Liwliwaennatayo ni Jehova iti Amin a Rigattayo

1, 2. Kasano a liwliwaennatayo ni Apo Jehova kadagiti pakarigatantayo, ken ania ti ipasigurado ti Saona?

MAYSA nga agtutubo a kabsat, nga awagantayo iti Eduardo, ti nakisarita iti naasawaan a panglakayen a ni Stephen. Pampanunoten ni Eduardo ti linaon ti 1 Corinto 7:28: “Dagidiay mangasawa addaandanto ti rigat iti lasagda.” Insaludsodna, “Ania daytoy a ‘rigat,’ ken kasanok a sanguen dayta no kas pagarigan agasawaak?” Sakbay a sinungbatan dayta ni Stephen, imbagana ken Eduardo a panunotenna ti sabali pay nga insurat ni apostol Pablo, a ni Jehova ket ‘Dios ti amin a liwliwa, a mangliwliwa kadatayo iti amin a rigattayo.’​—2 Cor. 1:3, 4.

² Nakadungdungngo nga Ama ni Jehova, ken liwliwaennatayo no adda dagiti pakarigatantayo. Mabalin a napadasamon a mismo ti tulong ken panangidalan ti Dios, kaaduanna a babaen iti Saona. Masiguradotayo a kayatna ti kasayaatan para kadatayo, kas iti inaramidna idi kadagiti adipenna.​—Basaen ti Jeremias 29:11, 12.

3. Ania dagiti saludsod a pagsasaritaantayo?

³ Siempre, nalaklakatayo a sanguen dagiti problema wenno pakarigatantayo no ammotayo dagiti makagapu kadagita. Kasta met laeng dagiti rigat nga adda koneksionna iti biag ti agassawa wenno pamilia. Ania ngarud ti dadduma a banag a makagapu iti ‘rigat iti lasag’ a tinukoy ni Pablo? Ania dagiti pagarigan idi tiempo ti Biblia ken ita a makatulong kadatayo tapno maliwliwatayo? Nalaklakatayo a sanguen dagiti pakarigatan no ammotayo ti sungbat dagita.

PANNUBOK​—‘RIGAT ITI LASAG’

4, 5. Ania ti dadduma a makagapu iti ‘rigat iti lasag’?

⁴ Kastoy ti kuna ti Dios kalpasan ti panangparsuana iti tao: “Ti maysa a lalaki panawannanto ti amana ken ti inana ket masapul a makitipon iti asawana ket masapul nga agbalinda a maymaysa a lasag.” (Gen. 2:24) Imbaga dayta ni Jehova idi kinasarna ti umuna nga agassawa. Ngem gapu iti kinaimperpekto, ti panagasawa ken panagpamilia ket mabalin a mamagproblema iti relasion dagiti agkakapamilia. (Roma 3:23) Gagangay a ti autoridad dagiti nagannak ket sukatan ti autoridad ti asawa a lalaki. Inyurnos ti Dios a ti lalaki ti mangidaulo ken baketna. (1 Cor. 11:3) Saan a nalaka dayta iti dadduma a kabbaro nga agassawa. Sigun iti Sao ti Dios, masapul nga akseptaren ti asawa a babai a ni lakayna ti mangidaulo kenkuana imbes a dagiti nagannakna. Mabalin a narigat kadagiti kabbaro nga agassawa ti makibagay kadagiti katuganganda ket mangpataud dayta iti problema.

⁵ Tumaud ti sabali pay a pakadanagan no ibaga ti asawa a babai ken lakayna, “Masikogak.” Gagangay a malaokan iti danag ti ragsakda gapu kadagiti mabalin a tumaud a problema bayat ti panagsikog wenno kalpasan dayta. Panunotenda pay dagiti paggastuanda, iti agdama ken iti masanguanan. Ad-adunto pay a panagbalbaliw ti aramidenda inton maipasngay ti anakda. Mabalin a maipamaysanton ti oras ken atension ti ina iti anakna. Iti adu a kapadasan, marikna ti asawa a lalaki a kasla awanen ti panawen ni baketna kenkuana gapu iti panangaywanna iti anakda. Adda metten baro a responsabilidad ti kabbaro nga ama. Immadun ti obligasionna ta addan baro a miembro ti pamiliana nga aywanan ken biagenna.

