Ti Espiritu ni Jehova Idalanna ti Ilina

“Ti espiritum naimbag; idalannak koma iti daga ti kinalinteg.”​—SALMO 143:10.

1, 2. Aniat’ mamagsennaay kadagiti nasungdo nga adipen ni Jehova?

‘MASNAAYANAK unay! Sadinot’ pakasarakak iti liwliwa? Binaybay-annak ayan ti Dios?’ Kasta kadi ti riknayo? No wen, saan laeng a dakayo. Nupay agnanaed dagiti nasungdo nga adipen ni Jehova iti rumangrang-ay a naespirituan a paraiso, maipasangoda no dadduma kadagiti makatuok a parikut, suot, ken sulisog a gagangay iti sangatauan.​—1 Corinto 10:13.

² Nalabit riribukennakayo ti napaut a suot wenno nakaro a pakadagsenan. Mabalin a nalidaykayo gapu iti ipapatay ti ingungotenyo ken mariknayo nga agmaymaysakayo. Wenno mabalin nga agpulkok ti pusoyo gapu ta masakit ti patpatgenyo a gayyem. Nalabit paidamannakayo dagiti kasta a kasasaad iti rag-o ken talna ken pagpeggadenna pay ketdi ti pammatiyo. Ania ngay ti rumbeng nga aramidenyo?

Dumawatkayo iti Espiritu ti Dios

3. No adda mangipapaidam kadakayo kadagiti galad kas ti talna ken rag-o, aniat’ nainsiriban nga aramidenyo?

³ No adda mangyad-adayo kadakayo iti talna, rag-o, wenno dadduma pay a nasayaat a galad, nainsiriban nga ikararagyo ti nasantuan nga espiritu ti Dios, wenno aktibo a puersa. Apay? Gapu ta mamataud ti espiritu ni Jehova kadagiti nasayaat a bunga a tumulong iti maysa a Kristiano a mangsaranget kadagiti parikut, suot, ken sulisog. Kalpasan a namakdaar maibusor “kadagiti aramid ti lasag,” insurat ni apostol Pablo: “Iti sabali a bangir, dagiti bunga ti espiritu isu ti ayat, rag-o, talna, mabayag a panagitured, kinaanus, kinaimbag, pammati, kinaemma, panagteppel. Awan linteg a maibusor kadagitoy a bambanag.”​—Galacia 5:19-23.

4. No maipasango iti suot wenno sulisog, apay maitutop nga espesipiko koma ti kararagtayo?

⁴ Gapu iti kita ti suot a sangsanguenyo, nalabit mabigbigyo nga agpeggad a mapukawyo ti kinaemmayo, wenno kinaanus. Ngarud dawatenyo ken Jehova a Dios ti bunga ti espiritu a kinaemma. No maipasangokayo iti sulisog, nangnangruna a kasapulanyo ti bunga a panagteppel. Siempre, maiparbeng met nga ikararag ti tulong ti Dios iti panangsaranget iti sulisog, iti pannakailisi ken ni Satanas, ken ti kasapulan a sirib tapno maibturan ti suot.​—Mateo 6:13; Santiago 1:5, 6.

5. No makariribuk unay dagiti kasasaad ta saanyo nga ammo no ania a bunga ti espiritu ti ikararagyo, aniat’ maaramidan?

⁵ Nupay kasta, no dadduma makatuok unay wenno makariribuk dagiti kasasaad ta saanyo nga ammo no ania a bunga ti espiritu ti kasapulanyo. Kinapudnona, mabalin nga agpeggad ti rag-o, talna, kinaemma, ken dadduma pay a nadiosan a galad. Ania ngaruden? Apay dikay dumawat iti Dios iti nasantuan nga espiritu a mismo ket bay-anyo a mamataud kadagiti kasapulan a bunga nga agtignay iti kasasaadyo? Nalabit masapulyo ti bunga nga ayat wenno rag-o wenno talna wenno kombinasion dagiti bunga ti espiritu. Ikararagyo met a tulongannakay ti Dios a paiwanwan iti espirituna, ta us-usarenna dayta a mangidalan iti ilina.

