Makasarakkayo ti Liwliwa Kadagiti Panawen ti Dukot
KASANOT’ rebbeng a panangmatmattayo kadagiti rikna ti panagdukot? No dedikadotayo ken Jehova, rebbeng kadi a matmatantayo ida kas karkarna gapu iti nakaskasdaaw a namnamatayo ken dagiti naespirituan a kinabaknangtayo? Dagiti kadi kasta a rikrikna kaipapananda a saantayo a maibagay iti naespirituan maipaay iti serbisio ti Dios?
“Ni Elias ket maysa a tao nga addaan rikrikna kas kadatayo,” insurat ni adalan a Santiago. (Santiago 5:17) Nupay ti Dios inaramatna ni Elias iti naisangsangayan a pamay-an, uray dayta a matalek a mammadto nakarikna met ti dukot. “Umdasen!” impukkaw naminsan ni Elias. “Ita, O Jehova, alaemon ti kararuak, ta saanak a naim-imbag ngem kadagiti ammak.” (1 Ar-ari 19:4) Ti manangsalimetmet-kinatarnaw a tao a ni Job, ni matalek a babai nga Ana, ken sabsabali pay a nasungdo nga adipen ni Jehova nakapasarda ti dukot. Uray ni nadiosan a salmista David inkararagna: “Dagiti dandanag toy pusok dimmakkelda; ay alawennak kadi kadagiti pakarigatak.”—Salmo 25:17.
Ti panangaramat ni Jehova kadagiti tattao iti serbisiona dina aramiden ida a naan-anay nga awan pagdanaganda. Addaanda pay laeng kadagiti natauan a pakapilawan ken rikrikna ket mabalin a mapasaranda ti dukot no addada iti sidong ti pannakasuot. (Aramid 14:15) Nupay kasta, dagiti adipen ti Dios addaanda ti nasaysayaat a tulong ngem kadagiti sabsabali iti panangsaranget kadagiti emosional a pakadagsenan. Usigentayo ti sumagmamano a pangarigan ti Biblia tapno makitatayo no aniat’ timmulong kadagiti sumagmamano nga indibidual tapno maparmekda ti mental a leddaang ken rikrikna ti dukot.
Nakasarak ti Liwliwa ti Agdukdukot nga Apostol
Ammo ni apostol Pablo no aniat’ rikna ti agsennaay. “Kinapudnona,” kunana, “idi dimtengkami ditoy Macedonia, awan idi ti bang-ar ti lasagmi . . . Iti ruar riribuk, iti uneg dandanag. Nupay kasta, ti Dios, a mangliwliwa kadagiti napadagsenan, liniwliwanakami babaen ti kaadda ni Tito.” (2 Corinto 7:5, 6) Ti panagsennaay ni Pablo ket pinataud dagiti sumagmamano a mamagdukot a kasasaad a maigiddato a mapaspasamak. Adda dagiti “riribuk iti ruar”—nakaro a pannakaidadanes a mamagpeggad iti biag a mismo. (Idiligyo ti 2 Corinto 1:8.) Kasta pay met, adda dagiti “dandanag iti uneg” iti porma dagiti panagdanag maipapan kadagiti kongregasion, kas iti adda idiay Corinto.
Sumagmamano a bulan sakbayna, naisuraten ni Pablo ti umuna a suratna kadagiti Kristiano a taga Corinto. Iti dayta kinondenarna dagiti sumagmamano a dakes unay a kasasaad idiay kongregasion ken agparang nga isut’ maseknan iti no kasanot’ panangipangag dagiti taga Corinto iti suratna. Nupay kasta, naliwliwa ni Pablo idi dimteng ni Tito manipud Corinto buyogen makaay-ayo a report maipapan iti panangipangagda. Umasping iti dayta, mabalin nga aramaten ni Jehova ti maysa kadagiti agdama-aldaw nga adipenna tapno iyegna ti naimbag a damag ken pabang-aranna ti panagdukottayo.
No Kasano a Matmatan dagiti Inted-Dios nga Annongen
Sumagmamano a Kristiano ti addaan maysa a rukod ti panagdukot no maipanggep iti ministerioda. Kinapudnona, dadduma kadagiti adipen ni Jehova ti nangipagarup a dagiti inted-Dios nga annongen ket dakkel unay sapulenda tapno maitungpalda ida. Kas pangarigan, narikna ni Moises nga isut’ di maitutop nga agbalin a pannakabagi ti Dios agpaay kadagiti Israelitas idiay Egipto. Kadagiti sabsabali pay a bambanag, kunana nga isut’ saan a nalaing nga agsao. (Exodo 3:11; 4:10) Ngem buyogen panagtalek iti Dios ken kaadda ni Aaron kas pannakangiwatna, inyusuat ni Moises nga itungpal ti annongenna.
