Itandudo Dagiti Nakaay-ayat a Kumbension ti Nadiosan a Panangisuro

ITATTA, aglaplapusanan ti lubong iti adu nga impormasion. Iti telebision ken radio, kadagiti libro wenno kompiuter, adda dandani di maibus nga abasto ti pannakaammo iti uray ania a tema a mabalin a panunoten. Kaskasdi, agsakit ken matay dagiti tattao. Adda krimen, bisin, ken kinapanglaw iti intero a lubong, ken ad-adu nga amang ita ti apektaran dagiti sakit a patauden ti emosion. Amin dagiti adda a pannakaammo napaayda a mangiremedio kadagiti bambanag. Apay? Agsipud ta tinallikudan ti sangatauan ti sirib ti Dios.

Anian a mayanatup ngarud, a “Nadiosan a Panangisuro” ti napili a tema dagiti kalkalpas a kumbension dagiti Saksi ni Jehova! Impalagip ti programa kadagiti timmabuno a ti laeng sursuro a masarakan iti Sao ti Dios, ti Biblia, ti addaan pateg a pudno a makaisalakan iti biag.

Ti umuna a kumbension nangrugi idi Huebes, Hunio 3, idiay Uniondale, Nueva York, E.U.A. Manipud idin, nagsasaruno a naiparang ti programa kadagiti siudad iti nadumaduma a pagilian, a naggibus kadagiti kontinente ti Africa ken Sud America.

Ti Malem ti Umuna nga Aldaw

Adda tema ti kada aldaw a nangipaganetget ti paset ti nadiosan a panangisuro. Kas pangarigan, ti programa iti umuna nga aldaw ket naibasar iti tema a “Panangammo iti Sursuro a Naggapu iti Dios.” (Juan 7:17) Nailawlawag a nalaing daytoy a kapanunotan bayat a nagleppas ti aldaw.

Kalpasan ti kanta ken kararag, linuktan ti tsirman ti kumbension ti programa babaen ti palawag a napauluan “Ti Nadiosan a Panangisuro Pagkaykaysaennatayo.” Impakitana a nagkaykaysa dagiti tattao ni Jehova babaen ti inda panangsursuro kadagiti pamay-anna ken pannagna kadagiti daldalanna. (Mikias 4:1-5) Palagdaen ti nadiosan a panangisuro ti panagkaykaysada. Naparegta dagiti kumbensionista nga agrag-o iti nagkaykaysa a panaglalangenda.​—Salmo 133:1-3.

Idi mumalemen, nasalaysay dagiti regular a gimong ti kongregasion iti simposium a napauluan “Dagiti Gimong a Mangiwardas Kadatayo Kadagiti Pamay-an ni Jehova.” Impalagip ti umuna a managpalawag kadagiti nakikumbension a no aggigimongtayo, raraementay ni Jehova ket iti kasta awatentay ti pammendisionna. Impaganetget ti simmaruno a nagpalawag a kasapulan a makiramantayo kadagiti gimong. Iti kasta, maidayawtay ni Jehova iti publiko, maiparangarang ti pammatitayo, ken mapatibker ti pammati dagiti sabsabali. Impakita ti maikatlo a nagpalawag iti simposium a masapul nga ipakattayo dagiti masursurotayo kadagiti gimong. Masapul nga ‘agbalintayo a managtungpal iti sao, ket saan a managdengngeg laeng.’​—Santiago 1:22.

Simmaruno ti nasayaat a pannakasalaysay ti panagkanta iti daydayaw ken ni Jehova. Ti naimpusuan a kanta ket napateg a paset ti panagdayawtayo. Sinaruno daytoy ti keynote a palawag nga, “Agballigi ti Nadiosan a Panangisuro.” Anian a nagsayaat a tema! “Ni Jehova ti Gubuayan ti kasayaatan a pannursuro a mabalin a magun-odan ti siasinoman,” kinuna ti nagpalawag. Ket kalpasan iti ababa a pannakasalaysay ti nakaskasdaaw nga utek ti tao, kinunana: “Usarentay koma a nangnangruna ti kabaelantay nga agpanunot iti pananggun-od iti nadiosan a sursuro. Daytoy laeng ti agbanag iti napaypayso a sirib.” Pudno a kasta!

