“Aramidem ti Trabaho ti Managebanghelio”

“Agtalinaedka a sipapanunot iti amin a bambanag, . . . aramidem ti trabaho ti managebanghelio.”​—2 TIMOTEO 4:5.

1. Ania ti imbilin ni Jesus kadagiti pasurotna?

TI NAGAN ken pangpanggep ni Jehova maidekdeklara iti intero a daga. Dagiti ngamin dedikado nga adipen ti Dios impapusoda ti bilin ni Jesu-Kristo kadagiti pasurotna idi kinunana: “Inkayo . . . ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.”​—Mateo 28:19, 20.

2. Ania ti naibilin iti manangaywan a ni Timoteo, ken ania ti maysa a pamay-an a maitungpal dagiti manangaywan a Kristiano ti ministerioda?

² Dagiti adalan ni Jesus idi umuna a siglo impategda dayta a bilin. Kas pagarigan, ni apostol Pablo indagadagna iti padana a Kristiano a manangaywan a ni Timoteo: “Aramidem ti trabaho ti managebanghelio, naan-anay nga itungpalmo ti ministeriom.” (2 Timoteo 4:5) Iti kaaldawantayo, ti maysa a pamay-an a maitungpal ti manangaywan ti ministeriona ket babaen ti panagbalinna a naregta a manangiwaragawag iti Pagarian, a regular a makiraman iti panangasaba. Kas pagarigan, ti manangaywan iti Panagadal iti Libro ti Kongregasion pribilehiona nga idauluan ti panangasaba ken panangsanay kadagiti dadduma. Naitungpal ni Pablo ti personal nga annongenna a mangideklara iti naimbag a damag, ken timmulong a mangsanay kadagiti dadduma a mangasaba.​—Aramid 20:20; 1 Corinto 9:16, 17.

Nareregta a Managebanghelio iti Naglabas

3, 4. Ania dagiti kapadasan ni Felipe kas maysa a managebanghelio?

³ Agdindinamag dagiti nagkauna a Kristiano kas nareregta a managebanghelio. Usigenyo ni managebanghelio a Felipe. Isu ti maysa kadagiti “pito a napaneknekan a lallaki . . . a napno iti espiritu ken sirib” a nadutokan tapno inaldaw a mangibunong iti taraon idiay Jerusalem nga awan idumdumana kadagiti Hebreo ken Griego ti pagsasaoda a Kristiano a balo. (Aramid 6:1-6) Idi nagngudo dayta a naisangsangayan nga annongen ken kalpasan a nawarawara ti amin a Kristiano malaksid kadagiti apostol gapu iti pannakaidadanes, napan ni Felipe idiay Samaria. Inwaragawagna sadiay ti naimbag a damag ken nangparuar kadagiti sairo ken nangpaimbag kadagiti pilay ken paralisado babaen ti tulong ti nasantuan nga espiritu. Adu a Samaritano ti nangipangag iti mensahe ti Pagarian ket nagpabautisarda. Idi nangngeg dayta dagiti apostol idiay Jerusalem, imbaonda da apostol Pedro ken Juan idiay Samaria tapno dagiti kabbaro a nabautisaran a manamati maparaburanda koma iti nasantuan nga espiritu.​—Aramid 8:4-17.

⁴ Kalpasanna, ti espiritu ti Dios inturongna ni Felipe iti ayan ti eunuko nga Etiope iti dalan ti Gaza. Kalpasan nga imbinsabinsa ni Felipe ti padto ni Isaias, daytoy a “lalaki nga adda iti pannakabalin iti sidong ni Candace a reyna dagiti Etiope” namati ken ni Jesu-Kristo ket nabautisaran. (Aramid 8:26-38) Kalpasanna, napan ni Felipe idiay Asdod sa idiay Cesarea, nga “indekdeklarana ti naimbag a damag kadagiti amin a siudad” a nalabasanna. (Aramid 8:39, 40) Di mapagduaduaan a nasayaat ti ulidanna kas managebanghelio!

5. Iti ania a nangnangruna a nagdindinamag dagiti uppat a babbalasang ni Felipe?

⁵ Aktibo pay la ni Felipe iti ministerio idiay Cesarea agarup 20 a tawen kalpasanna. Idi nagdagus da Pablo ken Lucas iti balayna, isu ket “addaan uppat nga annak a babbai, birhen, a nagipadpadto.” (Aramid 21:8-10) Awan duadua a nasayaat ti naespirituan a pannakasanayda, a naregtada iti ministerio, ken pribilehioda pay ketdi ti nagipadto. Ti naregta a pannakiraman dagiti nagannak iti ministerio ket mabalin a mangipaay iti nasayaat nga impluensia kadagiti annakda, a mangtignay kadakuada nga agbalin a naregta a managebanghelio iti tungpal biag.

