Piliem ti Agserbi ken Jehova Bayat nga Ubingka Pay

“Agtultuloyka iti bambanag a nasursurom ken nakaguyugoyam a patien.”​—2 TIM. 3:14.

1. Ania ti panangmatmat ni Jehova iti panagserbi dagiti agtutubo a Saksina?

NAKAPATPATEG ken Jehova ti sagrado a panagserbi dagiti agtutubo nga uray la impaltiingna ti maysa a padto maipapan kadakuada. “Dagiti tattaom situtulok nga idatondanto ti bagbagida iti aldaw ti puersa militarmo,” inkanta ti salmista. “Kadagiti kinangayed ti kinasanto, manipud iti aanakan ti bannawag, addaanka iti bunggoy dagiti agtutubo a tattao a kas kadagiti amor.” (Sal. 110:3) Wen, nakapatpateg ken Jehova dagiti agtutubo a sidadaan nga agserbi kenkuana.

2. Ania ti iparparegta ti lubong ita kadagiti agtutubo mainaig iti masanguananda?

² Dakayo nga agtutubo iti kongregasion Kristiano, indedikaryo kadin ti biagyo ken Jehova? Adu nga agtutubo ti marigatan a mangikeddeng no agserbida wenno saan iti pudno a Dios. Ngamin, dagiti negosiante, mannursuro, ken no dadduma, dagiti miembro ti pamilia ken gagayyem paregtaenda dagiti agtutubo a mangragpat kadagiti materialistiko a kalat. Masansan a ti lubong babalawenna dagiti agtutubo a mangragragpat kadagiti naespirituan a kalat. Ngem iti kinapudnona, ti panagserbi iti pudno a Dios ti kasayaatan a wagas ti panagbiag a magun-odam. (Sal. 27:4) Usigem ti tallo a saludsod maipapan iti daytoy: Apay a rumbeng nga agserbika iti Dios? Kasano a maitungpalmo ti panagdedikarmo iti Dios aniaman ti ibaga wenno aramiden ti dadduma? Ania dagiti silulukat kenka a nagsayaat a gundaway mainaig iti sagrado a panagserbi?

Ti Panagserbi ken Jehova ti Maiparbeng nga Aramiden

3. Ania koma ti epektona kadatayo dagiti parsua ni Jehova?

³ Apay a rumbeng nga agserbika iti sibibiag ken pudno a Dios? Ibaga ti Apocalipsis 4:11 ti kangrunaan a rason: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.” Ni Jehova ti nakaskasdaaw a Namarsua iti amin a bambanag. Nakapimpintas ti daga! Dagiti kayo, sabong, animal, taaw, bambantay, ken dissuor​—inaramid amin dagitoy ni Jehova. “Ti daga napno kadagiti pinataud [ti Dios],” kuna ti Salmo 104:24. Anian a panagyamantayo ta siaayat nga inikkannatayo ni Jehova iti bagi ken isip tapno matagiragsaktayo ti daga ken dagiti naimbag a bambanag nga adda iti dayta! Saantayo kadi a magutugot nga agserbi kenkuana kas ebkas ti naimpusuan a panagyamantayo kadagiti nagsayaat a parsuana?

4, 5. Ania dagiti gapuanan ti Dios a nangtignay ken Josue a suminged ken Jehova?

⁴ Dinakamat ti lider ti Israel a ni Josue no ania ti sabali pay a rason nga agserbitayo ken Jehova. Idi dandanin agpatingga ti biagna, imbaga ni Josue iti ili ti Dios: “Pagaammoyo unay iti amin a pusoyo ken iti amin a kararuayo nga awan napaay a maysa a sao manipud iti amin a naimbag a sasao a sinao kadakayo ni Jehova a Diosyo. Pimmudnoda amin maipaay kadakayo.” Apay a naibaga dayta ni Josue?​—Jos. 23:14.

