Dagiti Payunir Mangbendision ken Mabendisionan

“NAPATPATEG nga amang ti panagpayunir ngem ti naballigi a sekular a karera. Awanen ti ad-adda a makaparagsak ngem ti panangtulong kadagiti tao a makaammo ken Jehova ken ti kinapudnona.” Dayta ti kinuna ti maysa a Kristiano a babai a nangpili iti kinapayunir​—amin-tiempo a panangikaskasaba ti Pagarian​—kas karerana. Mano pay a sabsabali a karera ti makaipaay iti kasta a kinaragsak?

Ti panagpayunir ket agpadpada a natan-ok a kalat ken napateg a pribilehio. Kasano a maaramidan ti maysa a tao a pilien ti kasta a biag? Ania ti kasapulan tapno makapagtalinaed a payunir iti umdas a kaatiddog ti panawen tapno masagrap dagiti bendision a yeg dayta?

Adda dua a banag a nasken. Umuna, dagiti umiso a kasasaad. Adu ti adda iti kasasaad a nabatad a mangipakita nga imposible ti panagpayunir. Ken maikadua, ti umiso a naespirituan a kualipikasion ken kababalin. Siempre, ipalubos man ti agdama a kasasaad ti tao nga agpayunir wenno saan, amin ti mabalin a mangikagumaan a mangparang-ay kadagiti galad ti maysa a nataengan a Kristiano.

No Apay nga Agpayunir Dagiti Dadduma

Ania kadi dagiti kualipikasion maipaay iti naballigi a panagpayunir? Bueno, ti kinasigo iti panangasaba ket napateg. Kasapulan nga ammo dagiti payunir no kasano nga ipresenta ti naimbag a damag kadagiti ganggannaet, agsarungkar kadagiti interesado, ken mangidaulo kadagiti panagadal ti Biblia iti pagtaengan. Ti kaawan kabaelan kadagitoy mabalin a mangupay iti maysa a payunir. Nupay kasta, napateg met dagiti dadduma pay a banag.

Kas pangarigan, amin nga aramidentayo iti panagdaydayawtayo ket mainaig iti relasion[tayo] ken ni Jehova ken iti organisasionna. Mairaman ditoy ti panagpayunir. Inlawlawag ti maysa nga agtutubo a payunir nga agnagan Rado: “Para iti maysa nga agtutubo, awanen ti nasaysayaat ngem ti pananglagip ken ni Jehova ken pannagna iti dana ti kinapudno.” Wen, ti panagpayunir ti maysa a nasayaat a pamay-an para kadagiti agtutubo a mangipakita ti panagayatda ken ni Jehova ken ti kinadekket kenkuana.​—Eclesiastes 12:1.

Kasapulan met unay ti pannakaammo ken pannakaawat. (Filipos 1:9-11) Mayarig dagitoy iti krudo a mangpaandar iti naespirituan a makinatayo. Kasapulan ti regular a personal a panagadal tapno maliklikan ti panagkapuy iti naespirituan, a mapukaw ti kinaregta ken kinatibkertayo. Siempre, ti pannakaammo nga ipapaunegtayo rumbeng nga apektaranna saan laeng a ti isip no di pay ket ti puso. (Proverbio 2:2) Gapuna, malaksid iti personal a panagadal, kasapulantay ti panawen maipaay iti panagkararag ken panagmennamenna tapno ti pannakaammo a magun-odtayo dumanon iti puso. Kalpasanna, no ipalubos ti kasasaadtayo, tarigagayantayo ti agpayunir.​—Idiligyo ti Esdras 7:10.

Ti panagserbi kas payunir kalikagumanna met ti espiritu ti panagsakripisio. Maysa nga agtutubo nga agnagan Ron ti nakaplanon nga agpayunir. Ur-urayenna laengen ti umiso a kasasaad tapno marugiananna. Kinapudnona, kayatna ti maaddaan iti trabaho a mangipalubos kenkuana nga agpayunir ken maigiddan iti dayta matagiragsakna ti dadduma a pagnam-ayan iti biag. Idi dinakamatna daytoy iti maysa a nataengan a sister, naklaat iti sungbat ti kabsat. Kinuna ti sister: “Bendisionan ni Jehova dagiti aramid, saan a dagiti kari.” Nakabiruk ti agtutubo a lalaki iti trabaho a nababbaba ti sueldo ngem mangipaay kenkuana ti panawen nga agpayunir. Ti panangipakat iti Mateo 6:25-34 makatulong iti maysa nga agtultuloy a payunir uray no basbassit ti sapulna.

