Magnakayo Babaen ti Espiritu Tapno Maitungpalyo ti Dedikasionyo
“Itultuloyyo ti magna babaen ti espiritu ket saankayto a pulos makaaramid iti nainlasagan a tarigagay.”—GAL. 5:16.
1. Aniada a bautismo ti napasamak idi aldaw ti Pentecostes?
IDI Pentecostes 33 K.P., nabautisaran dagiti pasurot ni Jesus iti nasantuan nga espiritu. Kalpasanna, imparangarangda ti namilagruan a sagut ti espiritu—ti panagsaoda iti nagduduma a lenguahe. (1 Cor. 12:4-10) Ania ti epekto dayta a sagut ken ti impalawag ni apostol Pedro? ‘Naduyok ti puso’ ti adu. Iti panangidagadag ni Pedro, nagbabawi ken nagpabautisarda. Kuna ti salaysay: “Nabautisaran dagidiay naimpusuan a nangabrasa iti saona, ket iti dayta nga aldaw nainayon ti agarup tallo ribu a kararua.” (Ara. 2:22, 36-41) Maitunos iti imbilin ni Jesus, nabautisaranda iti danum iti nagan ti Ama, ti Anak, ken ti nasantuan nga espiritu.—Mat. 28:19.
2, 3. (a) Ilawlawagyo ti nagdumaan ti pannakabautisar iti nasantuan nga espiritu ken ti pannakabautisar iti nagan ti nasantuan nga espiritu. (b) Apay a maikalikagum a mabautisaran iti danum ti amin nga agbalin a pudno a Kristiano iti kaaldawantayo?
2 Nupay kasta, adda kadi nagdumaan ti pannakabautisar iti nasantuan nga espiritu ken ti pannakabautisar iti nagan ti nasantuan nga espiritu? Adda. Dagidiay nabautisaran iti nasantuan nga espiritu ket nayanakda manen kas napulotan iti espiritu nga annak ti Dios. (Juan 3:3) Napulotanda kas makipagturayto nga ar-ari ken katulongan a papadi iti nailangitan a Pagarian ti Dios, ken pasetda iti naespirituan a bagi ni Kristo. (1 Cor. 12:13; Gal. 3:27; Apoc. 20:6) Gapuna, dayta a bautismo—ti pannakabautisar iti nasantuan nga espiritu—ti ar-aramiden ni Jehova no pilienna dagiti indibidual a makipagtawid ken Kristo, kas iti napasamak idi aldaw ti Pentecostes ken agpatpatuloy. (Roma 8:15-17) Ngem ti ngay pannakabautisar iti danum iti nagan ti nasantuan nga espiritu, a kadawyan a maang-angay kadagiti asamblea ken kombension iti ili ni Jehova iti kaaldawantayo?
3 Ti pannakabautisar iti danum ket maysa a napateg nga addang nga aramiden dagiti pudno a Kristiano kas simbolo ti naan-anay a dedikasionda ken Jehova a Dios. Kasta ti aramiden dagidiay addaan iti nailangitan a pannakaayab ken ti minilion a lallaki ken babbai iti kaaldawantayo nga addaan iti namnama a biag nga agnanayon ditoy daga. Aniaman ti namnama ti maysa, ti pannakabautisarna iti danum iti nagan ti Ama ken ti Anak ken ti nasantuan nga espiritu ket napateg nga addang a masapul nga aramidenna tapno magun-odna ti anamong ti Dios. Gapuna, manamnama kadagiti amin a bautisado a Kristiano nga ‘agtultuloyda a magna babaen ti espiritu.’ (Basaen ti Galacia 5:16.) Magmagnaka kadi babaen ti espiritu ket iti kasta, agbibiagka maitunos iti dedikasionmo?
