Naagawa Kadagiti Ar-aramid a Natay Wenno iti Serbisio ni Jehova?
“LADINGITEK, ngem okupadoak.” Maysa daytoy kadagiti isusupiat a masabet dagiti Saksi ni Jehova bayat a publiko nga ikasabada ti naimbag a damag ti Pagarian. (Mateo 24:14) Ket nupay ti sao nga “Okupadoak” no dadduma ket maysa laeng a basta nalaka a pambar, ti kinapudnona a ta adu a tao ket naagawa. Agnaay a makumikomda unay “iti pagdanagan daytoy a sistema ti bambanag”—dagiti rigat iti panagsapul iti pagbiag, panangbayad kadagiti rebbengen, ipapan ken panagsubli manipud trabaho, panangpadakkel kadagiti ubbing, panangtaripato iti balay, kotse, ken dadduma pay a sanikua.—Mateo 13:22.
Nupay kasta, idinto a dagiti tattao mabalin a pudno a naagawada, sumagmamano laeng ti naigamer kadagiti aramid a pudno a nabagas wenno nabunga. Kas insurat naminsan ti masirib a tao a ni Salomon: “Ta ania ti maadda iti tao gapu iti amin a bannogna, ken iti panagagawa ti pusona a pagbambannoganna iti baba ti init? Ta amin dagiti al-aldawna dagiti aramidna isuda dagiti ladladingit ken liday, kasta met kabayatan ti rabii saan a makainana ti pusona. Daytoy kinaubbaw met.”—Eclesiastes 2:22, 23.
Awagan met ti Biblia ti kasta a bareng-bareng a trabaho kas “ar-aramid a natay.” (Hebreo 9:14) Dagiti kadi kakasta a trabaho ti agraira iti biagyo? Rebbeng a dakkel a pakaseknanyo daytoy kas maysa a Kristiano, yantangay ti Dios “subadannanto iti tunggal maysa sigun iti aramidna.” (Salmo 62:12) Ken yantangay “napaababan ti nabati a tiempo,” rebbeng a nangnangruna a maseknantayo a ditay saysayangen ti tiempo kadagiti ar-aramid a natay. (1 Corinto 7:29) Ngem ania kadi dagiti ar-aramid a natay? Kasanot’ rebbeng a panangmatmattayo kadakuada? Ken kasanotayo a makasigurado a naagawatayo kadagiti aramid nga addaan pudno a pateg?
Panangilasin kadagiti Ar-aramid a Natay
Idiay Hebreo 6:1, 2, insurat ni Pablo: “Gapu itoy a rason, ita ta pinanawantayon dagiti nagdamdamuan a doktrina maipapan ken Kristo, umabantetayo agturong iti kinanataengan, a ditay mangipasdek manen iti pundasion, nga isu ti, panagbabawi manipud ar-aramid a natay, ken ti pammati iti Dios, ti pannursuro kadagiti pammautisar, ti panangipatay kadagiti im-ima, ti panagungar dagiti natay ken agnanayon a pannakaukom.” Paliiwenyo a “ti nagdamdamuan a doktrina” inramanna ti “panagbabawi manipud ar-aramid a natay.” Kas Kristiano, dagiti managbasa ni Pablo nagbabawidan manipud kakasta nga ar-aramid a natay. Kasano a kasta?
Sakbay panangawatda ken Kristo, dadduma idi umuna a siglo ti naigameren kadagiti natay nga “ar-aramid ti lasag,” nga isuda ti, “pannakiabig, kinarugit, nalulok a kababalin, idolatria, aramid ti espiritismo,” ken dadduma pay a dakes nga ar-aramid. (Galacia 5:19-21) No di nasiputan, dagiti kakasta nga aramid ti nangituggod koma iti naespirituan nga ipapatayda. Siaasi unay, nupay kasta, dagidiay a Kristiano nagbaw-ingda manipud kadagiti pakadadaelan a kursoda, nagbabawida, ken “naugasanda.” Tinagiragsakda ngarud ti maysa a nadalus a takder ken Jehova.—1 Corinto 6:9-11.
Saan nga amin a Kristiano, nupay kasta, ti kasapulan nga agbabawi manipud kadagiti aramid a dakes ken imoral. Ti surat ni Pablo ket kangrunaanna a naiturong kadagiti manamati a Judio, nga adu kadakuada ti awan duadua a siirut a kimpet iti Mosaiko a Linteg sakbay panangawatda ken Kristo. Kadagiti ania nga ar-aramid a natay, ngarud, ti nagbabawianda? Sigurado nga awan pagdaksanna ti panangsurotda kadagiti ritual ken kalikagum ti panagdayaw ti Linteg. Saan kadi a ti Linteg “nasantuan ken nalinteg ken naimbag”? (Roma 7:12) Wen, ngem idiay Roma 10:2, 3, kuna ni Pablo maipanggep kadagiti Judio: “Paneknekak nga adda regtada iti Dios; ngem saan a sigun iti umiso a pannakaammo; ta, gapu ta dida ammo ti kinalinteg ti Dios no di ket pagregreggetanda nga ipasdek ti bukodda a kinalinteg, dida impaiturayan dagiti bagbagida iti kinalinteg ti Dios.”
