Agrag-okayo ken Jehova!
“Kankanayon nga agrag-okayo iti Apo. Maminsan pay a kunaek, Agrag-okayo!”—FILIPOS 4:4.
1. Apay a mabalin a masdaawtayo iti kayat a sawen ni Pablo idi kinunana a dagiti Kristiano rumbeng a kankanayon nga agrag-oda?
KADAGITOY a tiempo, kasla nagrasay dagiti rason iti panagrag-o. Maipaspasango dagiti tattao a naaramid iti tapok, uray dagiti pudno a Kristiano, kadagiti kasasaad a mamagladingit—kas ti kaawan panggedan, sakit, ipapatay ti patpatgen, parparikut iti kinatao, wenno ibubusor dagiti di manamati a kameng ti pamilia wenno sigud a gagayyem. Isu a kasanot’ panagawattayo iti balakad ni Pablo a, “Kankanayon nga agrag-okayo”? Iti sango dagiti di makaay-ayo ken narigat a kasasaad a masapul a pakidangadangantay amin, posible aya daytoy? Makatulong a mangilawlawag iti dayta a banag ti panangsalaysay iti konteksto dagitoy a sasao.
Agrag-okayo—Apay ken Kasano?
2, 3. Ania ti pateg ti rag-o, kas nailadawan iti kaso ni Jesus ken dagiti nagkauna nga Israelita?
2 “Kankanayon nga agrag-okayo iti Apo. Maminsan pay a kunaek, Agrag-okayo!” Mabalin nga ipalagip daytoy kadatayo ti sasao a naiturong kadagiti Israelita ag-24 a siglon ti napalabas: “Ti rag-o ni Jehova isu ti sarikedkedyo,” wenno sigun iti patarus ni Moffatt: “Ti panagrag-o iti daydiay Agnanayon isu ti pigsayo.” (Nehemias 8:10) Mangipaay ti rag-o iti pigsa ken mayarig dayta iti maysa a sarikedked a pakaliwliwaan ken pakasalakniban ti maysa a tao. Nakatulong ti rag-o uray iti perpekto a tao a ni Jesus nga agibtur. “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.” (Hebreo 12:2) Nalawag, nasken iti pannakaisalakan ti panagrag-o iti sango dagiti pakarigatan.
3 Sakbay ti iseserrekda iti Naikari a Daga, naibilin kadagiti Israelita: “Masapul nga agrag-oka gapu iti amin nga imbag a ni Jehova a Diosmo intedna kenka ken iti sangakabbalayam, sika ken ti Levita ken ti ganggannaet nga adda iti tengngam.” Nakaam-amak dagiti pagbanagan ti di panagserbi ken Jehova a sirarag-o. “Amin dagitoy a lunod umaydanto kenka ket kamatendakanto ket makamakamdakanto inggana iti madadaelka . . . gapu ta dika nagserbian ni Jehova a Diosmo iti ragsak ken iti ayat ti puso a maipuon iti kinawadwad ti amin nga adda.”—Deuteronomio 26:11; 28:45-47.
4. Apay a mabalin a saantay a marikna ti rag-o?
4 Gapuna, nagpateg a dagiti napulotan a natda ita ken ti “sabsabali a karnero” a kakaduada rebbeng nga agrag-oda! (Juan 10:16) Babaen ti panangulitna iti balakadna, “maminsan pay a kunaek,” impaganetget ni Pablo ti kinapateg ti panagrag-o gapu iti amin nga imbag nga inaramid ni Jehova kadatayo. Agragrag-otay kadi? Wenno makumikomtay kadi unay iti inaldaw a panagbiagtayo ta malipatantay payen dagiti adu a rasontayo nga agrag-o? Magabgabsuonantay kadi kadagiti parikut nga urayda la lingdan ti panangmatmattayo iti Pagarian ken dagiti bendision nga itdenna? Palpalubosantay kadi dagiti dadduma pay a banag—pananglabsing kadagiti linteg ti Dios, di panangikankano kadagiti nadiosan a prinsipio, wenno panangliway kadagiti Nakristianuan a pagrebbengan—a mangrabsut iti rag-otayo?
