Dagiti Manangiwaragawag ti Pagarian Aktiboda iti Intero a Daga
“Dakayto dagiti saksik . . . agingga iti kaadaywan a paset ti daga.”—ARAMID 1:8.
1. Ania a mensahe ti imbaga ni Jesus nga iwaragawag dagiti pasurotna iti kaaldawantayo?
IDI inlawlawagna ti trabaho a nangibaonan ni Jehova iti Anakna ditoy daga, kinuna ni Jesus: “Masapul nga ideklarak ti naimbag a damag ti pagarian ti Dios.” (Lucas 4:43) Kasta met, idi ibagbagana ti trabaho nga aramiden dagiti adalanna ditoy daga inton agsubli nga addaan iti naarian a pannakabalin, kinuna ni Jesus: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.”—Mateo 24:14.
2. (a) Apay a nagpateg a maisaknap ti mensahe ti Pagarian? (b) Ania a saludsod ti rumbeng nga isaludsodtay amin iti bagitayo?
2 Apay a nagpateg ti damag maipapan iti Pagarian ti Dios? Apay a kasapulan ti Pagarian ti kasta a nasaknap a pannakaipablaak? Agsipud ta ti Mesianiko a Pagarian ti mangalangon iti sapasap a kinasoberano ni Jehova. (1 Corinto 15:24-28) Babaen iti dayta, dadaelento ni Jehova ti agdama a sistema ni Satanas ken tungpalenna ti karina a bendisionanna amin a pamilia iti daga. (Genesis 22:17, 18; Daniel 2:44) Babaen ti pannakaikaskasaba ti Pagarian, nasarakan ni Jehova dagidiay pinulotanna kalpasanna a makipagturay iti Anakna. Babaen ti pannakaiwaragawag ti Pagarian, maar-aramid met itatta ti trabaho a panamaglalasin. (Mateo 25:31-33) Kayat ni Jehova a mapakaammuan dagiti tattao iti amin a nasion maipapan iti panggepna. Kayatna a maaddaanda iti gundaway a mangpili iti biag kas iturayan ti Pagarianna. (Juan 3:16; Aramid 13:47) Makiramramankay aya a naan-anay iti panangiwaragawag iti daytoy a Pagarian?
Panangpadpadaan iti Panagpatingga ti Panawen Gentil
3. (a) Mayanatup la unay, ania ti tema nga intampok ni C. T. Russell iti immuna a panagdaliasatna tapno mangbuangay kadagiti grupo maipaay iti panagadal iti Biblia? (b) Ania ti nabigbig dagiti immuna nga Estudiante ti Biblia no maipapan iti maiparbeng a lugar ti Pagarian ti Dios iti biagda?
3 Idi 1880, nagdaliasat ni Charles Taze Russell, ti immuna nga editor ti magasin a Watch Tower, iti umamianan a daya ti Estados Unidos tapno iparegtana ti panangbuangay kadagiti grupo maipaay iti panagadal iti Biblia. Mayanatup la unay, ti tema nga impalpalawagna ket “Bambanag a Nainaig iti Pagarian ti Dios.” Kas naipamatmat kadagiti immuna a ruar ti Watch Tower, nabigbig dagiti Estudiante ti Biblia (kas awag kadagiti Saksi ni Jehova idi) a tapno maikarida a makiraman iti Pagarian ti Dios, masapul a ti Pagarian ti iyun-unada, a siraragsak nga usarenda ti biagda, dagiti abilidadda, ken dagiti sanikuada iti panagserbi iti dayta. Maikadua laeng iti biagda amin a dadduma pay a banag. (Mateo 13:44-46) Ti responsabilidadda inramanna ti panangipakaammo iti naimbag a damag maipapan iti Pagarian ti Dios kadagiti sabsabali. (Isaias 61:1, 2) Kasano kasaknap ti panangaramidda iti dayta sakbay ti panagpatingga ti Panawen Gentil idi 1914?