⁵ Kas maysa nga ubing a dimmakkel idiay Egipto, mabalin a naammuan ni Josue ti kari ni Jehova nga itedna kadagiti Israelita ti maysa a daga kas tawidda. (Gen. 12:7; 50:24, 25; Ex. 3:8) Kalpasanna, nakita ni Josue no kasano nga inrugi a tinungpal ni Jehova dayta a karina babaen ti panangyegna iti Sangapulo a Saplit iti Egipto ket napilitan ti nasubeg a ni Faraon a nangwayawaya kadagiti annak ni Israel. Ni Josue ti maysa kadagiti nakalasat iti Nalabaga a Baybay ket nabuyana ti pannakalmes ni Faraon ken ti buyotna. Nakita ni Josue no kasano nga impaay ni Jehova ti amin a kasapulan dagiti Israelita bayat ti nawatiwat a panagdaliasatda “iti dakkel ken nakaam-amak a let-ang” iti Desierto ti Sinai. Awan ti uray maysa a natay gapu iti waw wenno bisin. (Deut. 8:3-5, 14-16; Jos. 24:5-7) Idi panawenen tapno parmeken dagiti Israelita ti nabibileg a nasion iti Canaan ken tagikuaen ti Naikari a Daga, nakita ni Josue ken ti dadduma nga Israelita no kasano a tinulongan ida ti Dios a pagdaydayawanda.​—Jos. 10:14, 42.

6. Ania ti makatulong kenka a maaddaan iti tarigagay nga agserbi iti Dios?

⁶ Ammo ni Josue a tinungpal ni Jehova dagiti karina. Gapuna, imbaga ni Josue: “Ngem no maipapan kaniak ken iti sangakabbalayak, agserbikamto ken Jehova.” (Jos. 24:15) Komustaka met ngay? No utobem dagiti natungpal a kari ti pudno a Dios ken dagiti tungpalennanto pay, saanka kadi a matignay nga agserbi kenkuana a kas iti inaramid ni Josue?

7. Apay a napateg nga addang ti bautismo?

⁷ No utobem dagiti pinarsua ni Jehova ken dagiti nakaskasdaaw ken mapangnamnamaan a karina, matignayka nga agdedikar ken Jehova ken agpabautisar kas simbolo dayta a dedikasion. Ti bautismo ket napateg nga addang nga aramiden dagiti agtarigagay nga agserbi iti Dios. Kasta ti nalawag nga inaramid ti Ulidantayo a ni Jesus. Sakbay nga inrugina ti trabahona kas Mesias, napan ken Juan a Mammautisar tapno agpabautisar. Apay a nagpabautisar ni Jesus? “Bimmabaak manipud langit tapno aramidek, saan a ti pagayatak,” imbagana kamaudiananna, “no di ket ti pagayatan daydiay nangibaon kaniak.” (Juan 6:38) Ngarud, nagpabautisar ni Jesus kas simbolo ti panangidatagna iti bagina a mangitungpal iti pagayatan ni Amana.​—Mat. 3:13-17.

8. Apay a pinili ni Timoteo ti agdayaw iti Dios, ket ania ti masapul nga aramidem?

⁸ Usigem met ni Timoteo, maysa nga agtutubo a Kristiano nga inikkan ni Jehova iti adu a trabaho ken pribilehio idi agangay. Apay nga inkeddeng ni Timoteo ti agserbi iti pudno a Dios? Ibaga kadatayo ti Biblia a ‘nasursurona dagiti bambanag ken naguyugoy a mamati.’ (2 Tim. 3:14) No inadalmo ti Sao ti Dios ket naguyugoyka a mamati a pudno dagiti pannursurona, awan nakaidumaam iti kasasaad idi ni Timoteo. Masapul ngarud nga agdesisionka ita. Apay a saanmo a kasarita dagiti dadakkelmo maipapan iti kayatmo nga aramiden? Mabalin a matulongandaka, agraman dagiti panglakayen iti kongregasion, a mangtarus kadagiti Nainkasuratan a kualipikasion para iti bautismo.​—Basaen ti Aramid 8:12.

9. Ania ti mabalin nga epektona kadagiti dadduma no ikeddengmo ti agpabautisar?

⁹ Ti panagpabautisar ket nagsayaat a pangrugian ti panagserbi iti pudno a Dios. Babaen ti panagpabautisar, arigna a sumrekka iti nawatiwat a lumba a ti gunggona ket biag nga agnanayon ken ti rag-o nga itden ti panangaramid iti pagayatan ti Dios ita. (Heb. 12:2, 3) Maparagsakmo met dagiti miembro ti pamiliayo nga adda iti dayta a lumba ken dagiti gagayyemmo iti uneg ti kongregasion Kristiano. Kangrunaanna, maparagsakmo ti puso ni Jehova. (Basaen ti Proverbio 23:15.) Mabalin a saan a maawatan ti dadduma no apay a pinilim ti agdayaw ken Jehova, ket nalabit nga ibagada a di umiso ti desisionmo. Mabalin a busorendaka pay ketdi. Ngem masarangetmo dagita.