Ti Maikadua nga Agsapa

“Itultuloyyo nga Arkosan ti Sursuro ti Manangisalakantayo, ti Dios.” Isu dayta ti tema ti maikadua nga aldaw ti kumbension. (Tito 2:10) Nairuar daytoy a prinsipio iti palawag a “Nadiosan a Sursuro Kontra Sursuro Dagiti Sairo.” Wen, adda sursuro dagiti sairo. (1 Timoteo 4:1) Kas inlawlawag ti ispiker, abaken ti nadiosan a sursuro ti “sirib” ni Satanas babaen ti panangibutaktak kadagiti ulbod a sursuro ken dagiti nasikap a pamay-an ti Diablo. Gapu iti daytoy, adda 4,500,000 a nalinteg-panagpuspusona a Kristiano a saanen nga adipen iti kinasipnget ni Satanas.​—Juan 8:32.

Kaskasdi, masapul nga itultuloytayo a sarangten ni Satanas. Naipaganetget daytoy iti palawag a “Sarsarangtenyo Aya ti Espiritu ti Lubong?” Makapapatay daytoy nga espiritu ti lubong. Iparegtana ti nababa a moralidad, rebelioso a panangmatmat iti autoridad, ken ti naagum a panagtarigagay kadagiti material a bambanag. Masapul a kanayon nga amirisen ti Kristiano ti bagina. Adda kadi pay nangato a pagrukodanna no maipapan kadagiti buybuyaen, dengdenggen, wenno basbasaenna? Makaparegta a kinuna ti ispiker: “Komendarandakayo, kakabsat a lallaki ken babbai, ken dakayo nga agtutubo, gapu iti napasnek a panangikagumaanyo iti daytoy.”​—1 Juan 2:15-17.

Adda maysa a makagapu no apay a narigat a sarangten ti espiritu ti lubong. Ania dayta? Imperpektotay amin. Pudno a natay ni Jesus maipaay kadagiti basoltayo, ngem masapul pay latta a sarangtentayo ti pagannayasan ti basol. Nadakamat daytoy iti palawag a “Pannakidangadang iti Panangpetpet ti Basol iti Nakapuy a Lasag.” Malaksid iti dadduma pay a bambanag, kinuna ti ispiker nga abakentay ti basol no ikawestay ti baro a personalidad ken liklikan ti aniaman a pagrayuan ti dakes a pagannayasantayo.

“Pagbalinenyo ti Makapasalun-at a Sursuro a Wagas ti Panagbiagyo” ti tema ti sumaruno a palawag. Nalabes ti pannakaseknan dagiti dadduma iti pisikal a salun-atda. Ngem kinaagpaysona, napatpateg nga adayo ti naespirituan a salun-at. Impaganetget ti nagpalawag a masapul a ditay laglag-anen ti responsabilidadtayo iti daytoy a banag, ken adda naisangsangayan a pammaregtana kadagiti Kristiano a babbai. Kinunana: “Apresiarenmi unay agpadpada dagiti nataenganen ken agtutubo a kakabsat a babbai a natimbeng iti regtada iti ministerio ken iti panangasikaso kadagiti personal nga annongenda.” Wen, ken agyamantay amin ken Jehova gapu kadagiti makapasalun-at a sursuro a nangisina kadatayo iti lubong.

“Ipalgak ti Nadiosan a Panangisuro ti Panggep ti Biag.” Isu dayta ti maudi a palawag iti agsapa. Kinuna ti nagpalawag: “Di agbayag, gistay amin ket agsaludsod, ‘Aniat’ panggep ti biag?’” Babaen kadagiti nabileg nga argumento, pinaneknekanna a ti Biblia laeng ti makaited ti sungbat iti dayta a saludsod. Kalpasanna, impakita ti ispiker a dagiti nakaskasdaaw a kari ti Dios ikkannatay ti panggep iti biag. Nalabit, adu kadagiti agdengdengngeg ti nagpampanunot, ‘Daytoy ti masapul a mangngegan dagiti tattao iti teritoriak.’ Kasta met ti pagarup ti Bagi a Manarawidwid. Maysa a baro a broshur, a napauluan Ania ti Panggep ti Biag? ti nairuar iti ngudo daytoy a palawag. Anian a ragsak ti amin a timmabuno! Adda gundaway a mangbasa iti baro a publikasion iti intermision iti tengngat’ aldaw.

Ti Maikadua a Malem

Addaan ti makaliwliwa a tema ti umuna a palawag iti malem “Iyallatiwyo ken Jehova Amin a Pakaringgoranyo.” Adu dagiti pakaigapuan ti pakaringgoran; ngem, kunaen ti Sao ti Dios nga iyallatiwtay amin a pakaringgorantayo kenkuana. (1 Pedro 5:6, 7) Pudno, adda dagiti problema nga agnaynay, ket maipanggep itoy imbalakad ti nagpalawag: ‘Agan-anuskayo. Mangnamnamakayo ken ni Jehova. Patienyo a sipapasnek a ti panangsurot iti Biblia isut’ kanayon a kasayaatan. No naipirmi dagiti pusotayo ken Jehova, tagiragsakentayto ti “talna ti Dios” a mangringbaw iti amin a panunot.’​—Filipos 4:6, 7.

