Panangipastor a Kadua ti Naindaklan a Namarsuatayo

“Ni Jehova isu ti Pastorko. Awanto ti pagkurangak. Pabaruenna toy kararuak. Iturongnak kadagiti dandana ti kinalinteg gapu iti naganna.”​—SALMO 23:1, 3.

1. Ania a naayat a pannakabang-ar ti ipapaay ni Jehova?

ADUN a nabannog a kararua ti binang-aran ti maika-23 a Salmo, a “salmo ni David.” Pinaregtana ida a maaddaan iti panagtalek a naiyebkas iti Sal 23 bersikulo 6: “Kinaagpaysona da kinaimbag ken naayat a kinamanangaasi sumurotdanto kaniak dagup dagiti al-aldaw ti panagbiagko; ket iti balay ni Jehova agtaengakto nga agnanayon.” Isu kadi dayta ti tarigagayanyo, ti agtaeng nga agnanayon iti balay ni Jehova a maipaay iti panagdayaw, a naikaykaysa iti ilina a maur-urnong itan manipud kadagiti amin a nasion ditoy daga? “Ti pastor ken manangaywan dagiti karkararuayo,” ti Naindaklan a Namarsuatayo, ni Jehova a Dios, tulongannakayo a gumun-od iti dayta a kalat.​—1 Pedro 2:25.

2, 3. (a) Kasano nga ipapaarab a siaayat ni Jehova ti ilina? (b) Kasano a dramatiko a dimmakkel ti “pangen” ni Jehova?

² Ti Namarsua iti “baro a langlangit ken ti maysa a baro a daga” isu met ti Organisador ken Kangatuan a Manangaywan ti kongregasion Kristiano, ti “sangakabbalayan ti Dios.” (2 Pedro 3:13; 1 Timoteo 3:15) Interesado unay a mangipastor iti ilina, kas nalawag a kunaen ti Isaias 40:10, 11: “Adtoy! Ni Soberano nga Apo Jehova umayto a kas mannakabalin, ken ti takkiagna agturayto a maipaay kenkuana. Adtoy! Ti panggunggonana maikuyog kenkuana, ken ti panupapakna adda iti sangona. Pagarabennanto ti arbanna a kasla maysa nga agpaspastor. Urnongennanto dagiti kordero iti takkiagna; ken awitenna ida iti barukongna. Idalannanto a nainayad dagiti adda urbonda.”

³ Iti napalawa a kaipapanan, daytoy nga “arban” iramanna dagiti nabayagen a magmagna iti Nakristianuan a kinapudno ken dagiti “kordero” a naurnong kadagiti kallabes a tiempo​—kas dagiti nakaad-adu a mababautisaran ita idiay Africa ken Makindaya nga Europa. Ti nabileg, makasalaknib a takkiag ni Jehova ur-urnongenna ida iti barukongna. Nupay kasda la idi nagtawataw a karnero, tagtagiragsakenda itan ti nasinged a pannakirelasion iti naayat a Dios ken Pastorda.

Ti Kadua a Pastor ni Jehova

4, 5. (a) Siasino “ti naimbag a Pastor,” ken kasano a tinukoy ti padto? (b) Ania a trabaho a panamaglalasin ti imatmatonan ni Jesus, ket ania ti nakaskasdaaw a resultana?

⁴ Agserserbi iti makannawan ni Amana sadi langit, siaasi nga ay-aywanan met “ti naimbag a pastor,” ni Jesu-Kristo, dagiti “karnero.” Insukona ti biagna agpaay iti pagimbagan umuna ti “bassit nga ipastoran” dagiti napulotan ken kalpasanna, ita, ti dakkel nga umariwekwek ti “sabsabali a karnero[na].” (Lucas 12:32; Juan 10:14, 16) Kastoy ti kuna ti Naindaklan a Pastor, ni Jehova a Dios, kadagitoy amin a karnero: “Adtoy, siak, wen siak, ukomekto . . . dagiti karnero ken dagiti karnero. Ket bangonekto ti maysa a pastor kadakuada, ket pakanennanto ida, nga isu ni adipenko a David. Pakanennanto ida, ket isunto ti pastorda. Ket siak, ni Jehova, siakto ti Diosda, ket ni adipenko a David prinsipe kadakuada. Siak, ni Jehova, sinaok.”​—Ezequiel 34:20-24.