No Pagsaludsodan Wenno Busorendaka

10, 11. (a) Ania dagiti saludsod a mabalin nga imtuoden dagiti tattao no ikeddengmo ti agserbi iti Dios? (b) Ania ti maadalmo iti pamay-an a panangsungbat ni Jesus kadagiti saludsod maipapan iti pudno a panagdayaw?

¹⁰ Mabalin a masdaaw dagiti kaeskuelaam, kaarrubam, ken kakabagiam no ikeddengmo ti agserbi ken Jehova. Nalabit a saludsodenda no apay a pinilim dayta ken agimtuodda maipapan iti patpatiem. Ania ti aramidem? Siempre, masapul nga usigem ken tingitingem ti isip ken riknam tapno mailawlawagmo no apay a kasta ti pangngeddengmo. No sungbatam dagidiay agsalsaludsod maipapan kadagiti patpatiem, nasayaat a tuladem ti ulidan ni Jesus.

¹¹ Idi a dagiti panguluen ti relihion dagiti Judio nagsaludsodda ken Jesus maipapan iti panagungar, inturongna ti atensionda iti maysa a kasuratan a dida naikabilangan. (Ex. 3:6; Mat. 22:23, 31-33) Idi sinaludsod kenkuana ti maysa nga eskriba no ania ti kadakkelan a bilin, inadaw ni Jesus dagiti maitutop a bersikulo ti Biblia. Nagyaman dayta a tao ken Jesus gapu iti sungbatna. (Lev. 19:18; Deut. 6:5; Mar. 12:28-34) Ti panangusar ni Jesus iti Kasuratan ken ti wagas ti panagsaona ket nangpataud iti “panagsusupadi . . . iti nagtetengngaan ti bunggoy,” isu a dagiti bumusbusor dida madangran ni Jesus. (Juan 7:32-46) No sungbatam dagiti saludsod maipapan iti pammatim, usarem ti Biblia ken sumungbatka “buyogen ti naalumamay a kababalin ken nauneg a panagraem.” (1 Ped. 3:15) No saanmo nga ammo ti sungbat iti maysa a saludsod, aminem a dimo ammo ket ibagam nga agsukimatka, kalpasanna, sukimaten ti Watch Tower Publications Index wenno Watchtower Library iti CD-ROM no adda iti pagsasaoyo. Babaen ti nasayaat a panagsagana, ‘ammom no kasano ti rumbeng nga isusungbatmo.’​—Col. 4:6.

12. Apay a dika koma maupay no maidadaneska?

¹² Saanto laeng a panagsaludsod maipapan kadagiti patpatiem ken iti desisionmo nga agserbi iti Dios ti mabalin a pakaipasanguam. Ni ngamin Satanas a Diablo, ti kabusor ti Dios, ti agturturay iti lubong. (Basaen ti 1 Juan 5:19.) Saanmo a namnamaen a komendaran wenno anamongandaka ti amin, ken mabalin pay ketdi a busorendaka. Dadduma ti mabalin nga ‘agsao a sibabassawang kenka,’ ken nalabit nga itultuloyda nga aramiden ti kasta. (1 Ped. 4:4) Ngem laglagipem a saan laeng a sika ti naipasango iti kasta. Naidadanes met ni Jesu-Kristo. Uray ni apostol Pedro, isu nga insuratna: “Dungdungnguen, saankayo koma a mariribukan kadagiti panangur-uram [panagsagaba] iti nagtetengngaanyo, a mapaspasamak kadakayo kas pakasuotan, a kasla mapagpagteng kadakayo ti karkarna a banag. Iti kasupadina, itultuloyyo ti agrag-o yantangay mairamankayo kadagiti panagsagaba ti Kristo.”​—1 Ped. 4:12, 13.