Dagiti simmaruno nga uppat a palawag impakitada a ti nadiosan a pannursuro agaplikar iti biag ti pamilia. Ti umuna, “Panangtaginayon iti Panagasawa,” impalagipna kadagiti nakikumbension nga iti imatang ni Jehova ti panagasawa ket saan nga urnos a basta iwaksi no kayatmo, a kas iti panangmatmat dagiti adu iti lubong. Nupay kasta, tapno agballigi ti panagasawa, masapul a surotentay ti panangiwanwan ni Jehova. Isu ti nangaramid kadatayo. No kasta ngarud, naglaon ti naipaltiing a Saona iti kasayaatan a balakad iti panagasawa.

Ti palawag nga “Aramidenyo ti Amin a Kabaelanyo Tapno Maisalakan ti Sangakabbalayanyo,” sinalaysayna dagiti karit ti panangtaripato iti pamilia kadagitoy napeggad a panawen. (2 Timoteo 3:1) Isuro dagiti nagannak dagiti annakda ti pisikal a kinadalus, dagiti nasayaat a kababalin, no kasanot’ agtrabaho, ken no kasanot’ panagbalin a naparabur ken mannakitulong kadagiti sabsabali. Ti napatpateg pay, masapul nga isuroda dagiti annakda nga agbalin a napasnek nga ad-adipen ni Jehova.​—Proverbio 22:6.

Iti simmaruno a palawag a napauluan “Nagannak, Kasapulan Dagiti Annakyo ti Naipangruna a Pannakaasikaso,” pinalagipan ti ispiker dagiti nakikumbension a masapul a komendaran dagiti annak, bayat a sipsiputan dagiti pagkapuyanda. Masapul a nangnangruna nga alerto dagiti nagannak kadagiti pagannayasanda iti di kinamapagpiaran, materialismo, wenno kinamanagimbubukodan.

Nangnangruna nga inimdengan a naimbag dagiti agtutubo a nakikumbension ti palawag nga “Agtutubo​—Makinsursuro ti Ipangpangagyo?” Narigat dagiti bambanag para kadagiti agtutubo a Kristiano kadagitoy nga al-aldaw. Nalaka ti makibuyog iti lubong, ngem daytoy agturong ken patay. Nupay kasapulan dagiti agtutubo ti tured a mangannurot iti nadiosan a sursuro, yegna ti naruay a bendision ita ken biag nga agnanayon iti masanguanan.​—1 Timoteo 4:8.

Naserraan ti maikadua nga aldaw babaen ti makaparegta a drama nga Agtutubo a Silalagip iti Namarsuada Itan. Iti pangrugian, inawagan ti direktor dagiti agtutubo iti organisasion ti Dios a “nasungdo a teokratiko a buyot a sipapasnek nga agserserbi ken Jehova a Dios ken iti dinutokanna a nailangitan nga Ari, ni Kristo Jesus.” Innayonna: “Dagiti agtutubotayo ket talaga nga ar-aramidenda ti naimbag!” Silalawag nga impakita ti drama a no ti nagannak sanayenna a naimbag ti anakna, paglaingannanto dayta inton dumakkel ket makapagserbinto ken Jehova a bukbukodna.

Ti Agsapa ti Maikatlo nga Aldaw

Ti tema para iti maikatlo nga aldaw ket “Itultuloyyo nga Isuro Dagiti Tattao iti Amin a Nasion.” (Mateo 28:19, 20) Di pagduduaan a ninamnama dagiti nakikumbension ti naintiempuan a balakad maipapan iti trabaho a panangasaba, ket saanda a napaay. Pinatibker ti maysa a simposium a napauluan “Siraragsak a Panangitungpal iti Trabahotayo a Panangasaba ken Panangisuro” ti determinasionda nga agtultuloy a makiraman iti trabaho a panangasaba. Sinalaysay ti panglukat a palawag dagiti damo nga isasarungkar; ti maikadua, dagiti met panagsarungkar; ken ti maikatlo, panangyadal ti Biblia. Naawis dagiti misionero iti intero a lubong nga agawid kadagiti lugarda tapno kaduada dagiti pamilia ken gagayyemda a dumar-ay iti kumbension. Kadagiti dadduma a kumbension, nakipaset dagiti misionero iti daytoy a paset ti programa. Makaparagsak unay a maammuan dagiti balligi a napasaranda kadagiti teritoriada. Ti sumaruno a palawag a, “Panangidanon iti Naimbag a Damag Kadagiti Isuamin” sinalaysayna ti maaramidan ti impormal a panangasaba.