4. Kasano kaadu ti naiwaras ti bassit a grupo dagiti Estudiante ti Biblia a literatura ti Biblia sakbay ti 1914?
4 Nanipud 1870’s agingga iti 1914, manmano laeng dagiti Estudiante ti Biblia. Idi 1914, agarup 5,100 laeng ti siaaktibo a makiramraman iti panangasaba iti publiko. Ngem anian a nakaskasdaaw a pammaneknek ti naipaay idi! Idi 1881, dua a tawen laeng kalpasan ti damo a pannakaipablaak ti Watch Tower, inwarasda ti 162-pinanidna a publikasion a Food for Thinking Christians. Iti sumagmamano la a bulan, nakaiwarasda iti 1,200,000 a kopia. Iti las-ud ti sumagmamano a tawen, pinulpullo a milion a tract ti maiwarwaras kada tawen iti adu a pagsasao.
5. Siasino dagiti colporteur, ket ania a kababalin ti imparangarangda?
5 Kasta met, nangrugi idi 1881, nagserbi dagiti dadduma a kas colporteur nga ebanghelisador. Isu dagitoy ti katupag dagiti payunir (amin-tiempo nga ebanghelisador) itatta. Dadduma kadagiti colporteur, a nagnagna wenno nakabisikleta, ti personal a nangaskasaba iti dandani amin a paset ti pagilian a pagtataenganda. Nagserbi dagiti dadduma kadagiti ganggannaet a tay-ak ket isuda ti immuna a nangipan iti naimbag a damag kadagiti lugar kas ti Finlandia, Barbados, ken Burma (Myanmar itan). Kas misionero, naregtada a kas ken Jesu-Kristo ken dagiti apostolna.—Lucas 4:43; Roma 15:23-25.
6. (a) Kasano kalawa ti dinaliasat ni Brother Russell a nangisaknap iti kinapudno ti Biblia? (b) Ania pay ti naaramid tapno lumawa ti panangikaskasaba iti naimbag a damag kadagiti ganggannaet a tay-ak sakbay ti panagpatingga ti Panawen Gentil?
6 Nalawa ti dinaliasat ni Kabsat Russell a mismo a nangisaknap iti kinapudno. No mano a daras a napan idiay Canada; nagpalpalawag idiay Panama, Jamaica, ken Cuba; namin-adu a napan idiay Europa; ken linibutna ti lubong iti trabaho a panagebanghelio. Nangibaon met kadagiti dadduma a lallaki a mangiyussuat ken mangidaulo iti panangikaskasaba iti naimbag a damag kadagiti ganggannaet a tay-ak. Naibaon ni Adolf Weber idiay Europa idi ngalay ti 1890’s, ket manipud Switzerland napan nagserbi idiay Francia, Italia, Alemania, ken Belgium. Ni E. J. Coward ti naibaon idiay deppaar ti Caribe. Ni Robert Hollister ti naituding iti Oriente idi 1912. Sadiay, naipablaak dagiti espesial a tract iti sangapulo a pagsasao, ket riniwriw a kopia dagitoy ti naiwaras dagiti katutubo iti intero nga India, China, Japan, ken Korea. No nagbiagkay idi, ginutugotnakay met ngata ti pusoyo a sipipinget a mangidanon iti naimbag a damag kadagiti sabsabali iti lugaryo ken iti dadduma pay a disso?
7. (a) Kasano a nausar dagiti pagiwarnak tapno ad-adda a maisaknap ti panangpaneknek? (b) Ania ti “Photo-Drama of Creation,” ket mano ti nakabuya iti dayta iti las-ud laeng ti makatawen?
7 Bayat nga umad-adani ti panagpatingga ti Panawen Gentil, naaramat dagiti pagiwarnak a mangipablaak kadagiti sermon iti Biblia nga impalpalawag ni Kabsat Russell. Saan a ti tawen 1914 ti kangrunaan nga impagpaganetget dagitoy, no di ket, ti panggep ti Dios ken ti di agkibaltang a pannakatungpal daytoy. Naminsan, agarup 2,000 a pagiwarnak, a dumandanon iti 15,000,000 a managbasa, ti regular a mangipabpablaak kadagitoy a sermon. Kalpasanna, bayat nga umad-adani ti tawen 1914, rinugian ti Sosiedad nga impabuya iti publiko ti “Photo-Drama of Creation.” Iti uppat a 2-oras a presentasion, imparang [ti “Photo-Drama of Creation”] dagiti kinapudno ti Biblia manipud panamarsua agingga iti Milenio. Iti las-ud laeng ti makatawen, nasurok a siam a milion ti nakabuyan iti dayta idiay Norte America, Europa, Australia, ken New Zealand.
