Ti Bin-i ti Serpiente—Kasano a Naibutaktak?
“Siak pagginnuraenkayto iti babai ken ti bin-im ken ti bin-ina.”—GENESIS 3:15.
1. (a) Apay a ni Jehova ti naragsak a Dios? (b) Ania ti inaramidna tapno makipagrag-otay kenkuana?
NI Jehova ti naragsak a Dios ket nainkalintegan dayta. Isu ti katan-okan ken kangrunaan a Manangipaay kadagiti bambanag a naimbag, ken awan a pulos ti makakeltay iti pannakatungpal dagiti panggepna. (Isaias 55:10, 11; 1 Timoteo 1:11; Santiago 1:17) Kayatna a makipagrag-o kenkuana dagiti adipenna, ket inikkanna ida iti nainkalintegan a rason nga agrag-o. Gapuna, iti maysa kadagiti kalideman a kanito iti pakasaritaan ti tao—ti iyaalsa idiay Eden—isut’ nangted iti pangnamnamaantayo iti masanguanan.—Roma 8:19-21.
2. Idi inukomna dagiti rebelde idiay Eden, kasano a nangipaay ni Jehova iti pangnamnamaan dagiti annak da Adan ken Eva?
2 Kalkalpas idi ti maysa kadagiti espiritu nga annak ni Jehova a pinagbalin ti bagina a Satanas a Diablo babaen ti panangbusor ken panangpardayana iti Dios. Natnag dagiti immuna a tao, ni Eva sa kalpasanna ni Adan, iti impluensiana ket sinalungasingda ti nabatad a linteg ni Jehova. Nainkalintegan a nasentensiaanda iti ipapatay. (Genesis 3:1-24) Nupay kasta, idi inukomna dagitoy a rebelde, nangipaay ni Jehova iti pangnamnamaan dagiti annak da Adan ken Eva. Kasano? Kas nailanad iti Genesis 3:15, kinuna ni Jehova: “Siak pagginnuraenkayto iti babai ken ti bin-im ken ti bin-ina. Daytoy sugatennanto ta ulom ket sika sugatemto ti mukodna.” Dayta a padto ti tulbek iti pannakaawat iti intero a Biblia kasta met iti napalabas ken agdama a paspasamak a pakairamanan agpadpada ti lubong ken dagiti adipen ni Jehova.
No Aniat’ Kaipapanan ti Padto
3. Kas nadakamat iti Genesis 3:15, ilasinyo (a) ti Serpiente, (b) “ti babai,” (c) ti “bin-i” ti Serpiente, (d) ti “bin-i” ti babai.
3 Tapno maawatantay ti kaipapananna, sukimatentayo ti nadumaduma a paset ti padto a mismo. Ti natukoy iti Genesis 3:15 isu ti Serpiente—saan a ti nanumo nga uleg no di ket daydi nangusar iti dayta. (Apocalipsis 12:9) “Ti babai” ket saan a ni Eva no di ket ti nailangitan nga organisasion ni Jehova, ti ina dagiti napulotan-espiritu nga adipenna ditoy daga. (Galacia 4:26) Ti “bin-i” ti Serpiente, isu ti bin-i ni Satanas, ti kaputotanna—dagiti demonio ken tattao kasta met dagiti natauan nga organisasion a mangiparparangarang kadagiti kababalin ni Satanas ken gumurgura iti “bin-i” ti babai. (Juan 15:19; 17:15) Ti kangrunaan a “bin-i” ti babai isu ni Jesu-Kristo, a napulotan iti nasantuan nga espiritu idi 29 K.P. Ti 144,000, a “maiyanak manen . . . manipud danum ken espiritu” ken makipagtawid ken Kristo iti nailangitan a Pagarian, ket maikadua a paset dayta naikari a bin-i. Nangrugi a nainayon dagitoy iti bin-i ti babai idi Pentecostes 33 K.P. a nagpatpatuloy.—Juan 3:3, 5; Galacia 3:16, 29.
4. Kasano a mainaig ti Genesis 3:15 iti panagbalin ti daga a paraiso, a napno kadagiti tattao a nawayawayaan iti basol ken ipapatay?