⁵ Ti designasion nga “adipenko a David” naimpadtuan a tuktukoyenna ni Kristo Jesus, ti “bin-i” nga agtawid iti trono ni David. (Salmo 89:35, 36) Iti daytoy aldaw a panangukom kadagiti nasion, agtultuloy a paglalasinen ti kadua a Pastor ken Ari ni Jehova, ni Kristo Jesus, ti Anak ni David, dagiti “karnero” iti sangatauan ken manipud kadagiti mangak-ako a “karnero” ngem iti kinapudnona “kalding[da]” met. (Mateo 25:31-33) Mabangon met daytoy “maysa a pastor” tapno pakanenna dagiti karnero. Anian a nagdayag a kaitungpalan daytoy a padto ti makitkitatayo ita! Bayat a pagsasaritaan dagiti politiko ti panamagkaykaysa iti sangatauan babaen ti baro a lubong nga urnos, aktual a pagkaykaysaen ti maysa a Pastor dagiti karnero kadagiti amin a nasion babaen ti kampania a panangasaba iti adu a pagsasao a ti laeng organisasion ti Dios ditoy daga ti makaaramid.

6, 7. Kasano a sigsiguraduen “ti matalek ken naannad nga adipen” a magun-odan dagiti karnero ti “taraon iti umiso a tiempo”?

⁶ Bayat nga agtultuloy nga agsaknap ti mensahe ti Pagarian kadagiti baro a teritoria, sigsiguraduen ti “matalek ken naannad nga adipen” dagiti napulotan a Kristiano, a dinutokan ti maysa a Pastor, a maipapaay amin a probision tapno magun-odan ti “taraon iti umiso a tiempo.” (Mateo 24:45) Pappapartaken ti adu kadagiti 33 a sanga a pagimprentaan ti Watch Tower Society iti intero a lubong ti pannakapataud ti dumakdakkel a pakasapulan iti ad-adu ken nasaysayaat a libro ken magasin ti Biblia.

⁷ Ar-aramiden ti Bagi a Manarawidwid dagiti Saksi ni Jehova ti amin tapno sumayaat ti kalidad ti panangipatarus iti agarup 200 a pagsasao ken mairugi ti panangipatarus iti ad-adu pay a pagsasao kas kasapulan tapno masaknapan ti intero a tay-ak iti lubong. Maitunos daytoy iti imbilin ni Jesus kadagiti adalanna idiay Aramid 1:8: “Umawatkayto ti pannakabalin inton umay kadakayo ti nasantuan nga espiritu, ket dakayto ti saksik . . . agingga iti ungto ti daga.” Mainayon pay, ti New World Translation of the Holy Scriptures, a naimalditen iti interamente wenno iti pasetna iti 14 a pagsasao, ket maipatpatarusen iti 16 a dadduma pay a pagsasao iti Europa, Africa, ken ti Oriente.

Panangtagiragsak ‘‘ti Talna ti Dios’’

8. Kasano a sibabaknang a naparaburan dagiti karnero gapu iti tulag ti kappia nga inaramid ni Jehova kadakuada?

⁸ Babaen ti maysa a Pastorna, ni Kristo Jesus, mangaramid ni Jehova kadagiti nasayaat pannakapakanna a karnerona iti maysa a ‘‘tulag ti kappia.’’ (Isaias 54:10) Iti panangalagadda ti pammati iti naiparukpok a dara ni Jesus, makapagna dagiti karnero iti lawag. (1 Juan 1:7) Tagiragsakenda ‘ti talna ti Dios a daeganna ti amin a pannakaawat ken aywananna dagiti puspusoda ken dagiti panunotda babaen ken Kristo Jesus.’ (Filipos 4:7) Kas ituloy a kunaen ti Ezequiel 34:25-28, ipapaarab ni Jehova dagiti karnerona iti naespirituan a paraiso, maysa a makaay-ayo a kasasaad ti kinatalged, makapabang-ar a kinarang-ay, ken kinabunga. Kastoy ti kuna daytoy naayat a Pastor kadagiti karnerona: “Mabigbigdanto a siak ni Jehova intono bungtolek dagiti balunet ti sangolda ken luk-atak ida iti ima dagidiay nangpatagabo kadakuada. Ket saandanto a samsam kadagiti nasnasion; . . . ket agnaeddanto a sitatalged, ket awanto ti mangpabutengen kadakuada.”