8. Idi 1914, mano a dagdaga ti nadanonen dagiti Estudiante ti Biblia a nangikaskasabaan iti naimbag a damag?
8 Sigun kadagiti adda a rekord iti maudi a paset ti 1914, naisaknapen daytoy naregta a bunggoy dagiti ebanghelisador ti panangiwaragawagda iti Pagarian ti Dios iti 68 a dagdaga.a Ngem pangrugian la dayta!
Sireregta nga Iwarwaragawagda ti Naipasdeken a Pagarian
9. Kadagiti kumbension idiay Cedar Point, kasano a naipaganetget ti trabaho a panangpaneknek maipapan iti Pagarian?
9 Idi nagtitipon dagiti Estudiante ti Biblia idiay Cedar Point, Ohio, idi 1919, kinuna ni J. F. Rutherford, ti presidente idi ti Watch Tower Society: “Ti trabahotayo idi ken ita isu ti panangipakaammo iti um-umayen a nadayag a pagarian ti Mesias.” Iti maikadua a kumbension idiay Cedar Point, idi 1922, intampok ni Kabsat Rutherford ti kinapudno nga iti panagpatingga ti Panawen Gentil, idi 1914, ‘naawaten ti Ari ti kinadayag ti naindaklan a pannakabalinna ken agturturayen.’ Kalpasanna, sipaprangka nga indatagna ti isyu kadagiti agdengdengngeg kenkuana, a kunana: “Mamatikayo kadi nga agturturayen ti Ari ti kinadayag? Agsublikayo ngarud iti tay-ak, O dakayo nga annak ti kangatuan a Dios! . . . Isaknapyo ti mensahe. Masapul a maammuan ti lubong a ni Jehova ti Dios ket ni Jesu-Kristo ti Ari dagiti ar-ari ken Apo dagiti appo. Isu daytoy ti aldaw dagiti amin nga al-aldaw. Adtoy, agturturayen ti Ari! Dakayo dagiti ahentena a mangiwaragawag.”
10, 11. Kasano a naaramat a sieepektibo dagiti radio, sound car, ken plakard a mangidanon iti kinapudno ti Pagarian kadagiti tattao?
10 Nasurok a 70 a tawenen ti naglabas sipud idi naangay dagidiay a kumbension idiay Cedar Point—agarup 80 a tawen sipud idi rinugian ni Jehova nga iyebkas ti kinasoberanona babaen ti Mesianiko a panagturay ti Anakna. Kasano kasaknap nga aktual a naitungpal dagiti Saksi ni Jehova ti trabaho nga intuding ti Sao ti Dios nga aramidenda? Ania ti personal a pasetyo iti dayta?
11 Idi rugrugi ti 1920’s, nagserbi ti radio kas maysa nga instrumento a maaramat iti panangisaknap iti mensahe ti Pagarian. Idi 1930’s, naipangngeg dagiti diskurso iti kumbension a nangitampok iti Pagarian kas namnama ti lubong babaen kadagiti network ti radio wenno chain broadcast ken linia ti telepono a nanglikmut iti lubong. Naaramat met dagiti kotse nga addaan kadagiti loudspeaker a mangipangngeg kadagiti nairekord a diskurso iti Biblia kadagiti publiko a lugar. Kalpasanna, idi 1936, idiay Glasgow, Scotland, rinugian dagiti kakabsattayo ti nagaruat kadagiti plakard bayat nga agparparadada kadagiti lugar ti komersio a mangipabpablaak kadagiti palawag publiko. Epektibo amin dagitoy a pamay-an ti panangpaneknek kadagiti adu a tattao iti daydi a tiempo idi manmanotay pay laeng.