4 Nausar ti literal a serpiente idiay Eden kas pannakangiwat daydi manangallilaw a makagapu iti pannakapukaw ti sangatauan iti Paraiso. Impakpakauna ti Genesis 3:15 ti panawen inton madadael daydi nangusar iti dayta a serpiente. Iti kasta maikkanto manen dagiti tattao nga adipen ti Dios iti gundaway nga agnaed iti Paraiso, a nawayawayaan iti basol ken ipapatay. Anian a makaparagsakto a panawen dayta!—Apocalipsis 20:1-3; 21:1-5.
5. Ania dagiti kababalin a pakailasinan ti naespirituan nga annak ti Diablo?
5 Kalpasan ti iyaalsa idiay Eden, nangrugi nga agparang dagiti indibidual ken organisasion a nangiparangarang kadagiti kababalin nga umasping ken ni Satanas a Diablo—iyaalsa, panagulbod, pammardaya, ken pammapatay, a pakairamanan ti ibubusor iti pagayatan ni Jehova ken kadagidiay agdaydayaw ken Jehova. Dagitoy ti kababalin a pakailasinan dagiti kaputotan, dagiti naespirituan nga annak, ti Diablo. Maysa kadagitoy ni Cain, a nangpapatay ken Abel idi inanamongan ni Jehova ti panagdayaw ni Abel imbes a ni Cain. (1 Juan 3:10-12) Ni Nimrod, a ti mismo a naganna nangipamatmat nga isu ket maysa a rebelde ken nagbalin a mannakabalin a mangnganup ken agturay a maibusor ken Jehova. (Genesis 10:9) Mainayon pay, adda dagiti nagsasaruno a nagkauna a pagarian, a pakairamanan ti Babilonia, a buyogen dagiti relihion a sinuportaran ti estado a naibatay iti kinaulbod, ket siuulpit nga inrurumen dagitoy dagiti managdaydayaw ni Jehova.—Jeremias 50:29.
‘Panagginnura iti Nagbaetam ken ti Babai’
6. Kadagiti ania a pamay-an a naipakita ti gura ni Satanas iti babai a kukua ni Jehova?
6 Iti unos amin daytoy a panawen, adda panagginnura iti nagbaetan ti Serpiente ken ti babai a kukua ni Jehova, iti nagbaetan ni Satanas a Diablo ken ti nailangitan nga organisasion ni Jehova a buklen dagiti nasungdo nga espiritu a parsua. Naipakita ti gura ni Satanas iti panangumsina ken ni Jehova ken panangpadasna a mangriribuk iti nailangitan nga organisasion ni Jehova, a ginargarina dagiti anghel a mangpanaw iti umiso a pagtaenganda. (Proverbio 27:11; Judas 6) Naiparangarang dayta idi inusar ni Satanas dagiti demoniona a manglapped kadagiti mensahero nga anghel nga imbaon ni Jehova. (Daniel 10:13, 14, 20, 21) Nangnangruna a nabatad dayta iti daytoy maika-20 a siglo idi inkagumaan ni Satanas a dadaelen ti naipasngay a Mesianiko a Pagarian.—Apocalipsis 12:1-4.
7. Apay a kagura dagiti nasungdo nga anghel ni Jehova ti simboliko a Serpiente, ngem ania a panagteppel ti impakitadan?
7 Kagura met ti babai a kukua ni Jehova, a buklen dagiti amin a nasungdo nga anghel, ti simboliko a Serpiente. Pinardaya ni Satanas ti naimbag a pakasarsaritaan ti Dios; kinaritna met ti kinatarnaw ti tunggal maysa kadagiti nasaririt a parsua ti Dios, a pakairamanan dagiti amin nga anghel, ket sipipinget nga ikagkagumaanna a rakraken ti kinasungdoda iti Dios. (Apocalipsis 12:4a) Natural laeng a karimon dagiti nasungdo nga anghel, kerubin, ken serafin daydiay nagbalin a Diablo ken Satanas. Kaskasdi, inur-urayda a tamingen ni Jehova dagiti bambanag iti bukodna a tiempo ken pamay-an.—Idiligyo ti Judas 9.
Ibubusor iti Bin-i ti Babai a Kukua ti Dios
8. Asino ti pinadpadaanan ni Satanas?
8 Kabayatanna, pinadpadaanan ni Satanas ti naikari a Bin-i ti babai, daydiay kinuna ni Jehova a mangsugat iti ulo ti Serpiente. Idi impakaammo ti anghel manipud langit a ni Jesus, a naipasngay idiay Betlehem, ti “Manangisalakan, nga isu ti Kristo nga Apo,” natibker daytoy a pammaneknek nga isu ti naipadto a Bin-i ti babai.—Lucas 2:10, 11.
