Report Dagiti Manangiwaragawag ti Pagarian
Napigpigsa ni Jehova Ngem Kadagiti Kabusorna
NABAYAGEN a padpadasen ti Diablo ken dagiti demoniona a lapdan ti pannakaikasaba ti naimbag a damag babaen ti ulbod a relihion ken espiritismo. Dinakamat ti Biblia ti maipapan iti dakes a ganuat ni Satanas iti 2 Corinto 4:4 a kunana a “ti dios daytoy a sistema ti bambanag binulsekna ti pampanunot dagiti di manamati, tapno ti lawag ti nadayag a naimbag a damag maipapan ken Kristo, isu a ladawan ti Dios, saan koma nga agsilnag.”
Ngem napigpigsa ni Jehova a Dios ngem ni Satanas. Awan maaramidan dagiti kabusor ni Jehova a mangpasardeng iti pannakaipatungpal ti nadiosan a pagayatanna, a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:4) Naipakita daytoy kadagiti sumaganad a report dagiti manangiwaragawag ti Pagarian idiay Australia.
◻ Kalpasan ti 20 a tawen nga isisinana iti relihion, rinugian manen ti maysa a babai a basaen ti Biblia. Naaddaan iti adu a saludsod gapu iti daytoy napabaro nga interesna iti Biblia, isu nga immararaw iti tulong ti Dios tapno makasarak kadagiti sungbat. Kayatna a sapulen ti kinapudno, ngem ammona a saan a marisut dagiti parikutna babaen ti isusublina iti dati a relihionna. Imbes ketdi, inrugina ti panagbirokna iti kinapudno babaen ti panangsarungkarna iti paglakuan kadagiti naaramaten a libro ket dinamagna no addaanda kadagiti aniaman a libro maipapan iti relihion.
Nalagip ti akinkukua iti paglakuan nga adda maysa a narelihiusuan a librona, nga awan iti paglakuan, no di ket idiay balay[na]. Ti paulo ti libro ket Mabalinyo ti Agbiag nga Agnanayon iti Paraiso a Daga, nga impablaak dagiti Saksi ni Jehova. Sigagagar a binasa ti babai ti libro ket nasarakanna dagiti sungbat kadagiti adu a saludsodna iti Biblia. Kalpasan ti panangbirokna kadagiti Saksi ni Jehova iti directory ti telepono, nasapulanna ida kamaudiananna ket nairugi ti regular a panagadal iti Biblia.
◻ Binayadan ti maysa a balasang ti serbisio ti maysa a pagiwarnak iti lugarna tapno mairakurak ti panaglakona iti maysa nga anting-anting. Inawagan daytoy ti advertisement a kas ‘anting-anting idi Edad Media a nabileg unay.’ Nabasa ti maysa kadagiti Saksi ni Jehova ti advertisement. Inkeddengna nga awagan ti naited a numero ti telepono ket nakisarita iti babai maipapan iti gubuayan ti maipagarup a bileg ti anting-anting. Sinaruno daytoy ti saritaan maipapan iti panangmatmat ti Biblia iti dinedemonio nga aramid. Impalgak ti babai nga addaan iti anting-anting nga idi laeng napalabas nga aldaw, isut’ nagkararag iti tulong ti Dios gapu kadagiti parikutna maipapan kadagiti demonio. Inyurnos ti Saksi ti sabali pay a pannakisarita iti telepono.
Idi umawag, awan ti balasang iti pagtaengan. Ti ina ti simmungbat iti telepono ket kinunana: “Diak ammo no aniat’ imbagam iti balasangko, ngem maysa a milagro ti napasamak!” Inlawlawagna a kalpasan ti damo a yaawag [ti Saksi] iti telepono, imbelleng amin ti balasangna dagiti sinasatanas a ladawan ken librona ket rinugianna a binasa ti Biblia.
Di nagbayag kalpasanna, nayurnos ti personal nga isasarungkar iti balasang. Inawatna a dagus ti regular a pannakipagadal iti Biblia kadagiti Saksi ni Jehova. Rinugianna met ti makitimpuyog kadagiti Saksi babaen ti itatabuno kadagiti Nakristianuan a gimongda. Manen, inatiw ni Jehova dagiti demonio babaen ti panangisilnagna iti umiso a pannakaammo kadagiti kinapudno iti Biblia.