“Talaga a Dikam Agkinnaawatan!”

MASAPUL a ni Michael, maysa nga abogado, ket agbalin a napuersa no makikomunikar. Nasken dayta iti trabahona. Ngem kalpasan ti 16 a tawen a panagdennada nga agassawa, inannugot ni Michael a no masangpetanna ti asawana, ni Adrian, kasla dinan maipakat ti kinasigona a makikomunikar. “Agrinrinneklamo, agbinbinnabalaw, ken agpinpinnasagidkami,” kuna ni Michael, “kanayonkam nga agsinnungbat ken Adrian, ket ti kunak dimin maibturan daytoy. Diak la ammo no kasta a talaga ti panagasawa, ti di agressat a panagdarison ti di pannakapnek ken panagpungtot. No kastoymi lattan bayat ti panagdennami, kayatkon ti makalung-aw​—saanak nga agang-angaw. Diak la ketdi maanusan ti 20, 30, 40 a tawen a kanayon ti panagpungtot ken panagdiskutir.”

Saan laeng a da Michael ken Adrian ti addaan iti kastoy a karikrikna. Pudno met dayta iti adu a pagassawaan a kanayon nga agapa sadanto met la agkappia. Agpatpatangda laeng, madamdama agsubangdan. “Mangngegda” dagiti banag a di naiyebkas. Makaisawangda iti bambanag a dida rinanta. Agpinnadakes ken agpinnabasolda, sadanto agulimek a nasakit ti nakemda. Saanda nga agsina, ngem kinapudnona saanda a “maymaysa a lasag.” (Genesis 2:24) Pulos a dida agkinnaawatan. No sumukoda, kaipapanannat’ panagsina; no agpatuloyda, kaipapananna a dida maliklikan ti panagrikkiar. Tapno maliklikan ti saem ti uray ania kadagita a dua a pagpilian, ikeddeng dagitoy nga agassawa a saanda unayen a makibiang iti maysa ken maysa.

Kasapulan dagiti kasta a pagassawaan a ‘gumun-od ti nasigo a pannakaiwanwan’ iti panagasawada. (Proverbio 1:5) Daytoy a pannakaiwanwan ket ipaay ti Sao ti Dios, ti Biblia. Patalgedan ti maikadua a surat ni Pablo ken Timoteo a ti Biblia ket “naimbag a pakasursuruan, pakababalawan, pakatinggaran.” (2 Timoteo 3:16) Napaneknekan a pudno a kabaelanna a risuten ti pannakadadael ti komunikasion ti agassawa, kas ti intay makita.