Ti sipapakumbaba ken situtulok a panangsurot kadagiti naimbag a singasing makatulong met kadatayo iti panagserbi kas payunir. Idi nabiit pay a nagbalin a Kristiano, tinarigagayan ni Hanna ti agpayunir. Ngem saan a nakapagpayunir bayat a nagpadakkel iti pamilia ken di nagbayag nagbalin nga okupado iti negosio. Iti panangipangagna iti balakad dagiti alisto a papanglakayen, inidianna ti makaay-ayo a sekular a karerana ket nagpayunir. Marikna itan ni Hanna ti dakkel a rag-o iti panangiturong kadagiti sabsabali iti dedikasion ken panangtulong kadagiti inaktibo.

Ti panagyaman iti naaramidan ti kinapudno iti biag ti maysa ket mabalin met a mangparegta iti panagpayunir. Usigenyo ti kasasaad ti malmalday unay a babai a makisina koman ken ni lakayna. Dakkel unay ti nagbaliwan daytoy a kasasaad idi naammuanna ti kinapudno ti Sao ti Dios ken inyaplikarna. Gapu iti ragsakna iti nagapuanan ti kinapudno kenkuana, inkeddengna a ti kasayaatan a pamay-an tapno maipakitana ti panangapresiar isu ti panagpayunir ken panangtulong kadagiti dadduma. Kasta ti inaramidna, ket sagsagrapenna itan dagiti bendision ti adu a yad-adalan iti Biblia ken maysa a naragsak a biag ti pamilia.

Makatulong Dagiti Dadduma

Masansan nga agbunga dagiti payunir kadagiti dadduma pay a payunir. Ni Rado, a nadakamat itay, innem ti tawenna idi nga inyadalan iti Biblia ti dua a payunir dagiti nagannak kenkuana. Idi ubing pay laeng, kanayon a makikuyog kadagitoy amin-tiempo a manangaskasaba iti ministerio iti tay-ak. Ni Rado a mismo nagbalin a regular payunir idi agtawen iti 17. Ti sabali pay nga agtutubo a lalaki, ni Arno, dimmakkel iti Kristiano a pamilia ngem kimmapuy ti espiritualidadna. Idi agangay, nagtignay a mangpabileg ti espiritualidadna, ket ita maikunana: “Kasta unay ti panangparparegta dagiti payunir kaniak. Nakilanglangenak kadakuada nangruna kabayatan dagiti bakasion iti eskuelaan ket no dadduma makapagreport-ak iti 60 nga oras iti maysa a bulan iti serbisio iti tay-ak. Kalpasan dayta, ti panagbalin kas maysa a regular payunir [a mangkalikagum iti 90 nga oras kada bulan] ket di unayen a narigat.” Ti panangmennamenna iti balakad idiay 1 Corinto 7:29-31 a saan a panangusar iti lubong a naan-anay ket pudno a makatulong iti kakasta nga agtutubo.

Nalaklaka nga agramut ti espiritu ti panagpayunir iti pagtaengan a dagiti naespirituan a banag ti mayun-una ket dagiti nagannak paregtaenda dagiti annakda a sumrek iti amin-tiempo a ministerio. Kuna ni Philo a dimmakkel iti kasta a pagtaengan: “Adu ti nangbalakad kaniak nga ituloyko ti panagadalko, tapno makapagtrabaho iti sekular iti masanguanan. Ngem tinulongandak dagiti dadakkelko a mangaramid iti mas nainsiriban a desision. Kinunada kaniak a no talaga a kayatko ti maaddaan iti nasayaat a masakbayan, ti umuna a rumbeng nga ipangrunak isu ti panangparang-ay iti relasionko ken ni Jehova.”

Impagapu met ti maysa nga agtutubo a babai nga agnagan Thamar ti panagserbina kas payunir iti ulidan ken panagregget dagiti dadakkelna. Kinunana: “Diak maibaga a talaga no kaano a naparang-ayko ti naespirituan a panangmatmat iti biag, ngem ammok a saan a naisigud dayta kaniak. Ti ugali dagiti dadakkelko a kanayon a makiraman iti tay-ak iti serbisio ken tumabuno kadagiti gimong, kasta met ti nauneg a panagayatda iti kinapudno, ti dakkel a timmulong kaniak tapno maparang-ay ti naespirituan a panangmatmatko.”

Panagtalinaed iti Desisionyo

No maysan a payunir ti maysa a tao, ti panagtalinaed iti dayta ti tumulong kenkuana a mangsagrap ti naan-anay a gunggona dayta nainsiriban a desision. Adu a praktikal a balakad ti maipaay iti kasta a panggep. Kas pangarigan, nasayaat no maadal dagiti payunir nga iyeskediul ti panawenda tapno agbalin a nabunga dayta aginggat’ mabalbalin. Nupay kasta, ti kangrunaan a banag isu ti relasion ti maysa ken ni Jehova ken iti organisasionna.