9. Aniada a gundaway ti nalukatan kadagiti tattao ti Dios babaen ti ‘pannakabungtol dagiti balunet’?

⁹ Kadagiti kallabes a tawen, nabungtolen ‘dagiti balunet ti sangol’ dagiti Saksi ni Jehova iti adu a pagilian. Nawayadan a mangasaba. Ket sapay koma ta amintayo, iti tunggal daga, aramatenna a naimbag ti kinatalged nga ipapaay ni Jehova bayat nga itultuloytayo nga iringpas ti trabaho. Anian a pammatalged ti ipapaay ni Jehova bayat nga umad-adanitayo iti tiempo ti kadakkelan pay laeng a rigat a mapasaranto ti sangatauan!​—Daniel 12:1; Mateo 24:21, 22.

10. Siasino dagiti inted ni Jehova a tumulong iti Naimbag a Pastor, ni Kristo Jesus, ken aniat’ kinuna ni apostol Pablo kadagitoy?

¹⁰ Kas panagsagana iti dayta nga aldaw ti panagibalesna kadagiti managdakdakes, nangipaay ni Jehova kadagiti katulongan a pastor a kadua ti Naimbag a Pastor, ni Kristo Jesus, a mangaywan iti arban. Nailadawan dagitoy idiay Apocalipsis 1:16 kas kompleto a bilang a “pito a bituen” iti kannawan nga ima ni Jesus. Idi umuna a siglo, kinuna ni apostol Pablo kadagitoy a pannakabagi a katulongan a pastor: “Kitaenyo ti bagiyo ken ti amin nga ipastoran, a nangikabilan ti nasantuan nga espiritu kadakayo a kas manangaywan, tapno ipaarabyo ti kongregasion ti Dios, isu a ginatangna iti dara ti Anakna.” (Aramid 20:28) Itatta, adda pinullo a ribo a katulongan a pastor nga agserserbi iti 69,558 a kongregasion iti intero a daga.

Mangidaulo Dagiti Katulongan a Papastor!

11. Kasano a mangidadaulo a sibaballigi dagiti dadduma a papastor kadagiti teritoria a naynay a mawanas?

¹¹ Iti adu a lugar masapul a mangidaulo dagitoy a papastor kadagiti teritoria a maulit-ulit a mawanas kadagitoy maudi nga al-aldaw. Kasanoda a maparayray ti kinapinget ti arban? Nasayaat ti ar-aramiden dagitoy a papastor, ket maysa kadagiti wagas a naballigida isu ti panangiparegta iti trabaho kas auxiliary ken regular payunir. Adu kadagiti papastor a mismo ti nakiraman itoy a serbisio, ken uray dagiti agibumbunannag a di makabael a mangaramid iti dayta ipakpakitada ti espiritu ti kinapayunir, nga agserserbida a buyogen ti rag-o a tumulong iti panangparmek iti kinaaleng-aleng iti teritoria. (Salmo 100:2; 104:33, 34; Filipos 4:4, 5) Gapuna, bayat a lapunosen ti kinadakes ken pagpeggaden ti anarkia ti lubong, adu a kasla karnero a tattao ti ririingen ti namnama ti Pagarian.​—Mateo 12:18, 21; Roma 15:12.