5. Apay a marigatan nga agrag-o ti di nainkalintegan a tao?
5 “Maammuan koma dagiti isuamin a tattao ti kina-nainkalinteganyo. Ti Apo asidegen.” (Filipos 4:5) Saan a natimbeng ti di nainkalintegan a tao. Mabalin a mabaybay-anna ti salun-atna, nga ipasidongna ti bagina iti di nasken a pakarigatan wenno pakaringgoran. Nalabit saanna a nasursuro nga awaten dagiti limitasionna ken agbiag a sitatakneng. Mabalin a nakangatngato dagiti kalatna ket ikarigatanna a ragpaten dagita uray aniat’ mapasamak. Wenno mabalin a pagpambarna dagiti limitasionna iti panagkapuy wenno panagbalin a nasadut. Gapu ta saan a natimbeng ken di nainkalintegan, marigatan nga agrag-o.
6. (a) Aniat’ rumbeng a makita kadatayo dagiti padatayo a Kristiano, ket kaano laeng a pudno daytoy? (b) Kasano a matulongannatay nga agbalin a nainkalintegan ti sasao ni Pablo idiay 2 Corinto 1:24 ken Roma 14:4?
6 Uray pay no matmatandatayo a panatiko dagiti bumusbusor, rumbeng a kanayon a makita dagiti padatayo a Kristiano ti kina-nainkalintegantayo. Ket matmatandatayo a kasta no natimbengtayo ken saantay a mangnamnama iti kinaperpekto iti man bagbagitayo wenno kadagiti sabsabali. Kangrunaan iti amin, masapul a liklikantayo ti mangipabaklay kadagiti sabsabali iti dadagsen a lumbes iti ipaannurot ti Sao ti Dios. Kinuna ni apostol Pablo: “Saan a gapu ta dakami dagiti agturay iti pammatiyo, no di ket katrabahuandakami a maipaay iti rag-oyo.” (2 Corinto 1:24) Kas sigud a Fariseo, pagaammo unay ni Pablo a dagiti nainget a paglintegan nga inaramid ken impaalagad dagidiay addaan autoridad lapdanna ti rag-o, idinto ta dagiti makatulong a singasing nga impaay dagiti katrabahuan parayrayenna dayta. Ti kinapudno a “ti Apo asidegen” rumbeng nga ipalagipna iti nainkalintegan a tao a saantay a “mangukom iti adipen iti balay ti sabali. Iti bukodna nga apo isu sitatakder wenno maikulbo.”—Roma 14:4.
7, 8. Apay a namnamaen dagiti Kristiano a maipasangoda kadagiti parikut, ngem kasano a maitultuloyda ti agrag-o?
7 “Dikay maringgoran iti aniaman, no di ket iti amin a banag babaen ti kararag ken araraw agraman panagyaman maipakaammo koma dagiti dawdawatyo iti Dios.” (Filipos 4:6) Mapaspasarantay ita “[dagiti] napeggad a tiempo a narigat a pakilangenan” nga insurat ni Pablo. (2 Timoteo 3:1-5) Isu a namnamaen dagiti Kristiano a maipasangoda kadagiti parikut. Ti sasao ni Pablo a “kankanayon nga agrag-okayo” dina ilaksid ti posibilidad a mapasaran ti maysa a nasungdo a Kristiano ti sagpaminsan a panagladingit wenno pannakaupay. Iti mismo a kasasaad ni Pablo, sipupudno a binigbigna: “Marikutankami iti tunggal pamay-an, ngem saan a mailetan a di makagunay; mariribukankami, ngem saan a naan-anay nga awanan ruaran; maidadaneskami, ngem saan a nabaybay-an iti rigat; maituangkami, ngem saan a nadadael.” (2 Corinto 4:8, 9) Nupay kasta, ti rag-o ti maysa a Kristiano ep-epen ket kamaudiananna parmekenna dagiti apagbiit a kanito ti pannakaburibor wenno panagladingit. Ipaayna ti kasapulan a pigsa tapno makapagtultuloytayo, a pulos a saantay a liplipatan dagiti adu a rason nga agrag-otayo.
