Report Dagiti Manangiwaragawag ti Pagarian
“Aramidem ti Trabaho ti Managebanghelio”
ANIAT’ kayat a sawen ti panagbalin a managebanghelio? Ti sao ket patarus ti Griego nga eu·ag·ge·li·stesʹ, a sisisinged a nainaig iti sao nga eu·ag·geʹli·on, kayatna a sawen “naimbag a damag.” Gapuna, ti managebanghelio ket manangaskasaba, wenno mensahero, ti naimbag a damag.
Managebanghelio amin a pudno a Kristiano gapu ta iwarwaragawagda ti naimbag a damag maipapan iti Pagarian ti Dios. Maikanatad, binagbagaan ni apostol Pablo ni Timoteo nga ‘aramidenna ti trabaho ti managebanghelio.’ Rumbeng idi nga aramiden a sipapasnek ni Timoteo daytoy a trabaho. Indagadag ni Pablo kenkuana nga ‘agtalinaed a sipupuot iti isuamin a bambanag’ ken ‘naan-anay nga itungpalna ti ministeriona.’—2 Timoteo 4:5.
Kas managebanghelio, aramidentay met a sipapasnek ti ministeriotayo ken ‘agtalinaedtay a sipupuot,’ wenno naalibtak a mangiburay iti naimbag a damag iti tunggal gundaway. Gapuna, adu ti nakaammo ken Jehova ken kadagiti panggepna kalpasan ti pannakasarak kadakuada dagiti Saksi ni Jehova iti impormal a panangasaba. Daytoy ti napasamak ken ni Seymore, maysa a lalaki idiay Barbados.
Ni Seymore ket maysa a mannursuro iti publiko a pagadalan. Ni Charles, paset-tiempo a mannursuro iti isu met laeng nga eskuelaan ken maysa kadagiti Saksi ni Jehova, ket naalibtak a managebanghelio. Isu ket maysa nga amin-tiempo a ministro, wenno payunir, ken ar-aramatenna ti tunggal gundaway a mangiburay iti naimbag a damag kadagiti sabsabali. Nangngeg ni Seymore ti mensahe ti Pagarian iti kaunaan a gundaway babaen ti impormal a panangasaba ni Charles.
Di nagbayag, determinado metten ni Seymore a mangiburay kadagiti kinapudno ti Biblia iti sabsabali. Isu nga inrugina ti impormal a pannakisarita kadagiti tattao iti pagtrabahuanna, nangnangruna kadagiti estudiantena. Nupay iti dadduma a pagilian ket saan a rumbeng a maisuro ti relihion kadagiti publiko a pagadalan, natudingan daytoy a lalaki a mangisuro kadagiti narelihiosuan ken moral a kababalin. Ngem itan, nasukatanen dagiti dati a panangmatmat ni Seymore kadagitoy a bambanag babaen ti kagunggun-odna a pannakaammo iti Biblia. Kabayatan ti panawen ti panaginana, kasaritana dagiti estudiantena maipapan iti kari ti Dios a baro a lubong ken ti namnama a biag nga agnanayon.
Kasanot’ panagtignay dagiti ubbing? Adut’ nangipakita iti pudpudno nga interes iti naimbag a damag ti Pagarian ni Jehova. Idi agangay, rinugianen ni Seymore ti mangidaulo kadagiti panangyadal iti Biblia iti 13 kadagiti estudiantena. Interesadoda unay ta inyurnosda ti makipagadal iti Biblia iti mamindua iti makalawas. Idi agangay, kaaduan kadakuada ti nangrugi a tumabuno kadagiti Nakristianuan a gimong iti lokal a Kingdom Hall dagiti Saksi ni Jehova. Siam kadakuada ti nagbalinen a dedikado ken bautisado a Saksi ni Jehova. No maipapan ken Seymore, ar-aramidenna itan a naan-anay ti ministeriona babaen ti panagserbina kas regular pioneer ken panglakayen iti maysa kadagiti kongregasion dagiti Saksi ni Jehova idiay Barbados.
Maysa laeng daytoy a pagarigan no kasano nga ‘ar-aramiden [dagiti Saksi ni Jehova iti intero a lubong] ti trabaho dagiti managebanghelio,’ a ti dadduma ket babaen ti pannakiraman iti impormal a panangasaba. Sursurotenda ti pammagbaga ti Biblia a masarakan iti Colosas 4:5, 6, a kunana: “Itultuloyyo ti makipagna a sisisirib kadagidiay taga ruar, a gatangenyo ti nainggundawayan a tiempo maipaay iti bagbagiyo. Ti panagsaoyo kankanayon koma a mabuyogan iti kinaparabur, natemplaan iti asin, tapno ammoyo no kasano ti rebbengyo nga isusungbat iti tunggal maysa.”