12. Ania a dakkel a parikut ti adda kadagiti lugar a napartak ti irarang-ay, ket kasano a mataming daytoy no dadduma?

¹² Maysa pay a parikut isu ti kinakurang dagiti kualipikado a papastor a mangaywan iti arban. Kadagiti lugar a napartak ti irarang-ay, kas idiay Makindaya nga Europa, adu dagiti baro a kongregasion nga awanan a pulos kadagiti nadutokan a panglakayen. Ibakbaklay dagiti natulok a karnero ti annongen, ngem awan pulos kapadasanda, ket kasapulan ti tulong iti panangsanay kadagiti karnero nga umap-apon kadagiti kongregasion. Kadagiti pagilian a kas ti Brazil, Mexico, ken Zaire, a sadiay napartak unay ti irarang-ay, maus-usar dagiti agtutubo a Saksi iti panangorganisar iti serbisio ken panangsanay kadagiti dadduma pay a kabbaro. Nasayaat ti maitultulong dagiti payunir, ket iti daytoy a tay-ak a makatulong dagiti kakabsat a babbai a mangsanay kadagiti kabbaro a kakabsat a babbai. Bembendisionan ni Jehova dagiti resulta babaen ti espirituna. Agtultuloy ti irarang-ay.​—Isaias 54:2, 3.

13. (a) Yantangay nakaad-adu ti anien, ania koma ti ikararag dagiti amin a Saksi? (b) Kasano a nasungbatan dagiti kararag dagiti tattao ti Dios sakbay ken bayat ti maikadua a gubat sangalubongan?

¹³ Kadagiti pagilian a naipasdeken a nalaing ti trabaho a panangasaba, kadagiti pagilian a naikkaten dagiti panangipawil itay nabiit, ken kadagiti kaluklukat a teritoria, agaplikar pay laeng dagiti sasao ni Jesus idiay Mateo 9:37, 38: “Pudno a ti anien adu, ngem bassitda dagiti agani. Dawatenyo ngarud iti Apo ti anien tapno mangibaon koma kadagiti agani iti paganianna.” Masapul nga ikararagtayo met a mangbangon koma ni Jehova kadagiti ad-adu pay a papastor. Impakitana a kabaelanna nga aramiden daytoy. Sakbay ken bayat ti Gubat Sangalubongan II, pinadas dagiti kasla Asirio a diktador nga ikisap dagiti Saksi ni Jehova. Ngem kas sungbat kadagiti kararagda, ginugoran ni Jehova ti organisasionda, a pinagbalinna a pudpudno a teokratiko, ken intedna dagiti kasapulan a “papastor.”a Maitunos daytoy iti padto: “Intono ti Asirio umayto iti dagatayo, ken intono bumaddek kadagiti palasiotayo, ibangontayto a bumusor kenkuana pito a pastor, ken walo a panguloen a lallaki”​—ad-adu pay ngem ti kasapulan a dedikado a papanglakayen a mangidaulo.​—Mikias 5:5.

14. Ania a naipangruna a pakasapulan ti adda iti organisasion, ket aniat’ maiparegta kadagiti kakabsat a lallaki?

¹⁴ Adda naipangruna a pannakasapul kadagiti amin a bautisado a lallaki a Saksi a gumaw-at kadagiti kanayonan a pribilehio. (1 Timoteo 3:1) Naganat ti situasion. Nakaparpartak ti yaadani ti panungpalan daytoy a sistema. Kunaen ti Habacuc 2:3: “Ti sirmata agpaay pay laeng iti nadutokan a panawen, ken agsiglat a tumurong iti pannakatungpal, ket saanto nga agulbod. . . . Pudno nga umayto, a dinto agbayag.” Kakabsat a lallaki, maikagumaanyo kadi a ragpaten dagiti kanayonan a pribilehio iti daytoy trabaho a panangipastor​—sakbay nga umay ti panungpalan?​—Tito 1:6-9.

Teokratiko a Panangipastor

15. Iti ania a pamay-an a teokrasia ti ili ni Jehova?

¹⁵ Tapno makiraman a naan-anay iti irarang-ay ti organisasion ni Jehova, masapul a teokratiko ti panangmatmat ti ilina. Kasanoda a maaramidan daytoy? Bueno, ania aya ti kayat a sawen ti sao a “teokratiko”? Depinaren ti Webster’s New Twentieth Century Dictionary ti “teokrasia” kas “turay ti estado babaen ti Dios.” Iti daytoy a sentido a teokratiko ti “nasantuan a nasion” dagiti tattao ni Jehova. (1 Pedro 2:9; Isaias 33:22) Kas miembro wenno kakadua dayta teokratiko a nasion, dagiti pudno a Kristiano masapul nga agbiag ken agserbida a maitunos iti Sao ti Dios ken kadagiti prinsipiona.

