudi a kaitungpalanna? Iti kaaldawantayo, dagiti klero ti Kakristianuan inannongda ti autoridad nga agserbi iti altar ti Dios, nga ibagbagada a ministrona ida, ‘papadina.’ Nupay kasta, ania ti mapaspasamak ita ta umab-abanten dagiti moderno-aldaw a dudon ti Dios?

¹² No dagiti “papadi” ti Kakristianuan makitada nga umab-abante ti ili ni Jehova ket mangngegda ti pammakdaarda maipapan iti nadiosan a panangukom, aglagawda. Agasugda gapu iti pannakasair ket marurodda gapu iti mamagwalangwalang nga epekto ti mensahe ti Pagarian. Ket agdung-awda ta panawan ida dagiti arbanda. Gapu ta aglangalang ti pagarabanda, agpuyatda a sikakawes iti nakersang a lupot, a dung-awanda ti pannakapukaw ti panguartaanda. Di agbayag, maikkatdanto metten kadagiti pagsapulanda! Kinapudnona, kuna ti Dios nga agdung-awda nga agpatpatnag ta asidegen ti kanibusananda.

13. Kas grupo, ipangagto aya ti Kakristianuan ti pakdaar ni Jehova?

¹³ Sigun iti Joel 1:14, ti laeng pangnamnamaanda isu ti panagbabawi ken idadawatda iti ‘tulong ken Jehova.’ Manamnamatay kadi nga agpatulong ken Jehova ti intero a klase klero ti Kakristianuan? Saan! Mabalin nga ipangag ti sumagmamano kadakuada ti pakdaar ni Jehova. Ngem kas klase, agtultuloy ti naespirituan a panagbisin dagitoy a panguluen ti relihion ken dagiti miembroda. Impadto ni propeta Amos: “Adtoy, umay dagiti al-aldaw, kuna ni Apo Jehova, nga ipaw-itkonto ti bisin ditoy daga, saan a bisin iti tinapay, wenno waw iti danum, no saan ket a panagdengngeg kadagiti sao ni Jehova.” (Amos 8:11) Iti sabali a bangir, anian a yamantayo iti nabaknang a naespirituan a piesta a siaayat nga ipapaay ti Dios baeten “ti matalek ken masirib nga adipen”!​—Mateo 24:45-47.

14. Ania ti ipakpakauna ti idadarup dagiti dudon?

¹⁴ Ti idadarup dagiti dudon ket pakpakauna ti maysa a banag idi ken ita. Ti ania? Sibabatad nga ibaga kadatayo ni Joel, a kunana: “Ay ilala pay ti aldaw! ta asidegen ti aldaw ni Jehova, ket umayto kas pannakadadael nga aggapu iti Mannakabalin-amin.” (Joel 1:15) Ti sangalubongan nga idadarup itatta dagiti dudon a buyot ti Dios nabatad nga ipasimudaagna nga asidegen ti dakkel ken nakaal-alingget nga aldaw ni Jehova. Sigurado a dagiti amin a nalinteg panagpuspusoda il-iliwenda dayta naisangsangayan nga aldaw a panagsingir inton maipakaten ti nadiosan a panangukom maibusor kadagiti nadangkes ket agbiktorianto ni Jehova kas Sapasap a Soberano.

15. Gapu iti nakalkaldaang a kasasaad ti daga, kasano ti reaksion dagidiay mangipangag kadagiti pakdaar ti Dios?

¹⁵ Kas ipakita ti Joel 1:16-20, naibus ti taraon idiay nagkauna a Juda. Kasta met ti rag-o. Awan nagyannan dagiti kamalig, ket kapilitan a rinebbada dagiti kamarin. Tangay awanen pagaraban ta dagiti dudon inibusda dagiti ruot, nawarawara dagiti baka ket natay dagiti pinangen a karnero. Anian a kalamidad! Gapu iti kasta a kasasaad, ania ti napasamak ken Joel? Sigun iti bersikulo 19, kinunana: “O Jehova, kenka umkisak.” Adu met ita ti mangipangpangag kadagiti nadibinuan a pammakdaar ken umaw-awag ken Jehova a Dios buyogen ti pammati.

“Ti Aldaw ni Jehova Umay”

16. Apay a “dagiti agnaed iti daga” agkintayegda koma?

¹⁶ Imdenganyo daytoy a bilin ti Dios: “Puyotenyo ti tangguyob idiay Sion, ket pagunienyo ti panagbuak iti nasantuan a bantayko; amin dagiti agnaed iti daga agkintayegda koma.” (Joel 2:1) Apay a kasta ti reaksionda? Sumungbat ti padto: “Ta ti aldaw ni Jehova umay, ta adda iti asidegen. Aldaw a nasipnget ken nakudrep, aldaw dagiti ul-ulep ken napuskol a sipnget, a kas ti bannawag nga agsaknap iti rabaw dagiti bambantay.” (Joel 2:1, 2) Adda pudpudno a kinaganat a nainaig iti dakkel nga aldaw ni Jehova.

