‘Naituang, Ngem Saan a Nadadael’

KAS INSALAYSAY NI ULF HELGESSON

Idi Hulio 1983, indir-i dagiti doktor a mangay-aywan kaniak: “Siririing!” Naikkat ti tumor a 12 a sentimetro ti kaatiddogna iti durik iti narikut a 15 nga oras nga operasion. Nagbalinak a naan-anay a paralisado.

SUMAGMAMANO nga aldaw kalpasanna, nayakarak iti ospital nga agarup 60 a kilometro manipud iti ilimi a Hälsingborg, idiay abagatanen ti Sweden. Sadiay a naiserrekak iti rehabilitation program. Kinuna ti physiotherapist a mabalin a nakarigrigat unay dayta, ngem magagaranak idi a mangirugi. Talaga a kayatko ti makapagna manen. Babaen ti panangsurot a siiinget iti programa ti panagwatwat a lima nga oras iti inaldaw, nakaparpartak ti iyiimbagko.

Makabulan kalpasanna, idi nagserbi ti agdaldaliasat a manangaywan iti kongregasionmi, nagdaliasatda iti adayo a kaduana ti dadduma pay a Kristiano a panglakayen tapno angayenda ti miting dagiti panglakayen ti kongregasion iti kuartok iti ospital. Anian a ragsakko iti daytoy a pammaneknek iti nainkabsatan nga ayat! Pinamerienda dagiti nars iti ward ti intero a grupo kalpasan ti miting.

Idi damo, nasdaaw dagiti doktor iti irarang-ayko. Kalpasan ti tallo a bulan, makapagtugawakon a nasayaat iti wheelchair-ko ken makapagtakder pay iti apagbiit. Maragsakan ken naan-anay a determinadoak idi a makapagna manen. Pinarparegtadak unay ti pamiliak ken dagiti pada a Kristiano kabayatan ti ibibisitada. Nabalinak pay ti agawid iti apagbiit.

Maysa a Pudpudno a Lapped

Nupay kasta, kalpasan dayta, awanen a pulos ti simmayaatak. Di nagbayag, kastoy ti nasaem a kinuna kaniak ti physiotherapist: “Saanton a pulos a sumayaat ti kasasaadmo!” Ti kalat itan isut’ panangpabilegda kaniak nga aggaraw a bukbukodko iti wheelchair. Pinampanunotko no aniantot’ mapasamak kaniak? Kasanon ni baketko? Kaop-operana met idi ket kasapulanna ti tulongko. Kasapulak kadi ti permanente a panangaywan ti institusion?

Napalalo idi ti ladingitko. In-inut a napukaw ti pigsak, tured, ken bilegko. Naglabas dagiti aldaw, ket kaskasdi a diak pay makagunay. Saanak laeng a naparalisado iti pisikal no di pay ket nabibineg ti emosion ken espiritualidadko. ‘Naituangak.’ Kankanayon a minatmatak ti bagik kas napigsa iti naespirituan. Natibker ti pannakairamut ti pammatik iti Pagarian ti Dios. (Daniel 2:44; Mateo 6:10) Kumbinsidoak iti kari ti Biblia a maagasanto amin a sakit ken an-annayen idiay nalinteg a baro a lubong ti Dios ken maisublinton sadiay iti perpekto a biag ti amin a sangatauan. (Isaias 25:8; 33:24; 2 Pedro 3:13) Ita, kaslaak la naparalisado saan laeng nga iti pisikal no di pay ket iti naespirituan. Kaslaak la “nadadael.”​—2 Corinto 4:9.

Sakbay nga itultuloyko, palubosandak a mangisarita iti sangkabassit iti nalikudak.

Maysa a Naragsak a Pamilia

Nayanakak idi 1934, ket kankanayon idi a nasayaat ti salun-atko. Iti nasapa a paset ti dekada ’50, naam-ammok ni Ingrid, ket nagkasarkami idi 1958 sa nagnaedkami iti ili ti Östersund, idiay sentral Sweden. Dimteng ti panagbalbaliw iti panagbiagmi idi 1963 idi nakipagadalkami iti Biblia kadagiti Saksi ni Jehova. Addaankami idin iti tallo a babassit nga annak​—da Ewa, Björn, ken Lena. Di nagbayag, agad-adalen ken nasayaat ti irarang-ay ti intero a pamiliami iti pannakaammo kadagiti kinapudno ti Biblia.

