Ania ti Kaipapananna Kadakayo ti Pangrabii ti Apo?
“Siasinoman a mangan iti tinapay wenno uminum iti kopa ti Apo a di maikari makabasolto maipapan iti bagi ken dara ti Apo.”—1 CORINTO 11:27.
1. Ania ti kapatgan nga okasion a naiplano iti tawen 2003, ken ania ti namunganayanna?
TI KAPATGAN nga okasion a naiplano para iti tawen 2003 ket maangay kalpasan ti ilelennek ti init inton Abril 16. Agtataripnong dagiti Saksi ni Jehova tapno rambakanda ti Pananglaglagip iti ipapatay ni Jesu-Kristo. Kas naipakita iti immuna nga artikulo, inyussuat ni Jesus daytoy nga okasion, a naawagan met kas Pangrabii ti Apo, kalpasan a rinambakanda ti Paskua idi Nisan 14, 33 K.P. Dagiti emblema ti Memorial—ti awan lebadurana a tinapay ken nalabaga nga arak—isimboloda ti awan basolna a bagi ni Kristo ken ti naiparukpok a darana, ti kakaisuna a daton a mangsubbot iti sangatauan manipud iti natawid a basol ken ipapatay.—Roma 5:12; 6:23.
2. Ania a pakdaar ti nairekord iti 1 Corinto 11:27?
2 Nasken nga umiso ti aramiden dagidiay makipaset kadagiti emblema ti Memorial. Imbatad dayta ni apostol Pablo idi nagsurat kadagiti Kristiano iti nagkauna a Corinto. Saan idi nga umiso ti panangrambakda iti Pangrabii ti Apo. (1 Corinto 11:20-22) Insurat ni Pablo: “Siasinoman a mangan iti tinapay wenno uminum iti kopa ti Apo a di maikari makabasolto maipapan iti bagi ken dara ti Apo.” (1 Corinto 11:27) Ania ti kaipapanan dagita a sasao?
Saan nga Umiso ti Panangrambak ti Dadduma
3. Ania ti inaramid ti adu a Kristiano sadi Corinto bayat ti pannakarambak ti Pangrabii ti Apo?
3 Adu a Kristiano sadi Corinto ti di umiso a nakipaset iti Memorial. Agsusupiatda, ken adda panawen a nagbalonda iti pangrabiida ket kinnanda sakbay wenno kabayatan ti gimong, a masansan a nalabes a pannangan ken panaginum. Saan nga umiso ti kasasaad ti isip wenno ti espiritualidadda. Daytoy ti makagapu a ‘nakabasolda maipapan iti bagi ken dara ti Apo.’ Mabisin ken nalaka a masinga dagidiay saan a nangrabii. Wen, adu ti awanan panagraem a nakipaset ken di naan-anay a nakabigbig iti kinaserioso ti okasion. Awan duadua nga inyegda ti bukodda a pannakaukom!—1 Corinto 11:27-34.
4, 5. Apay a napateg a dagidiay makipaspaset kadagiti emblema ti Memorial sukimatenda ti bagida?
4 Bayat nga umad-adani ti Memorial kada tawen, dagidiay datin a makipaspaset kadagiti emblema napateg a sukimatenda ti bagida. Tapno siuumiso a makiraman iti daytoy sangsangkamaysa a pannangan, masapul a nasalun-atda iti naespirituan. Agpegpeggad a ‘magessat iti ili ti Dios’ ti asinoman a mangipakita iti di panagraem, wenno panangumsi, iti daton ni Jesus, kas iti mapasamak idi iti maysa nga Israelita nga adda iti narugit a kasasaad sa makiraman iti sangsangkamaysa a pannangan.—Levitico 7:20; Hebreo 10:28-31.