No Ania ti Kaipapanan ti ‘Pannagna Babaen ti Espiritu’
4. Ania ti kayat a sawen ti ‘pannagna babaen ti espiritu’?
4 Ti ‘pannagna babaen ti espiritu’ ramanenna ti panangipalubosmo nga agtignay ti nasantuan nga espiritu iti biagmo. Iti sabali a pannao, kaipapanan dayta nga agpaiwanwanka iti nasantuan nga espiritu kadagiti inaldaw nga aktibidadmo. Ipakita ti Galacia kapitulo 5 ti nagdumaan ti panagpaiwanwan iti nasantuan nga espiritu ken ti panagpaiwanwan iti lasag.—Basaen ti Galacia 5:17, 18.
5. Ti panagpaiwanwan iti nasantuan nga espiritu ramanenna ti panangliklik kadagiti ania nga aramid?
5 No agpapaiwanwanka iti nasantuan nga espiritu, ikagumaam a liklikan dagiti aramid ti lasag kas iti “pannakiabig, kinarugit, nalulok a kababalin, idolatria, panangannurot iti espiritismo, guranggura, ringgor, imon, dagiti irarasuk ti unget, rinnupir, pannakabingbingay, dagiti sekta, ap-apal, panagbarbartek, naariwawa a panagragragsak.” (Gal. 5:19-21) No aramidem dayta, arigna a ‘pappapatayem ti ar-aramid ti bagi babaen ti espiritu.’ (Roma 8:5, 13) Tumulong dayta kenka a mangipamaysa iti panunotmo kadagiti bambanag ti espiritu ken agtultuloy nga agpaidalan iti dayta, imbes a kadagiti tarigagay ti lasag.
6. Iyilustraryo no ania ti kasapulan tapno maiparangarangyo ti bunga ti espiritu.
6 Bayat nga agpapaidalanka iti nasantuan nga espiritu, maiparangarangmo dagiti nadiosan a galad, “ti bunga ti espiritu.” (Gal. 5:22, 23) Ngem maamirismo nga agkalikagum dayta iti panagregget. Kas panangyilustrar: Maysa a mannalon ti mangsukay iti dagana. Siempre, napateg ti danum ken lawag ti init. No awan dagita, awan ti maapitna. Ti nasantuan nga espiritu ket mayarig iti lawag ti init. Kasapulantayo ti nasantuan nga espiritu tapno mapataudtayo ti bunga ti espiritu. Kaskasdi, adda ngata maapit ti mannalon no awan ti panagreggetna a mangsukay iti daga? (Prov. 10:4) Wen, kas iti daga, ti panangsukaymo iti kasasaad ti pusom ket adda epektona iti kalidad ken kinarayray ti bunga ti nasantuan nga espiritu nga adda kenka. Gapuna isaludsodmo, ‘Ipalpalubosko kadi a tumanor kaniak ti bunga ti nasantuan nga espiritu babaen ti panagpaidalanko iti dayta?’
7. Apay a nagpateg ti panagadal ken panagmennamenna no kayattayo a maparayray ti bunga ti nasantuan nga espiritu?
7 Tapno nasayaat ti apit, masapul met a padanuman dagiti mannalon dagiti mulada. Umasping iti dayta, tapno maparayray ti bunga ti espiritu, kasapulam ti danum ti kinapudno a masarakan iti Biblia ken magun-odan babaen ti agdama a kongregasion Kristiano. (Isa. 55:1) Mabalin a naisaritamon iti adu a tattao a ti Nasantuan a Kasuratan ket gapuanan ti nasantuan nga espiritu. (2 Tim. 3:16) Kasta met, mangipapaay ti klase matalek ken masirib nga adipen iti kasapulantayo a pannakaawat maipapan iti nasin-aw a danum ti kinapudno iti Biblia. (Mat. 24:45-47) Nalawag ngarud a masapul a basaen ken mennamennaentayo ti Sao ti Dios tapno maiwanwannatayo ti nasantuan nga espiritu. No aramidem dayta, tultuladem ti nasayaat nga ulidan dagiti mammadto a nangaramid iti ‘naganetget a panagsukimat ken naannad a panagsirarak’ kadagiti naipaay nga impormasion. Makapainteres ta uray dagiti anghel nangipakitada iti napasnek nga interes kadagiti naespirituan a kinapudno maipapan iti naikari a Bin-i ken iti napulotan a kongregasion Kristiano.—Basaen ti 1 Pedro 1:10-12.
