Surat Manipud iti Dominican Republic
“Ita Pay Laeng a Nakariknaak iti Kasta a Panagayat”
ITI daytoy a lawas, damo ni Niurka nga iparang ti naibatay-Biblia a pasetna iti kongregasionmi. Kas panagsagana, insuratna iti Braille ti pasetna, sana inkabesa. Duakami a nagakto iti entablado ket nagakemak kas maysa nga interesado iti Biblia. Usarko ti mikropono a nakakonektar iti usarna a headphone. Idi nalpas ti pasetmi, gumgumluong ti palakpak dagiti maragragsakan nga agbuybuya nga uray la a nangngeg a mismo ni Niurka. Ipakita ti isemna a napalaus ti ragsak ken pannakapnekna. Naragsakanak met. Anian a makagunggona ti agserbi kas misionera!
Malagipko pay idi damo a maam-ammok ni Niurka dua a tawenen ti napalabas. Kalpasan ti kagudua nga oras a panagmanehok kadagiti natapuk a kalsada iti away, nasangpetak a nakatugaw iti balkon ti maysa a simple a balay a naaramid iti kayo ken ladrilio ken naatepan kadagiti aglatlati a sim. Mangngeg ken maangotmo pay dagiti kalding, kuneho, ken aso. Nakadumog laeng ni Niurka, maysa a ladawan ti panagmaymaysa ken leddaang. Bakbaket ti langana ngem iti 34 nga edadna.
Sidudungngo a tinapikko ti abagana, ket tinangadnakami, nupay din makakita. Iti napigsa a timek inyam-ammok ti bagik ken ti kaduak. Naammuanmi a nagsakit ni Niurka iti Marfan syndrome, maysa a depekto iti gene a nangparigat unay kenkuana. Dayta ti makagapu a 11 a tawenen a bulsek ni Niurka. Addaan pay iti nakaro a diabetes nga agkalikagum iti naannad a panangasikaso gapu ta kellaat lattan nga agbaliw ti kaadu ti asukar iti bagina.
Idi impaiggemko kenkuana ti maysa a Biblia, nabigbigna dayta ket kinunana a magusgustuanna idi ti agbasa iti Biblia sakbay a nabulsek. Ngem kasanok nga isuro dagiti makapagin-awa a kinapudno iti Sao ti Dios iti daytoy naladingit, napakumbaba, ken masaksakit a babai? Tangay ammona dagiti alpabeto, rinugiak a sinursuruan babaen ti panangipaarikapko kenkuana kadagiti plastik a letra. Di nagbayag, ammonan nga ilasin dagita. Kalpasanna, babaen ti panangipaarikapko kadagiti imak bayat nga agsenseniasak, nasursurona nga ilasin ti katupag ti tunggal letra iti American Sign Language. In-inut a naadalna ti dadduma pay a senias. Gapu ta ad-adalek pay laeng idi dayta a lenguahe, masapul nga agsaganaak iti adu nga oras sakbay ti panagadalmi. Ngem gapu ta agpadakami ken Niurka a magagaran nga agsursuro, napartak a nasursuromi ti sign language.
Ad-adda a rimmang-ay ni Niurka idi naaddaan iti hearing aid nga inted ti maysa nga organisasion a mangipapaay iti saranay. Nupay saan a kabaruan dayta, dakkel ti naitulongna ken Niurka. Kalpasan ti nasurok a maysa a dekada a panagbiagna kas bulsek ken saan unay a makangngeg, imputputong ni Niurka ti bagina. Ngem ti espiritu ni Jehova tinignayna ti isip ken puso ni Niurka, a pinunnona dayta iti pannakaammo, namnama, ken ayat. Di nagbayag, makapasiaren ni Niurka kadagiti kaarrubana babaen ti tulong ti sarukod tapno iranudna ti kinapudno a linaon ti Biblia.
Ni Niurka iyad-adalanna iti Biblia ti ikit ken dua a kasinsinna. Agsagana a naimbag, nga ikabesana a nasaksakbay dagiti maadal. Basaen ti iyad-adalanna ti maysa a parapo ket basaen met ni Niurka ti saludsod iti librona a Braille. Ti kaduana a mangaskasaba ti mangyulit kenkuana kadagiti sungbat babaen ti napigsa a timek wenno babaen ti panangipaarikapna iti seniasna.
Ti intero a kongregasion tultulongan ken parparegtaenda ni Niurka. Dadduma a Kristiano a kapammatianna ti mangikuyog kenkuana kadagiti gimong ken asamblea. Dadduma met ti mangkadua kenkuana a mangasaba. Nabiit pay a naibaga kaniak ni Niurka: “Ita pay laeng a nakariknaak iti kasta a panagayat.” Kayatnan ti agpabautisar iti sumaruno a kombension distritomi.
Ita, no malabsanmi ti balay da Niurka, makitami a nakatugaw iti balkon ngem nakaisemen ken saanen a nakadumog. Dinamagko no apay a nakaisem. Kunana: “Pampanunotek ti masanguanan inton agbalinen a paraiso ti daga. Ken ar-arapaapek nga addaakon sadiay.”
[Ladawan iti panid 25]
Ni Niurka ken ti dadduma a kakongregasionmi iti sanguanan ti Kingdom Hall
[Ladawan iti panid 25]
Iranranud ni Niurka dagiti maad-adalna