5 Inyarig ni Pablo ti Memorial iti sangsangkamaysa a pannangan iti nagkauna nga Israel. Dinakamatna dagiti makiraman a kakadua ni Kristo ket kinunana: “Dikay mabalin ti uminum iti kopa ni Jehova ken iti kopa dagiti sairo; dikay mabalin ti makiraman iti ‘lamisaan ni Jehova’ ken iti lamisaan dagiti sairo.” (1 Corinto 10:16-21) No ti maysa a makipaspaset kadagiti emblema ti Memorial ket makabasol iti nadagsen, masapul nga ipudnona daytoy ken ni Jehova ken birokenna ti naespirituan a tulong dagiti panglakayen iti kongregasion. (Proverbio 28:13; Santiago 5:13-16) No napudno nga agbabawi ken mangpataud kadagiti bunga a maitutop iti panagbabawi, makuna a maikari a makipaset.—Lucas 3:8.
Tumabuno kas Nadayaw nga Agpaliiw
6. Kadagiti siasino nga inted ti Dios ti pribilehio a makipaset iti Pangrabii ti Apo?
6 Makipaset kadi iti Pangrabii ti Apo dagidiay mangipakpakita ita iti kinaimbag kadagiti natda ti 144,000 a kakabsat ni Kristo? (Mateo 25:31-40; Apocalipsis 14:1) Saan. Inted ti Dios dayta a pribilehio kadagiti indibidual a napulotan iti nasantuan nga espiritu kas “makipagtawid ken Kristo.” (Roma 8:14-18; 1 Juan 2:20) Ania ngarud ti takder dagidiay mangnamnama nga agbiag nga agnanayon iti sangalubongan a paraiso iti sidong ti turay ti Pagarian? (Lucas 23:43; Apocalipsis 21:3, 4) Gapu ta saanda a makipagtawid ken Jesus iti nailangitan a namnama, tumabunoda iti Memorial kas nadayaw nga agpaliiw.—Roma 6:3-5.
7. Apay nga ammo dagiti Kristiano idi umuna a siglo a maikarida a makipaset kadagiti emblema ti Memorial?
7 Napulotan iti nasantuan nga espiritu dagiti pudno a Kristiano idi umuna a siglo. Adu kadakuada ti nangusar iti maysa wenno ad-adu pay kadagiti milagro a sagut ti espiritu, kas iti panagsao iti nadumaduma a lenguahe. No kasta, dagita nga indibidual nalakada la idi a maammuan a napulotanda iti espiritu ken nasken a makipasetda kadagiti emblema ti Memorial. Ngem iti kaaldawantayo, dagiti kastoy a naipaltiing a sasao ti pakaibatayan ti pannakapilida: “Amin nga iturong ti espiritu ti Dios, dagitoy ket annak ti Dios. Ta saanyo nga inawat ti espiritu ti pannakaadipen a mamataud manen iti buteng, no di ket inawatyo ti espiritu ti pannakaampon kas annak, a babaen iti dayta nga espiritu ipukkawtayo: ‘Abba, Ama!’”—Roma 8:14, 15.
8. Siasino ti irepresentar ti “trigo” ken “dagiti dakes a ruot” a nadakamat iti Mateo kapitulo 13?
8 Iti sinigsiglo, dagiti pudno a napulotan ket dimmakkel kas “trigo” iti tengnga dagiti “dakes a ruot,” wenno ulbod a Kristiano. (Mateo 13:24-30, 36-43) Sipud idi dekada 1870, in-inut a nagminar ti “trigo.” Sumagmamano a tawen kalpasanna, naibilin kadagiti napulotan a Kristiano a manangaywan: “Dagiti panglakayen . . . nasken nga ituyangda dagitoy a pagannurotan kadagiti agtataripnong [iti Memorial],—(1) pammati iti dara [ni Kristo]; ken (2) panagbalin a dedikado iti Apo ken iti panagserbi kenkuana, uray agingga ken patay. Nasken ngarud nga awisenda amin a mamati ken agtarigagay a makiraman iti panangrambak iti ipapatay ti Apo.”—Studies in the Scriptures, Serye VI, The New Creation, panid 473.a
Panangbirok iti “Sabsabali a Karnero”
9. Idi 1935, kasano a nalawlawagan ti kinasiasino ti “dakkel a bunggoy,” ken ania ti nagbalin nga epektona kadagiti dadduma a makipaspaset kadagiti emblema ti Memorial?