8 No rumsua dagiti parikut, aniaman dagitoy, ti naragsak a Kristiano agpatulong a sipapakumbaba ken Jehova babaen ti kararag. Saan a sumuko iti nakaro a pakaringgoran. Kalpasan ti panangaramidna iti amin a kabaelanna a mangrisut iti parikut, italekna iti ima ni Jehova ti pagbanaganna maitunos iti awis nga: “Iyallatiwmo ti awitmo ken Jehova, ket saranayennakanto.” Kabayatanna, agtultuloy a pagyamanan ti maysa a Kristiano ni Jehova gapu iti amin a kinaimbagna.—Salmo 55:22; kitaenyo met ti Mateo 6:25-34.
9. Kasano a ti pannakaammo iti kinapudno mangted iti talna ti panunot, ket ania ti nasayaat nga epekto daytoy iti maysa a Kristiano?
9 “Ti talna ti Dios a mangringbaw iti amin a panunot aywanannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:7) Ti pannakaammo iti kinapudno ti Biblia ruk-atanna ti panunot ti maysa a Kristiano iti kinaulbod ken tulonganna a mangpatanor iti nasalun-at a panagpampanunot. (2 Timoteo 1:13) Iti kasta matulongan a mangliklik iti di umiso wenno di nainsiriban a kababalin a mangdadael iti natalna a relasion kadagiti sabsabali. Imbes a maupay gapu iti kaawan-hustisia ken kinadakes, isaadna ti panagtalekna ken Jehova a mangrisut kadagiti parikut ti sangatauan babaen ti Pagarian. Ti kasta a talna ti panunot saluadanna ti pusona, pagtalinaedenna a nadalus dagiti motibona, ken iturongna ti panagpampanunotna iti dana ti kinalinteg. Ket ti nadalus a motibo ken umiso a panagpampanunot mangipaay iti nakaad-adu a rason iti panagrag-o, iti baet dagiti parikut ken pakarigatan a pinataud ti nariribuk a lubong.
10. Mapasarantay laeng ti pudno a rag-o babaen ti panangisarsarita wenno panangpampanunot iti ania?
10 “Kamaudiananna, kakabsat, aniaman dagiti bambanag a napudno, aniaman dagiti bambanag a serioso a pakaseknan, aniaman dagiti bambanag a nalinteg, aniaman dagiti bambanag a nadalus, aniaman dagiti bambanag a maay-ayat, aniaman dagiti bambanag a naimbag ti pakasarsaritaanda, aniaman ti adda a naimbag a kababalin ken aniaman ti adda a banag a nadayaw, itultuloyyo nga imutektekan dagitoy a bambanag.” (Filipos 4:8) Saan a pagragsakan ti maysa a Kristiano ti panangisarsarita wenno panangpampanunot kadagiti dakes a banag. Automatiko nga iwaksi daytoy ti kaaduan a paglinglingayan nga ipapaay ti lubong. Awan ti tao a makasalimetmet iti Nakristianuan a rag-ona no punnuenna ti panunot ken pusona kadagiti kinaulbod, minamaag a panagang-angaw, ken bambanag a nakillo, imoral, saan a natakneng, makapagura, ken makarimon. Iti nabatad a pannao, awan ti makasarak iti napaypayso a rag-o no punnuenna ti panunot ken pusona iti rugit. Iti rinuker a lubong ni Satanas, anian a makapabileg a maammuan nga addaan dagiti Kristiano iti nakaad-adu a naimbag a banag a pagpanunotan ken pagsasaritaan!
