Salsaludsod Dagiti Agbasbasa

Masapul kadi a maannurot dagiti insapata iti Dios?

Iti Kasuratan, ti sapata ket maysa a sagrado a kari iti Dios a mangaramid iti maysa a banag, mangidaton, sumrek iti maysa a serbisio wenno kasasaad, wenno iyaadayo kadagiti bambanag a maisalungasing iti linteg. Naglaon ti Biblia kadagiti salaysay ti panagsapata nga addaan kondision agsipud ta dagitoy ket panagkari nga agaramid iti maysa a banag no adda aramiden nga umuna ti Dios. Kas pagarigan, ni Anna nga ina ni propeta Samuel, “nagkari ket kinunana: ‘O Jehova ti buybuyot, no . . . saanmonto a lipaten ti adipenmo a babai ket pudno a mangipaayka iti adipenmo a babai iti anak a lalaki, ipaaykonto ken Jehova iti amin nga al-aldaw ti panagbiagna, ket awanto ti labaha nga umay iti rabaw ti ulona.’” (1 Samuel 1:11) Adda met ti dinakamat ti Biblia a panagsapata a boluntario. Agingga kaano a maannurot dagiti insapata iti Dios?

“Kaanoman a mangikarika iti maysa a kari iti Dios,” kuna ni Ari Solomon iti nagkauna nga Israel, “dika bumdeng a mangtungpal iti dayta.” Innayonna: “No ania ti ikarim, tungpalem. Nasaysayaat a saanka nga agkari ngem iti agkarika ket saanmo a tungpalen.” (Eclesiastes 5:4, 5) Kuna ti Linteg a naited iti Israel babaen ken Moises: “No kas pagarigan mangikarika iti kari ken Jehova a Diosmo, dika bambannayaten a tungpalen dayta, agsipud ta di bumurong a singirento kenka ni Jehova a Diosmo, ket pudno nga agbalin a basol iti biangmo.” (Deuteronomio 23:21) Nalawag a serioso a banag ti panagsapata iti Dios. Nasken a naimbag ti motibo no agsapata. Masapul met a siguraduen ti nagsapata a kabaelanna a tungpalen ti karina. Ta no saan, nasaysayaat laengen a di agsapata. Ngem nasken kadi a maannurot ti amin a kari apaman nga insapata dayta?

Kasanon no ti inkari ti maysa nga aramidenna ket maammuanna inton agangay a saan a maitunos iti pagayatan ti Dios? Ipapantayo a maysa a kari dayta a manginaig iti imoralidad iti pudno a panagdayaw? (Deuteronomio 23:18) Siempre, saan nga agtultuloy a maannurot dayta a kari. Maysa pay, iti sidong ti Mosaiko a Linteg, ti kari ti maysa a babai ket mabalin a waswasen ti amana wenno ti asawana.​—Numeros 30:3-15.

Usigenyo met ti kasasaad ti maysa a nagkari iti Dios nga agtalinaed a di kasado ngem agparikut ita. Gapu ta kayatna a tungpalen ti karina, gistay masalungasingna ti pagalagadan ti Dios mainaig iti moralidad. Masapul kadi nga ikagumaanna latta a tungpalen ti karina? Saan kadi a nasaysayaat a saluadanna ti bagina a di matnag iti imoralidad babaen ti panangwaswasna iti karina ket dawatenna ketdi ti asi ken pammakawan ti Dios? Isuna laeng ti makaikeddeng iti dayta a banag. Awan ti sabali a tao nga agdesision para kenkuana.

Kasano no nagkari ti maysa ngem nabigbigna idi agangay a nailaw-an la a nangaramid iti dayta? Ikagumaanna kadi latta a tungpalen dayta a kari? Saan a nalaka iti biang ni Jefte a tungpalen ti inkarina iti Dios, ngem naan-anay nga inaramidna latta. (Uk-ukom 11:30-40) Ti tao a di mangtungpal iti karina ket mabalin a ‘mamagrurod’ iti Dios ken pakaigapuan ti panangrebbana iti nagapuanan dayta a tao. (Eclesiastes 5:6) Mabalin a maikkat ti anamong ti Dios no tagilag-anen ti panangtungpal iti kari.

Kinuna ni Jesu-Kristo: “Ti koma latta saoyo a Wen kaipapananna ti Wen, ti saoyo a Saan, Saan; ta ti aniaman a surok dagitoy ket nagtaud iti daydiay nadangkes.” (Mateo 5:37) Masapul koma a maseknan ti maysa a Kristiano saan laeng nga iti panangtungpalna iti karina iti Dios no di pay ket iti panangpaneknekna a mapagtalkan amin a saona​—iti Dios ken kadagiti tattao. Kasanon no naipasango iti kasasaad a nakitulag iti sabali a tao nga agparang a nasayaat idi damo ngem nautobna a kinamaag gayam? Saanna koma a laglag-anen dayta a kari. Ngem babaen ti nalapat a panagsarita, mabalin nga ikeddeng ti nagkarianna a mawaswas ti obligasionna kenkuana.​—Salmo 15:4; Proverbio 6:2, 3.

No maipapan kadagiti kari ken dadduma pay a bambanag, ania koma ti kangrunaan a pakaseknantayo? Nasken a kanayon nga ikagumaantayo a taginayonen ti nasayaat a relasiontayo ken ni Jehova a Dios.

[Dagiti Ladawan iti panid 30, 31]

Saan a nagpangadua ni Anna a nangtungpal iti insapatana

[Dagiti Ladawan iti panid 30, 31]

Nupay narigat kenkuana, situtulok a tinungpal ni Jefte ti karina