9 Idi agangay, rinugian ti organisasion ni Jehova nga iturong ti atensionna iti sabsabali malaksid kadagiti napulotan a pasurot ni Kristo. Mainaig iti dayta, adda nakadkadlaw a pasamak idi ngalay ti dekada 1930. Sakbay dayta, ti ili ti Dios matmatanna idi ti “dakkel a bunggoy” a nadakamat iti Apocalipsis 7:9 kas maysa a sumegunda a naespirituan a klase a maikaduanto idiay langit kadagiti 144,000 a napagungar a napulotan—kas katulongan wenno kakadua ti nobia ni Kristo. (Salmo 45:14, 15; Apocalipsis 7:4; 21:2, 9) Ngem idi Mayo 31, 1935, iti maysa a palawag iti kombension dagiti Saksi ni Jehova idiay Washington, D.C., E.U.A., nailawlawag maibatay iti Kasuratan a ti “dakkel a bunggoy” (“umariwekwek,” King James Version) tukoyenna ti “sabsabali a karnero” nga agbibiag iti panawen ti panungpalan. (Juan 10:16) Kalpasan dayta a kombension, dadduma a makipaspaset kadagiti emblema ti Memorial insardengdan ti makipaset gapu ta nabigbigda a ti namnamada ket naindagaan, saan a nailangitan.
10. Deskribirenyo ti namnama ken annongen dagiti agdama a “sabsabali a karnero.”
10 Nangnangruna nanipud idi 1935, adda panangbirok kadagidiay agbalin a “sabsabali a karnero,” a mamati iti subbot. Indedikarda ti biagda iti Dios, ken sinuportaranda ti napulotan a “bassit nga ipastoran” iti panangikasaba iti Pagarian. (Lucas 12:32) Mangnamnama dagitoy sabsabali a karnero nga agbiagda nga agnanayon ditoy daga. Ngem iti dadduma nga aspeto, umarngida kadagiti agdama a natda dagiti agtawid iti Pagarian. Kas kadagiti nagkauna a ganggannaet nga umili iti Israel a nagdayaw ken ni Jehova ken nagpasakup iti Linteg, dagiti sabsabali a karnero ita awatenda dagiti Nakristianuan nga annongen, kas iti panangikasaba iti naimbag a damag a kadua dagiti kameng ti naespirituan nga Israel. (Galacia 6:16) Ngem no kasano nga awan ti ganggannaet nga umili a mabalin nga agari wenno agserbi a padi, awan kadagitoy a sabsabali a karnero ti agturay iti nailangitan a Pagarian wenno agserbi kas papadi.—Deuteronomio 17:15.
11. Apay a ti petsa ti bautismo ti maysa a tao ket adda pakainaiganna iti namnamana?
11 Kabayatan ngarud ti dekada 1930, in-inut a nagminar a napilin dagiti kameng ti nailangitan a klase. Adu itan a dekada a ti mabirbirok isu dagiti sabsabali a karnero, a naindagaan ti namnamada. No di agtultuloy a matalek ti maysa a napulotan, agparang a maawagan ti maysa a kameng ti sabsabali a karnero a nabayagen a matalek nga agserserbi iti Dios tapno sumukat ken agbalin a kameng ti 144,000.
No Apay nga Agbiddut ti Dadduma
12. Iti sidong dagiti ania a kasasaad a nasken nga isardeng ti maysa ti pannakipasetna kadagiti emblema ti Memorial, ken apay?