12. Kas ipakita ti Kasuratan, ania ti maysa kadagiti kaepektibuan a pamay-an para iti tunggal maysa kadatayo a mangpaneknek?
12 Siempre, nabatad nga ipakita ti Kasuratan a kas Kristiano, addaan ti tunggal maysa kadatayo iti responsabilidad a mangpaneknek. Ditay mabalin nga ipabiang lattan dayta a trabaho kadagiti artikulo ti pagiwarnak wenno kadagiti broadcast iti radio. Rinibu a nasungdo a Kristiano—lallaki, babbai, ken agtutubo—ti nangawat iti dayta a responsabilidad. Kas banagna, ti panangasaba iti binalaybalay ket nagbalin a maysa a pakailasinan dagiti Saksi ni Jehova.—Aramid 5:42; 20:20.
Panangdanon iti Intero a Mapagnaedan a Daga
13, 14. (a) Apay nga umakar dagiti sumagmamano a Saksi kadagiti dadduma nga ili, uray kadagiti dadduma pay a pagilian, a pangituloyanda iti ministerioda? (b) Kasano a nakatulong ti naayat a pannakaseknan kadagiti tattao iti daga a nakayanakan ti maysa iti pannakaisaknap ti naimbag a damag?
13 Gapu ta ammoda a masapul a maikaskasaba ti mensahe ti Pagarian iti intero a mapagnaedan a daga, sipapasnek nga inusig dagiti dadduma kadagiti Saksi ni Jehova no ania ti personal a maaramidanda a mangdanon kadagiti lugar iti labes ti mismo a purokda.
14 Adu dagiti nakaammo iti kinapudno kalpasan ti yaakarda iti sabali a lugar nga adayo iti lugar a nakayanakanda. Nupay immakarda nalabit gapu iti material a pagimbagan, nakasarakda iti maysa a banag a napatpateg, ket nagsubli dagiti dadduma iti daga wenno lugar a nakayanakanda tapno iranudda ti kinapudno. Gapuna, iti rugrugi daytoy a siglo nakadanon ti panangikaskasaba iti naimbag a damag agingga idiay Scandinavia, Grecia, Italia, kadagiti pagilian ti Makindaya nga Europa, ken iti adu pay a disso. Uray ita, iti 1990’s, agsaksaknap ti mensahe ti Pagarian iti kasta met laeng a pamay-an.
15. Idi 1920’s ken 1930’s, ania ti nagapuanan dagiti sumagmamano a ti kababalinda ket kas iti daydiay nayebkas idiay Isaias 6:8?
15 Iti panangiyaplikarda iti balakad ti Sao ti Dios iti biagda, situtulok dagiti dadduma a napan nagserbi kadagiti disso a pulos a saanda pay a nagnanaedan. Maysa ni W. R. Brown (masansan a maawagan iti “Bible Brown”) kadagitoy. Idi 1923, tapno lumawa pay ti trabaho a panagebanghelio, isut’ immakar manipud Trinidad a nagturong idiay Makinlaud nga Africa. Idi 1930’s, karaman da Frank ken Gray Smith, Robert Nisbet, ken David Norman kadagidiay nangidanon iti mensahe ti Pagarian iti makindaya a kosta ti Africa. Timmulong dagiti dadduma a mangsukay iti tay-ak ti Sud America. Idi rugrugi ti 1920’s, nakiraman ni George Young, taga Canada, iti trabaho idiay Argentina, Brazil, Bolivia, Chile, ken Peru. Ni Juan Muñiz, a nakapagserbi idiay España, ket simmaruno a napan idiay Argentina, Chile, Paraguay, ken Uruguay. Imparangarang amin dagitoy ti kababalin a nayebkas idiay Isaias 6:8: “Adtoyak! Ibaonnak.”
16. Sadino malaksid pay kadagiti adut’ taona a lugar a maar-aramid ti panangpaneknek kadagiti tawtawen sakbay ti gubat?
16 Nakadanon ti panangikaskasaba iti naimbag a damag uray kadagiti nasulinek a disso. Sinarungkaran dagiti barko a Saksi ti tripulantena amin a puerto ti Newfoundland, ti kosta ti Norway iti Arctic, dagiti isla ti Pacifico, ken dagiti puerto ti Abagatan a daya nga Asia.