9. Kalpasan ti pannakaipasngay ni Jesus, kasano nga imparangarang ni Satanas ti makapapatay a gura?
9 Iti saan a nabayag naiparangarang ti makadangran a gura ni Satanas idi tinignayna dagiti pagano nga astrologo a mangirusat iti maysa a mision a nangiturong kadakuada nga umuna ken Ari Herodes idiay Jerusalem ket kalpasanna iti balay idiay Betlehem a nakasarakanda ken ni ubing a Jesus ken ni Maria nga inana. Di nagbayag kalpasanna imbilin ni Ari Herodes ti pannakapapatay dagiti amin nga ubbing a lallaki nga agtawen iti dua ken nababbaba, idiay Betlehem ken iti aglawlawna. Iti kasta, impakita ni Herodes ti makapapatay a gura iti Bin-i. Pagaammo unay ni Herodes a padpadasenna a kettelen ti biag daydiay agbalinto a Mesias. (Mateo 2:1-6, 16) Paneknekan ti historia a ni Ari Herodes ket nadangkok, nasikap, ken mammapatay—pudno a maysa kadagiti bin-i ti Serpiente.
10. (a) Kalpasan ti pannakabautisar ni Jesus, kasano a personal a pinadas ni Satanas a keltayen ti panggep ni Jehova iti naikari a Bin-i? (b) Kasano nga inusar ni Satanas dagiti narelihiosuan a papangulo a Judio iti panangibanag kadagiti panggepna?
10 Kalpasan a napulotan ni Jesus iti nasantuan nga espiritu idi 29 K.P. ken kalpasan a nagsao ni Jehova manipud langit a binigbigna ni Jesus kas Anakna, maulit-ulit a pinadas ni Satanas a sulisogen ni Jesus, iti kasta makeltay ti panggep ni Jehova iti Anakna. (Mateo 4:1-10) Gapu ta napaay, nangaramat kadagiti tattao a mangibanag kadagiti panggepna. Karaman kadagidiay inusarna a mangpadas a mangpadakes ken Jesus isu dagiti managinsisingpet a papangulo ti relihion. Nagulbod ken namardayada, kas iti inaramid ni Satanas a mismo. Idi kinuna ni Jesus iti maysa a paralitiko, “Bumilegka, . . . dagiti basolmo mapakawanda,” kinuna dagiti eskriba nga agtabtabbaaw ni Jesus, a dida man la inuray nga umuna no pudno nga immimbag met laeng ti lalaki. (Mateo 9:2-7) Idi pinaimbag ni Jesus dagiti tattao iti Sabbath, isut’ binabalaw dagiti Fariseo kas managsalungasing iti linteg ti Sabbath ket insikatda a patayen. (Mateo 12:9-14; Juan 5:1-18) Idi pinaruar ni Jesus dagiti sairo, kinuna dagiti Fariseo nga isu ket kadua ni “Beelzebub, ti agturay kadagiti sairo.” (Mateo 12:22-24) Kalpasan ti pannakapagungar ni Lazaro, adu kadagiti tattao ti namati ken Jesus, ngem insikat manen dagiti panguluen a papadi ken Fariseo a papatayen.—Juan 11:47-53.
11. Tallo nga aldaw sakbay ti ipapatay ni Jesus, asino ti impanayagna kas paset ti bin-i ti Serpiente, ken apay?
11 Idi Nisan 11, 33 K.P., nupay ammona ti pangpanggependa, situtured a napan ni Jesus iti mismo a templo idiay Jerusalem ket inukomna ida sadiay iti imatang dagiti tao. Kas grupo, kanayon nga imparangarang dagiti eskriba ken Fariseo no aniada a kita ti tattao; isu a kinuna ni Jesus: “Asikayo pay, eskriba ken Fariseo, a managinsisingpet! agsipud ta rikpanyo ti pagarian ti langlangit iti sanguanan dagiti tattao; ta dakayo met laeng dikay sumrek, dikay met palubosan a sumrek dagidiay mapan a sumrek.” Sipapanayag nga imbaga ni Jesus a paset ida ti bin-i ti Serpiente, a kunkunana: “Serpiente, putot dagiti karasaen, kasanokayo a makalisi iti pannakaukom idiay Gehenna?” (Mateo 23:13, 33) Iyanninaw ti sasaona ti padto iti Genesis 3:15.