Dagiti Naruay a Rason iti Panagrag-o
11. (a) Ania ti pulos a saantay koma a laglag-anen, ket apay a saan? (b) Ania ti epekto iti maysa a delegado ken iti asawana ti itatabunoda iti kombension internasional?
11 No dagiti rason iti panagrag-o ti pagsasaritaan, ditay koma liplipatan ti internasional a panagkakabsattayo. (1 Pedro 2:17) Bayat nga aggiginnura iti kasta unay dagiti nailubongan a nasional ken etniko a grupo, nagkaykaysa dagiti tattao ti Dios iti ayat. Nalawag a makita ti panagkaykaysada nangruna kadagiti kombension internasional. Maipapan iti maysa [a kombension] a naangay idi 1993 idiay Kiev, Ukraine, insurat ti maysa a delegado manipud Estados Unidos: “Dagiti lua gapu iti rag-o, naraniag a matmata, ti di agressat a panagiinnarakup a kas iti pamilia, ken ti panagkikinnablaaw dagiti grupo a mangiwagwagayway kadagiti de kolor a payong ken panyo iti ballasiw ti pagay-ayaman ket maysa a nalawag a pammaneknek iti teokratiko a panagkaykaysa. Limmukmeg iti ragsak dagiti pusomi gapu iti nakaskasdaaw nga ar-aramiden ni Jehova iti sangalubongan a panagkakabsat. Dakkel ti epekto daytoy kadakami nga agassawa ket ninayonanna ti pammatimi iti baro a kaipapanan.”
12. Kasano a matungtungpal ti Isaias 60:22 iti imatangtayo?
12 Anian a makapabileg pammati para kadagiti Kristiano ita ti pannakaimatangda iti pannakatungpal dagiti padto ti Biblia! Usigenyo, kas pagarigan, ti sasao ti Isaias 60:22: “Ti bassit agbalinto a sangaribu, ket ti kabassitan maysa a napigsa a nasion. Siak, ni Jehova, aramidekto a nadaras iti panawenna.” Iti pannakaipasngay ti Pagarian idi 1914, 5,100 laeng—nagbassit—ti aktibo a mangaskasaba. Ngem iti napalabas a lima a tawen, agpromedio iti 5,628 a kabbaro a bautisado a Saksi ti mainaynayon kada lawas iti sangalubongan a panagkakabsat! Idi 1993, ti kangatuan a bilang dagiti aktibo a ministro ket 4,709,889. Rabakenyo! Kaipapanan daytoy a “ti bassit” idi 1914 ket literal nga agbalbalin a “sangaribu”!
13. (a) Aniat’ mapaspasamak nanipud 1914? (b) Kasano a sursuroten dagiti Saksi ni Jehova ti prinsipio ti sasao ni Pablo idiay 2 Corinto 9:7?
13 Nanipud 1914 agturturayen ti Mesianiko nga Ari iti tengnga dagiti kabusorna. Ti panagturayna ket supsuportaran dagiti natulok a natauan a pasurot a mangipapaay iti panawen, pigsa, ken kuarta tapno maitultuloy ti sangalubongan a trabaho a panangasaba agraman ti internasional a kampania a panangibangon. (Salmo 110:2, 3) Maragsakan dagiti Saksi ni Jehova ta maus-usar dagiti mayab-abuloy a kuarta iti pannakairingpas dagitoy a trabaho, uray pay no manmano a madakamat ti kuarta kadagiti gimongda.a (Idiligyo ti 1 Cronicas 29:9.) Di kasapulan a dagdagen dagiti pudno a Kristiano a mangted; ibilangda a pribilehio ti panangsuportar iti Arida aginggat’ ipalubos ti kasasaadda, tunggal maysa “kas iti inkeddengna iti pusona, saan nga iti dakes a nakem wenno iti sidong ti pannakapilit.”—2 Corinto 9:7.
14. Ania a kasasaad iti ili ti Dios ti nalawag a makita nanipud 1919, a mangted kadakuada iti ania a rason iti panagrag-o?