17. (a) Idi 1935, mano a dagdaga ti nadanonen dagiti Saksi? (b) Apay a saan pay a nalpas ti trabaho iti daydi a tiempo?
17 Nakaskasdaaw, ta idi tawen 1935, kupado dagiti Saksi ni Jehova a mangaskasaba iti 115 a dagdaga, ket nakadanonda iti 34 pay a dagdaga babaen ti ipapanda a mismo kadagitoy a disso, wenno saan, babaen kadagiti literatura a maipatpatulod iti koreo. Ngem, saan pay a nalpas ti trabaho. Iti dayta a tawen linuktan ni Jehova dagiti matada iti panggepna a mangurnong iti “dakkel a bunggoy” a makalasatto nga agturong iti baro a lubongna. (Apocalipsis 7:9, 10, 14) Adu pay a panangasaba ti masapul a maaramid!
18. Iti trabaho a panangiwaragawag iti Pagarian, ania ti inakem ti Eskuelaan ti Gilead ken ti Ministerial Training School?
18 Uray pay no nalakub idin ti Gubat Sangalubongan II ti daga ken naiparit dagiti literatura wenno ti trabaho dagiti Saksi ni Jehova iti adu a pagilian, linuktan ti Watchtower Bible School of Gilead dagiti ruanganna a mangsanay kadagiti masanguanan a misionero a mangiringpas iti dakdakkel pay a trabaho a panangiwaragawag iti Pagarian iti intero a lubong. Nasurok a 200 a dagdagan ti nagserbian dagiti nagturpos iti Gilead. Saanda laeng a nangipaima kadagiti literatura sada immallatiw iti sabali a lugar. Nangidauloda kadagiti panagadal iti Biblia, nangbuangayda kadagiti kongregasion, ken nangsanayda kadagiti tattao a mangibaklay iti teokratiko a responsabilidad. Itay nabiit, timmulong met dagiti panglakayen ken ministerial nga adipen a nagturpos iti Ministerial Training School a mangasikaso kadagiti nasken a kasapulan a mainaig iti daytoy a trabaho iti innem a kontinente. Naipasdeken ti nalagda a pundasion maipaay iti agtultuloy nga irarang-ay.—Idiligyo ti 2 Timoteo 2:2.
19. Kasano nga impangag dagiti adipen ni Jehova ti awis nga agserbi kadagiti lugar a dakdakkel ti pakasapulan?
19 Adda kadi maitulong dagiti dadduma a mangasikaso kadagiti sumagmamano a teritoria a di pay nawanwanas? Idi 1957, kadagiti kumbension iti intero a lubong, naparegta dagiti indibidual ken pampamilia—natataengan a Saksi ni Jehova—nga usigenda ti maipapan iti yaakar kadagiti lugar a dakdakkel ti pakasapulan tapno idiaydan nga agtaeng ken ituloy ti ministerioda. Ti awis ket kas iti daydiay indatag ti Dios ken ni apostol Pablo, a nakakita iti sirmata iti maysa a lalaki nga agpakpakaasi kenkuana: “Umallatiwka idiay Macedonia ket tulongannakami.” (Aramid 16:9, 10) Kasta ti inaramid dagiti sumagmamano idi 1950’s, dagiti dadduma naud-udida. Agarup sangaribu a Saksi ti immakar idiay Irlandia ken idiay Colombia; ginasut ti immakar kadagiti adu a sabali pay a lugar. Pinulpullo a ribu ti immakar kadagiti lugar a dakdakkel ti pakasapulan iti mismo a pagilianda.—Salmo 110:3.
20. (a) Nanipud 1935, ania ti nagapuananen kas kaitungpalan ti padto ni Jesus idiay Mateo 24:14? (b) Kadagiti napalabas a sumagmamano a tawen, kasano a napadaras ti trabaho?
