Panagbiag a Maitunos iti Panagkinnari iti Panagasawayo!

MAYSA a naragsak nga aldaw ti aldaw ti kallaysa. Maysa met dayta a serioso unay nga okasion. Mangaramid ti nobia ken nobio iti napudno a karinkari a mangapektar kadakuada iti unos ti panagbiagda. Dagiti saksi iti daytoy a napudno a karinkari dagidiay presente iti kallaysa kas bisita, ngem ni Jehova a Dios ti kangrunaan a Saksi.

Saan a kalikaguman ti Biblia dagiti espesipiko nga addang wenno maysa a naisangsangayan a kita ti seremonia ti kallaysa. Nupay kasta, kas panangbigbig iti nadibinuan a namunganayanna, nakayugalianen a maaramid a pormal ti panagasawa babaen ti panagkinnari iti kallaysa kabayatan ti narelihiosuan a seremonia. Adda sumagmamanon a tawen nga ar-aramaten dagiti Saksi ni Jehova ti sumaganad a panagkinnari iti panagasawa: “Siak​—​— alaenka​—​— kas ikallaysak (nga asawa a babai/asawa a lalaki), tapno ayatek ken dungdungnguek (Nobia: ken sipupudno a raemek) kas maitunos iti nadiosan a linteg a naituyang iti Nasantuan a Kasuratan para kadagiti Kristiano (nga assawa a babbai/assawa a lallaki), bayat a sibibiagta a dua ditoy daga kas maitunos iti urnos ti Dios iti panagasawa.”a

Maysa a Banag a Pagpanunotan

No agpangpanggepkayo a mangasawa, nagpateg a panunoten ti kinauneg ken kaipapanan daytoy a panagkinnari sakbay ti aldaw ti kallaysa. Kinuna ni Solomon: “Dika pagdarasudusen ti ngiwatmo; ket dika palubosan nga agdaras ta pusom nga agsao iti aniaman iti sanguanan ti pudno a Dios.” (Eclesiastes 5:2) No ngay naasawaankayon? No kasta magunggonaankay a mangmennamenna iti kinapateg ti napudno a karinkari nga inaramidyo iti sanguanan ni Jehova. Agbibiagkay kadi a maitunos iti dayta? Itaktakderan a sisiserioso dagiti Kristiano dagiti karinkarida. Intuloy ni Solomon: “Tungpalem ti ikarim. Naim-imbag a dika koma mangikari ngem ti mangikarika ket dika tungpalen. Dika palubosan a ta ngiwatmo pagbasolenna ta lasagmo, dika met agsao iti sanguanan ti anghel a kunaem maysa a biddut.”​—Eclesiastes 5:4-6.

Ti sao-por-sao a panangusig iti panagkinnari iti kallaysa awan duadua a parang-ayenna ti pannakaawatyo iti daytoy napudno a karinkari.

“Siak ​—​— alaenka”: Daytoy ti panglukat a sasao iti panagkinnari. Itampok daytoy a dakayo a mismo ti manungsungbat iti pangngeddengyo a mangasawa.

Iti sidong ti Nakristianuan nga urnos, awan ti Nainkasuratan nga obligasion a mangasawa. Nagtalinaed a di naasawaan ni Jesu-Kristo a mismo ken inrekomendana ti panagwaywayas kadagidiay “makaiwaya iti dayta.” (Mateo 19:10-12) Iti kasumbangirna, kasado a lallaki ti kaaduan kadagiti apostol ni Jesus. (Lucas 4:38; 1 Corinto 9:5) Nalawag a maysa a personal a banag ti pangngeddeng a mangasawa. Awan ti tao nga addaan Nainkasuratan nga autoridad a makaipilit iti dadduma a mangasawa.

Gapuna, dakayo ti makaammo no pilienyo ti mangasawa. Nalabit, piniliyo iti pakiasawaanyo. No aramidenyo ti panagkinnari iti panagasawa, a kunkunayo, ‘alaenka ​—​—,’ alaen wenno awatenyo dayta a tao agraman dagiti nasayaat nga ugalina​—ngem kasta met dagiti pagbiddutanna.