16. Kasanotay a maipakita a teokratikotayo?

¹⁶ Ilawlawag ni apostol Pablo no kasano nga agbalin a teokratiko dagiti Kristiano. Umuna, kunaenna a “makawesan[da] koma iti baro a kinatao a naparsua a maitunos iti pagayatan ti Dios iti pudno a kinalinteg ken kinasungdo.” Masapul a masukog ti personalidad ti maysa a Kristiano sigun kadagiti nalinteg a prinsipio ti Dios a nailanad iti Saona. Masapul a nasungdo ken ni Jehova ken kadagiti lintegna. Kalpasan ti panangiyilustrarna no kasano a maaramidan daytoy, idagadag ni Pablo: “Tuladenyo ngarud ti Dios, kas annak a madungdungngo.” (Efeso 4:24–5:1) Kas natulnog nga annak, masapul a tuladentay ti Dios. Dayta ti pudno a teokrasia nga agtigtignay, a mangipakpakita a pudno nga iturturayannatayo ti Dios!​—Kitaenyo met ti Colosas 3:10, 12-14.

17, 18. (a) Ania a kangrunaan a galad ti Dios ti tuladen dagiti teokratiko a Kristiano? (b) Kadagiti sasaona ken Moises, kasano nga impaganetget ni Jehova ti kangrunaan a galadna, ngem ania a ballaag ti innayonna?

¹⁷ Ania ti kangrunaan a galad ti Dios a rumbeng a tuladentayo? Sumungbat ni apostol Juan idiay 1 Juan 4:8, a kunkunana: “Ti Dios isu ti ayat.” Walo a bersikulo kalpasanna, iti bersikulo 16, ulitenna daytoy napateg a prinsipio: “Ti Dios isu ti ayat, ket ti agtalinaed iti ayat agtaeng iti Dios ket ti Dios agtaeng kenkuana.” Ti Naindaklan a Pastor, ni Jehova, isu ti ladawan ti ayat. Isut’ tuladen dagiti teokratiko a papastor babaen ti panangipakita ti nauneg nga ayat kadagiti karnero ni Jehova.​—Idiligyo ti 1 Juan 3:16, 18; 4:7-11.

¹⁸ Impakaammo ti Naindaklan a Teokrata ti bagina ken ni Moises kas “Jehova, Jehova, Dios a manangngaasi ken managparabur, nainayad nga agpungtot ken aglaplapusanan iti naayat a kinamanangaasi ken kinapudno, manalimetmet iti naayat a kinamanangaasi a maipaay kadagiti rinibribo, mamakawan iti kinadakes ken salungasing ken basol, ngem iti uray kaano dina kanunongan ti nakabasol, ipasarungkarna iti kinadakes dagiti amma kadagiti annak, ken kadagiti annak dagiti annak, agpapan maikatlo ken kadagiti maikapat a kaputotan.” (Exodo 34:6, 7) No kasta, ipagpaganetget ni Jehova ti nadumaduma a parupa ti kangrunaan a teokratiko a galadna, nga isu ti ayat, bayat a sititibker nga ibalballaagna met a dusaenna dagiti nakabasol no kasapulan.

19. Maigidiat kadagiti Pariseo, kasanot’ rumbeng a panagtignay dagiti Kristiano a papastor iti teokratiko a wagas?

¹⁹ Kadagidiay addaan akem iti organisasion, aniat’ kaipapanan ti panagbalin a teokratiko? Kinuna ni Jesus maipapan kadagiti eskriba ken Pariseo idi kaaldawanna: “Ta mangreppetda kadagiti awit a nadagsen ken narigat nga awiten ket ipabaklayda kadagiti tao, ngem isuda dida kayat a garawen kadagiti ramayda.” (Mateo 23:4) Anian a kinaulpit ken kinaawan panagayat! Ti pudno a teokrasia, wenno turay ti Dios, sapulenna ti panangipastor iti arban babaen ti panangipakat kadagiti naayat a prinsipio ti Biblia, a saan ket a babaen ti panangpadagsen kadagiti karnero kadagiti nagadu nga aramid-tao a paglintegan. (Idiligyo ti Mateo 15:1-9.) Maigiddato iti dayta, masapul a tuladen dagiti teokratiko a papastor ti Dios babaen ti pananginayonda iti ayatda ti kinatibker iti panangtaginayon ti kinadalus ti kongregasion.​—Idiligyo ti Roma 2:11; 1 Pedro 1:17.

