Apay a Pagserbian ni Jehova?

“DANDANIN ti aldaw ni Jehova! Asidegen ti ‘dakkel a rigat’, ket saankayto a makalasat no dikay agserbi iti Dios.” No imbagada dayta kadakayo, aniat’ reaksionyo?​—Sofonias 2:2, 3; Mateo 24:21.

Pudno, rumbeng a kanayon a laglagipentayo ti aldaw ni Jehova, ket ti pannakailasat no dumteng ti dakkel a rigat agpannuray iti matalek a panagserbi iti Dios. Ngem dagitoy kadi ti kangrunaan a makagapu no apay nga ipaaytayo ti sagrado a panagserbi ken Jehova a Dios? Apay nga agserserbikayo ken Jehova?

Kasapulan ti Umiso a Motibo

No saan nga agserbi ti maysa a tao iti Dios buyogen ti umiso a motibo, mabalin nga agsardeng no saan a pumudno dagiti ninamnamana iti naituding a tiempo. Kas pangarigan, ninamnama dagiti dadduma nga agsubli ni Jesu-Kristo idi 1843 wenno 1844, dagiti tawen a limmabas a saan a natungpal dagiti ninamnamada. Ti makapainteres iti daytoy a banag isu ti insurat ni George Storrs, ti nangipablaak iti Bible Examiner ken idi agangay naam-ammo ni Charles Taze Russell, ti immuna a presidente ti Watch Tower Society. Iti Setiembre 1846 a Bible Examiner, insurat ni Storrs:

“Ti annongen nga agserbi iti Dios napatpateg ngem iti laeng banag a ti aldaw ket malmalpasen. . . . Ti kasasaad a mapagteng no ti ’46 ken ’47 ket limmabas kas mabalin, a saan a nasaksian ti iyaayna, agbanag iti pannakapaay a di pulos maipagarup. Paneknekan daytoy ti kapadasan​—kayatko a sawen ti kapadasan iti ’43 ken ’44. Ayanna ti kaaduan kadagidiay, sigun ti panangaklonda, ‘nagutugot nga agserbi iti Dios’ kas ti maiparbeng kadakuada idi inwaragawagda a panawenen ti iyaay ti Apo? Ket kuna ti allangogan​—AYANNA!!! Agarup maysa iti sangapulo kadagidiay natignay nga agserbi iti Dios gapu iti dayta a waragawag ti magmagna pay laeng iti pammati tapno mapadayawan ti panangaklonda a Kristianoda. Apay a kasta? Natignayda ngamin iti dakes a motibo. Ti kinamanagimbubukodanda ti kangrunaan a nanggutugot ken nangpagagar kadakuada. Umaspingda la unay iti managbasol a nakarikna a dandanin matay iti nakaro a sakit wenno iti bagyo idiay taaw. No matayen, agbalin a Kristiano. Ngem no ammona nga adayon iti peggad, iyaleng-alengna daytan.”

Panagserbi a Buyogen iti Umiso a Motibo

Ti kinamanagimbubukodan ken ti panagbuteng a madadael ti mabalin a mangtignay iti dadduma nga agpammarang a mangaramid iti pagayatan ni Jehova. Dagiti met dadduma mabalin a maayatanda iti kasta unay iti namnama nga agbiag iti Paraiso ta agserbida iti Dios gapu iti dayta la a rason. Nupay kasta, no natignay dagiti tao nga agserbi iti Dios kangrunaanna gapu iti kasta a motibo a mabayag pay ti aldaw ni Jehova ken ti dakkel a rigat, mabalin a dida agregta nga agserbi iti Dios.

Siempre, saan a kinamanagimbubukodan ti panagrag-o kadagiti kari ti Dios ken dagiti naipadto a bendision. Kayatna a maragsakantayo kadagiti namnama a naituyang kadatayo kas pasurot ti Anakna, ni Jesu-Kristo. “Agrag-okayo iti inanama,” kinuna ni apostol Pablo, sana innayon: “Agitured iti rigat. Agtalinaed iti panagkararag.” (Roma 12:12) Karaman iti panagkararag, “ti rag-o ni Jehova” ti tumulong kadatayo nga agibtur kadagiti pakasuotan ken aganus a manguray iti kaitungpalan dagiti kari ti Dios. (Nehemias 8:10) Kabayatanna, aduantay kadagiti rason nga agserbi ken Jehova. Ania dagiti dadduma kadagitoy?