Inton agangay nalabit a matakuatanyonto dagiti di ninamnama a kababalin a saan idi a nagminar iti personalidad ti asawayo. Maupaykayto sagpaminsan. Kuna ti Biblia nga “amin nagbasol ken agkurang iti dayag ti Dios.” (Roma 3:23) Gapuna mabalin a kasapulan a mangaramidkayo kadagiti panagbalbaliw tapno matulonganyo ti asawayo. Mabalin a narigat daytoy, ket no dadduma amangan no mariknayo a kasla kayatyon ti sumuko. Ngem laglagipenyo, naaramid ti panagkinnari iti panagasawa iti sanguanan ni Jehova. Matulongannakay nga agballigi.

“Kas ikallaysak (nga asawa a babai/asawa a lalaki)”: Iti kaunaan a panagkallaysa, idi naited ni Eva kas asawa ni Adan, kinuna ni Jehova a Dios nga “agbalindanto a maymaysa a lasag.” (Genesis 2:24; Mateo 19:4-6) No kasta, ti panagtipon kas agassawa ti kadekketan a relasion a mabalin a tumanor iti dua a tao. Ti panagasawa ti mamagbalin kadakayo a baro nga agkabagian. Alaenyo ti maysa a tao kas “ikallaysayo nga asawa a babai” wenno “ikallaysayo nga asawa a lalaki.” Naiduma dayta iti aniaman a relasion. Dagiti tignay a mangpataud iti sangkabassit a pannakadangran iti dadduma a relasion mabalin a pataudenna ti nakaro nga ut-ot iti uneg ti urnos ti panagasawa.

Usigenyo a pagarigan ti Nainkasuratan a balakad a masarakan iti Efeso 4:26. Sadiay kuna ti Biblia: “Agpungtotkayo, ngem nupay kasta dikay agbasol; ti init saannakay koma a malnekan a sipupungtot.” Nalabit saanyo a kanayon a sidadaras a narisut dagiti parikutyo kadagiti kabagian ken gagayyemyo. Ngem nadekdekket ti asawayo ngem iti asinoman a kabagian wenno gayyem. Ti diyo panangrisut nga insigida kadagiti banag a kadua ti asawayo nalabit pagpeggadenna ti naisangsangayan a panagkabagianyo.

Palubosanyo kadi a kumaro ti diyo pagkatunosan ken ni asawayo nga agturong iti maysa nga agtultuloy a panggapuan ti panagpulkok wenno pannakasuron? Dagiti kadi di panagkinnaawatan ken makapaupay a kasasaad agtalinaedda iti sumagmamano nga aldaw? Tapno agbiagkayo a maitunos iti panagkinnariyo, diyo palubosan nga aglabas ti aldaw a di makikappia iti asawayo no rumsua dagiti parikut. Kaipapanan daytoy ti panangpakawan ken pananglipat agraman ti panangbigbig kadagiti pagbiddutan ken pagkamkamalianyo.​—Salmo 51:5; Lucas 17:3, 4.

“Tapno ayatek”: Agkari ti agbalin nga asawa a lalaki nga ‘ayaten ken dungnguenna’ ti asawaenna. Mairaman iti daytoy nga ayat ti romantiko nga ayat a nalabit isut’ namagdekket kadakuada a sangsangkamaysa. Ngem saan nga umdas ti romantiko nga ayat. Naun-uneg ken nalawlawa ti ayat nga ikari ti maysa a Kristiano para iti asawana a lalaki wenno babai.

Kuna ti Efeso 5:25: “Assawa a lallaki, itultuloyyo nga ayaten dagiti assawayo, no kasano a ni Kristo inayatna met ti kongregasion.” Ti ayat ni Jesus iti kongregasion awan duadua a saan a kas ti romantiko nga ayat iti nagbaetan dagiti sekso. Dagiti termino nga “ayaten” ken ‘inayat’ a naaramat iti daytoy a kasuratan namunganay iti sao nga a·gaʹpe, a tumukoy iti ayat a nabuyogan iti prinsipio. Ditoy nga ibilin ti Biblia kadagiti assawa a lallaki nga ipakitada ti di agbalbaliw, napudno, awan panagkupasna nga ayat kadagiti assawada.