Di nagbayag kalpasan a rinugianmi ti nakipagadal, immakarkami idiay Hälsingborg. Sadiay nga indedikarmi ken baketko ti bagbagimi nga agserbi ken Jehova ket nabautisarankam idi 1964. Ad-adda ti ragsakmi idi nabautisaran ti inauna a balasangmi a ni Ewa idi 1968. Pito a tawen kalpasanna, idi 1975, nabautisaran met da Björn ken Lena, ken nadutokanak kas panglakayen iti kongregasion Kristiano iti sumuno a tawen.

Umdas idi ti sekular a trabahok a pangbiag iti pamiliak. Ket ad-adda a dimmakkel ti rag-omi idi simrek da Björn ken Lena iti amin-tiempo a ministerio. Di nagbayag, naayaban ni Björn nga agserbi iti sanga nga opisina dagiti Saksi ni Jehova idiay Arboga. Makuna a naisem idi kadakami ti biag. Kalpasanna, idi rugrugi ti 1980, nariknakon dagiti pisikal nga epekto ti tumor a naikkat idi agangay iti dayta a narikut nga operasion idi 1983.

Panangparmek iti Naespirituan a Pannakaparalisado

Idi naibaga kaniak a diakton makapagna, kasla awanen mamaay kaniak ti biag. Kasanok a napasubli ti naespirituan a pigsak? Nalaklaka ngem iti impagarupko. Innalak laeng ti Bibliak sa rinugiak a binasa. Bayat ti panagbasbasak, ad-adda met a napabilegak iti naespirituan. Ad-adda a tinagipategko ti Sermon ni Jesus iti Bantay. Inulit-ulitko a binasa ken minennamenna dayta.

Naisubli ti naragsak a panangmatmatko iti biag. Babaen ti panagbasbasa ken panagmennamenna, nangrugin a makitak dagiti oportunidad imbes a dagiti lapped. Napasublik ti tarigagayko a mangiranud kadagiti kinapudno ti Biblia iti sabsabali, ket pinennekko daytoy a tarigagay babaen ti panangasabak kadagiti mangngagas iti ospital ken iti dadduma pay a maam-ammok. Tinulongandak a naan-anay ti pamiliak ken nakagun-odda iti pannakasanay no kasanot’ mangasikaso kaniak. Idi agangay, nabalinakon a panawan ti ospital.

Kamaudiananna, nakaawidakon. Anian a nagragsak nga aldaw dayta kadakami amin! Nangyurnos ti pamiliak iti eskediul a pakairamanan ti pannakaaywanko. Inkeddeng ti barok, ni Björn, a panawanna ti trabaho iti sanga nga opisina dagiti Saksi ni Jehova, ket nagawid tapno tumulong a mangaywan kaniak. Makaliwliwa unay ti maipaayan iti kasta a napalalo nga ayat ken pannakaseknan manipud iti pamiliak.

Panangsaranget iti Sabali Pay a Lapped

Nupay kasta, bayat ti panaglabas ti panawen, dimmakes ti salun-atko, ken marigatanak idi nga agkuti. Idi agangay, iti laksid ti napinget a panangikagumaan ti pamiliak, saandan a kabaelan ti mangaywan kaniak iti pagtaengan. Isu a kinunak a nasaysayaat no maiserrekak iti balay a pagtaraknan. Manen, kaipapanan daytoy ti panagbalbaliw ken baro a rutina. Ngem diak impalubos a daytoy ti agbalin a naespirituan a lapped.

Pulos a diak insardeng ti agbasa ken agsukimat iti Biblia. Kanayonko a pampanunoten no aniat’ maaramidak, saan a ti diak maaramidan. Minennamennak dagiti naespirituan a bendision nga adda kadagiti amin a Saksi ni Jehova. Nagtalinaedak a nasinged ken Jehova iti kararag ken inaramatko ti tunggal gundaway a mangasaba kadagiti sabsabali.

Ita, agnanaedakon iti rabii ken iti dadduma a paset ti aldaw iti balay a pagtaraknan. Iti malem ken rabii, addaak idiay balay wenno kadagiti Nakristianuan a gimongmi. Nangyurnos ti social service iti regular a pagluganak nga agpapan ken agawid manipud kadagiti gimong ken manipud iti pagtaengak. Naisangsangayan unay ti panangasikaso kaniak ti nadungngo a pamiliak, dagiti kakabsat iti kongregasion, ken dagiti agtartrabaho iti balay a pagtaraknan.