Idi agangay ni Moises saanen a nagpannuray ken Aaron. Umasping iti dayta, dadduma ti nariknada idi damo a narigat ti Nakristianuan a ministerio, ngem immawatda ti pannakasanay ket nagbalinda a nalaing a managebanghelio. Kas pangarigan, adu nga agtutubo a Saksi ni Jehova ti rimmang-ayen tapno agbalinda nga amin-tiempo a manangaskasaba kas payunir ken misionero. Makaliwliwa a maammuan a ni Jehova ket kanayon a mabalin a pagpannurayan tapno pagbalinenna a kualipikado dagiti Kristiano a ministro ken pabilgenna ida nga itungpal dagiti inted-Dios nga annongenda.—Zacarias 4:6; 2 Corinto 2:14-17; Filipos 4:13.
Liwliwa No Pagdukoten dagiti Panagbabawi
Mabalin a masnaayantayo agsipud ta agbabbabawitayo a ditay nakaaramid ti ad-adu iti serbisio ti Dios. Maysa a kabsat a lalaki a nagbalinen nga inaktibo iti adu a tawen ti nangrugi manen a makipaset iti ministerio ti tay-ak. Di nagbayag kalpasanna, isut’ nagsakit iti nakaro ket isut’ naidalit. Kuna ti nasnaayan a kabsat: “Idi, a kinabaelak koma ti agbalin nga aktibo, liniklikak ti responsabilidad. Ita, ta kayatko ti agbalin nga aktibo, diak met kabaelanen.”
Saan kadi a nainsiriban nga aramidentayo ti aginggat’ kabaelantayo itan imbes a busbosentayo ti emosional a pigsatayo iti no aniat’ napasamak iti napalabas? Dagiti nainlasagan a kakabsat ni Jesus iti ina a da Santiago ken Judas dida nagbalin a manamati agingga iti kalpasan ti ipapatay ken panagungarna. No naaddaanda man kadagiti panagbabawi gapu itoy, daytoy ti saan a nangpasardeng kadakuada manipud panagbalinda nga adipen ti Dios ken mannurat pay ti Biblia.
Di Pulos Liwayan ti Panagkararag
No masnaayan, ti ili ti Dios rebbeng a sipapasnek nga agkararagda. Kinapudnona, dagiti Kasuratan naglaonda kadagiti adu a kararag a naiyebkas kadagiti panawen ti dukot. (1 Samuel 1:4-20; Salmo 42:8) Mabalin nga ipagarup dagiti dadduma: ‘Masnaayanak unay ket diak makapagkararag.’ No kasta apay a dikay utoben ni Jonas? Bayat ti kaaddana idiay tian ti ikan, kunana: “Idi a toy kararuak nagkapuy kaniak, nalagipko ni Jehova. Ket ti kararagko dimmanon kenka, iti nasantuan a templom. . . . Agidatonakto kenka a mabuyogan iti timek ti panagyaman. Tungpalekto ti inkarik. Ti pannakaisalakan agtaud ken Jehova.” (Jonas 2:4-9) Wen, nagkararag ni Jonas, ket isut’ liniwliwa ken inispal ti Dios.
Nupay maysa a kabsat a babai idiay Sweden ti nagpayunir iti adun a tawtawen, isut’ kellaat a naupay ken nabannog agpapan pay makagunggona a ministerio. Dinakamatna ti panagsennaayna iti kararagna ken Jehova. Sumagmamano nga aldaw kalpasanna, isut’ immawat ti maysa nga awag iti telepono manipud maysa a kabsat a lalaki idiay sanga nga opisina ti Watch Tower Society. Inyimtuod ti lalaki no isut’ makatulong sadiay uray maysa laeng nga aldaw iti tunggal lawas gapu iti pannakapalawa ti Bethel. Idi agangay kuna ti kabsat a babai: “Ti kasasaad idiay Bethel ken ti kaadda ti gundaway a pannakakita iti panangpalawa a trabaho ken pannakipaset iti dayta ti nangted kaniak iti kanayonan a pigsa a kasapulak.”