Ni Jehova Madadaan a Tumulong

6. Kasano nga ingunamgunam ni Jesus kadagiti pasurotna a kasapulan ti agkararag nga awan ressatna?

⁶ Idi nagpaisuro nga agkararag dagiti adalan ni Jesu-Kristo, iti pasetna indagadagna kadakuada nga ikararagda ti espiritu ti Dios. Nagusar nga immuna ni Jesus iti pangngarig a nairanta a mangtignay kadakuada nga agkararag nga awan ressatna. Kinunana: “Asino ngata kadakayo ti adda maysa a gayyemna ket mapanto kenkuana iti tengnga ti rabii ket kunananto kenkuana, ‘Gayyem, pabulodannak man ti tallo a tinapay, ta ti maysa a gayyemko a naggapu iti biahe immay kaniak a nagdagus ket awan ti isangok kenkuana’? Ket isu manipud iti uneg sumungbatto a kunaenna, ‘Dinak alimutengen. Ti ruangan naripkanen, ket dagiti annakko ken siak addakamin iti pagiddaan; diak mabalin ti bumangon ken mangted kenka.’ Kunak kadakayo, nga uray pay no saan koma a bumangon a mangted kenkuana gapu ta gayyemna, bumangonto laeng gapu iti pannakaalimutengna ket itednanto kenkuana ti isuamin a masapulna.”​—Lucas 11:5-8.

7. Aniat’ kababagas dagiti sasao ni Jesus idiay Lucas 11:11-13, ket aniat’ ipanamnama dagitoy kadatayo maipapan iti Dios ken ti espirituna?

⁷ Madadaan ni Jehova a tumulong iti tunggal matalek a dedikado nga adipenna, ken ipangagna dagiti kiddawna. Ngem no ti kasta a tao ‘itultuloyna ti dumawat,’ kas indagadag ni Jesus, ipamatmat daytoy ti naimpusuan a tarigagay ken maysa a panangiparangarang ti pammati. (Lucas 11:9, 10) Innayon ni Jesus: “Asino kadakayo ti idinto nga ama, no ti anakna dumawat kenkuana ti ikan, ikkanna aya ti maysa nga uleg imbes nga ikan? Wenno, no dumawat pay iti maysa nga itlog, itednanto aya kenkuana ti maysa a manggagama? Ngarud, no dakayo, idinto a dakeskayo, ammoyo ti mangted kadagiti nasayaat a sagsagut kadagiti annakyo, nangnangruna pay ni Amayo nga adda sadi langit a mangtedko kadagiti nasayaat a bambanag kadagiti agdawat kenkuana!” (Lucas 11:11-13) No ti naindagaan a naganak, nupay makuna a dakes gapu iti natawid a kinamanagbasol, mangted kadagiti nasayaat a bambanag iti anakna, sigurado nga itultuloy ti nailangitan nga Amatayo ti mangted ti nasantuan nga espirituna iti nasungdo nga adipenna a sipapakumbaba nga agdawat iti dayta.

8. Kasano nga agaplikar ti Salmo 143:10 ken David, Jesus, ken kadagiti moderno-aldaw nga adipen ti Dios?

⁸ Tapno magunggonaan manipud iti espiritu ti Dios, masapul a situtuloktayo a paidalan iti dayta kas ken David. Inkararagna: “Isuronak a mangtungpal iti pagayatam, ta sika ti Diosko. Ti espiritum naimbag; idalannak koma iti daga ti kinalinteg.” (Salmo 143:10) Tinarigagayan ni David, a naglibas iti ari ti Israel a ni Saul, ti paidalan iti espiritu ti Dios tapno masiguradona nga umiso ti ar-aramidenna. Idi agangay inyeg ni Abiatar ti efod ti padi a mangsierto iti pagayatan ti Dios. Kas padi a pannakabagi ti Dios, insuro ni Abiatar no aniat’ aramiden ni David tapno maay-ayo ni Jehova. (1 Samuel 22:17–23:12; 30:6-8) Kas ken David, inturong ti espiritu ni Jehova ni Jesus, ket pudno met daytoy kadagiti napulotan a pasurot ni Kristo kas maysa a klase. Idi 1918-19, inlaksid ida dagiti tao, ket impagarup dagiti relihiuso a kabusorda a maparmekda ida. Inkararag dagiti napulotan ti ruaran manipud iti natay a kasasaadda, ket idi 1919, sinungbatan ti Dios dagiti kararagda, inispalna ida, ken pinaganaygayna manen ida iti serbisiona. (Salmo 143:7-9) Pudno unay, tinulongan ken indalan ti espiritu ni Jehova ti ilina idi, a kas met ita.

