Ni Jehova—Kaam-ammoyo Wenno Gayyemyo?
“JOHN, iyam-ammok man kenka ti gayyemko? Isu daytoy ni—dispensarennak, ania tay naganmo itayen?”
Nangngegyo kadin daytoy a kita ti panagkibaltang? Mangipaay daytoy iti maysa a pangarigan no kasano a dadduma a tattao di umisot’ panangusarda iti sao a “gayyem.” Iti kinaagpaysuanna kayatda a sawen ti “kaam-ammo” wenno no dadduma saan pay ketdi. Ti pannakaam-ammo ken Mr. dela Cruz nga agtataeng iti ballasiw ti kalsada ket maysa a banag; ngem sabali a banag ti panagbalin a gayyemna.
Depinaren ti maysa a diksionario ti “kaam-ammo” kas “maysa a tao a nakiumananen ti maysa a tao nga awanan napigsa a personal a pannakaisinggalut kenkuana.” Ipabigbig daytoy ti “basbassit a pannakairuam, kinasinged, pannakilangen, ken panangikalikagum ngem iti GAYYEM.”
Daytoy a kinakurang ti nabileg a personal a pannakaisinggalut tumulong a mangilawlawag no apay a masansan a bassit laeng panangasikasotayo no ania ti mapaspasamak kadagiti kaam-ammo, bayat a kaay-ayotayo unay ti mainaig kadagiti biag dagiti gagayyemtayo. Makidanggaytayo kadagiti rag-o ken leddaangda, a palpalubosantayo ida a mangtukay unay kadatayo. Siempre, masapul nga agannadtayo a ditay ipalubos a ti emosional a pannakinaig iyaw-awannatayo agturong iti pannakibiang kadagiti pribado nga aramidda.—1 Pedro 4:15.
Ti kaadda ti nabileg a personal a pannakaisinggalut kadagiti gagayyemtayo ilawlawagna met no apay a gagangayen a pagreggetantayo nga ay-ayuen ida. No ti maysa a kaam-ammo masarakanna a di natanang wenno di umiso ti konduktatayo, ti dina pannakaay-ayo ket nalabit saan unay a mangtignay kadatayo nga agbalbaliw. Ngem ti maysa a gayyem mawatwatna ti nakapigpigsa la ketdi nga impluensia, dayta man ket kadagiti panagkawkawes, kondukta, wenno kababalin.
No maipanggep iti panagtalek, dungngo, ken kinasungdo, ti panaggayyem kiddawenna ti nangatngato a rukod ti responsabilidad ngem ti maaramidan ti panagam-ammo. Daydiay agkiddaw iti pannakigayyem nga, iti arigna, ket awan nainaig a responsabilidad, iti kinaagpaysuanna tarigagayanna ti maysa nga am-ammo, saan a maysa a gayyem. Dagiti nasinged a gagayyem ket naragsakda a mangitungpal kadagiti responsabilidad a lagumen ti nabileg a personal a pannakaisinggalut, a mabigbigda a dagitoy ket mangted kadakuada ti gundaway a mangpaneknek iti panaggayyemda.
Pannakigayyem iti Dios
Kas ti Namarsua, ni Jehova isu ti nailangitan nga Ama ti sangatauan ken maikari a maayat, mapagtulnogan, ken maraem. Ngem kayatna nga aramiden dagiti tattao daytoy gapu iti maysa a nabileg a personal a pannakaisinggalut, saan laeng a gapu iti rikna ti pagrebbengan. (Mateo 22:37) Kayatna met nga isut’ ayatenda kas maysa a Gayyem. (Salmo 18:1) Yantangay “isu inayatnatayo nga immuna,” impasdekna met laeng a mismo ti perpekto a pangisaadan ti kasta a pannakigayyem.—1 Juan 4:19.
Dagiti immuna a nagannaktayo, da Adan ken Eva, ket naam-ammoda ni Jehova. Ti saludsod ket: Awatenda kadi ti tukonna a pannakigayyem? Makapaladingit a kunaen, dida inawat. Ti agimbubukodan unay a panagarikapda iti panagwaywayas manipud iti Dios ti nangipakita iti kaawan ti rikna ti personal a pannakaisinggalut. Iti itutulokda a mangawat kadagiti bendision ti pannakigayyem nga ituktukonna, saanda met a situtulok a mangtungpal kadagiti responsabilidad dayta. Kasla arigna kayatda a tagiragsaken dagiti pagnam-ayan ken kinatalged ti nalapsat a Paraiso a pagtaenganda ngem saanda met a situtulok nga agbayad iti abang.