20. Aniada nga urnos ti organisasion ti bigbigen dagiti teokratiko a papastor?

²⁰ Bigbigen dagiti pudno a papastor a kadagitoy maudi nga al-aldaw, dinutokan ni Jesus ti matalek ken naannad nga adipenna a mangaywan iti amin a sanikuana kasta met a ti nasantuan nga espiritu ti mangidaldalan iti daytoy nga adipen iti panangdutok kadagiti panglakayen a mangipastor kadagiti karnero. (Mateo 24:3, 47; Aramid 20:28) Gapuna, ti panagbalin a teokratiko iramanna ti nauneg a panagraem iti daytoy nga adipen, kadagiti urnos ti organisasion nga ipatpatungpal ti adipen, ken kadagiti panglakayen iti uneg ti kongregasion.​—Hebreo 13:7, 17.

21. Ania a nasayaat nga ulidan ti intuyang ni Jesus kadagiti katulongan a pastor?

²¹ Nangituyang ni Jesus a mismo ti nasayaat nga ulidan, a kanayon a nagpaiwanwan ken ni Jehova ken iti Saona. Kinunana: “Awan ti pannakabalinko nga agaramid a sisiak iti uray ania; kas iti mangngegko, mangukomak; ket ti panangukomko nalinteg, ta diak sapulen ti nakemko, no di ket ti nakem ti nangibaon kaniak.” (Juan 5:30) Rumbeng a sukayan dagiti katulongan a pastor ni Apo Jesu-Kristo ti umasping a napakumbaba a kababalin. No kanayon nga agpaidalan ti maysa a panglakayen iti Sao ti Dios, kas ti inaramid ni Jesus, ngarud pudno a maysa a teokratiko.​—Mateo 4:1-11; Juan 6:38.

22. (a) Iti ania a pamay-an a pagreggetan koma ti amin nga agbalin a teokratiko? (b) Ania a naayat nga awis ti inted ni Jesus kadagiti karnero?

²² Bautisado a lallaki, pagreggetanyo ti gumaw-at kadagiti pribilehio iti kongregasion! Dakayo amin a patpatgen a karnero, ikagumaanyo ti agbalin a teokratiko, a tuladenyo ti Dios ken ni Kristo iti panangipakita ti ayat! Sapay koma ta agrag-o agpadpada dagiti pastor ken ti arban gapu ta impangagda ti awis ni Jesus: “Umaykayo kaniak, dakayo amin nga agrigrigat ken madagdagsenan, ta paginanaenkayto. Alaenyo ti sangolko kadakayo ket agsursurokayo kaniak, ta siak naemmaak ken napakumbabaak iti panagpuspusok, ket makasarakkayto ti inana a maipaay kadagiti kararuayo. Ta ti sangolko nalaka ken nalag-an ti awitko.”​—Mateo 11:28-30.

[Footnote]

Mailawlawagyo Kadi?

◻ Ania ti “pangen” ni Jehova, ken siasino ti iraman daytoy?

◻ Kasano a nagtignay ni Jesus kas “naimbag a pastor” idi umuna a siglo, ken ita?

◻ Ania a napateg a papel ti ak-akmen dagiti katulongan a pastor iti panangaywan ti arban?

◻ Aniat’ kayulogan ti sao a “teokrasia”?

◻ Kasano ti rumbeng a panagtignay ti maysa a Kristiano​—nangnangruna ti maysa a katulongan a pastor​—tapno agbalin a teokratiko?

[Ladawan iti panid 20]

Kas iti maysa a naayat a pastor, ay-aywanan ni Jehova ti arbanna

[Ladawan iti panid 23]

Ti panangtulad iti galad ni Jehova a Dios nga ayat ket agtigtignay a teokrasia