No Kasano a Tumulong ti Espiritu

9. (a) Kasano nga agserbi ti nasantuan nga espiritu kas “manangtulong”? (b) Kasanotay nga ammo a saan a maysa a persona ti nasantuan nga espiritu? (Kitaenyo ti footnote.)

⁹ Inawagan ni Jesu-Kristo ti nasantuan nga espiritu a “manangtulong.” Kas pangarigan, kinunana kadagiti pasurotna: “Agdawdawatakto ken Ama ket ikkannakayto ti sabali a manangtulong tapno adda kadakayo nga agnanayon, nga isu ti espiritu ti pudno, isu a ti lubong saanna a mabalin nga awaten, ta dina makita ket dina mailasin. Dakayo ammoyo, ta makipagtaeng kadakayo ken addanto iti unegyo.” Malaksid kadagiti dadduma a bambanag, dayta a “manangtulong” ket maysa a mannursuro, ta inkari ni Jesus: “Ti manangtulong, ti nasantuan nga espiritu, nga ibaonto ti Ama iti naganko, isu isuronanto kadakayo dagiti amin a banag ket ipalagipnanto kadakayo dagiti isuamin nga imbagak kadakayo.” Ti espiritu mangpaneknekto met maipapan ken Kristo, ket impanamnama ni Jesus kadagiti adalanna: “Maipaay kadakayo a mapanak. Ta no diak mapan, ti manangtulong dinto umay kadakayo; ngem no mapanak, ibaonkonto kadakayo.”​—Juan 14:16, 17, 26; 15:26; 16:7.a

10. Kadagiti ania a wagas a nagbalin a manangtulong ti nasantuan nga espiritu?

¹⁰ Manipud langit, imbuyat ni Jesus ti naikari a nasantuan nga espiritu kadagiti pasurotna iti aldaw ti Pentecostes idi 33 K.P. (Aramid 1:4, 5; 2:1-11) Kas manangtulong, pinarang-ay ti espiritu ti pannakaawatda iti pagayatan ken panggep ti Dios ken impakaammona kadakuada ti naimpadtuan a Saona. (1 Corinto 2:10-16; Colosas 1:9, 10; Hebreo 9:8-10) Pinabileg met dayta a manangtulong dagiti adalan ni Jesus nga agbalin a saksi iti intero a daga. (Lucas 24:49; Aramid 1:8; Efeso 3:5, 6) Itatta, matulongan ti nasantuan nga espiritu ti maysa a dedikado a Kristiano a rumang-ay iti pannakaammo no gundawayanna dagiti naespirituan a probision ti Dios babaen ti “matalek ken naannad nga adipen.” (Mateo 24:45-47) Makatulong ti espiritu ti Dios babaen ti panangipaayna iti tured ken pigsa a kasapulan iti panangpaneknek kas maysa kadagiti adipen ni Jehova. (Mateo 10:19, 20; Aramid 4:29-31) Nupay kasta, ti nasantuan nga espiritu tulonganna met ti ili ti Dios iti dadduma pay a pamay-an.

