Report Dagiti Manangiwaragawag ti Pagarian
Ti Kinatibker Mangyeg Kadagiti Nabaknang a Gunggona
IMPADTO ni Jesus a dagiti pasurotna maidadanesdanto, ken kasta met ni apostol Pablo, kas nailanad idiay 2 Timoteo 3:12: “Iti kinapudnona, amin dagidiay agtarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.” Ngem ti kinatibker iti panagserbi ken Jehova a Dios mangyeg kadagiti nabaknang a gunggona.
◻ Pudno daytoy iti maysa nga ili idiay amianan a daya a kosta ti Malaysia. Nupay isu ket debotado a Budista a mangisursuro kadagiti annakna a sipapasnek, saan a malapdan ti ama dagiti tallo nga annakna a babbai ken tallo nga annakna a lallaki a makipagadal ti Biblia kadagiti Saksi ni Jehova. Uray ti asawana naginteres iti kinapudno. Ket iti maysa nga aldaw inuyaw ti kaarrubana: “Apay a palusposam dagiti annakmo ken ipalubosmo nga agbalinda a Saksi ni Jehova? Amin dagiti annakko sumurotda kaniak ken iti nariinganmi a relihion a Budista. Ay-ayka pay!”
Nagdardaras a nagawid ti ama nga impangtana a kabilen ti sister a mangiyad-adal kadagiti annakna. Nupay kasta, pinagtanang dagiti annakna ket intuloyda ti nakipagadal ti Biblia kadagiti Saksi ni Jehova ken tumabuno kadagiti panaggigimong a kadua ni nanangda.
Nupay kasta, kamaudiananna, kinasarita ti ama ti amin a kameng ti pamiliana. “Agpilikayo,” inkalikagumna, “kumapponkayo kaniak ket agtalinaedkayo ditoy balay wenno agbalin a Kristiano ngem pumanawkayo.” Ti inauna nga anak a lalaki, a nakaal-alumanay ti panagsaona, dagus a rinugianna ti agbalkot tapno pumanaw. “Saan!” imbugkaw ti ama. “Yantangay nasukirkay amin nga annak, nasaysayaat la a matayakon.” Kalpasanna sidadaras a rimmuar iti balay, a kinamat ti pamiliana nga agpakpakaasi a saan nga agpakamatay. Gapu ta natignay kadagiti pakpakaasida, nagsubli met laeng iti pagtaenganda.
Naglabas ti panawen. Nangrugi a napaliiw ti ama ti nasayaat nga epekto ti kinapudno ti Biblia iti kababalin dagiti annakna. Maysa nga aldaw nasabetna ti nauyaw a kaarrubana, nga ita malmalday, a nangikuna: “Maup-upayak unay gapu kadagiti annakko. Lipliputandak ken taktakawandak.” Ngem ti ama a dagiti annakna ket makipagad-adal kadagiti Saksi ni Jehova kinunana: “Naidumduma dagiti annakko! Naimbagda unay kaniak ken tinulongandak pay ketdi a mangbayad ti utangko iti luganko kabayatan nga awan pagsapulak.”
Ita, bautisadon dagiti tallo nga annak a babbai ken ti ina. Ti maysa nga anak a lalaki ket espesial payunir. Ti ngay sigud a debotado ken managpungpungtot nga ama? Mannakigayyem itan ken timmabuno iti Memorial.
Binendisionan ni Jehova ti anak a lalaki ken dagiti tallo nga annak a babbai kasta met ti ina gapu iti kinatibkerda Kenkuana. Naregtada itan a manangaskasaba iti Pagarian, a parparagsakenda ti puso ni Jehova.—Proverbio 27:11.