13. Apay a makapagrag-o dagiti Kristiano no maidadanesda?

¹³ No idadanes wenno busorendaka gapu iti Kinakristianom, adda rasonmo nga agrag-o. Apay? Gapu ta no an-anamongannaka ti lubong, kayatna a sawen nga an-annurotem dagiti pagalagadan ni Satanas​—saan a dagiti pagalagadan ti Dios. Namakdaar ni Jesus: “Asikay pay, inton amin a tattao agsaoda iti naimbag maipapan kadakayo, ta ti bambanag a kas kadagitoy ti inaramid dagidi ammada kadagiti ulbod a mammadto.” (Luc. 6:26) Ti pannakaidadanes ipamatmatna a makapungtot kenka ni Satanas ken ti lubongna agsipud ta agserserbika ken Jehova. (Basaen ti Mateo 5:11, 12.) Wen, mangyeg iti rag-o ti ‘pannakaumsi gapu iti nagan ni Kristo.’​—1 Ped. 4:14.

14. Ania dagiti naimbag a resulta ti panagtalinaed a matalek ken Jehova iti laksid ti pannakaidadanes?

¹⁴ Adda uppat a naimbag a resulta no agtalinaedka a matalek ken Jehova iti laksid ti ibubusor. Makaipaayka iti pammaneknek maipapan iti Dios ken iti Anakna. Maparegta dagiti Kristiano a kakabsat gapu iti matalek a panagibturmo. Dadduma nga agpalpaliiw a di makaammo ken Jehova mabalin a matignayda a mangbirok kenkuana. (Basaen ti Filipos 1:12-14.) Ken bayat a mariknam ti panangpabileg kenka ni Jehova tapno maibturam dagiti pakasuotan, dumakkel ti panagayatmo kenkuana.

Naluktan Kenka ti “Dakkel a Ruangan”

15. Ania a “dakkel a ruangan” ti naluktan ken apostol Pablo?

¹⁵ Insurat ni apostol Pablo maipapan iti ministeriona idiay Efeso: “Naluktan kaniak ti maysa a dakkel a ruangan a mangiturong iti panagaramid.” (1 Cor. 16:8, 9) Maysa dayta a ruangan a nangted kenkuana iti ad-adu a gundaway a mangiranud iti naimbag a damag ken mangaramid kadagiti adalan iti dayta a siudad. Babaen ti iseserrekna iti dayta a ruangan, adu a tattao ti natulongan ni Pablo a maaddaan iti pannakaammo maipapan kenni Jehova ken nagbalin nga adipen ti Dios.

16. Kasano a simrek dagiti napulotan a natda iti maysa a ‘silulukat a ruangan’ idi 1919?

¹⁶ Idi 1919, ti naipadayag a Jesu-Kristo inkabilna iti sanguanan dagiti napulotan a natda ti maysa a ‘silulukat a ruangan.’ (Apoc. 3:8) Simrekda iti dayta a ruangan ket rinugianda nga inkasaba ti naimbag a damag ken insuroda ti kinapudno a linaon ti Biblia buyogen ti awan kaaspingna a kinaregta. Ania ti imbunga ti ministerioda? Naikasaba ti naimbag a damag agingga iti ungto ti daga, ket agarup pito a milion ti naaddaan iti namnama a makagun-od iti biag nga agnanayon iti baro a lubong ti Dios.

17. Kasano a makastrekkayo iti “dakkel a ruangan a mangiturong iti panagaramid”?

¹⁷ “Maysa a dakkel a ruangan a mangiturong iti panagaramid” ti silulukat agingga ita kadagiti amin nga adipen ni Jehova. Rag-o ken pannakapnek ti masagrap dagidiay sumrek iti dayta bayat a dumakdakkel ti pannakiramanda iti panangikasaba iti naimbag a damag. Dakayo nga agtutubo nga adipen ni Jehova, kasano kapateg kadakayo ti awan kapadana a pribilehio a panangtulong kadagiti sabsabali tapno ‘maaddaanda iti pammati iti naimbag a damag’? (Mar. 1:14, 15) Pinampanunotyo kadin ti agserbi kas regular pioneer wenno auxiliary pioneer? Ti panagibangon kadagiti Kingdom Hall, panagserbi iti Bethel, ken panagmisionero, ti dadduma pay a pribilehio a mabalin a silulukat kadagiti adu nga agtutubo. Tangay bassiten ti tiempo daytoy dakes a lubong ni Satanas, agbalin a nagangganat iti kada aldaw ti pannakiraman kadagitoy a tay-ak ti panagserbi iti Pagarian. Sumrekkayo kadi iti “dakkel a ruangan” bayat nga adda pay tiempo?