“Buyogen dagiti Un-unnoy a Di Maiyebkas”

11. No kasla manglapunos ti suot, aniat’ rumbeng nga aramiden ti maysa a Kristiano?

¹¹ No maipasango ti maysa a Kristiano iti suot a kasla manglapunos, aniat’ rumbeng nga aramidenna? Ay ket, ikararagna ti nasantuan nga espiritu, ket bay-anna nga agtignay! “Ti espiritu tulongannatayo iti kinakapuytayo,” kinuna ni Pablo, “ta ditay ammo no kasano ti panagkararagtayo a kas maiparbeng, ngem ti espiritu met laeng ibabaetnatayo a buyogen dagiti un-unnoy a di maiyebkas. Ngem ti mangsukimat kadagiti puspuso ammona no ania ti tarigagay ti espiritu, gapu ta isu ibabaetna dagiti sasanto kas iti pagayatan ti Dios.”​—Roma 8:26, 27.

12, 13. (a) Kasano nga agaplikar ti Roma 8:26, 27 kadagiti kararag nangruna kadagiti narikut a kasasaad? (b) Aniat’ inaramid ni Pablo ken dagiti kakaduana idi nagsagabada ti rigat iti distrito ti Asia?

¹² Dagiti sasanto nga ibabaet ti espiritu ti Dios isu dagiti napulotan a pasurot ni Jesus, nga addaan nailangitan a namnama. Ngem nailangitan man wenno naindagaan ti namnamayo, kas Kristiano magun-odanyo ti tulong ti nasantuan nga espiritu ti Dios. No dadduma sungbatan a direkta ni Jehova ti espesipiko a kararag. Ngem no maminsan, nalabit mariribukankayo unay ta saanyo a maipeksa ti riknayo ket kabaelanyo laeng ti umararaw ken Jehova kadagiti asug a di maiyebkas. Kinapudnona, nalabit saanyo nga ammo no aniat’ kasayaatan para kadakayo ken nalabit saan pay ketdi nga umiso ti dawatenyo malaksid no ikararagyo ti nasantuan nga espiritu. Ammo ti Dios a kayatyo a matungpal ti pagayatanna, ken ammona ti pudpudno a masapulyo. Maysa pay, babaen ti nasantuan nga espirituna, adu a kararag ti nailanad iti Saona, ket mainaig dagitoy kadagiti narikut a kasasaad. (2 Timoteo 3:16, 17; 2 Pedro 1:21) Ngarud, maibilang ni Jehova dagiti rikna a naiyebkas kadagita a naipaltiing a kararag kas ebkas a kayatyo nga iyasug kas maysa kadagiti adipenna, ket sungbatanna dagita maipaay kadakayo.

¹³ Nalabit saan nga ammo ni Pablo ken dagiti kakaduana no aniat’ ikararagda idi agsagsagabada ti rigat iti distrito ti Asia. Gapu iti ‘pannakapaksuyda iti nakaro, impapanda a nasentensiaanda a matay.’ Ngem dinawatda ti panangikararag dagiti dadduma ken nagtalekda iti Dios, a mamagungar kadagiti natay, ket insalakanna ida. (2 Corinto 1:8-11) Anian a makaliwliwa a ni Jehova a Dios ipangagna ken sungbatanna ti karkararag dagiti matalek nga adipenna!

14. Aniat’ naimbag nga ibunga ti panangpalubos ni Jehova nga agtultuloy ti suot iti sumagmamano a panawen?

¹⁴ Masansan a masuot ti ili ti Dios kas maysa nga organisasion. Kas nadakamaten, naidadanesda idi Gubat Sangalubongan I. Nupay saanda a maawatan unay idi ti takderda ket ngarud saanda nga ammo ti masnup nga ikararagda, ti Sao ni Jehova naglaon kadagiti naimpadtuan a kararag a sinungbatanna maipaay kadakuada. (Salmo 69, 102, 126; Isaias, kapitulo 12) Ngem no ngay palubosan ni Jehova nga agtultuloy ti suot iti sumagmamano a panawen? Mabalin nga agbanag daytoy iti pammaneknek, tignayenna dagiti dadduma nga umawat ti kinapudno, ken ipaayanna dagiti Kristiano iti gundaway a mangipakita iti nainkabsatan nga ayat babaen ti panangikararag wenno panangtulong kadagiti agsagsagaba a kapammatian. (Juan 13:34, 35; 2 Corinto 1:11) Laglagipenyo nga idalan ni Jehova ti ilina babaen ti nasantuan nga espirituna, aramidenna ti kasayaatan para kadakuada, ken kanayon a risutenna dagiti bambanag iti wagas a mangidayaw ken mangsantipikar iti nasantuan a naganna.​—Exodo 9:16; Mateo 6:9.