Wen, sibibiddut a pinati dagiti Judio a babaen sipipinget a panangsurotda iti Linteg, mateggedda ti pannakaisalakanda. Ni Pablo, nupay kasta, inlawlawagna a “ti maysa a tao ket maibilang a nalinteg, saan a gapu kadagiti aramid ti linteg, no di ket baeten laeng iti pammati ken Kristo Jesus.” (Galacia 2:16) Kalpasan a naipaay ti subbot ni Kristo, dagiti aramid ti Linteg—kasanoman kasagrado wenno katan-okda—ket ar-aramid a natay ken awan aniaman a pategda iti pananggun-od iti pannakaisalakan. Dagiti nalinteg-panagpuspusona a Judio ti nangsapul ngarud iti anamong ti Dios babaen panagbabawida kadagiti kakasta nga ar-aramid a natay ken panagpabautisarda tapno isimboloda ti panagbabawida.—Aramid 2:38.
Aniat’ maadaltayo manipud itoy? A dagiti ar-aramid a natay mabalin nga iramanna ti ad-adu pay ngem dagiti dakes wenno imoral nga aramid; lagumenda ti aniaman nga aramid a natay iti naespirituan, ubbaw, wenno awanan-bunga. Ngem saan kadi nga amin a Kristiano agbabawida manipud kakasta nga ar-aramid a natay sakbay ti panagbautisarda? Pudno, ngem dadduma a Kristiano idi umuna a siglo ti kimmapuy agturong iti imoral a kondukta. (1 Corinto 5:1) Ket kadagiti Kristiano a Judio, adda idi pagannayasan nga agsubli iti panagaramid kadagiti ar-aramid a natay ti Mosaiko a Linteg. Kinasapulan a palagipan ni Pablo dagiti kakasta a dida agsubsubli kadagiti ar-aramid a natay.—Galacia 4:21; 5:1.
Panagaluad Maibusor kadagiti Aramid a Natay
Ti ili ni Jehova ita masapul ngarud nga agannadda a dida agkapuy agturong iti silo dagiti aramid a natay. Rautendatayo manipud agarup amin a direksion dagiti panangpilit a makikompromiso iti moral, agbalin a di nasingpet, ken makinamin kadagiti aramid ti seksual a kinarugit. Makapaladingit, rinibo a Kristiano iti tunggal tawen ti rumukrukma kadagiti kakasta a panangpilit ket, no dida agbabawi, mailaksidda manipud Kristiano a kongregasion. Ad-adda pay ngem idi, ngarud, ti maysa a Kristiano masapul nga ipangagna ti balakad ni Pablo idiay Efeso 4:22-24: “Ussubenyon ti daan a personalidad a maitunos iti daan a kurso ti konduktayo ken daydiay mamulmulitan sigun kadagiti manangallilaw a tarigagayna; ngem . . . mapabarokayo koma iti puersa a mangtigtignay iti panunotyo, ken ikawesyo koma ti baro a personalidad a naparsua sigun iti pagayatan ti Dios iti pudno a kinalinteg ken kinasungdo.”
Siempre, dagiti taga Efeso a nagsuratan ni Pablo inkawesdan ti baro a personalidad iti nalawan a rukod. Ngem tinulongan ida ni Pablo a mangtarus a ti panagaramid iti dayta ket maysa nga agtultuloy a pamay-an! No awan di-agsarday a panagregget, mabalin a dagiti manangallilaw a tarigagay nga agtalinaed kas mangrugit nga impluensia ituggodna dagiti Kristiano nga agsubli kadagiti aramid a natay. Pudno met laeng dayta kadatayo ita. Masapul a kankanayon nga ikagumaantayo nga ikawes ti baro a personalidad, a ditay palpalubosan a mamulitan dayta babaen aniaman a kababalin a magun-odan manipud daan a wagas ti panagbiagtayo. Masapul a liklikan—guraen—ti aniaman a porma ti ar-aramid a natay ti lasag. “O, dakayo a managayat ken Jehova, guraenyo ti dakes,” inggunamgunam ti salmista.—Salmo 97:10.