Dagiti Naregta a Managebanghelio Ita

6. Ania ti nagapuanan dagiti managebanghelio idi umuna a siglo?

⁶ Iti naindaklan a padtona a mangipatuldo iti kaaldawantayo ken iti tiempo ti panungpalan, kinuna ni Jesu-Kristo: “Kadagiti amin a nasion kasapulan a maikaskasaba nga umuna ti naimbag a damag.” (Marcos 13:10) Dumtengto ti panungpalan kalpasan a maikasaba ti naimbag a damag “iti intero a mapagnaedan a daga.” (Mateo 24:14) Idi a ni Pablo ken dagiti managebanghelio idi umuna a siglo inwaragawagda ti naimbag a damag, adu ti nagbalin a manamati, ket nagsasaruno a nabuangay dagiti kongregasion iti nadumaduma a paset ti Imperio ti Roma. Dagiti panglakayen a nadutokan nga agserbi kadagita a kongregasion nakidanggayda kadagiti kakabsatda iti panagebanghelio ket nangasabada agpadpada iti asideg ken adayo a lugar. Nagtultuloy a nagsaknap ken nagballigi ti sao ni Jehova kadagidi nga aldaw, kas met la ita gapu ta minilion a Saksi ni Jehova ti mangitungtungpal iti trabaho a panagibanghelio. (Aramid 19:20) Maysakayo kadi kadagiti naragsak a mangidaydayaw ken ni Jehova?

7. Ania ti ar-aramiden ita dagiti manangiwaragawag iti Pagarian?

⁷ Adu nga agdama a manangiwaragawag iti Pagarian ti mangap-aprobetsar kadagiti gundaway a mapalawada ti pannakiramanda iti panagebanghelio. Rinibu ti nagmisionero, ken ginasut a ribu ti nakiraman iti amin-tiempo a panagebanghelio kas regular ken auxiliary pioneer. Ken anian a nagsayaat ti magapgapuanan dagiti lallaki, babbai, ken ubbing nga agserserbi kas naregta nga agibumbunannag iti Pagarian! Talaga a ti amin nga adipen ni Jehova tagtagiragsakenda dagiti nabaknang a bendisionna bayat nga abagan-abaga nga agserserbida kenkuana kas Kristiano a managebanghelio.​—Sofonias 3:9.

8. Ania a trabaho a panangmarka ti maar-aramid ita, ken babaen kadagiti siasino?

⁸ Imbilin ti Dios kadagiti napulotan a pasurot ni Jesus a responsabilidadda nga ipakaammo ti naimbag a damag iti intero a daga. Kaduada nga agebanghelio ti umad-adu a bilang dagiti “sabsabali a karnero” ni Kristo. (Juan 10:16) Iti padto, daytoy mangispal-biag a trabaho ket nayasping iti panangmarka kadagiti muging dagidiay agsensennaay ken umas-asug maigapu kadagiti makarimon a bambanag a mapaspasamak ita. Iti din agbayag, madadael dagiti nadangkes. Kabayatanna, anian a pribilehio nga idanon kadagiti agnanaed ditoy daga dagiti makaispal-biag a kinapudno!​—Ezequiel 9:4-6, 11.

9. Kasano a dagiti kabbaro matulongan ida iti ministerio?

⁹ No nabayagtayon a makipaspaset iti trabaho a panagebanghelio, dakkel ti maitulongtayo kadagiti kabbaro iti kongregasion. Sagpaminsan, mabalintay a kaduaen ida iti ministerio. Maiparegta kadagiti panglakayen nga aramidenda ti amin a kabaelanda a pabilgen ti espiritualidad dagiti pada a manamati. Ti panagregget dagiti napakumbaba a manangaywan mabalin a dakkel ti maitulongna kadagiti dadduma nga agbalin a naregta ken nabunga a managebanghelio.​—2 Pedro 1:5-8.

Panangasaba iti Binalaybalay

10. Ania nga ulidan iti ministerio ti impasdek ni Kristo ken dagiti nagkauna a pasurotna?

¹⁰ Nagsayaat ti inyulidan ni Jesu-Kristo kadagiti pasurotna kas managebanghelio. No maipapan iti ministerio ni Kristo ken dagiti apostolna, kuna ti Sao ti Dios: “Napan nagbambaniaga iti siniudansiudad ken iti pinuronpurok, nga ikaskasabana ken idekdeklarana ti naimbag a damag ti pagarian ti Dios. Ket naikuyog kenkuana ti sangapulo ket dua.” (Lucas 8:1) Komusta met dagiti mismo nga apostol? Kalpasan ti pannakaiparukpok ti nasantuan nga espiritu idi Pentecostes 33 K.P., “tunggal aldaw idiay templo ken iti binalaybalay nagtultuloyda nga awan sarday a mangisuro ken mangideklara iti naimbag a damag maipapan iti Kristo, a ni Jesus.”​—Aramid 5:42.