Dikay Pulos Pagleddaangen ti Espiritu

15. Makapagtalek dagiti Kristiano iti espiritu ni Jehova a mangaramid iti ania maipaay kadakuada?

¹⁵ Ngarud, no adipennakayo ni Jehova, ikararagyo ti nasantuan nga espiritu bayat dagiti pakasuotan ken kadagiti sabali a gundaway. Ket paidalankayo iti dayta, ta insurat ni Pablo: “Dikay pagleddaangen ti nasantuan nga espiritu ti Dios, isu a nakaseliuanyo a maipaay iti aldaw ti pannakasubbot.” (Efeso 4:30) Ti espiritu ti Dios ket maysa a selio idi ken ita, wenno ‘tanda no anianto ti umay,’ kadagiti matalek a napulotan a Kristiano​—kayatna a sawen, imortal a nailangitan a biag. (2 Corinto 1:22; Roma 8:15; 1 Corinto 15:50-57; Apocalipis 2:10) Makapagtalek agpadpada dagiti napulotan a Kristiano ken dagiti addaan naindagaan a namnama iti espiritu ni Jehova nga agtignay iti nawadwad maipaay kadakuada. Maidalanna ida iti matalek a panagbiag ken matulonganna ida a mangliklik kadagiti managbasol nga aramid a mangiturong iti di pananganamong ti Dios, pannakapukaw ti nasantuan nga espirituna, ken pannakapaay a manggun-od iti biag nga agnanayon.​—Galacia 5:19-21.

16, 17. Kasano a paleddaangen ti maysa a Kristiano ti espiritu?

¹⁶ Kasano a ti maysa a Kristiano, ammona man wenno saan, pagleddaangenna ti espiritu? Bueno, us-usaren ni Jehova ti espirituna a mangitandudo iti panagkaykaysa ken mangdutok kadagiti responsable a lallaki iti kongregasion. Ngarud, no agtanabutob ti maysa a miembro ti kongregasion maibusor kadagiti nadutokan a panglakayen, agiwaras iti makadangran a panangidanon-danon, ken dadduma pay, isut’ saan nga agpapaidalan iti espiritu ti Dios maipaay iti talna ken panagkaykaysa. Iti kasta, pagledleddaangenna ti espiritu.​—1 Corinto 1:10; 3:1-4, 16, 17; 1 Tesalonica 5:12, 13; Judas 16.

¹⁷ Iti suratna kadagiti Kristiano idiay Efeso, namakdaar ni Pablo maibusor kadagiti pagannayasan nga agulbod, agpungtot iti napaut, agtakaw, agsao iti dakes, agderrep iti pannakiabig, agtignay iti nakababain, ken agsalawasaw. No paiduyos ti maysa a Kristiano kadagita a banag, supsupringenna ti impaltiing-espiritu a balakad ti Biblia. (Efeso 4:17-29; 5:1-5) Wen, pagledleddaangenna ti espiritu ti Dios.

18. Aniat’ mabalin a mapasamak iti maysa a Kristiano a di mangitaltalek iti balakad ti impaltiing-espiritu a Sao ti Dios?

¹⁸ Kinapudnona, ti Kristiano a di mangitaltalek iti pammagbaga ti impaltiing-espiritu a Sao ni Jehova nalabit mangpatanor kadagiti kababalin wenno ugali nga agtungpal iti ginagara a basol ken pannakapukaw ti anamong ti Dios. Nupay saan nga agar-aramid ti basol iti agdama, mabalin nga agturturong iti dayta. Ti kasta a Kristiano a sumupsupring iti panangidalan ti espiritu pagledleddaangenna dayta. Iti kasta busbusorenna met ken pagledleddaangenna ni Jehova, ti Gubuayan ti nasantuan nga espiritu. Nikaanoman nga aramiden dayta ti managayat iti Dios!