12 Naan-anay a sigurado dagiti napulotan a Kristiano nga inawatda ti nailangitan a pannakaayab. Ngem komusta dagidiay makipaspaset kadagiti emblema ti Memorial a di met karaman iti daytoy a pannakaayab? Ita ta ammodan a saan a nailangitan ti namnamada, sigurado a ti konsiensiada ti mangtignay kadakuada nga agsardeng a makipaset. Saan a maay-ayo ti Dios iti asinoman a mangibilang iti bagina kas napili nga agbalin nga ari ken padi idiay langit idinto ta ammona a dina inawat dayta a pannakaayab. (Roma 9:16; Apocalipsis 20:6) Pinapatay ni Jehova ti Levita a ni Kore gapu ta sidudursok a tinarigagayanna ti kinapadi ni Aaron. (Exodo 28:1; Numeros 16:4-11, 31-35) No mabigbig ti asinoman a Kristiano a biddut ti pannakipasetna kadagiti emblema ti Memorial, masapul nga isardengna ti makipaset ken sipapakumbaba nga ikararagna ti pammakawan ni Jehova.—Salmo 19:13.
13, 14. Apay a sibibiddut nga ipapan ti dadduma a naawatda ti nailangitan a pannakaayab?
13 Apay a sibibiddut nga ipapan ti dadduma a naawatda ti nailangitan a pannakaayab? Nalabit dida kayaten ti agbiag ditoy daga gapu iti ipupusay ti asawada wenno iti dadduma a trahedia. Wenno mabalin a tarigagayanda ti kas iti namnama dagiti nasinged a gagayyemda nga agkuna a napulotanda a Kristiano. Siempre, awan ti asinoman a dinutokan ti Dios a mangawis kadagiti dadduma iti daytoy a pribilehio. Ken dina patalgedan ti pannakapulot dagiti makipagtawid iti Pagarian babaen ti maysa a timek nga addaan iti mensahe.
14 Mabalin a panunoten ti dadduma nga addaanda iti nailangitan a pannakaayab gapu iti di umiso a narelihiosuan a kapanunotan a mapan idiay langit ti amin a naimbag a tattao. Gapuna, masapul nga agannadtayo a di paallilaw kadagiti saan nga umiso idi a panangmatmat wenno dadduma pay a banag. Kas pagarigan, mabalin nga iyimtuod ti dadduma iti bagida: ‘Agus-usarak kadi iti agas a mangapektar iti riknak? Emosionalak kadi unay, isu a sibibiddut nga ipapanko a napulotanak?’
15, 16. Apay a mabalin sibibiddut nga ipapan ti dadduma a napulotanda?
15 Mabalin nga iyimtuod ti dadduma iti bagida: ‘Kayatko kadi ti agbalin a nalatak? Tarigagayak kadi ti autoridad ita wenno kas masanguanan a makipagtawid ken Kristo?’ Idi naayaban dagiti makipagtawid iti Pagarian idi umuna a siglo, saan nga amin kadakuada ket addaan iti dakkel nga annongen iti kongregasion. Dida met sinapul ti dayaw wenno impannakkel ti panagbalinda a napulotan. Impakitada ti kinapakumbaba a manamnama kadagidiay addaan iti “panunot ni Kristo.”—1 Corinto 2:16.
16 Mabalin nga ipapan ti dadduma nga addaanda iti nailangitan a pannakaayab gapu ta adu ti pannakaammoda iti Biblia. Ngem ti mapulotan iti espiritu dina kaipapanan a naisangsangayan ti pannakaawatna, gapu ta adda dadduma idi a napulotan a masapul nga isuro ken balakadan ni Pablo. (1 Corinto 3:1-3; Hebreo 5:11-14) Adda urnos ti Dios a mangipaay iti naespirituan a taraon kadagiti amin nga adipenna. (Mateo 24:45-47) Gapuna, awan koma kadagiti napulotan a Kristiano ti mangipapan nga isu ket nalalaing ngem kadagidiay naindagaan ti namnamada. Ti pannakapulot iti espiritu ket saan a makita iti kinalaing a mangasaba, mangsungbat kadagiti Nainkasuratan a saludsod, wenno mangipaay kadagiti naibatay-Biblia a palawag. Kabaelan met nga aramiden dayta dagiti Kristiano nga addaan iti naindagaan a namnama.