Amintayo, dadduma iti dakdakkel a rukod ngem kadagiti sabsabali, ti nakatawid iti daytoy di manangapresiar ken managwaywayas nga espiritu. (Genesis 8:21) Dadduma nga agtutubo, kas pangarigan, pinalubosanda ti kasisigud a tarigagayda a mamagbalin kadakuada a di manangapresiar kadagiti nagannakda. Nagresulta daytoy iti pannakarba ti kapapatgan a pannakigayyem a rebbeng a maadda iti nagbaetanda ken dagiti nagannakda iti intero a panagbiagda. Makapaladingit man daytoy, nupay kasta, ti pannakarba ti pannakigayyemtayo iti nailangitan nga Amatayo ket nakarkaro pay. Kinapudnona, makapapatay dayta!
Dagiti Kalikagum iti Pannakigayyem
No awan panagtalek, awan makapagbayag a pannakirelasion, kadagiti tattao man wenno iti Dios. Naawatan ni patriarka Abraham daytoy, ket isut’ gapuna a naulit-ulit nga imparangarangna ti awan panagkedkedna a panagtalek iti Dios. Basaenyo ti Genesis 12:1-5 ken 22:1-18, ket makitayo ti dua a naidumduma nga ulidan ti panagtalekna ken Jehova. Wen, “namati ni Abraham ken Jehova, ket naibilang dayta kenkuana a kinalinteg.” Isut’ gapuna nga “isu ket naawagan ‘gayyem ni Jehova.’”—Santiago 2:23.
Ti kanayonan pay a kalikagum iti pannakigayyem iti Dios isu ti panangragpat kadagiti obligasion nga iraman ti pannakigayyemna. Gapu iti nakurapay a takdertayo no maidilig ken Jehova, dagitoy nga obligasion ket nainsiriban a dakdakkel ngem iti kaaddada iti pannakigayyem iti tao. Lumabesda pay iti panagtarigagaytayo a mangay-ayo kenkuana kadagiti sumagmamano a banag—kas aramidentayo iti natauan a gayyem. Iramanda ti panagtarigagaytayo a mangay-ayo kenkuana iti amin a banag. Ni Jesus, ti Anak ken kasisingedan a gayyem ti Dios, impakitana daytoy idi kunana maipapan ken Jehova: “Kankanayon nga aramidek dagiti bambanag a makaay-ayo kenkuana.”—Juan 8:29.
Ngarud, ti pannakigayyem ken Jehova, wenno iti Anakna, ket saan a magun-odan iti awan nainaig a responsabilidad a pangibatayan; daytat’ agpannuray iti panagtungpaltayo kadagiti makalikaguman iti pannakigayyem nga intuyangda. (Kitaenyo ti Salmo 15:1-5.) Silalawag nga impakita daytoy ni Jesus iti pannakipatpatangna kadagiti adalanna. “Dakayo dagiti gagayyemko,” kunana kadakuada, “no aramidenyo ti ibilbilinko kadakayo.”—Juan 15:14.
Sabali pay a kalikagum iti pannakigayyem isu ti silulukat ken prangkesa a komunikasion. Iti aldaw ti ipapatayna, kuna ni Jesus kadagiti matalek nga apostolna: “Dikay naganenen ti ad-adipen, ta ti adipen dina ammo ti aramiden ni apona. Ngem ninagankayo ti pagpagayam, ta isuamin dagiti nangngegko ken Amak impakaammok kadakayo.” (Juan 15:15) Iti panangiranudna kadagiti kapanunotanna kadagiti gagayyemna, sursuroten ni Jesus ti ulidan ti nailangitan nga Amana, a maipapan kenkuana kunaen ti Amos 3:7: “Ni Soberano nga Apo Jehova dinto mangaramid ti maysa a banag no dina pay impanayag ti palimedna kadagiti adipenna a mammadto.”
Saan kadi a gagangay a banag daytoy kadagiti aggagayyem? Mabalin nga awan issemtayo a mangiranud kadagiti kapadasantayo ken Mr. dela Cruz nga agnanaed iti ballasiw ti kalsada. Ken masigurado a ditay kayat nga ibaga kenkuana dagiti kaunggan a pampanunot ken rikriknatayo. Tutal, isu ket maysa laeng a kaam-ammotayo. Ngem kadagiti gagayyemtayo, ay ket, masansan a ditay makatutor a mangibaga kadakuada dagita a bambanag!
Kasta met ti pannakigayyemtayo iti Dios. Ditay makatutor nga umadani kenkuana iti kararag, nga ipalgaktayo kenkuana dagiti kasapulantayo, dagiti tarigagaytayo, ken dagiti kaunggan a rikriknatayo. Siempre, no maymaysa laeng ti agsasao, di agbayag ket mapukaw ti panaggayyem. Masapul met a situtuloktayo a mangipalubos nga agsao ti Dios kadatayo. Aramidentayo daytoy babaen siaannad a panagimdeng iti naisurat a Saona, panagmennamenna iti balakadna, ken kalpasanna panangiyaplikar iti dayta iti kasayaatan a mabalinantayo.