17. Kasano a naapektaran ti daga ken dagiti umili iti Juda iti idadarup dagiti dudon?

¹⁷ Darepdepenyo ti epekto ti sirmata ti propeta bayat a dagiti narungsot a dudon pinagwalangwalangda ti arig minuyongan ti Eden. Imdenganyo ti pannakadeskribir ti buyot dagiti dudon: “Ti langada kasla langa dagiti kabalyo; ket kas tattao a nagsakay iti kabalyo, kasta ti panagtarayda. Kas iti daranudor dagiti lugan kadagiti tapaw dagiti bambantay kasta ti panaglagtoda; kas ti anabaab ti gil-ayab ti apuy a manglamut iti punget, kas maingel nga ili a maurnos a maipaay iti gubat. Iti sanguananda, dagiti il-ili agtuokda; amin a ruprupa bumsagda.” (Joel 2:4-6) Kabayatan ti idadarup dagiti dudon idi tiempo ni Joel, kimmaro ti tuok dagidi agrukrukbab ken Baal, ket nangindarupa ti danagda.

18, 19. Kasano a ti trabaho ti ili ti Dios ita ket umasping iti idadarup dagiti dudon?

¹⁸ Awan nakapasardeng kadagidi naurnos, di mabannog a dudon. Nagtarayda a “kasla mamaingel a tattao” ket kinalay-atda pay dagiti pader. No ‘adda man rimmubsi kadagiti igam, saan a nadadael ti turong dagiti kaduada.’ (Joel 2:7, 8) Anian a nabiag a propetiko a panangiladawan iti agdama a buyot dagiti piguratibo a dudon ti Dios! Umab-abante met ita ti buyot dagiti dudon ni Jehova. Awan ‘pader’ ti ibubusor a makalapped kadakuada. Dida ikompromiso ti kinatarnawda iti Dios no di ket situtulokda a sumango ken patay, kas kadagiti rinibu a Saksi a ‘rimmubsi kadagiti igam’ gapu ta nagkitakitda a mangsaludo ken Hitler kabayatan ti panagturay dagiti Nazi idiay Alemania.

¹⁹ Ti buyot dagiti dudon ti Dios iti agdama a panawen naan-anay a nangasabada “iti ili” ti Kakristianuan. (Joel 2:9) Kasta ti inaramidda iti intero a lubong. Kalkalay-atenda pay laeng amin a bangen, serserkenda dagiti minilion a balay, as-asitganda dagiti tattao iti lansangan, makisarsaritada kadakuada iti telepono, ken kasaoda ida iti aniaman a posible a pamay-an bayat nga iwarwaragawagda ti mensahe ni Jehova. Kinapudnona, binilionen a publikasion ti Biblia ti naiwarasda ket adunto pay ti iwarasda iti di agsarday a ministerioda​—agpada iti publiko ken iti binalaybalay.​—Aramid 20:20, 21.

20. Siasino ti tumultulong kadagiti moderno-aldaw a dudon, ket ania dagiti resulta?

²⁰ Ipakita ti Joel 2:10 a ti nagdakkel a pangen dagiti dudon umarngida iti ulep a manglangeb iti init, bulan, ken bitbituen. (Idiligyo ti Isaias 60:8.) Pagduaduaan kadi no asino ti adda iti likudan daytoy a buyot? Iti ngatuen ti arimbangaw dagiti dudon, mangngegtayo dagitoy a sasao ti Joel 2:11: “Ni Jehova agtimek iti sanguanan ti buyotna; ta ti pakarsona dakkel unay; ta isu napigsa a manungpal iti saona; ta ti aldaw ni Jehova dakkel ken nakaal-alingget unay; ket asino ti makaitured?” Wen, ibabaon itan ni Jehova a Dios dagiti dudon a buyotna​—sakbay ti dakkel nga aldawna.