Makomendaran unay, kaaduan iti ili ni Jehova ita impangagda daytoy a balakad ken nagtalinaedda a nadalus iti moral. Dadduma, nupay kasta, ti naisiasi babaen kadagiti aramid a saan met a talaga a dakes ngem pudpudno nga ubbaw ken awan pagimbaganna. Kas pangarigan, dadduma ti naigamer kadagiti gakat iti panagsapul ti kuarta wenno iti pananggun-od kadagiti material a bambanag. Ngem ipakdaar ti Biblia: “Dagidiay agtarigagay a bumaknang matnagda iti pannakasulisog ken maysa a silo ken adu a minamaag ken makaranggas a tarigagay, a mangipalned kadagiti tattao iti pannakadadael ken pannakapukaw.” (1 Timoteo 6:9) Para kadagiti sabsabali, ti sekular nga edukasion nagbalinen a maysa a silo. Pudno, ti maysa a rukod ti sekular nga edukasion mabalin a napateg tapno makagun-od pagtrabahuan. Ngem iti mangibus-tiempo a panangkamat iti adelantado a nailubongan nga edukasion, dadduma ti nangdangranen kadagiti bagbagida iti naespirituan.
Wen, adu nga aramid ti mabalin a saan met a mismo a dakes iti moral. Ngem uray kasta dagita ket natay no saanda a pudpudno a makatulong iti biagtayo ita wenno makairagpat kadatayo ti anamong ken Jehova a Dios. Dagiti kakasta nga aramid ibusenda ti tiempo ken pigsa ngem awan met pataudenda a naespirituan a gunggona, awanan manayon a panangpabang-arna.—Idiligyo ti Eclesiastes 2:11.
Awan duadua nga ikagkagumaanyo ti agbalin a naagawa kadagiti napateg a naespirituan nga aramid. Makatulong, nupay kasta, a sukimatenyo a regular ti bagiyo. Maulit-ulit, mabalin a saludsodanyo ti bagiyo kadagiti saludsod kas iti: ‘Ti kadi pannakipasetko iti serbisio ken itatabunok iti gimong ket agsagsagaba gapu ta inawatko ti saan met a kasapulan a sekular a trabaho?’ ‘Addaanak kadit’ tiempo maipaay iti panaglinglingay ngem bassit laeng ti tiempok agpaay iti panagadal a personal ken ti pamilia?’ ‘Mangbusbosak kadi ti nawadwad a tiempo ken pigsa iti panangtaripato kadagiti material a sanikua ngem diak met mataripato dagidiay agkasapulan idiay kongregasion, kas kadagiti masakit ken dagiti nataenganen?’ Dagiti sungbat kadagitoy a saludsod nalabit ipanayagda ti pagkasapulan iti biangyo a mangted dakdakkel a panangiyun-una kadagiti naespirituan a trabaho.
Agtalinaed a Naagawa iti Serbisio ni Jehova
Kas kunaen ti 1 Corinto 15:58, adda “naruay nga aramid iti trabaho ti Apo.” Kangrunaan isu ti panangikasaba iti Pagarian ken panagaramid-adalan a trabaho. Idiay 2 Timoteo 4:5, inggunamgunam ni Pablo: “Aramidenyo ti panangikasaba iti Naimbag a Damag a trabaho a kangrunaan iti biagyo, iti napasnek a panagserbi.” (Jerusalem Bible) Dagiti panglakayen ken ministerial nga ad-adipen adu met maaramidda iti panangtaripato kadagiti kasapulan ti arban. (1 Timoteo 3:1, 5, 13; 1 Pedro 5:2) Dagiti ulo ti pamilia—adu kadakuada ti agmaymaysa a nagannak—addaanda met kadagiti nadagsen a responsabilidad iti panangtaripato kadagiti pamiliada ken panangtulong kadagiti annakda a dumakkel iti pannakirelasionda iti Dios. Ti kakasta a trabaho ket mabalin a makabannog, uray la manglapunos, no dadduma. Ngem adayo ket a maibilang a natay, mangiyeg dagita iti napaypayso a pannakapnek!
Ti parikut ket: Kasano a mailugaran ti maysa nga aramiden amin dagitoy kasapulan a napateg nga aramid? Nasken ti disiplina iti bagi ken personal a panangiyurnos. Idiay 1 Corinto 9:26, 27, insurat ni Pablo: “Ti panagtarayko ket saan a kasla makigasanggasat; ti pannakidangadangko saan a kasla makikabil iti angin; ngem gubgubatek ti bagik ket iturayak, di la ket ta, idinto a kinaskasabaak dagiti sabali, mapagtalawakto met.” Maysa a pamay-an a maipakat ti prinsipio daytoy a teksto isu ti maulit-ulit a panangsukimat iti personal nga inaldaw nga aramidtayo ken estilo ti panagbiag. Nalabit a nasayaat pannakatakuatyo a maikkatyo ti adu kadagiti di-nasken a mangal-alun-on iti tiempo ken pigsayo.