17. Iti ania ken asino ti pagpannurayan ti panangpulot iti espiritu?
17 No adda kapammatian nga agsaludsod maipapan iti nailangitan a pannakaayab, maysa a panglakayen wenno sabali a nataengan a Kristiano ti mabalin a makisarita kenkuana maipapan iti dayta. Kaskasdi, saan a mabalin a sabali a tao ti agdesision para kenkuana. Ti tao nga addaan iti daytoy a pannakaayab dina kasapulan a damagen ti dadduma no kasta a talaga ti namnamana. Dagiti napulotan ket ‘naipaayan iti baro a pannakayanak, saan a babaen iti agrupsa, no di ket babaen iti di agrupsa a bin-i a pagpaadu, babaen iti sao ti sibibiag ken manayon a Dios.’ (1 Pedro 1:23) Babaen ti espiritu ken Saona, immula ti Dios ti “bin-i” a mamagbalin iti dayta a tao a “maysa a baro a parsua,” nga addaan iti nailangitan a namnama. (2 Corinto 5:17) Ken ni Jehova ti agpili. Ti panangpulot ket ‘agpannuray, saan nga iti daydiay agtartarigagay wenno uray iti daydiay agtartaray, no di ket iti Dios.’ (Roma 9:16) Kasano ngarud a masigurado ti maysa a tao nga inawatna ti nailangitan a pannakaayab?
No Apay a Siguradoda
18. Kasano a ti espiritu ti Dios mangsaksi iti espiritu dagiti napulotan?
18 Ti panangsaksi ti espiritu ti Dios patalgedanna kadagiti napulotan a Kristiano a nailangitan ti namnamada. “Inawatyo ti espiritu ti pannakaampon kas annak,” insurat ni Pablo, “a babaen iti dayta nga espiritu ipukkawtayo: ‘Abba, Ama!’ Ti mismo nga espiritu mangsaksi a buyogen ti espiritutayo a datayo ket annak ti Dios. Ngarud, no datayo ket annak, agtawidtayo met: pudno a dagiti agtawid ti Dios, ngem makipagtawid ken Kristo, no la ket agsagabatayo a sangsangkamaysa tapno maipadayagtayo met a sangsangkamaysa.” (Roma 8:15-17) Babaen ti impluensia ti nasantuan nga espiritu, ti espiritu wenno kababalin dagiti napulotan tignayenna ida a mangbigbig nga agaplikar kadakuada ti kunaen ti Kasuratan maipapan kadagiti naespirituan nga annak ni Jehova. (1 Juan 3:2) Iparikna kadakuada ti espiritu ni Jehova nga annak ida ti Dios ken itukitna iti pusoda ti naisangsangayan a namnama. (Galacia 4:6, 7) Wen, naragsak ti agbiag nga agnanayon kas perpekto a tao iti denna dagiti kapamilia ken gagayyem, ngem saan a dayta ti inted ti Dios a namnamada. Babaen ti espirituna, patanoren ti Dios kadakuada ti natibker a nailangitan a namnama nga uray la sidadaanda a mangisakripisio kadagiti amin nga ik-ikutan ken oportunidadda ditoy daga.—2 Corinto 5:1-5, 8; 2 Pedro 1:13, 14.
19. Ania ti paset ti baro a tulag iti biag dagiti napulotan a Kristiano?
19 Sigurado dagiti napulotan a Kristiano iti nailangitan a namnamada, a karamanda iti baro a tulag. Dinakamat dayta ni Jesus idi inyussuatna ti Memorial ken kinunana: “Daytoy a kopa kaipapananna ti baro a tulag babaen ti bileg ti darak, a maiparukpok maigapu kadakayo.” (Lucas 22:20) Ti Dios ken dagiti napulotan ti karaman iti baro a tulag. (Jeremias 31:31-34; Hebreo 12:22-24) Ni Jesus ti mangibabaet. Maipatpatungpalen ti baro a tulag babaen ti naiparukpok a dara ni Kristo. Nangpili iti tattao manipud kadagiti Judio ken kadagiti nasion maipaay iti nagan ni Jehova ken pinagbalinna ida a paset ti “bin-i” ni Abraham. (Galacia 3:26-29; Aramid 15:14) Gapu iti daytoy nga “agnanayon a tulag,” mapagungar ti amin a naespirituan nga Israel iti imortal a biag idiay langit.—Hebreo 13:20.