20 Gapu iti pammendision ni Jehova iti ilina, agtultuloy ti irarang-ay ti trabaho a panangiwaragawag iti Pagarian iti nakaskasdaaw a kinapartak. Nanipud 1935 agarup maminwalopulo ti rimmang-ayan ti bilang dagiti agibumbunannag, ket ti irarang-ay ti bilang dagiti payunir ket 60 porsiento a naparpartak ngem ti irarang-ay ti bilang dagiti agibumbunannag. Nayussuat ti urnos a panagadal iti Biblia iti pagtaengan idi 1930’s. Agpromedio itan iti nasurok nga uppat ket kagudua a milion ti bilang dagiti panagadal iti Biblia iti pagtaengan a maidadaulo kada bulan. Nanipud 1935, nasurok a 15 bilion nga oras ti nabusbosen iti trabaho a panangiwaragawag iti Pagarian. Maar-aramid ita ti regular a panangikaskasaba iti naimbag a damag iti 231 a dagdaga. Bayat a naglukat dagiti teritoria idiay Makindaya nga Europa ken Africa maipaay iti nawaywaya a pannakaikaskasaba ti naimbag a damag, sieepektibo a maus-usar dagiti kumbension internasional a mangiparang a sipapanayag iti mensahe ti Pagarian iti publiko. Kas inkari ni Jehova idi ugma, idiay Isaias 60:22, pudno a ‘pinagbalinna a nadaras ti trabaho iti panawenna.’ Anian a naindaklan a pribilehio para kadatayo a makiraman iti dayta!
Panangidanon iti Naimbag a Damag iti Tunggal Maysa No Mabalbalin
21, 22. Ania ti personal a maaramidantayo tapno agbalintayo nga ad-adda nga epektibo a Saksi sadinoman ti pagserserbiantayo?
21 Saan pay nga imbaga ti Apo a nalpasen ti trabaho. Rinibribu pay dagiti mangab-abrasa iti pudno a panagdayaw. Gapuna tumaud ti saludsod, Ar-aramidentay aya ti amin a kabaelantayo a mangusar a naimbag iti panawen nga impalubos ti panagan-anus ni Jehova a maipaay iti daytoy a trabaho?—2 Pedro 3:15.
22 Di mabalinan ti tunggal maysa ti umakar iti teritoria a paspasaray a matrabaho. Ngem us-usarenyo aya a naan-anay amin a gundaway a silulukat kadakayo? Kaskasabaanyo aya dagiti katrabahuanyo? dagiti mannursuro ken kaeskuelaanyo? Makibagbagaykay aya kadagiti agbaliwbaliw a kasasaad iti teritoriayo? No, kas resulta ti panagbaliwbaliw ti urnos ti trabahoda, manmano dagiti adda iti pagtaengan iti aldaw, binaliwanyon aya ti eskediulyo tapno masarungkaranyo ida iti rabii? No dagiti pasdek ket di mabalin a serken dagiti di naawis a bisita, mangpampaneknekkayo aya babaen ti telepono wenno koreo? Sarsarungkaranyo aya dagidiay nangipakita iti interes ken mangituktukonkayo iti panagadal iti Biblia iti pagtaengan? An-annongenyo aya a naan-anay ti ministerioyo?—Idiligyo ti Aramid 20:21; 2 Timoteo 4:5.
23. Bayat a palpaliiwen ni Jehova ti panagserbitayo kenkuana, ania ti rumbeng a nabatad kadatayo?
23 Sapay koma ta annongentay amin ti ministeriotayo iti wagas a silalawag a mangipakita ken Jehova a pudpudno nga ipatpategtayo ti naindaklan a pribilehio nga agbalin a Saksina kadagitoy nagpateg a tiempo. Sapay koma ta maparaburantayo a makaimatang iti panangdadael ni Jehova iti rinuker a daan a sistema ken panangiyegna iti nadayag a Milenio a Panagturay ni Jesu-Kristo!
[Footnote]
a Nabilang sigun iti pamay-an a pannakabingaybingay ti daga idi rugrugi ti 1990’s.
Panangrepaso
◻ Apay a nagpateg ti panangikaskasaba iti mensahe ti Pagarian?
◻ Kasano kasaknap a naikaskasaba ti naimbag a damag agingga iti 1914?