12, 13. (a) Kasano a nangipaay dagiti pangulo a papadi ken eskriba iti kanayonan a pammaneknek no asino ti naespirituan nga amada? (b) Asino ti nakikappon kadakuada? (c) Iti kaitungpalan ti Genesis 3:15, kasano a nasugat iti mukod ti Bin-i ti babai?
12 Idi mangngegda ti sasao ni Jesus, natukay kadi dagiti pusoda, iti kasta dimmawatda iti asi ti Dios? Nagbabawyanda kadi ti kinadakesda? Saan! Ipadamag ti Marcos 14:1 nga iti sumuno nga aldaw, iti panagtataripnongda iti paraangan ti nangato a padi, “dagiti panguluen a papadi ken dagiti eskriba sinapsapulda no kasano ti panangkemmegda [ken Jesus] babaen iti nasikap a pamuspusan ken papatayenda.” Intultuloyda nga imparangarang ti makapapatay nga espiritu ni Satanas, nga inawagan idi damo ni Jesus kas mammapatay. (Juan 8:44) Iti saan a nabayag kimmappon kadakuada ni Judas Iscariote, a sinugsogan ni Satanas a tumallikud. Pinaglikudan ni Judas ti awanan-basol a Bin-i ti babai a kukua ti Dios sa kimmappon iti bin-i ti Serpiente.
13 Iti agsapa ti Nisan 14, insaklang dagiti kameng ti relihioso a pangukoman dagiti Judio ni Jesus kas maysa a balud iti gobernador a Romano. Ditoy, dagiti panguluen a papadi ti nangidaulo a nangipukkaw iti pannakailansana. Idi sinaludsod ni Pilato, “Ilansakto aya ti ariyo?” simmungbat dagiti panguluen a papadi, “Awan ti arimi no di ni Cesar.” (Juan 19:6, 15) Wen, iti amin a pamay-an pinaneknekanda a paset ida ti bin-i ti Serpiente. Ngem nalawag a saan laeng nga isuda. Ipadamag ti naipaltiing a rekord iti Mateo 27:24, 25: “Ni Pilato nangala iti danum ket binugguanna dagiti imana iti sanguanan ti bunggoy.” Kalpasanna amin dagiti tattao kinunada: “Ti darana umay kadakami ken kadagiti annakmi.” No kasta, pinaneknekan ti adu a Judio dayta a kaputotan a paset ida ti bin-i ti Serpiente. Sakbay a nagngudo dayta nga aldaw, natay ni Jesus. Babaen ti panangusarna iti makitkita a bin-ina, sinugat ni Satanas ti mukod ti Bin-i ti babai a kukua ti Dios.
14. Apay a ti pannakasugat iti mukod ti Bin-i ti babai dina kaipapanan a nagballigi ni Satanas?
14 Nangabak kadi ni Satanas? Saan a pulos! Pinarmek ni Jesu-Kristo ti lubong ken nagballigi a maibusor iti agturay iti dayta. (Juan 14:30, 31; 16:33) Nasalimetmetanna ti kinasungdona ken Jehova agingga ken patay. Ti ipapatayna kas perpekto a tao nagserbi a pagbayad iti subbot a kasapulan tapno maisubli ti kalintegan iti biag a napukaw ni Adan. Isu a linuktanna ti dalan nga agturong iti biag nga agnanayon para kadagidiay mangalagad iti pammati iti dayta a probision ken agtulnog kadagiti bilin ti Dios. (Mateo 20:28; Juan 3:16) Pinagungar ni Jehova ni Jesus iti imortal a biag idiay langit. Iti naikeddeng a tiempo ni Jehova, pukawento ni Jesus ni Satanas. Iti Genesis 22:16-18, naipadto a ni Jehova paraburannanto dagiti amin a pamilia iti daga a mangaramid iti kasapulan a panagtignay tapno mabendisionanda babaen iti dayta nasungdo a Bin-i.