“Nanamenyo ken Kitaenyo a ni Jehova Naimbag”

18, 19. (a) Ania ti nakatulong ken David a maaddaan iti napigsa a tarigagay nga agserbi ken Jehova? (b) Ania ti mangipakita a saan a pulos a nagbabawyan ni David ti panagserbina ken Jehova?

¹⁸ Ti napaltiingan a salmista aw-awisenna ti dadduma a ‘mangnanam ken mangkita a ni Jehova naimbag.’ (Sal. 34:8) Idi ni Ari David iti nagkauna nga Israel ket maysa pay laeng nga agtutubo a pastor, insalakan ni Jehova manipud kadagiti atap nga animal. Ti Dios ti nangtulong kenkuana a nakidangadang kenni Goliat ken insalakanna iti dadduma pay a pakarigatan. (1 Sam. 17:32-51; Sal. 18, superskripsion) Natignay ni David nga agsurat gapu iti dakkel a kinamanagayat ti Dios: “Adu a banag ti inaramidmo, O Jehova a Diosko, ti mismo a nakaskasdaaw nga ar-aramidmo ken ti pampanunotmo maipaay kadakami; awan ti maipadis kenka.”​—Sal. 40:5.

¹⁹ Kasta unay ti panagayat ni David kenni Jehova ket kayatna nga idaydayaw ti Dios iti amin a puso ken isipna. (Basaen ti Salmo 40:8-10.) Iti panaglabas dagiti tawen, saan a pulos a nagbabawyan ni David ti panangbusbosna iti biagna a nagserbi iti pudno a Dios. Ti panagbiag buyogen ti nadiosan a debosion ti kadakkelan a gamengna​—ti gubuayan ti awan kapadana a kinaragsak. Idi lakayen ni David, kinunana: “Sika ti namnamak, O Soberano nga Apo Jehova, ti pagkammatalkak manipud kinaagtutubok. Ket uray pay agingga iti kinalakay ken kinaubanan, O Dios, saannak a baybay-an.” (Sal. 71:5, 18) Ad-adda pay a bimmileg ti pannakigayyem ken panagtalek ni David kenni Jehova, nupay kumapkapuyen ti bagina.

20. Apay a ti panagserbi iti Dios ti kasayaatan a pangbusbosam iti biagmo?

²⁰ Ti panagbiag da Josue, David, ken Timoteo ket mangipaay iti kanayonan a pammaneknek a ti panagserbi ken Jehova ti kasayaatan a pangbusbosam iti biagmo. Awan kaimudingan ti apagbiit a material a pagimbagan nga itden ti maysa a karera iti daytoy a lubong no idilig iti agpaut a gunggona a magun-odam gapu iti ‘panagserbim ken Jehova buyogen ti isuamin a puso ken kararuam.’ (Jos. 22:5) No dika pay nagdedikar ken Jehova babaen ti kararag, imtuodem iti bagim, ‘Ania ti manglaplapped kaniak nga agbalin a maysa a Saksi ni Jehova?’ No maysakan a bautisado nga agdaydayaw ken Jehova, kayatmo kadi a naragragsak pay ti biagmo? No kasta, palawaem ti ministeriom, ket itultuloymo ti rumang-ay iti naespirituan. Ti sumaganad nga artikulo ipakitana no kasanoka a rumang-ay babaen ti panangsurotmo iti ulidan ni apostol Pablo.

Ania ti Sungbatyo?

• Mangtedkayo iti dua a rason no apay a rumbeng nga agserbitayo iti Dios.

• Ania ti nakatulong ken Timoteo a mangikeddeng nga agserbi iti Dios?

• Apay a rumbeng nga agtalinaedtayo a natibker iti sidong ti pannakaidadanes?

• Ania dagiti pribilehio iti panagserbi a silulukat kenka?

[Ladawan iti panid 18]

Ti panagserbi ken Jehova ti kasayaatan a wagas ti panagbiag

[Ladawan iti panid 19]

Masungbatam kadi dagiti saludsod maipapan iti pammatim?