Annongen ken Pribilehio

Kas Soberano iti Uniberso, maikari ken kalikaguman ni Jehova ti naipamaysa a debosion. (Exodo 20:4, 5) Isu a tunggal Kristiano addaan ti agpapada a dagsen ti annongen iti Dios uray no mangrugi man ti dakkel a rigat inton bigat, inton umay a tawen, wenno iti kamaudiananna. Obligado nga agserbi ken Jehova nga awan panagimbubukodan gapu iti panagayatna iti Dios iti isuamin a puso, kararua, isip, ken pigsa. (Marcos 12:30) Impagarup dagidi dadduma nga immuna a Kristiano nga asidegen ti aldaw ni Jehova, ngem saan a natungpal ti ninamnamada, ket natayda a dida nakita ti pannakapasamak dayta. (1 Tesalonica 5:1-5; 2 Tesalonica 2:1-5) Ngem, no nagkammatalekda agingga ken patay, dagidiay a napulotan a pasurot ni Kristo awatendanto ti gunggona a panagungar iti nailangitan a biag iti kamaudiananna.​—Apocalipsis 2:10.

Dagiti bautisado a Saksi ni Jehova masapul nga agserbida kenkuana a simamatalek gapu ta siboboluntario nga inawatda ti obligasion a mangaramid iti pagayatanna. Panunotenyo laengen! Kas kadagiti nasantuan nga anghel, maaramidtayo ti pagayatan ti Soberano iti Uniberso. (Salmo 103:20, 21) Kasta la unay ti panangraem ni Jesus iti dayta a pribilehio ta naikunana: “Ti taraonko isu ti panangaramidko iti pagayatan ti nangibaon kaniak ken panangturposko ti aramidna.” (Juan 4:34) No addaantay iti isu met laeng nga espiritu, naregtatayo a mangidaydayaw ken Jehova ken mangibaga kadagiti sabsabali maipapan iti panggepna, kas naipalgak kadagiti Kasuratan. Iti kastoy a pamay-an, addaantay met ti pribilehio a tumulong kadagiti sabsabali iti naespirituan. Ket sigurado a ti panangaramid iti pagayatan ti Dios gapu iti panagayat kenkuana ket maysa a naisangsangayan a pribilehio, kaanoman a mangrugi ti aldaw ni Jehova.

Ti Panagyaman Tignayennatayo

Ti panagyaman iti ayat ti Dios iti panangipaayna ti daton a subbot ti Anakna rumbeng a tignayennatay met nga agserbi ken Jehova. Idi damo naisinatay ken Jehova a Dios gapu ti basol. Nupay kasta, kinuna ni Jesus: “Ta kasta la unay ti panagayat ti Dios iti lubong [ti sangatauan] ta intedna ti Anakna a bugbugtong, tapno amin a mamati kenkuana saan a mapukaw no di ket adda biagna nga agnanayon.” (Juan 3:16) Natignay nga umuna ni Jehova iti daytoy a banag, kas insurat ni Pablo: “Ngem ti Dios ipatalgedna ti ayatna kadatayo, agsipud ta idinto a managbasoltayo pay laeng, ni Kristo natay gapu kadatayo.” (Roma 5:8) Ti panagyaman iti daytoy nga ebkas ti ayat ti Dios tignayennatayo koma nga agserbi kenkuana iti isuamin a puso.

Ti panangapresiar kadagiti naespirituan ken material a probision ni Jehova ipaayannatayo pay iti rason nga agserbi kenkuana a simamatalek. Ti Sao ti Dios ket pudno a giya​—maysa a silaw iti danatayo. Dagiti publikasion nga ipapaay “ti matalek ken naannad nga adipen” tulongannatay a mangitunos ti panagbiagtayo iti pagayatan ti Dios. (Mateo 24:45-47; Salmo 119:105) Ket gapu ta iyun-unatay a biruken ti Pagarian, ipaayannatay met ni Jehova ti material a kasapulantayo. (Mateo 6:25-34) Ipakpakitayo aya ti panangapresiar kadagitoy a banag?