14 Ti naipadto a pannakaisubli ti pudno a panagdaydayaw iti ili ti Dios nagbanag iti pannakaparsua ti naespirituan a paraiso. Nanipud 1919 in-inut nga agsaksaknap daytoy. (Salmo 14:7; Isaias 52:9, 10) Ti resulta? Mapaspasaran dagiti pudno a Kristiano ti “ragsak ken rag-o.” (Isaias 51:11) Ti nasayaat a bunga daytoy ket maysa a pammaneknek iti kabaelan nga aramiden ti nasantuan nga espiritu ti Dios babaen dagiti imperpekto a tattao. Maiturong amin a pammadayaw ken Jehova, ngem adda pay kadi dakdakkel a pribilehio ngem iti panagbalin a katrabahuan ti Dios? (1 Corinto 3:9) Addaan ni Jehova iti pannakabalin a mangtignay kadagiti bato, no kasapulan, a mangipukkaw iti mensahe ti kinapudno. Nupay kasta, saan a kastoy ti pamay-an a pinilina no di ket, babaen ti pananggutugotna kadagiti natulok a parsua a naaramid iti tapok a mangitungpal iti pagayatanna.—Lucas 19:40.
15. (a) Ania a moderno a paspasamak ti sigagagar a palpaliiwentayo? (b) Ania a pasamak ti sirarag-o a padpadaanantayo?
15 Napnuan siddaaw a palpaliiwen ita ti ad-adipen ni Jehova dagiti pasamak iti lubong a nainaig kadagiti naisangsangayan a padto iti Biblia. Ikagkagumaan dagiti nasion a tun-oyen ti manayon a talna—ngem agbambannogda laeng. Pilpiliten ida dagiti pasamak nga agkiddaw iti organisasion ti Naciones Unidas nga agtignay kadagiti nariribuk a lugar iti lubong. (Apocalipsis 13:15-17) Kabayatanna, sigagagar unay a padpadaanan ti ili ti Dios ti maysa kadagiti kararagsakan pay laeng a pasamak a maangay iti masanguanan, maysa a pasamak nga umas-asideg iti inaldaw. “Agrag-otayo ken agragsaktayo iti napalalo, ket ipaaytayo kenkuana ti dayag, agsipud ta ti panagkasar ti Kordero dimtengen ket ti asawana naisagananan ti bagina.”—Apocalipsis 19:7.
Panangasaba—Dadagsen Wenno Pagrag-oan?
16. Yilustraryo no kasano a ti di panangaramid iti naadalna mabalin a rabsutenna ti rag-o ti maysa a Kristiano.
16 “Dagiti bambanag a naadalyo kasta met nga inawat ken nangngeg ken nakitayo mainaig kaniak, annurotenyo dagitoy; ket ti Dios ti talna addanto kadakayo.” (Filipos 4:9) Babaen ti panangaramid kadagiti naadalda, mainanama dagiti Kristiano ti umawat iti parabur ti Dios. Ti maysa kadagiti kapatgan a banag a naadalda isu ti pakasapulan a mangikaskasaba iti naimbag a damag kadagiti sabsabali. Pudno la unay, natalna aya ti panunot ken naragsak ti maysa a tao no dina ipakaammo ti maysa nga impormasion kadagiti nasingpet panagpuspusona a tattao a ti biagda ket agpannuray iti pannakangngeg iti dayta?—Ezequiel 3:17-21; 1 Corinto 9:16; 1 Timoteo 4:16.
17. Apay a rumbeng a kankanayon a gubuayan ti rag-o ti trabahotayo a panangasaba?
17 Anian a makaparagsak ti makasarak kadagiti kimmarnero a tattao a situtulok a makasursuro maipapan ken Jehova! Wen, dagidiay agserserbi a buyogen ti umiso a motibo kanayon a pagrag-oanda ti agserbi iti Pagarian. Ngamin, ti kangrunaan a rason iti panagbalin a Saksi ni Jehova isu ti panangidaydayaw iti naganna ken panangitandudo iti saadna kas Soberano nga Agturay. (1 Cronicas 16:31) Ti tao a mangbigbig iti daytoy a kinapudno ket agrag-o uray no simamaag a laksiden dagiti tattao ti naimbag a damag nga idanonna. Ammona nga addanto aldaw nga agpatingga ti panangaskasaba kadagiti di manamati; agtultuloy nga agnanayon ti panangidaydayaw iti nagan ni Jehova.