Daytat’ saan laeng nga “Ay-ayatenka gapu ta ay-ayatennak” a kita ti emosion. Sapulen ti asawa a lalaki ti pagimbagan ti asawana a nangnangruna ngem iti bukodna, ket ipateg ti asawa a babai ni lakayna iti kasta met laeng a pamay-an. (Filipos 2:4) Ti panangsukay iti nauneg a panagayat iti kaparehayo ti tumulongto kadakayo nga agbiag a maitunos iti panagkinnari iti panagasawayo.

“Tapno dungdungnguek”: Sigun iti maysa a diksionario, ti ‘tapno dungdungnguen’ kaipapananna ‘tapno ipateg, tapno iparikna wenno ipakita ti panagayat.’ Masapul nga iyebkasyo ti ayatyo iti sasao ken ar-aramid! Ti asawa a babai nangnangruna nga agkasapulan nga umawat a kanayon kadagiti ebkas ti ayat ni lakayna. Mabalin nga asikasuen a naimbag ni lakayna dagiti pisikal a kasapulanna, ngem saan nga umdas daytoy. Addada assawa a babbai nga umdas ti taraonda ken maysa a komportable a pagtaengan ngem nalidayda unay gapu ta nabaybay-an wenno di ikaskaso ida ti asawada.

Iti kasumbabangirna, ti asawa a babai a makarikna a maay-ayat ken madungdungngo awan duadua nga addaan rason tapno agragsak. Siempre, pudno met daytoy iti asawa a lalaki. Maparang-ay unay ti pudno nga ayat babaen kadagiti napudno nga ebkas ti panangipateg. Iti Kanta ni Solomon, kuna ti managayat a pastor: “Anian a nagimnas ta ayatmo, O kabsatko a babai, a nobiak! Anian ti kinaim-imbag ta ayatmo ngem iti arak ken ti kinaayamuom dagiti lanam ngem iti amin a kita dagiti bangbanglo!”​—Kanta ni Solomon 4:10.

“Ken sipupudno a raemek”: Kadagiti napalabas a siglo, addada lallaki a nangabuso ken nangipababa kadagiti babbai. Uray ita, sigun iti magasin a World Health, ti “kinaranggas maibusor kadagiti babbai maar-aramid iti amin a pagilian ken iti amin a tukad ti kagimongan ken ekonomia. Iti adu a kultura, maibilang a karbengan ti lalaki ti panangkabil iti asawa a babai.” Nalabit a saan a makarikna iti basol ti kaaduan a lallaki iti kasta nga aramid. Kaskasdi, agparang nga adu a lallaki ti saan a makaipakita iti pudpudno nga interes kadagiti isyu a pakaseknan dagiti babbai. Kas resultana, nakapatanor ti adu a babbai iti negatibo a rikna kadagiti lallaki. Nangngeg iti sumagmamano nga assawa a babbai a nagkuna, “Ay-ayatek ni lakayko, ngem talaga a diak maraem!”

Nupay kasta, tagipatgen ni Jehova a Dios ti babai a mangikagkagumaan a mangraem iti asawana​—uray no pasaray agkurang daytoy kadagiti ninamnamana. Bigbigenna nga addaan inted-Dios a rebbengen, wenno posision. (1 Corinto 11:3; Efeso 5:23) Ti nauneg a panagraem iti asawana no kasta paset ti panagdayaw ken panagtulnog ken Jehova. Saan a lipatan ti Dios ti kinatulnog dagiti nadiosan a babbai.​—Efeso 5:33; 1 Pedro 3:1-6; idiligyo ti Hebreo 6:10.

Kasapulan ti panagrinnaem iti tumunggal maysa iti panagasawa, ket rumbeng a teggeden dayta imbes a namnamaen wenno kalikaguman laeng. Kas pagarigan, ti mangumsi wenno makapasakit a sasao awan lugarna iti urnos ti panagasawa. Saan a kinamanagayat wenno panagraem ti panangipababa a sasao iti asawayo a lalaki wenno asawayo a babai. Saan a makagunggona ti panangipalgakyo iti sabsabali ti pagkurkurangan ti asawayo wenno panangisarsarita kadagitoy iti publiko. Uray iti panagangaw maipakita ti maysa ti nakaro a kinaawan panagraem iti daytoy a banag. Agaplikar ti sasao iti Efeso 4:29, 32 agpadpada iti asawa a lalaki ken asawa a babai. Sadiay ibagbaga ti Biblia: “Saan koma a rummuar iti ngiwatyo ti rinuker a sasao, no di ket ti aniaman a sasao a naimbag a maipaay a pangpabileg kas iti kasapulan . . . Agbalinkayo a manangaasi iti maysa ken maysa, nadungngo a mannakipagrikna.”