Itultuloyyo nga Ikararag ti Nasantuan nga Espiritu

19. Apay nangnangruna a kasapulan ti ili ni Jehova ti espirituna itatta?

¹⁹ No adipennakayo ni Jehova, itultuloyyo nga ikararag ti nasantuan nga espirituna. Nangnangruna kadagitoy “maudi nga al-aldaw,” buyogen dagiti napeggad a panawen a narigat a pakilangenan, a kasapulan dagiti Kristiano ti tulong ti espiritu ti Dios. (2 Timoteo 3:1-5) Ti Diablo ken dagiti demoniona, a naitappuak manipud langit ken addada itan iti kaparanget ti daga, ti agur-uramentado maibusor iti organisasion ni Jehova. Gapuna, ad-adda a kasapulan ti ili ti Dios ti nasantuan nga espirituna a mangidalan, wenno mangiwanwan, kadakuada ken tumulong kadakuada nga agibtur kadagiti pakarigatan ken pannakaidadanes.​—Apocalipsis 12:7-12.

20, 21. Apay paidalan iti Sao, espiritu, ken organisasion ni Jehova

²⁰ Kanayon nga apresiarenyo ti tulong nga ipapaay ni Jehova a Dios babaen ti nasantuan nga espirituna. Paidalankayo iti impaltiing-espiritu a Saona, ti Biblia. Makitunoskayo a naan-anay iti iturturong-espiritu a naindagaan nga organisasion ti Dios. Dikay pulos agbaw-ing iti di nainkasuratan a kurso a mamagleddaang iti nasantuan nga espiritu, ta amangan no agtungpalto daytoy iti ipapanawna ket iti kasta agturong iti naespirituan a didigra.​—Salmo 51:11.

²¹ Ti panagpaidalan iti espiritu ni Jehova ti kakaisuna a wagas a mangay-ayo kenkuana ken maaddaan ti natalna, naragsak a biag. Laglagipenyo met, nga inawagan ni Jesus ti nasantuan nga espiritu a “manangtulong,” wenno “manangliwliwa.” (Juan 14:16, footnote) Babaen dayta, liwliwaen ti Dios dagiti adipenna ken papigsaenna ida a mangsaranget kadagiti suot. (2 Corinto 1:3, 4) Pabilgen ti espiritu ti ili ni Jehova a mangikasaba ti naimbag a damag ken tulonganna ida a manglagip kadagiti Nainkasuratan a punto a kasapulan tapno makaipaayda iti nasayaat a pammaneknek. (Lucas 12:11, 12; Juan 14:25, 26; Aramid 1:4-8; 5:32) Babaen ti kararag ken panangiwanwan ti espiritu, mapagballigian dagiti Kristiano dagiti pakasuotan ti pammati buyogen nailangitan a sirib. Gapuna, iti amin a kasasaad iti biag, kanayon nga ikararagda ti nasantuan nga espiritu ti Dios. Kas resultana, ti espiritu ni Jehova idalanna ti ilina.

[Footnote]

Ania dagiti Sungbatyo?

◻ Apay ikararagyo ti nasantuan nga espiritu ni Jehova?

◻ Kasano a maysa a manangtulong ti nasantuan nga espiritu?

◻ Aniat’ kaipapanan ti panamagleddaang iti espiritu, ket kasanotayo a maliklikan dayta?

◻ Apay kanayon nga ikararagyo ti nasantuan nga espiritu ken paidalan iti dayta?

[Ladawan iti panid 15]

No kasano nga ited ti naayat nga ama dagiti nasayaat a bambanag iti anakna, kasta met nga ited ni Jehova ti espirituna kadagiti adipenna a dumawat iti dayta

[Ladawan iti panid 17]

Ammoyo kadi no kasano nga ibabaet ti espiritu ti Dios dagiti managkararag a Kristiano?