18. Aniat’ mangtignay iti maysa a Kristiano a mangaramid iti pagayatan ni Jehova?
18 Ti pudno a relihion tignayenna dagidiay mangal-alagad iti dayta a mangaramid kadagiti bambanag nga ipaannurot ni Jehova, saan a gapu ta masapul nga aramidenda, no di ket gapu ta kayatda. (Salmo 40:8; Juan 4:34) Adu a tattao ti marigatan a mangawat iti daytoy. Kinuna naminsan ti maysa a babai iti maysa a Saksi a simmarungkar kenkuana: “Ammom, rebbeng a padayawanka. Pulos a dinak mauray a mamalaybalay a mangikaskasaba iti relihionko kas iti ar-aramidem.” Nakaisem a kinuna ti Saksi: “Maawatak ti riknam. Sakbay a nagbalinak a maysa kadagiti Saksi ni Jehova, mabalin a dinak mauray a mapan kadagiti dadduma a tattao a makisarita maipapan iti relihion. Ngem kayatko itan.” Nagpanunot biit ti babai sana kinuna: “Nalawag nga adda maipaay ti relihionmo a di maipaay ti relihionko. Panagkunak rebbeng nga agsukimatak.”
19. Apay a tiemponan nga ad-adda nga agrag-otayo?
19 Ti teksto iti tawen 1994, a sipapatak a naiparang kadagiti Kingdom Hall-tayo, kanayon nga ipalagipna kadatayo: “Agtalekka ken ni Jehova iti amin a pusom.” (Proverbio 3:5) Adda pay kadi dakdakkel a rasontayo nga agrag-o ngem ti pannakabael nga agtalek ken Jehova, ti sarikedked a pagkamangantayo? Ilawlawag ti Salmo 64:10: “Ti nalinteg agragrag-onto ken Jehova ket agkamangto kenkuana.” Saan a panawen daytoy ti panagkapuy wenno isusuko. Tunggal aglabas ti bulan umas-asidegtayo iti kaitungpalan ti il-iliwen a makita dagiti adipen ni Jehova manipud pay idi kaaldawan ni Abel. Tiemponan nga agtalek ken Jehova iti amin a pusotayo, nga ammotayo nga addaantay ita iti naruay a rason nga agrag-o!
[Footnote]
a Kadagiti kombension ken maminsan kada bulan kadagiti kongregasion, maibasa iti apagbiit ti dagup dagiti naawat a boluntario a kontribusion, kasta met ti nabusbos. No dadduma, maipatulod dagiti surat a mangipakpakaammo no kasano a maus-usar dagiti kasta a donasion. Iti kasta mapalagipan ti tunggal maysa iti pinansial a kasasaad ti sangalubongan a trabaho dagiti Saksi ni Jehova.
Kasanoyo a Sungbatan?
◻ Sigun iti Nehemias 8:10, apay a rumbeng nga agrag-otayo?
◻ Kasano nga ipakita ti Deuteronomio 26:11 ken De 28:45-47 ti kinapateg ti panagrag-o?
◻ Kasano a matulongannatayo ti Filipos 4:4-9 a kankanayon nga agrag-o?
◻ Ania a rason ti ipaay kadatayo ti teksto iti tawen 1994 nga agrag-o?
[Ladawan iti panid 16]
Pagrag-oan dagiti Ruso ken Aleman a Saksi ti agbalin a paset ti internasional a panagkakabsat
[Ladawan iti panid 17]
Mangyeg rag-o ti panangiranud iti kinapudno kadagiti sabsabali