Naserraan dayta nga agsapa babaen ti palawag ti bautismo, a kanayon nga isut’ tampok dagiti dadakkel a panagtataripong dagiti Saksi ni Jehova. Iti kada kumbension, nagtakder iti sanguanan ti naummong a bunggoy ti dadakkel a grupo dagiti kabbaro a nagdedikar ket sipapasnekda a simmungbat iti wen kadagiti dua a saludsod a naiturong kadakuada. Kalpasanna nabautisaranda iti imatang dagiti tao. Anian a nagbileg a pammaneknek iti dakkel nga epekto ti nadiosan a panangisuro!

Ti Malem ti Maikatlo nga Aldaw

Nairugi ti programa iti malem babaen ti nauneg a pannakasalaysay dagiti Kasuratan. Pamiliar dagiti Saksi ni Jehova kadagiti sasao iti Mateo kapitulo 24 ken Lucas kapitulo 21. Adda kadi nangipagarup nga awan baro a mairuar kadagitoy a kapitulo ti Biblia? Dakkel a kamali ti pagarupda no kasta! Dagiti palawag nga “Anianto ti Pagilasinan ti Kaaddam?” ken “Ibagam Kadakami, Kaanonto a Mapasamak Dagitoy a Bambanag?” intundana dagiti nakikumbension iti makaawis a pannakasalaysay ti paset dagidiay dua a kapitulo ken nangipaay kadagiti napabaro a panangilawlawag kadagiti sumagmamano a bersikulo. Adda dagiti nabiag a panagsasarita kalpasan ti sesion bayat a pinagdidinnilig dagiti nakikumbension dagiti notada no pudno a naawatanda met laeng dagiti punto. Awan duadua nga adunto dagiti saludsod a masungbatan inton maipablaak daytoy nga impormasion iti Pagwanawanan.

Naituloy ti tema maipapan iti panangyadal ti Biblia iti palawag a “Dagiti Makaisuro a Sungbat Kadagiti Saludsodyo iti Biblia.” Kalpasanna binaliwan ti programa ti tema a pagsasaritaan. Ti tawen 1993 minarkaanna ti maika-50 nga anibersario ti Watchtower Bible School of Gilead. Ti palawag a “Limapulo a Tawen a Pannakasanay ken Aktibidad Dagiti Misionero iti Gilead” impakitana kadagiti nakikumbension no aniat’ naaramidan kabayatan dayta a periodo. No adda misionero a nairana iti palawag a “Dagiti Nagapuanan ti Panagebanghelio iti Sangalubongan a Tay-ak,” naawisda a mangiranud kadagiti sumagmamano a kapadasanda. Talaga a makapagagar nga imdengan ti salaysay dagiti misionero!

Sabali pay nga adal ti historia ti nangngegan iti simmaruno a palawag a, “No Apay nga Itultuloy Dagiti Saksi ni Jehova ti Agbantay.” Impakitana nga agbambantay dagiti Kristiano manipud idi umuna a siglo K.P. agingga ita. Nangiturong dayta iti sabali pay a sorpresa. Iti pangrugian ti sumaruno a palawag a napauluan “Aktibo Dagiti Manangiwaragawag ti Pagarian iti Intero a Daga,” intag-ay ti ispiker ti maysa a dakkel a libro (no maalan iti lokal a pagsasao) ket kinunana: “Makaparagsak nga ipakaammo ditoy ita ti pannakairuar daytoy baro a libro, a napauluan Dagiti Saksi ni Jehova​—Manangiwaragawag iti Pagarian ti Dios.” Naglaon ti libro iti detaliado a salaysay ti moderno-aldaw a historia dagiti Saksi ni Jehova. Saritaenna ti nakaay-ayat a kapadasan ti panagibtur, determinasion, ken balligi, a mangted iti nabileg a pammaneknek a ti espiritu ni Jehova ket agtigtignay kadagiti ad-adipenna.