20. Nairaman dagiti napulotan iti ania a tulag ken Kristo?
20 Sigurado dagiti napulotan iti namnamada. Nairamanda iti kanayonan a tulag, ti tulag ti Pagarian. No maipapan iti pannakiramanda ken Kristo, kinuna ni Jesus: “Dakayo dagidiay nagtalinaed kaniak kadagiti pannakasusuotko; ket mangaramidak iti tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian.” (Lucas 22:28-30) Agnanayon a maipatungpal daytoy a tulag iti nagbaetan ni Kristo ken dagiti kakaduana nga agari.—Apocalipsis 22:5.
Ti Panawen ti Memorial —Makagunggona a Tiempo
21. Kasanotayo a magunggonaan a naimbag iti panawen ti Memorial?
21 Adu ti magunggona iti panawen ti Memorial. Magunggonaantayo iti panagbasa iti Biblia a nayeskediul iti dayta a lawas. Nagsayaat met dayta a gundaway nga agkararag, a mangmennamenna iti panagbiag ken ipapatay ni Jesus ditoy daga, ken makiraman iti panangikasaba iti Pagarian. (Salmo 77:12; Filipos 4:6, 7) Ti mismo nga okasion ipalagipna kadatayo ti ayat nga impakita ti Dios ken ni Kristo mainaig iti daton a pangsubbot ni Jesus. (Mateo 20:28; Juan 3:16) Mangyeg daytoy a probision iti namnama ken liwliwa ken papigsaenna ti determinasiontayo nga agbiag kas maysa a Kristiano. (Exodo 34:6; Hebreo 12:3) Pabilgennatayo met koma ti Memorial a mangitungpal iti dedikasiontayo kas ad-adipen ti Dios ken agbalin a nasungdo a pasurot ti dungdungnguenna nga Anak.
22. Ania ti kadakkelan a sagut ti Dios iti sangatauan, ket ania ti maysa a pamay-an a maipakita ti panagyaman iti dayta?
22 Anian a nagsayaat dagiti sagut kadatayo ni Jehova! (Santiago 1:17) Iwanwannatayo ti Saona, tulongannatayo ti espirituna, ken addaantayo iti namnama a biag nga agnanayon. Ti kadakkelan a sagut ti Dios isu ti daton ni Jesus para iti basol dagiti napulotan ken amin a mangipakita iti pammati. (1 Juan 2:1, 2) No kasta, kasano kapateg kadakayo ti ipapatay ni Jesus? Maysakayonto kadi kadagiti mangipakita iti panagyaman iti dayta babaen ti itatabunoyo kalpasan ti ilelennek ti init inton Abril 16, 2003, tapno rambakan ti Pangrabii ti Apo?
[Footnote]
a Impablaak dagiti Saksi ni Jehova ngem saanen a mayim-imprenta.
Ania ti Sungbatyo?
• Siasino dagiti rumbeng a makipaset kadagiti emblema ti Memorial?
• Apay a tabunuan dagiti “sabsabali a karnero” ti Pangrabii ti Apo kas nadayaw nga agpaliiw laeng?
• Kasano nga ammo dagiti napulotan a Kristiano a maikarida a makipaset iti tinapay ken arak bayat ti Pananglaglagip iti ipapatay ni Kristo?
• Ti panawen ti Memorial ket nagsayaat a tiempo para iti ania?
[Graph/Dagiti Ladawan iti panid 18]
(Para iti aktual a pannakaurnosna, kitaem ti publikasion)
Bilang Dagiti Timmabuno iti Memorial
ITI MILION
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Ladawan iti panid 18]
Tabunuanyonto kadi ti Pangrabii ti Apo iti daytoy a tawen?
[Dagiti Ladawan iti panid 21]
Ti panawen ti Memorial ket nagsayaat a gundaway para iti kanayonan a panagbasa iti Biblia ken pannakiraman iti panangikasaba iti Pagarian