◻ Kasano kasaknap a maar-aramid ti panangasaba nanipud naipasdek ti Pagarian?
◻ Ania ti mamagbalin iti pannakiramantayo iti ministerio a nabungbunga?
[Kahon iti panid 16, 17]
DAGITI SAKSI NI JEHOVA—Manangiwaragawag iti Pagarian ti Dios
Kadagiti ginasut a kumbension iti aglikmut ti lubong idi 1993-94, naipakaammo ti pannakairuar ti baro a libro a napauluan Dagiti Saksi ni Jehova—Manangiwaragawag iti Pagarian ti Dios. Maysa daytoy a makaisuro, komprehensibo a pakasaritaan dagiti Saksi ni Jehova. Maysa dayta a 752-pinanidna a libro, napintas pannakailadawanna, nga addaan iti nasurok a sangaribu a ladawan a naurnong manipud iti 96 a nadumaduma a dagdaga. Idi ngudo ti 1993, naipablaaken daytoy iti 25 a pagsasao ken maipatpatarus iti dadduma pay a pagsasao.
Apay a naintiempuan unay ti kasta a libro? Kadagiti kallabes a tawen riniwriw a tattao iti intero a lubong ti nagbalin a Saksi ni Jehova. Rumbeng a masursuruanda amin a naimbag maipapan iti pakasaritaan ti organisasion a nakaikamenganda. Mainayon pay, nakadanonen ti panangaskasaba ken wagas ti panagdaydayawda kadagiti nadumaduma a nasion ken puli iti intero a lubong ken inabrasa dagiti tattao, agpadpada dagiti agtutubo ken natataengan, iti amin a tukad ti kabibiag ken edukasion. Kas banagna, adu a makaim-imatang iti mapaspasamak ti agsalsaludsod maipapan kadagiti Saksi—saan laeng a maipapan iti patpatienda no di pay ket maipapan iti nagtaudanda, pakasaritaanda, organisasionda, pangpanggepda. Adda dagidiay nagsurat maipapan kadakuada, nupay dadduma kadagitoy ti adda panangidumdumana. Nupay kasta, awan ad-adda a makaammo iti pakasaritaan dagiti Saksi ni Jehova iti moderno a panawen no di dagiti Saksi met laeng. Inkagumaan dagiti editor daytoy a libro ti mangidatag iti awan ay-ayonanna ken napudno a pakasaritaan. Iti panangaramidda iti dayta, sinalaysayda met ti pannakatungpal ti nagpateg a paset ti pagilasinan ti kaadda ni Kristo a nailanad idiay Mateo 24:14, ket inaramidda dayta babaen kadagiti detalye a dagidiay laeng sipipinget a makiramraman iti trabaho a naipadto sadiay ti makaipaay.
Nabingaybingay ti libro iti pito a kangrunaan a seksion:
Seksion 1: Sukimaten daytoy a paset ti historikal a nagtaudan dagiti Saksi ni Jehova. Ramanen dayta ti ababa ngem nabagas, makaisuro a pananggupgop iti modern-aldaw a pakasaritaanda nanipud 1870 agingga iti 1992.
Seksion 2: Marepaso ditoy ti progresibo nga irarang-ay ti pammati dagiti Saksi ni Jehova a mangiduma kadakuada kadagiti dadduma a relihiuso a grupo.
Seksion 3: Usigen daytoy a paset ti libro ti irarang-ay ti urnos ti organisasionda. Salaysayenna dagiti makapainteres a bambanag maipapan kadagiti gimong ti kongregasion ken kumbensionda, kasta met ti pamay-an ti panangbangonda kadagiti Kingdom Hall, daddadakkel nga Assembly Hall, ken pasilidad para iti panangipablaak kadagiti literatura ti Biblia. Ipakitana ti kinaregta dagiti Saksi ni Jehova iti panangiwaragawag iti Pagarian ti Dios ken ti ayat nga iparparangarangda iti panangaywanda iti maysa ken maysa kadagiti narigat a tiempo.