Panangaramid iti Kabaelak

Diak ibilang ti bagik kas baldado, ket saandak a trinato ti pamiliak a kasta, wenno dagiti Kristiano a kakabsatko. Ay-aywanandak a siaayat, a daytoy ti namagtultuloy kaniak nga agserbi a sieepektibo kas maysa a panglakayen. Mangidauloak iti Panagadal iti Libro ti Kongregasion iti kada lawas, kasta met ti linawas a panagadal ti kongregasion iti Pagwanawanan idiay Kingdom Hall. Marigatanak a manglukib kadagiti pinanid ti Biblia, isu nga adda maysa a matudingan a tumulong kaniak a mangaramid iti dayta kadagiti gimong. Mangidauloak kadagiti gimong ken mangipaay kadagiti palawag a situtugaw iti wheelchair-ko.

Gapuna, maaramidko pay laeng ti adu a banag a tinagtagiragsakko idi, a pakairamanan ti panangipastor. (1 Pedro 5:2) Aramidek daytoy no adda kakabsat a lallaki ken babbai nga agpatulong wenno agpabalakad kaniak. Aramatek met ti telepono, a siak ti mangyun-una babaen ti iyaawagko kadagiti sabsabali. Agresulta daytoy iti agpadpada a pannakaparegta. (Roma 1:11, 12) Nabiit pay a kinuna ti maysa a gayyem: “No malmaldaanganak, awagannak iti telepono tapno liwliwaennak.” Ngem maparparegtaak met ta ammok a bembendisionan ni Jehova ti panagreggetko.

Sakbay ken kalpasan dagiti gimong, naragsak ti pannakilangenko kadagiti ubbing iti kongregasion. Yantangay nakatugawak iti wheelchair-ko, agsasaritakami a kaslakam la agkakadakkel. Apresiarek ti kinapasnek ken kinaprangkada. Kinuna kaniak ti maysa a barito iti naminsan: “Manmamo ti kas kenka a guapo a baldado!”

Babaen ti panangipamaysa iti maaramidak imbes a masikoran iti diak maaramidan, tagtagiragsakek ti panagserbi ken Jehova. Adut’ naadalko iti napasamak kaniak. Nautobko a masansanay ken mapappapigsatayo babaen kadagiti suot a lak-amentayo.​—1 Pedro 5:10.

Adu dagiti nasalun-at a tattao a napaliiwkon a saanda a matarusan a nasken nga ipasnektay a kankanayon ti panagdaydayaw iti nailangitan nga Amatayo. No saantay nga aramiden dayta, ti eskediultayo iti panagadal, pannakigimong, ken tay-ak ti ministerio ket nalabit agbalin laengen a maysa a rutina. Ibilangko dagitoy a probision kas napateg iti ilalasat iti panungpalan daytoy a lubong nga agturong iti inkari ti Dios a naindagaan a Paraiso.​—Salmo 37:9-11, 29; 1 Juan 2:17.

Nasken a kankanayon a salimetmetantay a nabiag kadagiti pusotayo ti namnama a biag iti um-umay a baro a lubong ti Dios. (1 Tesalonica 5:8) Naadalko met ti saan a sumuksuko iti dangadang maibusor iti aniaman a pagannayasan a maupay. Nasursurok nga ibilang ni Jehova kas ti Amak ken ti organisasionna kas ti Inak. Nautobko a no pagreggetantayo, mabalin nga aramaten ni Jehova ti uray asino kadatayo nga agbalin nga epektibo nga adipenna.

Nupay mariknak no dadduma a kaslaak la ‘naituang,’ saanak a “nadadael.” Pulos a saannak a binaybay-an ni Jehova ken ti organisasionna, uray ti pamiliak ken dagiti Kristiano a kakabsatko. Gapu iti panangpetpetko iti Biblia ken panangbasbasa iti dayta, napasublik ti naespirituan a pigsak. Agyamanak ken Jehova a Dios, a mangipaay iti “pannakabalin a nalablabes ngem ti gagangay” no agtalektayo kenkuana.​—2 Corinto 4:7.

Buyogen ti naan-anay a pananginanama ken panagtalek ken Jehova, sigagagarak a kumitkita iti masanguanan. Agtalekak nga iti mabiiten, tungpalenton ni Jehova a Dios ti karina maipapan iti naisubli a paraiso ditoy daga kasta met dagiti amin a nakaskasdaaw a bendision nga iyegna.​—Apocalipsis 21:3, 4.