“Kas maitunos iti nadiosan a linteg a naituyang iti Nasantuan a Kasuratan”: Kayat ti Dios a tagiragsakentayo ti wayawaya nga agpili ken agtignay. Saannatay a padagsenan iti adu a listaan dagiti linteg a mangiwanwan iti biag ti agassawa. Nupay kasta, impasdekna dagiti sumagmamano a pagalagadan agpaay iti pagimbagantayo.

Ita, nakaad-adu ti nadumaduma a nayimprenta a material maipapan iti panagasawa, ken adu a tattao ti addaan bukodda a pilosopia. Ngem agannadkayo! Iti tema maipapan iti panagasawa, adu kadagiti impormasion a maiwarwaras ti maibusor iti Biblia.

Kitaenyo met ta nadumaduma dagiti kasasaad iti tunggal agassawa. Iti maysa a pamay-an, mayasping ti agassawa kadagiti arbis ti niebe; iti adayo kasla agpapadada, ngem iti kinaagpaysuanna naisangsangayan ti tunggal maysa, naidumduma iti amin a sabsabali pay. Ti nagtipon a personalidadyo iti asawayo saan a matulad ti aniaman a sabsabali a pagassawaan iti lubong. Gapuna dikay agdarasudos nga umawat iti personal a panangmatmat ti sabsabali. Awan ti inaramid-tao a pormula nga agaplikar iti tunggal panagasawa!

Iti kasunganina, pudno ken mayanatup ti amin a bilin ti Biblia. Nagsurat ni apostol Pablo: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag.” (2 Timoteo 3:16; Salmo 119:151) No basaenyo ti Biblia ken awatenyo dagiti sursurona kas giya iti inaldaw a panagbiagyo, mabalinyo ti agbiag a maitunos iti panagkinnari iti panagasawayo.​—Salmo 119:105.

“Bayat a sibibiagta a dua ditoy daga”: Daytoy tuktukoyenna ti napaut a panagkadua. Ibilin ti Dios a ti “lalaki panawannanto ti amana ken ti inana ket tumiponto iti asawana.” (Genesis 2:24) Kayat ni Jehova nga agkaduakayo. Agkaduakayo nga agserbi iti Dios. Agkaduakayo nga agadal iti Saona. Mangbusbos iti panawen nga agkuyog a magna, agkatugaw, aggiddan a mangan. Agkaduakayo a mangtagiragsak iti biag!

Ikagkagumaan ti sumagmamano nga agassawa ti mangilasin ti panawen iti inaldaw tapno agtungtongda a dua. Uray kalpasan ti adun a tawen ti panagasawa, napateg ti kastoy a panagkadua tapno matagiragsak ti panagasawa.

“Kas maitunos iti urnos ti Dios iti panagasawa”: Maysa a sagut ti panagasawa manipud ken Jehova a Dios, a nangipasdek iti urnos ti panagasawa. (Proverbio 19:14) Ti di panangsurot iti urnosna saanna laeng a pagpeggaden ti ragsakyo iti panagasawa no di pay met ti relasionyo iti Namarsua. Iti kasumbangirna, no sukayen ti asawa a lalaki ken asawa a babai ti nasayaat a relasion ken Jehova, nga iyanninawda babaen ti panagtulnog kadagiti urnosna, maaddaandanto iti natalna a relasion iti sabsabali, agraman iti maysa ken maysa.​—Proverbio 16:7.

Diyo liplipatan a ni Jehova ti kangrunaan a Saksi iti panagkinnariyo iti panagasawa. Itultuloyyo ti agbiag iti daytoy napudno a karinkari, ket ti panagasawayo agbalinto a maysa a gubuayan ti dayaw ken dayag ni Jehova a Dios!

[Footnote]

[Blurb iti panid 22]

Iti maysa a pamay-an, mayasping ti agassawa kadagiti arbis ti niebe. Iti adayo kasla agpapadada amin, ngem iti kinaagpaysuanna naisangsangayan a naidumduma ti tunggal pagassawaan

[Credit Line]

Dagiti Kristal a Niebe/Dover