Mainaig iti daytoy isu ti kanayon a panagkararag. “Idi addaakon iti kinapudno, tarigagayak unay ti agpayunir,” kuna ni Cor. Nupay kasta, inkalikagum ti amana a mangileppas pay nga umuna ti kurso iti Agricultural University. Kalpasanna, rinugian ni Cor ti agpayunir. Idi agangay nangasawa, ket kimmadua ni baketna iti trabaho a panagpayunir. Idi agdadagsen ni baketna, naipasango iti posibilidad nga agikkat iti panagpayunir. “Masansan nga agkararagak ken Jehova ket inyebkasko kenkuana ti tarigagay toy pusok nga agtultuloy a payunir,” kuna ni Cor. Kamaudiananna nakabiruk ni Cor iti maysa a kita ti trabaho a mangipalubos kenkuana nga agpayunir bayat nga ay-aywananna ti pamiliana.

Ti panagbalin a kontento kadagiti material a kasapulan masansan a makatulong met iti maysa a tao nga agtalinaed iti panagserbi a kas payunir. Insurat ni apostol Pablo: “Ti wagas ti panagbiagyo siwayawaya koma iti panagayat iti kuarta, bayat a mapnekkayo kadagiti agdama a bambanag. Ta kinunana: ‘Saankanto a pulos panawan ket saankanto a pulos baybay-an.’” (Hebreo 13:5) Ti panagbalin a kontento kadagiti bambanag iti agdama ti nakatulong kada Harry ken Irene nga agtalinaed a payunir. Ni Irene, maysa a bulsek, walo a tawenen a payunir. “Pulos a saanmi a minatmatan kas parikut ti kasasaadmi iti pinansial,” kunana. “Siniguradomi laeng a dikam mangawat kadagiti di kasapulan a pinansial a pakadagsenan. Tiningitingmi a kanayon ti gatad. Ti panagbiagmi ket kanayon a simple, nupay agpayso a naragsak, ken adu ti aw-awatenmi a bendision.”

Naruay a Rag-o ken Bendision

Iti panangtaliaw iti nasurok a siam a tawen a panagpayunir, kuna ni Thamar: “Mapasingedka ken ni Jehova, a kas man la aktual a tartarabayennaka.” (Salmo 73:23) Sumiplot met iti panunot dagiti sumagmamano a pannubok. “Masansan a riribukendak dagiti bukodko a pagkapuyan kasta met dagiti dadduma,” innayon ni Thamar. “Maysa pay, no matmatak dagiti kakabsat a nangpili iti nanamnam-ay a panagbiag, kasla makaawis ti pinilida no kasta a mamalaybalayak bayat nga agtudtudo ken nalam-ek ti panawen. Ngem iti kaunggan toy pusok, pulos a diak tarigagayan ti makisinnukat ti kasasaad. Adda kadi pay sabali malaksid iti panagpayunir a makaipaay iti kasta a kinarag-o, pannakapnek iti naespirituan, ken kakasta a bendision?” Tagipatgenyo met aya unay dagiti umasping a kinarag-o ken bendision?

Gapu iti adu a panawen a busbusbosen dagiti payunir iti Nakristianuan a ministerio, addada iti kasasaad a tumulong iti adu a tattao a gumun-od iti pannakaammo iti kinapudno iti Biblia. Kuna da Harry ken Irene a nadakamat itay: “Nagadu ti pribilehio iti organisasion ni Jehova, ngem ti panangtulong iti kabbaro nga interesado a rumang-ay agingga iti punto nga agbalin nga adipen ni Jehova ti kadakkelan iti amin.”

Nasayaat ti panangiyebkas ti sabali pay a payunir: “Napaneknekak a pudno dagiti sasao idiay Proverbio 10:22: ‘Ti bendision ni Jehova​—ti mangpabaknang ket saanna nga anayan iti ladingit.’ Maulit-ulit a natungpal daytoy a kasuratan kaniak kadagiti tawtawen a panagserbik ken Jehova.”

Dakayo a nagannak, ipagpaganetgetyo kadi kadagiti annakyo ti panagpayunir? Dakayo a payunir, iparparegtayo kadi kadagiti dadduma daytoy a tarigagay? Dakayo a papanglakayen, supsuportaranyo kadi dagiti payunir iti kongregasionyo ken tumultulongkayo a mangpatanor iti espiritu ti panagpayunir kadagiti dadduma? Sapay koma ta adu pay iti ili ni Jehova ti matignay a mangragpat kadagiti kakasta a nabaknang a bendision bayat a makiramanda iti panagserbi kas payunir.