6-8. Apay a makuna a ‘rigat iti lasag’ ti pannakapaay ti arapaap a maaddaan iti anak?

⁶ Adda pay sabali a rigat ti dadduma nga agassawa. Saanda a maaddaan iti anak uray no kayatda koma la unay. No saan nga agsikog ti asawa a babai, mabalin a malidayan iti kasta unay. Saan a nalaka ti biag ti adda asawana wenno ti mangpadakkel iti anak, ngem ti pannakapaay a maaddaan iti anak ket makuna latta a ‘rigat iti lasag.’ (Prov. 13:12) Idi panawen ti Biblia, nakababain ti awan anakna. Impeksa ti asawa ni Jacob a ni Raquel ti nakaro a saem a marikriknana idi makitkitana nga adda annak ni manangna. (Gen. 30:1, 2) Kadagiti lugar a gagangay ti maaddaan iti dakkel a pamilia, masansan a maisaludsod kadagiti misionero no apay nga awan ti anakda. Uray no ilawlawagda a naimbag ti rason, mabalin latta nga ibagada, “Ket ikarkararagandakayo, a!”

⁷ Kitaentayo met ti situasion ti kabsat a babai a taga-England a kayatna la unay ti maaddaan iti anak ngem saan a napasamak. Nadanonna ti edad a saanen a posible a maaddaan iti anak. Inaminna a kasta unay ti pannakapaayna ta saanen a mapasamak iti agdama ti ar-arapaapenna. Gapuna, nagamponda ken lakayna. Ngem kinunana: “Nakalidlidayak latta idi. Naragsak ti agampon, ngem sabali latta ti ragsakmo no anakmo a mismo dayta.”

⁸ Kuna ti Biblia a natalged ti Kristiano a babai no adda anakna. (1 Tim. 2:15) Ngem di kayat a sawen dayta a ti panagpasngay wenno ti kaadda iti anak ket agresulta iti biag nga agnanayon. Tumuktukoy ketdi dayta iti situasion a no adda anak nga aywanan ti maysa nga ina, ken no as-asikasuenna dagiti kasapulan ti pamiliana, maliklikanna ti makitsismis ken makibiang iti biag ti dadduma. (1 Tim. 5:13) Nupay kasta, mabalin latta a maipasango iti rigat a kakuykuyog ti panagasawa ken panagpamilia.

9. Kasano a makuna a naidumduma a rigat ti matayan iti asawa?

⁹ No mapagsasaritaan dagiti rigat a mainaig iti panagasawa, mabalin a saan a dagus mapanunot ti dadduma ti ipapatay ti ay-ayaten iti biag. Wen, ti ipapatay ti dungdungnguenda nga asawa ti naidumduma a rigat a napasaran ti dadduma. Mabalin a saan a namnamaen ti nabalo nga asawa a mapasamak kenkuana dayta. Natibker ti pammati dagiti Kristiano iti kari ni Jesus a panagungar a mabasa iti Sao ti Dios. (Juan 5:28, 29) Ania ti maitulong dayta iti nabalo nga asawa? Makaliwliwa dayta kenkuana. Dayta ti maysa a pamay-an ti nadungngo nga Amatayo a tumulong ken mangliwliwa kadagiti agpaspasar iti rigat. Ammuentayo ita no ania ti narikna ti dadduma nga adipen ti Dios iti panangliwliwa kadakuada ni Jehova ken no kasano a nakatulong dayta kadakuada.

LIWLIWA NO ADDA PROBLEMA

10. Kasano a nabang-aran ni Anna? (Kitaen ti ladawan iti rugi ti artikulo.)

¹⁰ Adda met rigat a nakaipasanguan ni Anna, ti dungdungnguen nga asawa ni Elcana. Awanan latta iti anak uray no adda idin annak ti sabali nga asawa ni Elcana a ni Penina. (Basaen ti 1 Samuel 1:4-7.) “Kada tawen” nga agtultuloy nga inuy-uyaw ni Penina ni Anna. Gapu iti dayta, masaksaktan ken marigrigatan unay ni Anna. Mabang-aran idi no ikararagna ken Apo Jehova ti situasionna. Wen, ‘nagkararag iti napaut’ ken Jehova. Ninamnamana kadi a sungbatan ni Apo Jehova ti kararagna? Sigurado a kasta ta “saanen a nagdanag” ni Anna kalpasan dayta. (1 Sam. 1:12, 17, 18) Nagtalek ken Jehova a maaddaanto met laeng iti anak wenno solusionan ti Dios ti problemana iti sabali a pamay-an.