11. Sigun iti Aramid 20:20, 21, ania ti inaramid ni apostol Pablo mainaig iti ministeriona?

¹¹ Gapu iti naregta a panagebangheliona, naikuna ni apostol Pablo kadagiti Kristiano a panglakayen idiay Efeso: “Saanko a minedmedan ti panangibaga kadakayo ti aniaman kadagiti banag a makagunggona wenno uray ti panangisuro kadakayo iti publiko ken iti binalaybalay.” Idi ‘nangisuro ni Pablo iti binalaybalay,’ dagiti kadi padana nga agdaydayaw ken ni Jehova ti binisitana, a nangaramid iti panagipastor a panagsarungkar kadagiti manamati? Saan, gapu ta intuloyna a kinuna: “Naan-anay a nangsaksiak agpadpada kadagiti Judio ken kadagiti Griego maipapan ti panagbabawi iti Dios ken ti pammati ken Apotayo a Jesus.” (Aramid 20:20, 21) Kaaduanna, dagidiay dedikado ken ni Jehova didan kasapulan ti maisuro maipapan iti “panagbabawi iti Dios ken ti pammati ken ni Apotayo a Jesus.” Sinanay ni Pablo a mangasaba dagiti Kristiano a panglakayen idiay Efeso, bayat nga insurona kadagiti saan a manamati ti maipapan iti panagbabawi ken pammati. Gapu iti dayta, tinulad ni Pablo ti ulidan ni Jesus.

12, 13. Maitunos iti Filipos 1:7, ania ti inaramid dagiti adipen ni Jehova no maipapan iti kalinteganda a mangasaba?

¹² Makakarit ti panangasaba iti binalaybalay. Kas pagarigan, saan a magustuan ti dadduma no idanontayo ti mensahe ti Biblia iti pagtaenganda. Ditay kayat ti mangsair iti rikna. Ngem Nainkasuratan ti panangasaba iti binalaybalay, ket ti panagayattayo iti Dios ken kadagiti kaarruba tignayennatayo a mangsaksi iti kastoy a pamay-an. (Marcos 12:28-31) Tapno ‘maidepensa ken legal a maipasdek’ ti kalintegantayo nga agbalaybalay, nagasuntotayo kadagiti korte, agraman iti Korte Suprema ti Estados Unidos. (Filipos 1:7) Dandani pabor kadatayo ti amin a desision ti korte, kas ipakita dagiti sumaganad.

¹³ “Ti panangipaima kadagiti narelihiosuan a polieto ket maysa a nabayagen a kita ti panagebanghelio​—kas kadaan ti panagimprenta. Dakkel ti naitulongna kadagiti nagduduma a relihion iti adun a tawen. Maus-usar ita dayta a kita ti panagebanghelio, kaaduanna kadagiti nadumaduma a narelihiosuan a sekta a dagiti misioneroda idanonda ti Ebanghelio iti rinibu a pagtaengan ken ikagumaanda ti mangkomberte babaen ti personal a panagsarungkar. . . . Iti sidong ti First Amendment [iti Konstitusion ti Estados Unidos], ti kastoy a narelihiosuan nga aktibidad ket kas kapateg ti panagdayaw a maar-aramid kadagiti simbaan ken panangasaba manipud iti pulpito.”​—Murdock v. Pennsylvania, 1943.

Apay nga Itultuloy ti Mangasaba?

14. Ania a panagrang-ay ti iyeg ti ministeriotayo?

¹⁴ Adu ti makagapu a mangasaba iti binalaybalay. Iti tunggal pannakisaritatayo iti maysa a bumalay, mangimulmulatayo iti bin-i ti kinapudno manipud iti Kasuratan. No agsarungkartayo, sibsibugantayo dayta. Iti kasta, mabalin a mangyeg dayta iti nasayaat a panagrang-ay, ta insurat ni Pablo: “Nagmulaak, ni Apolos nagsibug, ngem ti Dios ti nangpadpadakkel iti dayta.” (1 Corinto 3:6) Itultuloytayo ngarud ti ‘agmula ken agsibug,’ nga agtalektayo a ‘padakkelen dayta’ ni Jehova.