Ti Maikapat nga Agsapa

Dimtengen ti maudi nga aldaw ti kumbension. Ti tema ti aldaw a “Magunggonaantayo Babaen ti Nadiosan a Panangisuro,” impanamnamana ti nasayaat a paggibusan ti programa. (Isaias 48:17) Iti agsapa, naiturong ti atension dagiti nakikumbension iti nabileg a nagkatlo a simposium a palawag. Napauluan iti “Ti Naipaltiing a Pakdaar ni Jeremias​—Iti Napalabas ken iti Agdama,” naglaon ti simposium iti bersikulo-por-bersikulo a pannakasalaysay ti Jeremias kapitulo 23, 24, ken 25. Anian a nagdagsen a mensahe ti linaon dagitoy a kapitulo! Sigurado a nagkintayeg ti di matalek nga Israel idi panawen ni Jeremias iti prangka a pakdaar nga impaltiing ti Dios. Nakarkaro ti panagkintayeg ti lubong idi natungpal dagidiay a pakdaar. Naiduma kadi dagiti kasasaad itatta? Saan. Situtured nga ikaskasaba dagiti Saksi ni Jehova dagiti mensahe a pangukom ti Dios. Iti kamaudiananna, sanguento daytoy intero a sistema dagiti bambanag ti panangukom ni Jehova. Dayta kaipapanannanto ti naan-anay a pannakadadael ti lubong ni Satanas.

Ti agsapa ti Domingo nagngudo iti pannakaipabuya ti maikadua a drama, Dikay Maallilaw Wenno Rabrabaken ti Dios. Iti nalawag a pamay-an, impakitana no kasano a masalaknibannatayo ti nadiosan a sursuro manipud impluensia dagiti naalas a video ken musika ken manipud iti tendensia a mamagririri kadagiti pada a Kristiano. Iti pagnguduan ti drama, inadaw ti tsirman ti mamagpanunot a sasao ti maysa kadagiti nagpaset: “Saantay a nailaksid iti impluensia ti lubong. Do ditay sarangten, mabalin a sisisikap a dadaelen ti lubong ti panagpampanunottayo. Ket ti panagtalinaedtayo a matalek wenno saan agdepende iti no ania ti imulmulatayo.” Pudno la unay dayta!

Ti Maudi a Malem

Napardas ti yaasideg ti panagngudo ti kumbension bayat a napan ti ispiker iti podium a mangipalawag ti diskurso iti publiko a napauluan “Makatulong a Pannursuro iti Napeggad a Panawentayo.” Iti nalawag ken lohikal a pamay-an, pinagminarna dagiti kangrunaan a parikut a mangap-apektar kadatayo ita ken impakitana dagiti sumagmamano a wagas a ti nadiosan a pannursuro makatulong kadatayo a mangtagiragsak iti nasaysayaat a biag. Kinunana a no sursurotentayo dagiti Nainkasuratan a sursuro itan, kabaelantayto a suroten dayta iti agnanayon idiay baro a lubong ni Jehova.

Kalpasan ti sumario ti linawas a maadal iti Pagwanawanan, tiempon ti maudi a palawag. Napartak ti panangrepaso ti ispiker kadagiti napateg a punto iti uppat nga aldaw a programa sana pinalagipan dagiti nakikumbension maipapan kadagiti baro a publikasion. Inyanunsiona met a ti maikadua a videocassette iti serye ti The Bible​—A Book of Fact and Prophecy ket mairuarton iti mabiit. Kinapudnona, ti videocassette a napauluan The Bible​—Mankind’s Oldest Modern Book ket maalan iti Ingles. Naibasa dagiti makaabbukay-rikna a report a naggapu kadagiti lugar nga adda napalalo a krisis, a kas idiay Bosnia ken Herzegovina. Kas pangserra, binasa ti ispiker dagiti sasao ti Eclesiastes 12:13: “Daytoy isu ti pagbanagan ti panggep, amin nangngegan: Agbutengka iti Dios, ket salimetmetam dagiti bilbilinna. Ta daytoy isu ti dagup ti rebbeng ti tao.”

Anian a nagsayaat a palagip! Agbiagtayo maipaay iti aldaw inton amin a sangatauan dayawenda ti Naindaklan nga Instruktor, ni Jehova, ken ipangagda ti nadiosan a sursurona.

[Dagiti Ladawan iti panid 24, 25]

Dagiti “Nadiosan a Panangisuro” a kumbension idiay Moscow ken Kiev nangyeg iti dakkel a rag-o

[Dagiti Ladawan iti panid 26, 27]

1. Babaen ti panagpabautisarda, adu dagiti nangisimbolo ti dedikasionda iti Dios

2. Maragsakan a nakaawat iti baro a publikasion ti 100-años a kumbensionista

3, 4. Naapresiar unay dagiti mamagpanunot a drama

5. Intampok dagiti misionero a nainterbiu kadagiti kumbension dagiti gunggona ti nadiosan a pannursuro