Kasano Kapateg Kadakayo ti Pannakigayyem ni Jehova?
Tapno matulongankayo a mangsungbat iti daytoy a saludsod, usigenyo ti maysa a naisangsangayan a kita ti pannakigayyem iti tao. No maysakayo nga agtutubo, nalabit interesadokayo iti maysa a pannakigayyem a mangiturong iti panagasawa. Siempre, mautobyo a ti basta pannakiam-ammo iti mainanama a pakiasawaan ket saan nga umiso a pakaibatayan ti panagasawa. Ti pannakiam-ammo masapul a mapagbalin a pannakigayyem. Daytoy a pannakigayyem ket maparang-ayto ken masukog iti nasingsinged a pannakirelasion nga inton agangay isuntot’ mangbukel iti umiso a pakaibatayan ti naragsak a panagasawa.
Ita, usigenyo. Kasano kaadu a panagregget ti ipapaay ti kaaduan a tattao iti panangparang-ayda iti daytoy a kita ti pannakigayyem? Kasano kawadwad a tiempo ken kuarta ti busbusbosenda iti panangibangon ken kalpasanna panangtaginayon iti dayta? Kasano kawadwad a tiempo ti busbusbosenda iti panangpanunotda iti dayta? Agingga iti ania nga agaramidda kadagiti plano—wenno ipakitada ti kinatulok a mangbalbaliw kadagiti plano—iti panggep a panangparang-ay wenno panangtaginayon iti daytoy a pannakirelasion?
Kalpasanna saludsodanyo ti bagiyo: ‘Kasanot’ pannakaidilig daytoy kadagiti panagreggetko a mangparang-ay iti pannakigayyemko iti Namarsuak wenno iti panangidur-as ken panangpapigsak iti dayta? Kasano kawadwad a tiempo ti busbusbosek iti panangaramid iti dayta? Agingga iti ania a ti pannakigayyem ken Jehova ukoparenna ti pampanunotko? Agingga iti ania nga agar-aramidak kadagiti plano—wenno mangipakpakitaak iti kinatulok a mangbalbaliw kadagiti plano—iti panggep a panangparang-ay ken kalpasanna panangtaginayon iti daytoy a pannakirelasion?’
Dagiti agtutubo a Kristiano rebbeng a siaammoda a naan-anay nga amin a natauan a pannakigayyem, agraman daydiay mangiturong inton agangay iti panagasawa, ket maikadua laeng ti kinapategda iti pannakigayyem a kasapulan a maadda iti Namarsuada. Isut’ gapuna no apay a naigunamgunam kadakuada idiay Eclesiastes 12:1: “Laglagipem, ita, ti Naindaklan a Namarsuam kadagiti aldaw ti kinaagtutubom.” Adut’ mangar-aramid iti daytoy babaen panagserbi kas ministro ti Dios iti publiko, a dumakdakkel-bilangda kas amin-tiempo a manangasaba, wenno payunir.
Iti laksid ti dumakdakkel a panagin-inap ken di kinapasnek iti aglikmutda, situtured dagitoy a mangidepensa ken Jehova no makangngegda kadagiti ulbod a panangumsi ken pammabasol maibusor kenkuana. Saan kadi a daytoy ti rebbeng a nainkalintegan a mainanamana kadagiti gagayyemna? Saan kadi a daytoy ti inanamaentayo met kadagiti gagayyemtayo? Ken dina kadi pagrag-oen ti pusotayo no matakkuatantayo a sireregget nga ar-aramiden daytoy dagiti gagayyemtayo ken buyogen panamati?—Idiligyo ti Proverbio 27:11.
Wen, ti pannakigayyem iti Dios—uray kadagiti tattao—ket mangipaay kadagiti responsabilidad a masapul a maitungpal tapno ti panaggayyem ket agpaut. Ti maysa a tao a saan a situtulok a mangawat kadagitoy a responsabilidad, wenno saan a sisasagana a mangaramid iti dedikasion iti Dios ken kalpasanna itungpalna dayta, ket mabalin nga am-ammona ni Jehova. Ngem masapul a mapasaranna pay, nupay kasta, dagiti rag-o ti panangikutna Kenkuana kas maysa a Gayyem.
[Ladawan iti panid 25]
Ni Abraham nagtalek iti Dios ket ngarud naawagan a gayyem ni Jehova