Report Dagiti Manangiwaragawag ti Pagarian

“Amin Dagiti Bilbilinmo Kinapudno”

SAKBAY la unay ti ipapatayna, binagbagaan ni Moises dagiti umili ti Israel a tungpalenda amin a bilin ni Jehova. Kinunana: “Ikabilyo ita pusoyo dagiti amin a sasao nga ipaneknekko kadakayo itoy nga aldaw, isu nga ibilinyonto kadagiti annakyo a tungpalenda nga aramiden ti dagup met laeng dagiti sasawen daytoy a linteg. Ta saan a barengbareng kadakayo, gapu ta isu ti pakabiaganyo.”​—Deuteronomio 32:46, 47.

Ginasgasut a tawen kalpasanna, intampok ti salmista ti kinapateg ti amin a sursuro ti Dios idi kinunana: “Sika asidegka, O Jehova, ket amin dagiti bilbilinmo kinapudno.” (Salmo 119:151) Idi immuna a siglo, dinakamat ni Jesus a mismo ti kinapateg ti “tunggal sao a rumrummuar iti ngiwat ni Jehova.” (Mateo 4:4) Ket iti sidong ti panangiwanwan ti Dios insurat ni apostol Pablo nga “amin a Kasuratan impaltiing ti Dios ken makagunggona.”​—2 Timoteo 3:16.

Nalawag, namnamaen ni Jehova a Dios a sipapasnek nga usigen dagiti agdaydayaw kenkuana ti intero a mensahe nga idandanon kadatayo dagiti panid ti Saona. Awan uray maysa a bersikulo iti Biblia a di napateg. Kasta ti marikna dagiti Saksi ni Jehova maipanggep iti Sao ti Dios, kas inladawan ti sumaganad a kapadasan manipud idiay Mauritius.

Ni Mr.D​—​— ket agnanaed iti nasulinek a purok, a sadiay isut’ guardia iti rabii. Nabayagen a sipapasnek nga agbirbirok iti umiso a pamay-an ti panagdayaw iti Dios. Iti rabii kabayatan ti panagbantayna, rinugianna a basaen ti Biblia. Idi agangay nabasanan amin daytoy. Naammuanna a Jehova ti nagan ti Dios​—maysa a nagan nga agparang iti adu a daras iti Bibliana a Hindi. Nasarakanna a nangnangruna a nakaskasdaaw ti libro nga Apocalipsis.

Kalpasanna pinampanunotna no adda ngata relihion a sumursurot iti intero a Biblia. Nadlawna a dagiti kasayaatanen a relihion nga ammona ket sumursurot laeng iti sumagmamano a paset ti Biblia. Inawat ti dadduma a relihion ti Hebreo a Kasuratan ket linaksidda ti Kristiano a Griego a Kasuratan. Tagtagibassiten ti dadduma a relihion ti Hebreo a Kasuratan, a ti laeng Kristiano a Griego a Kasuratan ti ibilangda nga addaan praktikal a pateg.

Maysa nga aldaw nakita ni Mr.D​—​— ti agassawa a matudtuduan ket inawisna ida nga aglinong iti pagtaenganna. Saksi ni Jehova dagitoy. Iggem ti asawa a babai ti libro nga Apocalipsis​—Ti Grande a Tampokna Asidegen!a Dagus a kiniddaw ni Mr.D​—​— ti libro kadakuada. Ammo dagiti Saksi a narigat unay para kenkuana ti material iti padto ti Apocalipsis, isu nga intukonda kenkuana ti sabali a publikasion. Ngem impapilit ni Mr.D​—​— a kayatna ti libro nga Apocalipsis.

Idi naalana ti kopiana, dagus a binasána ti libro. Kalpasanna nakipagadal iti Biblia kadagiti Saksi ni Jehova. Di nagbayag naawis iti nangato a panagraem dagiti Saksi iti intero a Biblia. Nangrugi a tumabuno a regular kadagiti gimong iti Kingdom Hall dagiti Saksi ni Jehova, a sadiay agpada a siaannad a maad-adal ti Hebreo a Kasuratan ken ti Kristiano a Griego a Kasuratan. Maysa itan a manangiwaragawag ti Pagarian ken nabautisaran a kameng ti kongregasion Kristiano.

[Footnote]