Enoc​—Natured Aniaman ti Mapasamak

PARA iti nasayaat a tao, dayta idin ti kadaksan a tiempo. Napno ti daga iti kinadakes. Dumakdakes unay idi ti moral a kasasaad ti sangatauan. Kinapudnona, dandani idin maikuna a: “Nakita ni Jehova a ti kinadakes ti tao dakkel iti daga, ken amin nga arapaap dagiti panunot ti pusona dakes la a kankanayon.”​—Genesis 6:5.

Ni Enoc, ti maikapito a tao iti kapuonan ni Adan, naaddaan iti tured nga agbalin a naiduma. Nagtalinaed iti kinalinteg aniaman ti pagtungpalanna. Makasair unay ti mensahe ni Enoc kadagiti dakes a managbasol ta insikatda a papatayen, ket ni Jehova laeng ti makatulong kenkuana.​—Judas 14, 15.

Ni Enoc ken ti Sapasap nga Isyu

Sakbay pay ti pannakayanak ni Enoc, naibangonen ti isyu maipapan iti sapasap a kinasoberano. Adda kadi kalintegan ti Dios a mangituray? Agparang a ti sungbat ni Satanas a Diablo ket awan. Inkalinteganna a nasaysayaat no nawaya dagiti nasaririt a parsua manipud iti panangiwanwan ti Dios. Inkagumaan ni Satanas nga ipasdek ti ebidensiana maibusor ken Jehova a Dios babaen ti sisisikap a panangimaniobrana kadagiti tao tapno dumasigda kenkuana. Ni Adan, ti asawana a ni Eva, ken ti inauna nga anakda, a ni Cain, ket nalatak ti idadasigda ken Satanas babaen ti panangpilida iti kabukbukodan a turay imbes a ti turay ti Dios. Inaramid daytoy ti immuna nga agassawa babaen ti pannanganda iti bunga nga imparit ti Dios, ket kasta met ti inaramid ni Cain babaen ti sipapakinakem a panangpapatayna iti nalinteg a kabsatna, a ni Abel.​—Genesis 3:4-6; 4:8.

Situtured a nagtalinaed ni Abel iti dasig ni Jehova. Yantangay ti kinatarnaw ni Abel intandudona ti nadalus a panagdayaw, di pagduaduaan a naragsakan ni Satanas a makakita ken Cain a mangipeksa iti makapapatay a pungtotna kenkuana. Manipud iti daydi a tiempo nga agpatpatuloy, inusar ni Satanas ti “panagbuteng iti ipapatay” kas nakaam-ames nga igam. Kayatna nga imula ti buteng iti puso ti asinoman nga agannayas nga agdayaw iti pudno a Dios.​—Hebreo 2:14, 15; Juan 8:44; 1 Juan 3:12.

Iti daydi pannakaipasngay ni Enoc, kasla umiso unay ti panangmatmat ni Satanas a di itandudo dagiti tao ti kinasoberano ni Jehova. Natayen ni Abel, ket saanda a sinurot ti matalek nga ulidanna. Ngem pinaneknekan ni Enoc ti bagina kas naiduma. Adda natibker a nakaibatayan ti pammatina, ta pagaammona unay dagiti napasamak iti minuyongan ti Eden.a Tinagipategna la ketdi ti padto ni Jehova a mangipaspasimudaag a ti naikari a Bin-i pagpatinggaennanto ni Satanas ken dagiti gakatna!​—Genesis 3:15.

Gapu iti kanayon a panangpampanunotna iti daytoy a namnama, di napabutngan ni Enoc iti agdindinamag a pannakapapatay ni Abel gapu iti panangisungsong ti Diablo. Imbes ketdi, intultuloyna ti nakipagna ken Jehova, a sinurotna ti kinalinteg iti unos ti panagbiagna. Nagtalinaed ni Enoc a naisina iti lubong, a liniklikanna ti agwaywayas nga espirituna.​—Genesis 5:23, 24.

Maysa pay, situtured a nagsao ni Enoc ken imbatadna a mapaayto dagiti dakes nga aramid ti Diablo. Iti sidong ti panangipaltiing ti nasantuan nga espiritu ti Dios, wenno aktibo a puersa, nagipadto ni Enoc maipanggep kadagiti nadangkes: “Adtoy! Immay ni Jehova a kaduana dagiti nasantuan a linaklaksana, tapno ipakatna ti panangukom maibusor kadagiti isuamin, ken tapno ikeddengna a nakabasol dagiti amin a di nadiosan maipapan kadagiti isuamin a di nadiosan nga ar-aramidda nga inaramidda iti di nadiosan a pamay-an, ken maipapan kadagiti isuamin a makapakigtot a bambanag a sinao dagiti di nadiosan a managbasol maibusor kenkuana.”​—Judas 14, 15.