15, 16. Apay a maulit-ulit a sarungkarantayo dagiti tattao kadagiti pagtaenganda?

¹⁵ Agebangheliotayo gapu ta agpegpeggad ti biag dagiti tattao. Babaen ti panangasaba, mabalintayo a maisalakan ti biagtayo ken ti biag dagidiay mangipangag kadatayo. (1 Timoteo 4:16) No ammotayo nga agpegpeggad ti biag ti maysa, parparawpaw la kadi ti panangtulongtayo kenkuana? Saan! Gapu ta nairaman ti pannakaisalakanda, maulit-ulit a sarungkarantayo dagiti tattao kadagiti pagtaenganda. Agtultuloy nga agbaliwbaliw dagiti kasasaad. Ti maysa nga okupado unay idi nga umimdeng ket nalabit sidadaan a dumngegto iti mensahe ti Biblia iti sabali a gundaway. Nalabit nga adda sabali a miembro ti pamilia a makasangotayo, ket mabalin a makasaritatayo maipapan iti Kasuratan.

¹⁶ Saan laeng a dagiti kasasaad ti mabalin nga agbaliw no di ket uray ti kababalin dagiti bumalay. Kas pagarigan, ti nasaem nga ipupusay ti maysa nga ing-ingungoten ti mabalin a mangtignay iti maysa a mangipangag iti mensahe ti Pagarian. Kayattayo a liwliwaen dayta a tao, a tulongan a mangbigbig iti naespirituan a kasapulanna, ken ipakita no kasano a mapennek dayta.​—Mateo 5:3, 4.

17. Ania ti kangrunaan a rason no apay a mangasabatayo?

¹⁷ Ti kangrunaan a rason no apay a mangasabatayo iti binalaybalay wenno makiraman iti dadduma a benneg ti Nakristianuan a ministerio ket gapu ta kayattayo ti makipaset iti panangipakaammo iti nagan ni Jehova. (Exodo 9:16; Salmo 83:18) Pudno a mangyeg iti pannakapnek no ti trabahotayo a panagebanghelio ket matulongantayo nga agdayaw ken ni Jehova dagidiay agayat iti kinapudno ken kinalinteg! “Dakayo nga agtutubo a lallaki ken kasta met dakayo a birhen, dakayo a lallakay agraman ubbing,” inkanta ti salmista. “Idaydayawda koma ti nagan ni Jehova, ta ti naganna laeng ti di magaw-at ti kangatona. Ti dayawna adda iti ngatuen ti daga ken langit.”​—Salmo 148:12, 13.

Personal a Makagunggona Kadatayo ti Panagebanghelio

18. Kasano a makagunggona kadatayo ti panagebanghelio?

¹⁸ Ti panagebanghelio ket personal a makagunggona kadatayo iti nadumaduma a pamay-an. Ti panangidanon iti naimbag a damag iti binalaybalay tulongannatayo a mangsukay iti kinapakumbaba, nangnangruna no saan a nasayaat ti pannakisangoda kadatayo. Tapno epektibo ti panagebangheliotayo, masapul a tuladentayo ni Pablo, a ‘nagbalin nga amin a bambanag iti amin a kita ti tattao tapno maisalakanna ti sumagmamano.’ (1 Corinto 9:19-23) Ti kapadasantayo iti ministerio tulongannatayo nga agbalin a naannad. Babaen ti panagtalek ken ni Jehova ken panangpili a naimbag kadagiti sasao nga usarentayo, mayaplikartayo ti balakad ni Pablo: “Ti panagsaoyo kankanayon koma a mabuyogan iti kinaparabur, natemplaan iti asin, tapno ammoyo no kasano ti rebbengyo nga isusungbat iti tunggal maysa.”​—Colosas 4:6.

19. Kasano a tulongan ti nasantuan nga espiritu dagiti managebanghelio?

¹⁹ Ti panagebanghelio tignayennatayo met nga agpannuray iti nasantuan nga espiritu ti Dios. (Zacarias 4:6) Kas resultana, agminar iti ministeriotayo ti bungana nga “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.” (Galacia 5:22, 23) Apektaranna ti pannakilangentayo kadagiti tattao. No agpaiwanwantayo iti espiritu, maiparangarangtayo ti ayat, agbalintayo a naragsak ken mannakikappia, maaddaan iti mabayag a panagitured ken kinamanangngaasi, maiparangarangtayo ti kinaimbag ken pammati, ken agbalintayo a naalumamay ken managteppel bayat nga ideklaratayo ti naimbag a damag.

