Ipatpategyo Kadi ti Biblia?
NASUROK a 200 a tawen laeng ti napalabas, nayanak ni Mary Jones idiay Llanfihangel, maysa a nasulinek a purok ti Wales nga asideg iti igid ti Atlantico. Nakurapay a mangngabel dagiti dadakkelna—nakakurkurapayda ta saanda pay a makagatang iti Biblia. Ngem impasagepsepda iti balasangda ti panagayat iti Dios babaen ti panangisarsaritada kenkuana kadagiti estoria ti Biblia ken panangulit-ulitda kadagiti teksto a malagipda. Masansan a basaen ni Mary ti Welsh a Biblia ti kaarrubada ket inkarigatanna ti nagurnong iti bassit a kuarta, a determinado a gumatang iti bukodna a kopia.
Idi tawen 1800, idi 16 ti tawen ni Mary, nadamagna nga adda sumagmamano a Welsh a Biblia a mailaklako iti bassit nga ili ti Bala, 40 a kilometro manipud iti lugarda. Sititibker nga inkeddengna ti magna a mapan sadiay. Kasta ti inaramidna, a sakasaka a binallasiwna dagiti turod. Ngem idi sumangpet, naibus aminen a kopia. Naammuan met ni Maria a bassit unay ti kuarta a naurnongna.
Natukay ti rikna ti lokal a pastor iti pannakaammo ken panagayat ni Mary iti Biblia. Idi makitana nga aglulua gapu iti pannakapaayna kalpasan ti amin a panagreggetna, siaasi nga intedna kenkuana ti mismo a personal a kopiana, a kunana: “Basaem a naimbag daytoy, adalem a siaanep, italimengmo dagiti nasantuan a balikas iti panunotmo, ket agbiagka a mayannurot kadagiti pannursurona.”
Iti saan a nabayag, naipadamag daytoy nga estoria iti taripnong ti Committee of the Religious Tract Society of London. Sadiay, naikeddeng a maibunong dagiti patarus ti Biblia saan laeng a kadagiti umili ti Wales no di pay ket iti intero a lubong. Manipud iti daytoy simple a pangrugian timmaud ti immuna kadagiti adu a sosiedad ti Biblia idi maika-19 a siglo. Kalpasanna, immadu nga immadu dagiti Biblia a naipatarus iti ganggannaet a pagsasao.
Itatta, mangimalmaldit ti Watch Tower Bible and Tract Society, a nainkorporada idi 1884, kadagiti Biblia ken katulongan iti panagadal iti Biblia iti nasurok a 200 a pagsasao. Iti intero a lubong, 72 milion a kopia ti moderno-pagsasao a New World Translation of the Holy Scriptures ti naiwarasen daytoy. Naipatarus manipud iti orihinal a Hebreo ken Griego, magun-odan itan ti New World Translation iti interamente wenno iti pasetna iti 18 a pagsasao ken madama a maipatpatarus iti 12 pay a pagsasao.
Ita ta magun-odanen ti gistay tunggal maysa ti Biblia, kasano ti panangmatmatyo iti dayta? Ipatpategyo kadi ti Biblia? Addaankay kadi iti kopia nga ipatpateg ken basbasaenyo?
[Picture Credit Line iti panid 3]
Manipud iti libro a The Story of Mary Jones and Her Bible