Report Dagiti Manangiwaragawag ti Pagarian

Ti Bileg ti Sao ti Dios a Mangbalbaliw

INAMINNA a mismo a maysa idi a “managtabbaaw ken manangidadanes ken nakuspag a tao.” (1 Timoteo 1:13) Ngem nagbalbaliw! Dakkel ti nagbalbaliwan ni apostol Pablo, isut’ gapuna a naikunana idi agangay: “Agbalinkayo a tumutulad kaniak, kas met iti panangtuladko ken Kristo.”​—1 Corinto 11:1.

Ita, ginasut a ribu a napasnek a managdaydayaw iti intero a lubong ti mangar-aramid iti umasping a panagbalbaliw. Ania ti tumultulong kadakuada a mangaramid iti dayta? Gumunggun-odda iti pannakaammo iti Sao ti Dios ken iyap-aplikarda dayta iti biagda. Itampok ti sumaganad a kapadasan ti bileg ti Sao ti Dios a mangbalbaliw.

Idiay Slovenia, agbukbukod dagiti lumakay ken bumaketen nga agassawa nga agnanaed iti ruar ti maysa a purok. Ag-60 ti tawen ti asawa a lalaki, ni Jože ngem mangnginum. Kaskasdi, tinaripatona ti masakit nga asawana, ni Ljudmila. Iti maysa nga aldaw, inasitgan ti dua a manangiwaragawag ti Pagarian ni Jože. Pinadanonna dagiti Saksi iti pagtaenganna, ket naam-ammoda ni baketna. Idi mangngegna ti mensahe ti Pagarian, nakalua ni Ljudmila. Naragsakan met ni Jože iti nangngegna ket adu ti insaludsodna. Pimmanaw dagiti Saksi kalpasan a napaimaanda ti agasawa iti sumagmamano a literatura ti Biblia.

Kalpasan ti makabulan nagsubli dagiti Saksi, ket nakitada ti libro a Mabalinyo ti Agbiag nga Agnanayon iti Paraiso a Daga nga adda iti rabaw ti lamisaan. Idi dinamagda no nangalaanna iti dayta, kinuna ni Jože: “Nabasak ti anunsio iti akinlikud nga akkub ti maysa kadagiti magasin nga imbatiyo kaniak. Isu a nagsuratak iti opisinayo idiay Zagreb tapno agkiddaw iti dayta a libro.” Gapu ta interesado, inawisda a tumabuno iti masungad a Panglaglagip iti ipapatay ni Kristo a maangay iti Kingdom Hall. Napan, ket naragsakan dagiti Saksi!

Di nagbayag, nairugi ti panagadal iti Biblia, ket nasayaat ti panagrang-ayna. Kas pagarigan, idi naipakita ken Jože manipud Biblia a “dika mangaramid iti maipaay kenka a ladawan a kinitikitan wenno . . . agruknoy kadakuada tapno pagserbian ida,” dágus nga inurnongna amin a relihioso nga imahen nga adda iti balayna, agraman dagiti ladawan, ket imbellengna ida.​—Exodo 20:4, 5.

Maep-ep-ep idin ti pannakawaw ni Jože iti naespirituan a kinapudno. Isuna laeng ta mawaw latta iti arak. Iti agarup 18 a tawenen, ag-10 a litro nga arak ti mainumna kada aldaw. Gapu iti panagin-inumna, nabaybay-anna ti personal a langana. Ngem idi naammuanna ti panangmatmat ti Dios iti panagabuso iti arak, determinado nga agbalbaliw.

In-inut nga inkagumaanna a parmeken ti panagin-inumna, nga inaldaw nga irekordna ti kaadu ti mainumna. Di nagbayag, nakaruk-aten iti arak. Bayat ti panagadalna iti Biblia, nasursurona met a masapul a nadalus a kanayon dagiti pudno a Kristiano. Gapuna, inikkanna dagiti Saksi iti kuarta ket kinunana: “Ala, inkay gumatang iti aniaman a kawes a kasapulak tapno presentableak kadagiti Nakristianuan a gimong ken iti tay-ak ti serbisio!” Nagsubli dagiti Saksi nga adda awitda a kalsonsilio, medias, sapatos, kamisa dentro, amerikana, kurbata, ken bag.

Kalpasan ti makatawen a panagadalda iti Biblia, kualipikadon da Jože ken Ljudmila a kumuyog kadagiti Saksi a mangasaba kadagiti balbalay. Kalpasan ti tallo a bulan, insimboloda ti dedikasionda iti Dios babaen ti panagpabautisar iti danum iti kombension distrito dagiti Saksi ni Jehova. Nupay lakay ken nakapsutdan, regular a nakiraman ni Jože iti panangikasaba iti naimbag a damag ket idi agangay, agingga iti ipapatayna idi Mayo 1995, simamatalek a nagserbi a kas ministerial nga adipen iti kongregasion. Ti nasayaat nga imbungana iti biag daytoy napakumbaba a lalaki ken ti asawana paneknekanna ti bileg ti Sao ti Dios a mangbalbaliw!