11. Kasano a makaliwliwa kadatayo ti panagkararag?

¹¹ Agtultuloy latta dagiti pakarigatan agingga a saantayo a perpekto ken bayat nga addatayo pay laeng iti lubong ni Satanas. (1 Juan 5:19) Ngem imbag laengen ta ni Jehova ti “Dios ti amin a liwliwa”! Ti panagkararag ti maysa a pamay-an a makaawattayo iti tulong kadagiti problema wenno pakarigatantayo. Imbukbok ni Anna ti amin a linaon ti pusona ken Jehova. No adda met dagiti rigat a pakaipaspasanguantayo, saantay la koma nga ibaga ken Apo Jehova ti marikriknatayo. Masapul nga umararawtayo kenkuana, kayatna a sawen, agpakaasitayo babaen ti napasnek a panangikararagtayo kenkuana iti linaon ti pusotayo.​—Fil. 4:6, 7.

12. Ania ti nakatulong ken Ana nga agbalin a naragsak?

¹² Uray no mariknatayo nga adda dakkel a kurang iti biagtayo​—kaawan man iti anak wenno ipapatay ti ay-ayatentayo iti biag​—adda latta liwliwa a maawattayo. Idi panawen ni Jesus, natay ti asawa ni propetisa Ana kalpasan laeng ti pito a tawen a panagasawada. Awan ti ibaga ti Biblia nga adda anakda. Komustan ni Ana idi agtawen iti 84? Kuna ti Lucas 2:37: “Saan a pulos limmanglangan idiay templo, a mangipapaay iti sagrado a panagserbi iti rabii ken aldaw buyogen dagiti panagayunar ken ar-araraw.” Naliwliwa ken naragsakan ni Ana iti panagdaydayawna ken Jehova.

13. Mangted iti pagarigan no kasano a makaliwliwa dagiti pudno a gagayyem uray no saan a maaramidan dayta dagiti asideg a kakabagian.

¹³ No kanayon a makikaduatayo kadagiti kakabsattayo, maaddaantayo kadagiti pudno a gagayyem ken kakadua. (Prov. 18:24) Malagip ni Paula ti liday a nariknana idi lima ti tawenna ta timmallikud iti kinapudno ni nanangna. Nagrigat dayta ken Paula. Imbag laengen ta adda kakongregasionna a payunir, nga agnagan iti Ann, a nangparegta kenkuana. “Uray diak kapkapin-ano ni Manang Ann, nagdakkel ti naitulongna kaniak,” kuna ni Paula. “Natulongannak nga agtultuloy nga agserbi ken Apo Jehova.” Matalek latta nga agserserbi ni Paula agingga ita. Nakaragragsak met ta kaduana manen ni nanangna nga agserserbi iti kongregasionda. Naragsak met ni Ann ta nagbalin a pannakaina ni Paula iti naespirituan.

14. Ania a bendision ti maawat dagiti mangliwliwa?

¹⁴ Makaparagsak ta no siaayat a tultulongantayo ti dadduma, mabalin a maksayan dagiti negatibo a marikriknatayo. Ammo dagiti kakabsat a babbai, adda man asawada wenno awan, a nakaragragsakda no ikaskasabada ti naimbag a damag kas katrabahuan ti Dios. Ar-aramidenda dayta ta kayatda nga idaydayaw ti Dios. Ibilang pay ti dadduma ti pannakiramanda iti ministerio kas agasda. Sigurado a tumultulongtayo amin iti panagkaykaysa ti kongregasion no ipakitatayo nga ipatpategtayo ti dadduma, dagiti adda iti teritoriatayo ken dagiti kakongregasiontayo. (Fil. 2:4) Nagsayaat a pagtuladan ni apostol Pablo. Nagbalin a kas iti “agtagtagibi nga ina” kadagiti Kristiano idiay Tesalonica; nagbalin pay a naespirituan nga amada.​—Basaen ti 1 Tesalonica 2:7, 11, 12.