Ti panagyaman iti inted-Dios a wayawaya manipud ulbod a relihion mangipaay iti sabali pay a rason nga agserbi ken Jehova a simamatalek. Ti narelihiusuan a balangkantis nga isu ti Babilonia a Dakkel ket “nakatugaw iti adu a danum,” kaipapananna “dagiti tao ken umariwekwek ken nasion ken pagsasao.” (Apocalipsis 17:1, 15) Nupay kasta, saan a nakatugaw kadagiti adipen ni Jehova, tapno impluensiaan ken dominaranna ida iti narelihiusuan a pamay-an. Kas pangarigan, laksidenda ti ulbod a narelihiusuan a sursuro a ti natauan a kararua ket saan a matay. Ammoda a naparsua ti tao a “maysa a kararua a sibibiag,” a dagiti natay “ket dida ammo ti aniaman,” ket addanto panagungar. (Genesis 2:7; Eclesiastes 9:5, 10; Aramid 24:15) Isu a dida agbuteng wenno agdayaw kadagiti natay. Ti kadi panagyaman iti kasta a naespirituan a pannakawayawaya tignayennakay a mangsaranget iti apostasia ket kumpet iti nadalus a panagdayaw ken Jehova?​—Juan 8:32.

Ti panangapresiar iti inaldaw-aldaw a tulong ni Jehova patibkerenna ti determinasiontayo nga agserbi kenkuana a sisusungdo. Kinuna ni salmista David: “Bendito ni Jehova, nga inaldaw-aldaw a mangawit iti awittayo.” (Salmo 68:19) Kinuna pay ti salmista: “No da ama ken ina baybay-andak, ni ngad Jehova pidutennakto.” (Salmo 27:10) Wen, ti tao a matalek nga agserserbi ken Jehova mabalin nga iyallatiwna ti piguratibo nga awitna, kas kadagiti pakaseknan ken pakasuotan, iti Dios. Ipakpakitayo met laeng aya ti panangapresiar kadagiti di agsarday a tulong ni Jehova babaen ti matalek a panagserbi kenkuana?​—Salmo 145:14.

Itan-ok ni Jehova ken ti Kinaarina

Ti tarigagay a mangipadayag ken Jehova tignayennatay met nga agserbi kenkuana. Dagiti nailangitan a parsua ket nairepresentar kas mangipadpadayag ken Jehova kadagitoy a sasao: “Maikarika, Jehova, sika a Diosmi, nga umawat iti dayag ken iti dayaw ken iti pannakabalin, agsipud ta pinarsuam dagiti amin a banag, ket gapu iti pagayatam naaddada, ken naparsuada.” (Apocalipsis 4:11) Intan-ok met ni Ari David ti Dios babaen ti panagkunana: “Kukuam, O Jehova, ti kinadakkel ken ti pannakabalin ken ti gloria ken ti balligi ken ti kinadayag . . . Kukuam ti pagarian, O Jehova . . . Dagiti kinabaknang ken dayaw agpadpadada a naggapu kenka, ket agturayka iti isuamin . . . O Diosmi, agyamankami kenka ken agdayawkami iti nagloriaan a naganmo.” (1 Cronicas 29:10-13) Kas ad-adipen ni Jehova, ditay kadi makarikna iti rebbengen a mangipadayag kenkuana iti sao ken aramid bayat nga ur-urayen ti kaitungpalan dagiti karina?​—1 Corinto 10:31.

Ti napinget a tarigagay a mangikasaba iti Pagarian ti Dios gutugotennatay met nga agserbi ken Jehova. Nagimnas ti pannakaiyebkas ti kasta a nadalus a motibo iti sasao ti salmista: “Amin dagiti aramidmo agyamandanto kenka, O Jehova, ket dagiti sasantom bendituendakanto. Sawendanto ti dayag ti pagariam, ken saritaendanto ti pannakabalinmo, tapno ipakaammoda kadagiti annak dagiti tao dagiti nabileg nga ar-aramidna ken ti dayag ti nadaeg a pagarianna. Ti pagariam agnanayon a pagarian, ti panagturaymo mataginayon kadagiti amin a kaputotan.” (Salmo 145:10-13) Ti panangipakaammo iti mensahe ti Pagarian isu ti naibilin kadagiti Kristiano ken ti kapatgan a trabaho a maar-aramiden iti kaaldawantayo. (Mateo 24:14; 28:19, 20) Addaankay kadi ti nasged a tarigagay a mangidaydayaw ken Jehova ken mangisarita kadagiti sabsabali maipapan iti Pagarianna?