Kas pangarigan, ti kadi nawadwad a pigsa ken tiempoyo ket magasgastar iti panagbuya ti TV, panaglinglingay, gagangay a panagbasbasa, wenno pagesman? Sigun iti maysa nga artikulo iti The New York Times, ti gagangay a nataengan idiay Estados Unidos maigamgamer iti “nasurok ngem 30 nga oras iti maysa a lawas” iti panagbuya ti TV. Mabalin la ketdi nga ipan dayta a tiempo iti nasaysayaat a pakausaran! Ipadamag ti asawa ti maysa nga agdaldaliasat a manangaywan: “Ngangngani naan-anay nga inwaksikon amin a mangsayang ti tiempo, kas iti panagbuya ti telebision.” Aniat’ resultana? Nabalinanna a basaen a sibubukel ti dua a tomo nga enciclopedia ti Biblia nga Insight on the Scriptures!
Mabalin a kasapulanyo met nga usigen no agingga iti ania a mapagbalinyo a simple ti estilo ti panagbiagyo. Kuna ni Salomon: “Ti turog ti agbannog a tao nasam-it, uray no mangan iti bassit wenno adu; ngem ti naruay a sanikua ti nabaknang dinanto palubosan a maturog.” (Eclesiastes 5:12) Naruay kadi a tiempo ken pigsayo ti maipapaay iti panangtaripato kadagiti di-nasken a material a sanikua? Pudno, no ad-adu a banag ti matagikuatayo, ad-adu met ti taripatuen, isiguro, tarimaanen, ken salaknibantayo. Saan ngata a pagimbaganyo ti basta panangiliklik iti bagiyo kadagiti kakasta a sanikua?
Ti kaadda ti maysa a realistiko nga iskediol ket maysa pay a pamay-an tapno nasaysayaat panangaramatyo iti tiempoyo. Ti kasta nga iskediol rebbeng a ramanenna ti pagkasapulan ti maysa maipaay iti panagpalpaliwa wenno panaglinglingay. Ngem dagiti naespirituan nga interes rebbeng a maiyun-una. Rebbeng a mailasin ti tiempo iti itatabuno a regular kadagiti amin a gimong ti kongregasion. Nalabit nga ikeddengyo met a nasaksakbay no ania dagiti aldaw wenno rabii a mabalin a maipaay iti trabaho a panag-ebanghelio. Buyogen naannad a panangiplano, mabalinyo pay ngata a maparang-ay ti pannakiramanyo iti serbisio, nalabit no manen agserbi kas maysa nga auxiliary payunir. Siguraduenyo, nupay kasta, ti mangiyiskediol ti tiempo agpaay panagadal a personal ken iti pamilia, agraman panagsagana a naimbag agpaay kadagiti gimong. Babaen panagbalin a nakasagana, saan laeng nga adut’ magunggonayo a mismo manipud kadagiti gimong no di ket nasaysayaatto ti takderyo a “mangparegta iti ayat ken naimbag nga ar-aramid” babaen kadagiti kumentoyo.—Hebreo 10:24.
Ti panangilugar iti tiempo nga agadal mabalin a kalikagumanna ti mangaramid kadagiti sumagmamano a panagsakripisio. Kas pangarigan, dagiti pamilia ti Bethel iti intero a lubong bumangonda a nasapa iti binigat tapno salaysayenda ti teksto iti dayta nga aldaw. Posible kadi para kadakayo a gumatang ti bassit a tiempo iti tunggal agsapa agpaay iti personal a panagadal? Kuna ti salmista: “Inunaak ti bannawag ti agsapa, tapno agikkisak koma maipaay iti tulong. Nanginanamaak kadagiti saom.” (Salmo 119:147) Siempre, ti ibabangon a nasapa kalikagumanna ti panangiyiskediol iti kalalainganna nga oras ti pannaturog tapno nakaradkad ken nakainanakanto a bumangon iti sumaganad nga aldaw.
Dagiti Gunggona ti Panagbalin a Naagawa iti Serbisio ni Jehova
Ti panagbalin nga “aduan kadagiti aramid ti Apo” kalikagumanna ti panagplano, disiplina, ken panagsakripisio. Ngem tagiragsakenyonto ti di mabilang a gunggona kas resultana. Gapuna nga agtalinaed a naagawa, saan a kadagiti natay wenno ubbaw nga ar-aramid a mangiyeg laeng kinaawan serbina ken ut-ot, no di ket iti serbisio ni Jehova. Gapu ta babaen kakasta a trabaho a maiparangarangyo ti pammatiyo, magun-odyo ti anamong ti Dios, ken, kangrunaanna, ti gunggona a biag nga agnanayon!
[Ladawan iti panid 28]
Ti panagaramid iti maysa a realistiko nga iskediol tulonganna ti maysa a Kristiano a mangaramat nga ad-adda a nainsiriban iti tiempona