No masnaayantayo, nasayaat no lagipentayo a ti kararag ket maysa a pamay-an a panglaban iti panagsennaay. (Colosas 4:2) Iti sungbat kadagiti kararagtayo, mabalin a lukatan ni Jehova ti ruangan a mangiturong iti dakdakkel a trabaho iti serbisiona, wenno mabalin a bendisionanna ti ministeriotayo babaen naparang-ay a kinabunga. (1 Corinto 16:8, 9) Iti aniaman a pasamak, “ti bendision ni Jehova—isu ti mangpabaknang, ket awan inayonna nga ut-ot iti dayta.” (Proverbio 10:22) Sigurado a pasarantaenna ti rikriknatayo.
Pagdukoten dagiti Panagduadua?
Sagpaminsan, ti maysa kadagiti adipen ni Jehova mabalin nga addaan kadagiti panagduadua. No mapasamak dayta kadatayo, rebbeng a ditay dagdagus nga ipato a napukawtayon ti anamong ti Dios. Ni Jesus dina inwaksi ni apostol Tomas gapu iti panagduaduana kadagiti impadamag dagiti nakasaksi iti panagungar ni Apona. Imbes ketdi, siaayat a tinulongan ni Jesus ni Tomas tapno maparmekna dagiti panagduaduana. Ket nalaus ti ragsak ni Tomas idi nabigbigna a sibibiag ni Jesus!—Juan 20:24-29.
Babaen ulbod a pannursuroda, panagtanabutob, ken dadduma pay, “dagiti di nadiosan a tattao” a simrek a di nadnadlaw iti umuna-siglo a Kristiano a kongregasion pagbalbalinenda dagiti dadduma nga agduadua. Ngarud, insurat ni adalan a Judas: “Itultuloyyo nga ipakita ti asi kadagiti dadduma nga addaan panagduadua; ispalenyo ida babaen panangagawyo kadakuada manipud iti apuy.” (Judas 3, 4, 16, 22, 23) Tapno agtultuloyda nga umawat iti naasi a konsiderasion ti Dios, dagiti kapada ni Judas a managdaydayaw—nangnangruna dagiti panglakayen ti kongregasion—kasapulanda nga ipakita ti asi kadagiti agduadua a maikari iti dayta. (Santiago 2:13) Agngangabit ti biagda nga agnanayon, ta addada iti peggad “ti apuy” ti agnanayon a pannakadadael. (Idiligyo ti Mateo 18:8, 9; 25:31-33, 41-46.) Ket anian a rag-o ti adda no ti tulong ket siaanus a maited kadagiti pada a manamati nga addaan kadagiti panagduadua ket agbalinda a nabileg iti naespirituan!
No dagiti mamagleddaang a suot pagduaduaennatayo no adda met laeng ti Dios kadatayo, kasapulantayo ti agbalin nga espesipiko kadagiti kararagtayo. Iti sidong dagiti kakasta a kasasaad, ditay agsarday a dumawat iti sirib ken Jehova. Isut’ mangted a sipaparabur a dinatayo umsien gapu iti panagkurangtayo iti sirib wenno panagkiddaw iti dayta. Masapul nga “itultuloytayo ti agdawat iti pammati, a di pulos agduadua,” ta ti agduadua ket “kas iti dalluyon ti baybay nga iduron ti angin ket agpallayug” iti amin a direksion. Dagiti kakasta a tao awan maurayda manipud iti Dios gapu ta agduduada, “saan a natibker” iti panagkararag ken iti isuamin a wagasda. (Santiago 1:5-8) Gapuna a mamatitayo koma a ni Jehova tulongannatayo a mangmatmat a siuumiso kadagiti suottayo ken maibturantayo ida. Mabalin a maipaasikaso kadatayo dagiti Kasuratan babaen kadagiti kapammatiantayo wenno kabayatan ti panagadal ti Biblia. Dagiti pasamak a maimaniobra baeten pannakabalin ti Dios mabalin a tulongannatayo a makaawat no aniat’ rebbeng nga aramidentayo. Dagiti anghel mabalin a makiramanda iti panangiturong kadatayo, wenno mabalin nga umawattayo ti panangiwanwan babaen nasantuan nga espiritu. (Hebreo 1:14) Ti kangrunaan a banag isu ti panagkararag maipaay iti sirib buyogen naan-anay a panagtalek iti naayat a Diostayo.—Proverbio 3:5, 6.
Laglagipen a ni Jehova Mangted Liwliwa
Sikakararag a nagpannuray ni Pablo ken Jehova ket ammona nga isut’ Gubuayan ti liwliwa. Insurat ni apostol Pablo: “Madaydayaw koma ti Dios ken Ama ni Apotayo a Jesu-Kristo, ti Ama dagiti naayat nga asi ken Dios ti amin a liwliwa, isu a mangliwliwa kadakami iti amin a pakarigatanmi, tapno mabalinmi a liwliwaen dagiti adda iti uray ania a pakarigatan baeten iti liwliwa a pangliwliwa met laeng ti Dios kadakami.”—2 Corinto 1:3, 4.