15. (a) Kalpasan ti ipapatay ni Jesus, kasano nga intultuloy dagiti apostol nga imbutaktak ti bin-i ti Serpiente? (b) Ania a kanayonan pay nga ibubusor ti imparangarang ti bin-i ti Serpiente agingga iti kaaldawantayo?
15 Kalpasan ti ipapatay ni Jesus, intultuloy dagidiay a napulotan-espiritu a Kristiano nga imbutaktak ti bin-i ti Serpiente, kas iti inaramid ti Apoda. Tinignay ti nasantuan nga espiritu, namakdaar ni apostol Pablo maibusor iti “tao ti kinakillo” a ti kaaddana “maitunos iti panagtignay ni Satanas.” (2 Tesalonica 2:3-10) Dagiti klero ti Kakristianuan ti mangbukel iti daytoy kolektibo a “tao.” Kas banagna, sirurungsot nga indadanes ti bin-i ti Serpiente dagiti pasurot ni Jesu-Kristo. Iti padto a nailanad iti Apocalipsis 12:17, impadto ni apostol Juan nga itultuloy ni Satanas a gubaten dagiti natda iti bin-i ti babai a kukua ti Dios agingga iti kaaldawantayo. Kasta nga agpayso ti napasamak. Iti adu a dagdaga, napawilan, naderraawan, naibalud, wenno naipisok kadagiti kampo konsentrasion dagiti Saksi ni Jehova gapu iti natibker a panangitandudoda iti Pagarian ti Dios ken kadagiti nalinteg a dalanna.
Ti Agdama-Aldaw a Panangibutaktak iti Bin-i ti Serpiente
16. Iti moderno a panawen, asino ti naibutaktak kas paset ti bin-i ti Serpiente, ken kasano?
16 Kas panangtulad ken Jesu-Kristo, situtured nga intultuloy dagiti pudno a Kristiano nga ibutaktak ti Serpiente ken ti bin-ina. Idi 1917, impablaak dagiti Estudiante ti Biblia, kas pannakaawag dagiti Saksi ni Jehova idi, ti libro a The Finished Mystery, a nangibutaktakanda iti kinamanaginsisingpet dagiti klero ti Kakristianuan. Idi 1924, napasarunuan daytoy iti naimaldit a resolusion a napauluan Ecclesiastics Indicted. Limapulo milion a kopia ti naiwaras iti intero a lubong. Idi 1937, ni J. F. Rutherford, a presidente idi ti Watch Tower Society, nangipaay kadagiti nabileg a panangibutaktak maipapan iti bin-i ni Satanas kadagiti palawag a napauluan “Naibutaktak” ken “Relihion ken Kinakristiano.” Iti simmaganad a tawen, kabayatan nga adda dimngeg iti 50 a pagkokombensionan iti nadumaduma a daga, impaayna ti palawag a “Sanguen Dagiti Kinapudno” babaen ti radiotelephone idiay London, England. Makabulan kalpasanna, naipatangatang iti nasaknap a network ti radio idiay Estados Unidos ti palawag a “Facismo Wenno Wayawaya.” Nasuportaran dagitoy babaen ti nabileg a panangibutaktak kadagiti libro a kas ti Enemies ken Religion kasta met iti bokleta a Nalucasan. Maitunos iti adda a naipablaaken sipud pay idi dekada 1920, impakita ti libro nga Apocalipsis—Ti Grande a Tampokna Asidegen!,a a naimaldit itan iti 65 a pagsasao, a karaman kadagiti kangrunaan a kameng ti makitkita a bin-i ti Serpiente dagiti rinuker a napolitikaan nga agtuturay ken dagiti naagum, awanan prinsipio a suitik a komersiante. No ruamen dagiti napolitikaan a papangulo ti agulbod tapno maallilaw dagiti iturayanda, a dida ikabkabilangan ti kinasagrado ti dara, ken irurumenda dagiti adipen ni Jehova (iti kasta ipakpakitada ti gurada iti bin-i ti babai a kukua ti Dios), awan duadua a pampaneknekanda a paset ida ti bin-i ti Serpiente. Pudno met dayta kadagiti suitik a komersiante a pulos a di makonsiensia nga agulbod tapno makaganansia ken mangaramid wenno mangilako kadagiti produkto a pagaammo a mangpataud iti sakit.
