Dagiti Saludsod Manipud Kadagiti Managbasa

Ipakita dagiti report iti sumagmamano a tawen nga immadu bassit dagiti makiramraman kadagiti emblema ti memorial. Iparipirip kadi daytoy nga adu ti kabbaro a mapulpulotán iti nasantuan nga espiritu?

Adda nasayaat a rason tapno patientayo a ti bilang a 144,000 a napulotan a Kristiano ket nakompleto adu a dekada ti napalabasen.

Iti Aramid 2:1-4, mabasatayo ti maipapan kadagiti immuna iti dayta a limitado a grupo: “Itan bayat a madama ti aldaw ti piesta ti Pentecostes addada amin idi a sangsangkamaysa iti maymaysa a lugar, ket pagammuan adda napasamak manipud langit a maysa nga ungor a kaasping ti maysa a dumardaruros a napigsa a puyupoy, ket pinunnona ti intero a balay a yanda a pagtugtugawan. Ket dagiti dildila a kasla iti apuy nagparangda kadakuada ket naibunongda, ket maysa ti nagdisso iti tunggal maysa kadakuada, ket napnoda amin iti nasantuan nga espiritu ket rinugianda ti agsao iti nagduduma a pagsasao, kas iti impalubos kadakuada ti espiritu a sawenda.”

Kalpasan daydi, nangpili ni Jehova kadagiti sabsabali pay, ket pinulotanna ida iti nasantuan nga espirituna. Rinibu ti nainayon kadagiti nasapa a tawtawen ti Kinakristiano. Iti pannakarambak ti Memorial iti kaaldawantayo, masansan a dakamaten ti agpalawag dagiti sasao ni apostol Pablo iti Roma 8:15-17, a mangdakamat a dagiti napulotan ‘awatenda ti espiritu ti pannakaibilang nga annak.’ Kinuna pay ni Pablo a ti nasantuan nga espiritu nga awatenda ‘saksianna buyogen ti espirituda, nga isuda ket annak ti Dios, a makipagtawid ken Kristo.’ Dagidiay pudno a pinulotan ti espiritu ammoda dayta nga awan panagduadua. Daytat’ saan a basta tarigagay wenno mangyanninaw iti emosional ken di napudno a panangmatmat iti bagbagida.

Matarusantayo a daytoy nailangitan a pannakaayab nagtultuloy iti panaglabas dagiti siglo, nupay kabayatan ti makunkuna nga Edad Media, nalabit addada idi tiempo a nakabasbassit ti bilang dagiti napulotan.a Iti pannakaipasdek manen ti pudno a Kinakristiano idi arinunos ti napalabas a siglo, ad-adu pay ti naayaban ken napili. Ngem agparang nga idi katengngaan ti dekada ti 1930, nakompleton ti naan-anay a bilang ti 144,000. Gapuna nangrugi idin nga agparang ti maysa a grupo dagiti nasungdo a Kristiano nga addaan naindagaan a namnama. Inawagan ida ni Jesus kas “sabsabali a karnero,” a makikaykaysa iti panagdayaw a kadua dagiti napulotan kas maysa a naanamongan nga arban.​—Juan 10:14-16.

Dagiti kinapudno kadagiti napalabas a dekada iyanninawda agpadpada ti pannakakompleto ti pannakaawag dagiti napulotan ken ti pammendision ni Jehova iti umad-adu a “dakkel a bunggoy,” a mangnamnama a lumasat “iti dakkel a rigat.” (Apocalipsis 7:9, 14) Kas pagarigan, iti pannakarambak ti Memorial idi 1935, a tinabunuan ti 63,146, dagidiay nakiraman kadagiti emblema kas pammaneknek iti panangbigbigda a karamanda kadagiti napulotan nga agdagup iti 52,465. Tallopulo a tawen kalpasanna, wenno idi 1965, adda timmabuno a 1,933,089, idinto ta bimmassit ti nakiraman a nagbalin a 11,550. Kalpasan ti 30 a tawen, idi 1995 ngimmato ti timmabuno iti 13,147,201, ngem 8,645 laeng ti nakiraman iti tinapay ken arak. (1 Corinto 11:23-26) Nabatad, bayat ti panaglabas dagiti dekada, bimmassit unay ti bilang dagidiay mangbigbigbig a paset ida ti natda​—agarup 52,400 idi 1935; 11,500 idi 1965; 8,600 idi 1995. Nupay kasta, nabendisionan dagidiay addaan iti naindagaan a namnama, ket immaduda unay.

Ti kaudian unay a naipablaak a report ket para iti tawen 1995, ket ipakitana a ti nakiraman ad-adu iti 28 ngem iti sinarunona a tawen nupay pudno a bimmaba ti ratio dagiti nakiraman no idilig kadagidiay timmabuno. No tingitingen, ti pannakainayon ti sumagmamano pay a napili a makiraman kadagiti emblema saan nga isut’ pakariribukantayo. Kadagiti napalabas a tawen addada sumagmamano, uray kababautisarda pay, a pagammuan ta nangrugida a nakiraman. Iti adu a kaso, kalpasan ti sumagmamano a kanito nabigbigda a maysa daytoy a biddut. Nabigbig ti dadduma a nakiramanda kas emosional a tignay iti nalabit pannakabannog ti bagi wenno isip. Ngem kamaudiananna nabigbigda a saanda a talaga a naayaban iti nailangitan a biag. Nagkiddawda iti naasi a pannakaawat ti Dios. Ket agtultuloyda nga agserbi kenkuana kas naimbag, nasungdo a Kristiano, nga addaan iti namnama a biag nga agnanayon ditoy daga.

Saan a masapul a pakaseknan ti asinoman kadatayo no mangrugi a makiraman ti maysa a tao kadagiti emblema wenno isardengna ti panangaramidna iti kasta. Talaga a saan a datayo ti mangikeddeng no ti maysa ket pudno a napulotan iti nasantuan nga espiritu ken naawis iti nailangitan a biag wenno saan. Laglagipenyo ti nabileg a pammasiguro ni Jesus: “Siak ti nasayaat a pastor, ket am-ammok dagiti karnerok.” Kas naipanamnama, am-ammo ni Jehova dagidiay pinilina kas naespirituan nga annak. Nainkalintegan a patien nga agtultuloy a bumassit ti bilang dagiti napulotan bayat nga agpatingga ti naindagaan a biagda gapu iti kinalakay/kinabaket ken kadagiti di mapakpakadaan a pasamak. Nupay kasta, kas met iti panagmatalek dagitoy pudno a napulotan agingga ken patay, a manginanama iti balangat ti biag, dagiti sabsabali a karnero, a nangbuggo kadagiti pagan-anayda iti dara ti Kordero, makainanamada a lumasat iti umad-adanin a dakkel a rigat.​—2 Timoteo 4:6-8; Apocalipsis 2:10.

[Footnote]