Panagpaiwanwan iti Espiritu—Kasano?
8. Apay a nagpateg a kiddawen ti espiritu ni Jehova?
8 Saan nga umdas ti basta panangadal ken panangutob iti Kasuratan. Kasapulan nga agtultuloy a kiddawem ti tulong ken panangiwanwan ni Jehova. Kabaelanna ti ‘agaramid iti nawadwadwad ngem iti amin a bambanag a dawaten wenno panunotentayo.’ (Efe. 3:20; Luc. 11:13) Ngem ania ti isungbatmo no adda agsaludsod iti, “Apay a masapul nga agtultuloy nga agkiddawak iti Dios idinto ta ammonan ‘no ania ti bambanag a kasapulak sakbay pay a dawatek kenkuana’?” (Mat. 6:8) Bueno, no ikararagmo ti nasantuan nga espiritu, ipakpakitam nga agpannurayka ken Jehova. Kas pagarigan, no adda agpatulong kenka, sigurado nga ikagumaam a tulongan yantangay ipakpakitana nga isu ket agtalek kenka. (Idilig ti Proverbio 3:27.) Umasping iti dayta, pakaragsakan ni Jehova ti panagkiddawmo iti espirituna, ket iti kasta, ipaayna dayta kenka.—Prov. 15:8.
9. Kasano a ti itatabuno kadagiti Nakristianuan a gimong tulongannakayo nga agpaiwanwan iti espiritu ti Dios?
9 Ti sabali pay a pamay-an nga iwanwannatayo ti espiritu ti Dios ket babaen kadagiti gimong, asamblea, ken kombensiontayo. Nagpateg ti panangikagumaam a tumabuno ken umimdeng a naimbag kadagiti programa. Tulongannaka dayta a mangtarus iti “nauneg a bambanag ti Dios.” (1 Cor. 2:10) Makagunggona met ti regular a panagkomento. Lagipem dagiti gimong a tinabunuam iti napalabas nga uppat a lawas. Kasano kasansan nga intayagmo ti imam tapno agkomentoka ken iyebkasmo ti pammatim? Adda kadi makitam a mabalinmo a parang-ayen iti dayta a benneg? No adda, ikeddengmo no ania ti aramidem kadagiti sumaganad a lawas. Makita ni Jehova ti panagreggetmo a makipaset ken ipaayna ti nasantuan nga espirituna a kasapulam tapno tulongannaka nga ad-adda a magunggonaan kadagiti gimong.
10. Ti pannagna iti espiritu ramanenna ti panangitukon iti ania nga awis?
10 Ti pannagna babaen ti espiritu ramanenna ti panangipangag iti awis a mabasatayo iti Apocalipsis 22:17: “Ti espiritu ken ti nobia agtultuloy a kunaenda: ‘Umayka!’ Ket ti asinoman a dumdumngeg kunaenna koma: ‘Umayka!’ Ket ti asinoman a mawaw umay koma; ti asinoman a mayat awatenna koma ti danum ti biag nga awan bayadna.” Ti espiritu, nga agtigtignay babaen ti napulotan a klase nobia, ituktukonna dayta nga awis mainaig iti danum ti biag. No inawatmo ti awis nga “umayka!” determinadoka kadi a mangitukon met iti awis nga “Umayka!”? Anian a pribilehio ti makipaset iti daytoy mangispal iti biag a trabaho!
11, 12. Ania ti akem ti nasantuan nga espiritu iti trabaho a panangasaba?
11 Maitungtungpal ita dayta a napateg a trabaho babaen ti panangiwanwan ti nasantuan nga espiritu. Nabasatayo no kasano a nairaman ti nasantuan nga espiritu iti pannakalukat dagiti baro a teritoria idi umuna a siglo para kadagiti misionero. Ni apostol Pablo ken dagiti kakaduana “pinaritan ida ti nasantuan nga espiritu a sawenda ti sao idiay distrito ti Asia”; naparitanda met a mapan idiay Bitinia. Saantayo nga ammo no kasano a linapdan ti espiritu ti ipapanda kadagidiay a lugar, ngem nalawag a ti espiritu inturongna ni Pablo iti nalawa a teritoria ti Europa. Nasirmatana ti maipapan iti maysa a lalaki a taga-Macedonia nga agpakpakaasi iti tulong.—Ara. 16:6-10.