Ti pannakasantipikar ti nagan ni Jehova ken ti pannakaalangon ti kinasoberanona ket masapul a nagpateg kadatayo ta kayattayo ti agserbi kenkuana a simamatalek. Mabalin nga ikararagtay ti pannakasantipikar ti nagan ni Jehova ken ti pannakaalangon ti kinasoberanona. (Mateo 6:9) Makapagtignaytayo a maitunos kadagiti kararagtayo babaen ti pannakiraman a kanayon iti Nakristianuan a ministerio ken babaen ti panangisaknap ti kinapudno maipapan kadagita a napateg a bambanag.​—Ezekiel 36:23; 39:7.

Rag-o ken Pannakapnek

Babaen ti matalek a panagserbi ken Jehova, addaantayo iti pannakapnek iti panangparag-o iti pusona ken panangpaneknek nga ulbod ti Diablo. Nupay ulbod ti panangikuna ni Satanas nga agserserbi dagiti tao iti Dios gapu kadagiti managimbubukod a rason, ti nasungdo a panagserbitay ken Jehova gapu iti ayat paneknekanna nga ulbod dayta a panangumsi. (Job 1:8-12) Mangted daytoy ti naimbag a rason nga itultuloytay nga aramiden ti naikuna idiay Proverbio 27:11: “Anakko, agsiribka, ket paragsakem toy pusok, tapno masungbatak ti mangumsi kaniak.” Maysa pay, no sisusungdo nga agserbitay ken Jehova agpapan pananglapped ni Satanas kadatayo, ti panangsalimetmet iti kinatarnawtayo mabalin a patibkerenna dagiti kapammatiantayo.​—Filipos 1:12-14.

Ti rag-o ken pannakapnek iti pannakiraman iti naespirituan a panagani dagdagennatay met a simamatalek nga agserbi ken Jehova. Narikna ni Jesus ti kinaragsak iti panangtulongna kadagiti tao, nangnangruna kadagiti naespirituan a pamay-an. Kunaen ti Mateo 9:35-38: “Ket ni Jesus linawlawna dagiti amin nga il-ili ken purpurok a nangisursuro kadagiti sinagoga, ken nangikaskasaba ti naimbag a damag ti pagarian, ket pinaimbagna amin a kita ti an-annayen. Ket idi nakitana dagiti adu unay a tattao, simnek ti asina kadakuada, gapu ta nalidayda ken nawarawarada a kasda la karkarnero nga awan ti pastorda. Idin kunana kadagiti adalanna: ‘Pudno, a ti anien adu, ngem bassitda dagiti agani. Dawatenyo ngarud iti Apo ti anien tapno mangibaon koma kadagiti agani iti paganianna.’” No napapaut ti trabaho a panagani ngem iti ninamnamatayo, mangted daytoy kadatayo ti ad-adu a gundaway a makasarak iti rag-o ken pannakapnek iti panangtulong kadagiti sabsabali iti naespirituan. Maysa met daytoy a pamay-an tapno maipakita ti panagayat iti kaarruba a mainanama kadatayo.​—Mateo 22:39.

Apay nga Agserbikayo iti Dios?

Inusigtayo ti sumagmamano laeng kadagiti adu a nainget a rason tapno simamatalek nga agserbi ken Jehova. Nasayaat unay no nainkararagan nga usigentayo dagiti rason nga agserserbitayo iti Dios, ta tunggal maysa kadatayo makikuentanto kenkuana. (Roma 14:12; Hebreo 4:13) Ket dagidiay agtalinaed nga addaan iti managimbubukodan a motibo saandanto a tagiragsaken ti anamong ti Dios.

Aniat’ manamnama no kangrunaan a maseknantayo iti pannakasantipikar ti nagan ni Jehova ken mangipapaay iti sagrado a serbisio iti Dios a buyogen ti nadalus a motibo? Ay ket, bendisionannatayto ni Jehova ken ti ministeriotayo! (Proverbio 10:22) Awatentayto met ti biag nga agnanayon agsipud ta nagserbitayo ken Jehova a simamatalek.

[Ladawan iti panid 9]

Rinibo dagiti agserserbi ken Jehova idiay Japan

[Ladawan iti panid 10]

Panagserbi ken Jehova idiay Côte d’Ivoire

[Picture Credit Line iti panid 8]

SIX SERMONS, ni George Storrs (1855)