17. Ania a gundaway ti silulukat pay kadagiti prominente nga indibidual a mabalin a rummuar iti sistema ti lubong?
17 Saan nga amin nga indibidual a natulawan iti nailubongan a relihion, politika, wenno komersio ket maibilang iti kamaudiananna kas paset ti bin-i ti Serpiente. Dayawen ti dadduma kadagitoy a lallaki ken babbai dagiti Saksi ni Jehova. Usarenda ti impluensiada a tumulong kadakuada ken kamaudiananna awatenda ti pudno a panagdayaw. (Idiligyo ti Aramid 13:7, 12; 17:32-34) Kadagiti amin a kakasta, naipaay daytoy nga awis: “Ket ita, O dakayo nga ar-ari, agmasiribkayo; paaturkayo, O dakayo nga uk-ukom ditoy daga. Agserbikayo a sibubuteng ken Jehova ken agrag-okayo a sikikintayeg. Agepenyo ti anak, tapno di agpungtot ket mapukawkayo iti dalan, ta nalaka a sumged ti pungtotna. Naragsak dagiti amin nga agkamang kenkuana.” (Salmo 2:10-12) Wen, masapul nga agtignay itan dagiti amin nga agtarigagay iti anamong ni Jehova, sakbay a kellaat nga iserra ti nailangitan nga Ukom ti ruangan ti gundaway!
18. Nupay saan a paset ti bin-i ti babai, asino ti kaskasdi nga agdaydayaw ken Jehova?
18 Dagidiay laeng mangbukel iti nailangitan a Pagarian ti paset ti bin-i ti babai. Bassit ti bilang dagitoy. (Apocalipsis 7:4, 9) Nupay kasta, adda maysa a dakkel a bunggoy dagiti sabsabali, wen, riniwriw kadakuada, ti mangnamnama iti biag nga agnanayon iti paraiso a daga kas managdaydayaw ni Jehova. Agpadpada iti sao ken aramid, kunada kadagiti pinulotan ni Jehova: “Kumuyogkami kadakayo, ta nadamagmi a ti Dios adda kadakayo.”—Zacarias 8:23.
19. (a) Ania a panagpili ti masapul nga aramiden ti amin a tattao? (b) Iti asino ti partikular a pagpaayan ti napasnek a pakaammo nga agtignay buyogen ti kinasirib bayat nga adda pay gundaway?
19 Itan ti tiempo a masapul nga agpili ti amin a sangatauan. Kayatda kadi ti agdayaw ken Jehova ken itandudo ti kinasoberanona, wenno palubosanda kadi ni Satanas a mangituray kadakuada babaen ti panagaramid kadagiti bambanag a makaay-ayo kenkuana? Agarup lima a milion a tattao iti isuamin a nasion ti dimmasigen ken Jehova a kadua dagiti natda iti bin-i ti babai, ti agtawid iti Pagarian. Walo a milion a sabsabali pay ti nangipakita iti interes a makipagadal iti Biblia kadakuada wenno tumabuno kadagiti gimongda. Kadakuada amin, kuna dagiti Saksi ni Jehova: Silulukat pay laeng ti ruangan ti gundaway. Dikay bumdeng a dumasig ken Jehova. Bigbigenyo ni Kristo Jesus kas ti naikari a Bin-i. Sirarag-o a makitimpuyogkayo iti makitkita nga organisasion ni Jehova. Sapay koma ta mairamankayto kadagiti amin a bendision nga ipaaynanto babaen ti panagturay ti Ari, ni Kristo Jesus.
[Footnote]
a Impablaak ti Watchtower Bible and Tract Society of New York, Inc.
Malagipyo Pay Aya?
◻ Asino ti Serpiente a nadakamat iti Genesis 3:15? Ken asino ti babai?
◻ Ania dagiti kababalin a pakailasinan ti bin-i ti Serpiente?
◻ Kasano nga imbutaktak ni Jesus ti bin-i ti Serpiente?
◻ Asino ti naibutaktak kas paset ti bin-i ti Serpiente iti moderno a panawen?
◻ Ania a naganat a panagtignay ti kasapulan tapno maliklikan ti maibilang a paset ti bin-i ti Serpiente?
[Ladawan iti panid 10]
Imbutaktak ni Jesus dagiti managinsisingpet a narelihiosuan a papangulo kas paset ti bin-i ti Serpiente