20, 21. Ania ti sumagmamano a bendision ken gunggona no okupadotayo kas managebanghelio?

²⁰ Masursurotayo met ti agbalin nga ad-adda a mannakipagrikna no maysatayo a managebanghelio. No iyebkas ti tattao dagiti parikutda​—sakit, kinaawan ti panggedan, problema ti pamilia​—saantayo nga agserbi a kas mammagbaga no di ket iranudtayo kadakuada dagiti makapabileg ken makaliwliwa a teksto. Maseknantayo kadagiti tattao a nabulsek iti naespirituan nupay nalabit ay-ayatenda ti kinalinteg. (2 Corinto 4:4) Ken anian a bendision ti mangipaay iti naespirituan a tulong kadagidiay “siuumiso nga agannayas iti agnanayon a biag”!​—Aramid 13:48.

²¹ Ti regular a pannakipaset iti panagebanghelio tulongannatayo nga agbalin a sipapanunot kadagiti naespirituan a banag. (Lucas 11:34) Sigurado a makagunggona dayta, yantangay makatulong dayta tapno saantay a matnag kadagiti materialistiko a pannulisog a gagangay iti daytoy a lubong. Indagadag ni apostol Juan kadagiti Kristiano: “Dikay ayaten ti lubong wenno uray ti bambanag nga adda iti lubong. No ti asinoman ayatenna ti lubong, ti ayat ti Ama awan kenkuana; agsipud ta amin a banag iti lubong​—ti derrep ti lasag ken ti derrep dagiti mata ken ti panangiparammag iti sanikua a pagbiag ti maysa​—​saan nga agtaud iti Ama, no di ket agtaud iti lubong. Kanayonanna pay, ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.” (1 Juan 2:15-17) Ti panagbalin nga okupado kas managebanghelio nga aduan iti aramiden iti trabaho ti Apo tulongannatayo a di mangayat iti lubong.​—1 Corinto 15:58.

Agurnong Kadagiti Gameng Idiay Langit

22, 23. (a) Aniada a gameng ti ur-urnongen dagiti Kristiano a managebanghelio? (b) Ania ti ilawlawag kadatayo ti sumaruno nga artikulo?

²² Ti naregta a panangikasaba iti Pagarian mangyeg kadagiti manayon a gunggona. Pinaneknekan daytoy ni Jesus idi kinunana: “Isardengyo ti agurnong maipaay iti bagbagiyo kadagiti gameng iti daga, sadiay nga ibusen ti sanga ken lati, ken sadiay a serken ken takawen dagiti mannanakaw. Imbes ketdi, agurnongkayo maipaay iti bagbagiyo kadagiti gameng idiay langit, sadiay a saan nga ibusen ti sanga wenno uray lati, ken sadiay a saan a serreken ken takawen dagiti mannanakaw. Ta no sadino ti ayan ti gamengmo, addanto met sadiay ti pusom.”​—Mateo 6:19-21.

²³ Itultuloytayo koma ti agurnong kadagiti gameng idiay langit, a bigbigentayo nga awanen ti nasaysayaat pay a pribilehio ngem iti mangibagi iti Soberano nga Apo Jehova kas Saksina. (Isaias 43:10-12) Bayat nga itultuloytayo nga itungpal ti annongentayo kas ministro ti Dios, maibagatayo met ti kas iti narikna ti maysa a Kristiano a babai nga agtawen iti nasurok a 90, a nagkuna maipapan iti nabayagen a panagserbina iti Dios: “Agyamanak iti panangan-anus kaniak ni Jehova iti unos ti panagbiagko, ket sipapasnek nga ikarkararagko nga isu koma ti naayat nga Amak iti agnanayon.” No kasta ti panangipategtayo iti relasiontayo iti Dios, sigurado a kayattayo a naan-anay nga aramiden ti trabaho ti maysa a managebanghelio. Ilawlawag ti sumaruno nga artikulo no kasanotayo a naan-anay a mairingpas ti ministeriotayo.

Ania ti Sungbatyo?

• Apay a nasken nga agebangheliotayo?

• Ania ti makunayo maipapan iti trabaho dagiti napalabas ken agdama a managebanghelio?

• Apay a mangaskasabatayo iti binalaybalay?

• Kasano a personal a makagunggona kadakayo ti panagebanghelio?

[Dagiti Ladawan iti panid 10]

Adda dagiti naragsak a managebanghelio iti kaaldawantayo a kas met la idi kada Felipe ken iti uppat a babbalasangna

[Ladawan iti panid 14]

Kasano a personal a makagunggona kadakayo ti panangiranud iti naimbag a damag kadagiti sabsabali?