Ti Dios ti amin a liwliwa ket siaammo kadagiti pagdukotan a mapaspasaran dagiti adipenna ket kayatna ida nga ikkan ti bang-ar. Maipanggep iti pannakaseknan ni Pablo kadagiti taga Corinto, dimteng ti bang-ar baeten ken Kristiano a kaduana a ni Tito. Maysa daytoy a pamay-an a maliwliwatayo ita. No agdukottayo, rebbeng ngarud a liklikantayo ti panangisina kadagiti bagbagitayo. (Proverbio 18:1) Ti pannakilangen kadagiti pada a Kristiano ket maysa kadagiti pamay-an a pangliwliwa kadatayo ti Dios. Mabalin a panunotentayo: ‘Naladingitak unay ket awan umdasen a pigsak tapno makikadua kadagiti Kristiano a gagayyemko.’ Nupay kasta, rebbeng a labanantayo ti kakasta a rikna ket ditay paidaman dagiti bagbagitayo iti liwliwa a maitukon dagiti kapammatiantayo.
Dikay Sumuksuko!
Dadduma kadatayo mabalin a dida pay napasaran ti kasta kadagsen a suot a nakapadasantayo iti nakaro a panagsennaay. Ngem ti manglapunos a sakit, ti ipapatay ti asawa, wenno sabali pay a makasuot unay a kasasaad ti makaiyeg emosional a pagdukotan. No bilang man mapasamak dayta, ditay koma ipato a talaga a masakittayo iti naespirituan. Ti maysa nga agsensennaay a tao ket mabalin a kualipikado unay maipaay iti serbisio ti Dios, a matulonganna pay dagiti sabsabali iti naespirituan. Inyunay-unay ni Pablo kadagiti kakabsat nga “agsaoda a mangliwliwa kadagiti nasnaayan a kararua,” a dida agin-inap a nakaaramidda iti dakes a banag ken masakitda iti naespirituan. (1 Tesalonica 5:14) Nupay ti panagsennaay no dadduma ket nainaig iti di umiso nga aramid ken panagbasol, saan a kasta ti kaso kadagidiay agserserbi iti Dios nga addaan nasin-aw a puso. Ti panagdayawda, nalabit maipapaay buyogen nakaro a rigat, ket makaay-ayo ken Jehova. Ay-ayatenna ida ken arayatenna ida buyogen dagiti kasapulan a tulong ken liwliwa.—Salmo 121:1-3.
Dagidiay mangbukel iti natda ti naespirituan nga Israel ket pinagsennaay unay dagiti suot idi tawen 1918. (Idiligyo ti Galacia 6:16.) Ti urnosda iti panangasaba ket gistay nadadael, a dadduma kadakuada ti nabalud nga awan gapgapuna, ken adu kadagiti dati a kakaduada ti nagbalin a di nasungdo, bumusbusor nga apostata. Kasta pay met, di naawatan dagiti matalek a napulotan no apay nga impalubos ti Dios a mapasamak amin dagitoy. Iti naunday a panawen ‘nagmulada kadagiti bukel buyogen lulua,’ ngem dida simmuko. Nagtultuloyda a nagserbi ken Jehova ken sinukimatda met dagiti bagbagida. Ania ti resultana? ‘Nagawidda buyogen narag-o a panagdir-i, nga inkuyogda dagiti binettekda.’ (Salmo 126:5, 6) Mabigbig itan dagiti napulotan nga impalubos ti Dios dagiti kakasta a suot tapno gugoranna ida agpaay iti umad-adani nga internasional a trabaho a panagani.
No bilang man masnaayantayo gapu ta linawlawdatayo dagiti nagduduma a suot, magunggonaantayo manipud kapadasan dagiti napulotan a natda. Imbes a sumukotayo, itultuloytayo nga aramiden no ania ti umiso, uray no aramidentayo ti kasta bayat nga agsangsangittayo. Inton agangay, addanto dalan a ruaran manipud kadagiti suottayo, ket ‘agawidtayonto buyogen narag-o a panagdir-i.’ Wen, ti rag-o—maysa a bunga ti nasantuan nga espiritu ti Dios—ket kukuatayonto gapu ta naibturantayo dagiti suot. Para kadatayo, sigurado a ni Jehova agbalinto a “ti Dios ti amin a liwliwa.”