LIWLIWA ITI PAMILIA

15. Siasino ti kangrunaan a makinresponsabilidad iti panangisuro iti kinapudno kadagiti annak?

¹⁵ Nagsayaat met no kitaentayo no kasano a matulongan ken maliwliwatayo dagiti pamilia. No dadduma, dagiti kabbaro a kakabsat agpatulongda kadagiti nataengan a kakabsat a mangisuro kadagiti annakda iti kinapudno, wenno payadalanda pay ketdi ida iti Biblia. Iti Kasuratan, dagiti nagannak ti kangrunaan a makinresponsabilidad iti panangisuro ken panangsanay kadagiti annak. (Prov. 23:22; Efe. 6:1-4) Adda dagiti situasion a kasapulan ti tulong ti dadduma ket maapresiar unay dayta. Ngem saan a dayta ti mangikkat iti responsabilidad dagiti nagannak. Napateg ti kanayon a panagsasarita ti pamilia.

16. Ania ti masapul a laglagipentayo no tulongantayo ti annak ti dadduma?

¹⁶ No kayat ti nagannak a sabali ti mangyadal iti annakna, saan koma nga alaen ti napili a mangyadal ti akem dagiti nagannak. Adda dagiti situasion a naidawat iti maysa a kabsat nga iyadalanna ti annak dagiti saan nga interesado iti kinapudno. Nupay kasta, masapul a laglagipen ti kabsat a nupay isu ti mangipapaay iti naespirituan a tulong, saan nga isu ti ama wenno ina dagiti annak nga iyad-adalanna. Ket no agadalda, nasayaat no maaramid dayta iti balay dagiti annak, a kaduada ti nagannakda wenno ti sabali a nataengan iti naespirituan a kabsat, wenno iti maitutop a lugar nga adda makakitkita kadakuada. Iti kasta, saan ida a pagatapan ti dadduma. Manamnama a dagiti met laeng nagannak ti mangitungpalto iti intalek ti Dios a responsabilidadda a mangipaay iti naespirituan a kasapulan dagiti annakda.

17. Kasano a dagiti annak ket agbalin a paggapuan ti liwliwa?

¹⁷ Posible a makaliwliwa iti pamiliada dagiti annak a makasursuro a mangayat iti pudno a Dios ken mangsurot kadagiti bilinna. Maaramidda dayta babaen ti panangrespetoda kadagiti nagannakda ken ti panangtulongda kadakuada kadagiti kasapulanda. Dakkel met ti maitulongda iti espiritualidad ti pamiliada. Sakbay ti Layus, nagdaydayaw ken Jehova ni Lamec nga apoko ni Set. Kuna ni Lamec maipapan iti anakna a ni Noe: “Mangyegto kadatayo iti liwliwa manipud iti aramidtayo ken manipud iti rigat dagiti imatayo nga ibunga ti daga nga inlunod ni Jehova.” Natungpal dayta idi nagpatingga ti lunod. (Gen. 5:29; 8:21) Dagiti annak nga agdaydayaw iti pudno a Dios ket mabalin a paggapuan ti liwliwa ti pamiliada. Matulonganda ti pamiliada a mangibtur kadagiti agdama a pakarigatan ken tapno malasatandanto ti didigra a nakarkaro pay ngem iti Layus.

18. Ania ti makatulong kadatayo a mangibtur iti aniaman a rigat wenno problema a pakaipasanguantayo?

¹⁸ Ti panagkararag, panangutob kadagiti kapadasan iti Biblia, ken kanayon a pannakikadua kadagiti agdaydayaw ken Jehova ti tumultulong ita kadagiti minilion a tattao tapno maliwliwada iti amin a pakarigatanda. (Basaen ti Salmo 145:18, 19.) Ti pannakaammotayo a ni Jehova ti Paggapuan ti pudpudno a liwliwa ket sigurado a makatulong kadatayo a mangibtur iti aniaman a rigat a pakaipasanguantayo​—iti man agdama wenno iti masanguanan.