12 Iturturong met ita ti espiritu ni Jehova ti sangalubongan a panangasaba. Saanen nga us-usaren ni Jehova dagiti namilagruan a sirmata tapno mangted iti bilin ngem iwanwanwanna dagiti napulotan babaen ti nasantuan nga espiritu. Ken dayta nga espiritu ti mangtigtignay kadagiti kakabsat a mangaramid iti amin a kabaelanda a mangasaba ken mangisuro. Awan duadua a makipaspasetka iti dayta a napateg a trabaho. Mabalinmo kadi a parayrayen ti rag-om iti dayta a makapagagar nga aktibidad?
13. Kasanokayo nga agpaidalan iti nasantuan nga espiritu? Iyilustraryo.
13 Mabalinmo ti agpaidalan iti nasantuan nga espiritu babaen ti panangyaplikarmo kadagiti impormasion a maipapaay iti ili ti Dios. Usigem ti agtutubo a ni Mihoko a taga-Japan. Kas kabbaro a payunir, mariknana a dina kabaelan ti agsarungkar ta dina ammo no kasano nga alaen ti interes ti bumalay. Iti dayta met la a tiempo, nangipaay Ti Ministeriotayo iti Pagarian kadagiti praktikal a singasing no kasano ti mangaramid iti ababa a panagsarungkar. Kalpasanna, naipablaak ti broshur a Makapnek a Biag—No Kasano a Masagrap. Napaneknekan a nangnangruna a makatulong dayta kadagiti teritoria iti Japan. Impakat ni Mihoko dagiti naipaay a singasing no kasano nga usaren ti broshur, nangruna iti ababa a panagsarungkar. Idi agangay, nakairugi kadagiti panangyadal iti Biblia kadagidiay dati a saan nga immawat iti panagadal. Kinunana, “Nagadu ti iyad-adalak—uray la a dimmanon iti 12—isu a kasapulan nga aguray ti dadduma!” Wen, agapitka a siwawadwad no magnaka babaen ti espiritu, a tungpalem dagiti bilin a naited kadagiti adipen ni Jehova.
Agpannuray iti Espiritu ti Dios
14, 15. (a) Kasano a posible kadagiti imperpekto a tattao ti makapagbiag maitunos iti dedikasionda? (b) Kasanokayo a makasarak kadagiti kasayaatan a gagayyem?
14 Kas ordinado a ministro ti Dios, adda ministerio a masapul nga itungpalmo. (Roma 4:20) Mabalin a mariknam a saanka a naan-anay a kualipikado a mangibaklay iti kasta a responsabilidad. Ngem kas kadagiti napulotan, ti Dios ti namagbalin kenka a kualipikado. (Basaen ti 2 Corinto 3:5.) Makapagbiagka a maitunos iti dedikasionmo babaen ti panangaramidmo iti amin a kabaelam ken panagpannuraymo iti espiritu ti Dios.
15 Kas imperpekto a tattao, saan a nalaka ti agbiag maitunos iti dedikasiontayo iti perpekto a Dios a ni Jehova. Ti maysa a makagapu ket mabalin a saan a maawatan dagiti dadduma a dati a kakaduam ti baro a wagas ti panagbiagmo ken mabalin nga ‘agsaoda a sibabassawang kenka.’ (1 Ped. 4:4) Kaskasdi, dimo liplipatan a naaddaanka iti kabbaro a gagayyem, a kangrunaan kadagita ket ni Jehova ken ni Jesu-Kristo. (Basaen ti Santiago 2:21-23.) Nagpateg met ti makisinninged kadagiti kakabsat iti kongregasionyo a paset ti “intero a timpuyog dagiti kakabsat” iti sangalubongan. (1 Ped. 2:17; Prov. 17:17) Tulongannaka ni Jehova babaen ti espirituna tapno maaddaanka kadagiti gagayyem nga agtultuloy a makaipaay kenka iti nasayaat nga impluensia.