“Saan a Nabannayat ni Jehova”

21. Ania ti mapasamak inton ti ‘aldaw ni Jehova umay a kasla mannanakaw’?

²¹ Kas ken Joel, nadakamat ni apostol Pedro ti dakkel nga aldaw ni Jehova. Insuratna: “Ti aldaw ni Jehova umayto a kasla mannanakaw, nga iti dayta ti langlangit aglabasdanto buyogen ti sumayetset a daranudor, ngem dagiti elemento gapu ta nakabarbarada unay marunawdanto, ket ti daga ken ti ar-aramid nga adda kenkuana matakuatanto.” (2 Pedro 3:10) Iti sidong ti impluensia ni Satanas a Diablo, dagiti nadangkes a “langlangit” a gobierno iturayanda ti “daga,” kayatna a sawen, ti sangatauan a naisina iti Dios. (Efeso 6:12; 1 Juan 5:19) Dagitoy simboliko a langlangit ken daga didanto makalisi iti bara ti nadiosan a pungtot inton dakkel nga aldaw ni Jehova. Imbes ketdi, masuktandanto iti “baro a langlangit ken maysa a baro a daga nga ur-urayentayo sigun iti karina, ket kadagitoy nga agtaeng ti kinalinteg.”​—2 Pedro 3:13.

22, 23. (a) Kasano koma ti reaksiontayo iti naasi a panangipakita ni Jehova iti kinaanus? (b) Kasano koma ti reaksiontayo iti kinaasideg ti aldaw ni Jehova?

²² Gapu kadagiti agdama a pakasingaan ken pakasuotan ti pammati, mabalin a malipatantayo ti kinaganat ti tiempotayo. Ngem bayat nga umab-abante dagiti simboliko a dudon, adu a tattao ti mangipangpangag iti mensahe ti Pagarian. Nupay impalubos ti Dios ti tiempo para iti daytoy, ditay koma ipapan a kinabannayat ti kinaanusna. “Saan a nabannayat ni Jehova maipapan iti karina, kas iti panangibilang dagiti dadduma a tattao a kinabannayat, no di ket an-anusannakayo agsipud ta saanna a tarigagayan a madadael ti asinoman no di ket tarigagayanna a makagteng dagiti isuamin iti panagbabawi.”​—2 Pedro 3:9.

²³ Bayat nga ur-urayentayo ti dakkel nga aldaw ni Jehova, ipapusotay koma ti sasao ni Pedro a nailanad iti 2 Pedro 3:11, 12: “Yantangay isuamin dagitoy a bambanag marunawdanto a kasta, ania a kita ti tattao ti rebbeng koma a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova, a babaen iti dayta ti langlangit gapu ta maur-uramda marunawdanto ket ti el-elemento gapu ta nakabarbarada unay malunagdanto!” Dagitoy a kababalin ken ar-aramid ramanenda ti pannakidanggaytayo iti buyot dagiti dudon ni Jehova babaen ti naynay ken nabunga a pannakiramantayo iti panangikasaba iti naimbag a damag ti Pagarian sakbay a dumteng ti panungpalan.​—Marcos 13:10.

24, 25. (a) Kasanoyo nga ipangag ti pribilehio a makiraman iti trabaho ti buyot dagiti dudon ni Jehova? (b) Ania a nabagas a saludsod ti inyimtuod ni Joel?

²⁴ Agtultuloy ti trabaho ti buyot dagiti dudon ti Dios agingga a bumtak ti dakkel ken nakaal-alingget nga aldaw ni Jehova. Ti mismo a kaadda daytoy di maatipa a buyot dagiti dudon ket karkarna a pammaneknek a ti aldaw ni Jehova asidegen. Dikay kadi maragsakan a makipagserbi kadagiti napulotan a dudon ti Dios ken kadagiti kakaduada iti maudin nga idadarup sakbay ti dakkel ken nakaal-alingget nga aldaw ni Jehova?

²⁵ Anian a naindaklanto dayta nga aldaw ni Jehova! Di pakasdaawan a tumaud daytoy a saludsod: “Asino ti makaitured?” (Joel 2:11) Daytoy ken adu pay a saludsod ti mausig iti sumaganad a dua nga artikulo.

Mailawlawagyo Kadi?

◻ Apay a namakdaar ni Jehova maipapan iti idadarup dagiti insekto iti Juda?

◻ Iti moderno-aldaw a kaitungpalan ti padto ni Joel, siasino dagiti dudon ni Jehova?

◻ Kasano ti reaksion dagiti panguluen ti Kakristianuan iti idadarup dagiti dudon, ket kasano a ti dadduma kadakuada maliklikanda dagiti pagbanaganna?

◻ Kasano kasaknap ti idadarup dagiti dudon iti maika-20 a siglo, ket agingga iti kaano nga agtultuloy dayta?

[Ladawan iti panid 9]

Ti idadarup dagiti insekto impakpakaunana ti banag a nakarkaro pay

[Credit Line]

Nararit a kayo: rinetrato ti FAO/G. Singh

[Ladawan ti panid 10]

Ni Jehova a Dios ti adda iti likudan ti idadarup dagiti moderno-aldaw a dudon

[Picture Credit Line iti panid 8]

Dudon: rinetrato ti FAO/G. Tortoli; pinangen a dudon: rinetrato ti FAO/Desert Locust Survey