Seksion 4: Masarakanyo ditoy dagiti makakayaw a detalye no kasano a nagsaknap ti panangiwaragawag iti Pagarian ti Dios kadagiti kangrunaan a pagilian ken adayo a purpuro iti aglikmut ti lubong. Panunotenyo laengen—panangasaba iti 43 a dagdaga idi tawen 1914, ngem iti 229 a dagdaga idi 1992! Pudno a makaparegta dagiti kapadasan dagidiay nakiraman iti daytoy a sangalubongan a panangisaknap.
Seksion 5: Ti panangitungpal iti daytoy a trabaho a panangiwaragawag iti Pagarian kinasapulanna ti panangbangon kadagiti sangalubongan a pasilidad para iti panangipablaak kadagiti Biblia ken literatura ti Biblia iti nasurok a dua gasut a pagsasao. Maammuanyo ditoy ti maipapan iti dayta a paset ti trabahoda.
Seksion 6: Naipasango met dagiti Saksi kadagiti pakasuotan—dagiti sumagmamano gapu iti kinaimperpekto ti tao, dagiti dadduma gapu kadagiti ulbod a kakabsat, ken adda met dagidiay gapu iti direkta a pannakaidadanes. Namakdaar ti Sao ti Dios a mapasamak ti kasta. (Lucas 17:1; 2 Timoteo 3:12; 1 Pedro 4:12; 2 Pedro 2:1, 2) Silalawag a salaysayen daytoy a seksion ti libro no ania ti aktual a napasamak ken no kasano a ti pammati dagiti Saksi ni Jehova ket nakatulong kadakuada nga agballigi.
Seksion 7: Kas paggibusan, salaysayen ti libro no apay a kapkapnekan unay dagiti Saksi ni Jehova a ti organisasion a nakaikamenganda ket pudpudno nga iturturong ti Dios. Salaysayenna met no apay a sisasalukagda, kas organisasion ken indibidual.
Malaksid iti nadakamaten, naglaon daytoy makaay-ayo ti pannakadiseniona a libro iti napintas ken makaisuro unay a 50-pinanidna a seksion dagiti de kolor a ladawan, a mangipakpakita iti sangalubongan a hedkuarter ken dagiti pasilidad iti sanga nga us-usaren dagiti Saksi ni Jehova iti intero a lubong.
No awan pay kopiayo, sigurado a mabenepisiarankayo iti pananggun-od ken panangbasa iti maysa a kopia daytoy makaay-ayo a publikasion.
Ti Komento Dagiti Dadduma a Nakabasan iti Dayta
Ania ti reaksion dagidiay nakabasan iti daytoy a libro? Adtoy ti sumagmamano:
“Kalkalpasko a binasa ti makakayaw, nabiag a dokumentario a Dagiti Saksi ni Jehova—Manangiwaragawag iti Pagarian ti Dios. Ti laeng maysa nga organisasion a sipupudno ken sipapakumbaba a mangitantandudo iti kinapudno ti makaisurat a sipaprangka, situtured, ken sipapasnek.”
“Arigna ti panangbasa iti libro nga Aramid, a buyogen ti kinapudno ken kinaprangka.”
“Anian a makaawis a baro a publikasion! . . . Maysa dayta a historikal nga obra maestra.”
Idi mabasana ti agarup kagudua ti libro, insurat ti maysa a lalaki: “Kasta unay ti siddaawko, naimayengak, ken uray la makaluaak. . . . Iti unos ti panagbiagko, ita laeng a nakabasaak iti publikasion a nangtukay iti kasta unay iti riknak.”
“Maragragsakan toy pusok tunggal panunotek no kasano a mapabileg daytoy a libro ti pammati dagiti agtutubo ken dagiti kabbaro a sumsumrek iti organisasion itatta.”
“Kanayon nga ipatpategko ti kinapudno, ngem ti panangbasa iti daytoy a libro linuktanna dagiti matak ken tinulongannak a makabigbig nga ad-adda a ti nasantuan nga espiritu ni Jehova ti adda iti likudan ti amin.”
[Dagiti Ladawan iti panid 18]
Adu a tattao ti nakangngeg iti mensahe ti Pagarian numan pay manmano idi dagiti Saksi