16. Kas ken Pablo, apay a mabalinyo a ‘pagragsakan dagiti kinakapuy’?
16 Uray no addaanka kadagiti sidadaan a tumulong a gagayyem iti kongregasionyo, nalabit a marigatanka latta a mangdaer kadagiti inaldaw a karit. Mabalin a dimo ammon ti aramidem gapu kadagita, a kasla awan patinggana dagiti parikutmo. Dayta ti tiempo a nangnangruna nga agpatulongka ken Jehova, a kiddawem ti nasantuan nga espirituna. Insurat ni apostol Pablo: “Inton nakapuyak, iti kasta nabilegak.” (Basaen ti 2 Corinto 4:7-10; 12:10.) Ammo ni Pablo a ti espiritu ti Dios ti mangpabileg kadagiti tattao iti panawen a nakapuyda, aniaman ti pakaigapuanna. Gapuna, kabaelannaka a pabilgen ti aktibo a puersa ti Dios kadagiti tiempo a makariknaka iti panagkapuy wenno agkasapulanka iti tulong. Insurat ni Pablo a mabalin a ‘pagragsakanna dagiti kinakapuy.’ Nariknana ngamin ti panagtignay kenkuana ti nasantuan nga espiritu idi isu ket nakapuy. Mabalinmo met a mapadasan ti kasta a rikna!—Roma 15:13.
17. Kasano a tulongannakayo ti nasantuan nga espiritu a makadanon iti destinasionyo?
17 Kasapulantayo ti espiritu ti Dios tapno maitungpaltayo ti dedikasiontayo. Ipapanmo nga aglaylayagka. Kalatmo a pagserbian ni Jehova iti agnanayon. Ti nasantuan nga espiritu ket mayarig iti angin a kayatmo a mangiturong iti layagmo tapno makadanonka a natalged iti destinasionmo. Dimo kayat nga iyallo-allonnaka ti espiritu ti lubong ni Satanas. (1 Cor. 2:12) Arigna a masapul nga ilasinmo ti umiso nga angin, ti nasantuan nga espiritu, sa agpaiturongka iti dayta. Babaen ti Sao ti Dios ken ti organisasion nga iwanwanwan ti espirituna, iturongnaka ti nasantuan nga espiritu iti umiso a direksion.
18. Ania ti determinasionyo ita, ken apay?
18 No makipagad-adalka kadagiti Saksi ni Jehova ken makitimtimpuyogka kadakuada kadagiti gimong ken dadduma pay, ngem dimo pay inaramid dagiti napateg nga addang a panagdedikar ken panagpabautisar, isaludsodmo, ‘Apay a bumdengak a mangaramid kadagita?’ No bigbigem ti akem ti nasantuan nga espiritu iti panangitungpal ita ni Jehova iti pagayatanna ken ipatpategmo ti panagtignayna, aramidem ngarud dagiti addang a naadalmo nga umiso. Sibabaknang a bendisionannaka ni Jehova ken sipaparabur nga ipaayna ti nasantuan nga espirituna kenka. No sumagmamano a tawen wenno dekada a nabautisarankan, sigurado a nariknamon ti panangiwanwan ti nasantuan nga espiritu. Nakita ken nariknam no kasano a pinabilegnaka ti Dios babaen ti espirituna. Mabalin nga agtultuloy dayta iti agnanayon. Gapuna, determinadoka koma nga agtultuloy a magna babaen ti nasantuan nga espiritu.
Malagipyo Kadi?
• Ania ti kayat a sawen ti ‘pannagna babaen ti espiritu’?
• Ania ti makatulong kadakayo nga “agtultuloy a magna babaen ti espiritu”?
• Kasanoyo a maitungpal ti dedikasionyo?
[Ladawan iti panid 15]
Kas iti daga, agkalikagum iti panagregget ti panangsukay iti kasasaad ti puso
[Dagiti Ladawan iti panid 16, 17]
Agpapaiwanwanka kadi iti espiritu ti Dios?