Gapu iti natured a proklamasion ni Enoc, isu ket inraman ni apostol Pablo, iti panagsuratna kadagiti Kristiano a Hebreo, iti dakkel nga “ulep dagiti saksi” a nangipasdek iti naisalsalumina nga ulidan ti pammati a nabuyogan iti aramid.b (Hebreo 11:5; 12:1) Kas maysa a tao a matalek, nagtalinaed a natarnaw ni Enoc iti nasurok a 300 a tawen. (Genesis 5:22) Nakasuron la ketdi dagiti kabusor ti Dios idiay langit ken ditoy daga gapu iti kinamatalek ni Enoc! Ti natadem a padto ni Enoc pinagpungtotna ni Satanas, ngem nangyeg daytoy iti pannalaknib ni Jehova.

Ti Dios Innalana ni Enoc​—Kasano?

Di pinalubosan ni Jehova ni Satanas wenno dagiti naindagaan nga adipenna a papatayenda ni Enoc. Imbes ketdi, kuna ti naipaltiing a rekord: “Innala ti Dios.” (Genesis 5:24) Kastoy ti panangiladawan ni apostol Pablo: “Babaen iti pammati naiyalis ni Enoc tapno dina makita ni patay, ket saan a nasarakan iti sadinoman agsipud ta isu inyalis ti Dios; ta sakbay ti pannakaiyalisna isu addaan iti pangsaksi a naay-ayona unay ti Dios.”​—Hebreo 11:5.

Kasano a “naiyalis ni Enoc tapno dina makita ni patay”? Wenno kas iti pannakaipaulogna iti patarus ni R. A. Knox, kasano a “naala [ni Enoc] a dina napasaran ti ipapatay”? Sitatalna a pinagpatingga ti Dios ti biag ni Enoc, nga inliklikna kadagiti ut-ot ni patay manipud iti sakit wenno kinaranggas iti ima dagiti kabusorna. Wen, pinaababa ni Jehova ti biag ni Enoc iti edad a 365​—a medio ub-ubing no idilig kadagiti kataebna.

Kasano a naipaayan ni Enoc iti “pangsaksi a naay-ayona unay ti Dios”? Ania a pammaneknek ti naadda kenkuana? Nalabit, pinagparmata ti Dios ni Enoc, a kas met ken apostol Pablo a “narabsut,” wenno naiyalis, a nabatad nga immawat iti sirmata maipapan iti masanguanan a naespirituan a paraiso ti kongregasion Kristiano. (2 Corinto 12:3, 4) Ti pangsaksi, wenno pammaneknek, a nagbalin ni Enoc a makaay-ayo iti Dios mabalin nga adda nakainaiganna iti maysa a sirmata maipapan iti naindagaan a Paraiso iti masanguanan a sadiay amin dagidiay agbibiag itandudodanto ti kinasoberano ti Dios. Nalabit kabayatan a tagtagiragsaken ni Enoc ti maysa a sirmata idi alaen ti Dios iti awan ut-otna nga ipapatay tapno maturog agingga iti aldaw a pannakapagungarna. Agparang a, kas iti kaso ni Moises, indulin ni Jehova ti bangkay ni Enoc, tangay “saan a nasarakan iti sadinoman.”​—Hebreo 11:5; Deuteronomio 34:5, 6; Judas 9.

Ti Natungpal a Padto

Ita, iwarwaragawag dagiti Saksi ni Jehova ti kababagas ti padto ni Enoc. Manipud iti Kasuratan, ipakpakitada no kasanonto a matungpal dayta inton dadaelen ti Dios dagiti nadangkes iti asidegen a masanguanan. (2 Tesalonica 1:6-10) Maum-umsida gapu iti mensaheda, tangay naiduma unay manipud kadagiti panangmatmat ken kalat daytoy a lubong. Saanda a masdaaw iti ibubusor a mapaspasaranda, tangay pinakdaaran ni Jesus dagiti pasurotna: “Puntiriakayto ti pananggura dagiti amin a tattao maigapu iti naganko.”​—Mateo 10:22; Juan 17:14.

Nupay kasta, kas ken Enoc, naipanamnama kadagiti agdama-aldaw a Kristiano ti pannakaisalakanda kamaudiananna manipud kadagiti kabusorda. Insurat ni apostol Pedro: “Ammo ni Jehova no kasanona nga ispalen dagiti tattao nga addaan nadiosan a debosion manipud iti pannakasuot, ngem isaganana dagiti nakillo a tattao maipaay iti aldaw a panangukom tapno magessatda.” (2 Pedro 2:9) Mabalin a makita ti Dios a maikanatad ti panangikkat iti maysa a parikut wenno narigat a kasasaad. Mabalin nga agpatingga ti panangidadanes. Ngem no saan, ammona nga ‘aramiden ti dalan a pagruaran’ tapno ti ilina sibaballigi a maibturanda dagiti pakasuotanda. Mangted pay ni Jehova iti “pannakabalin a nalablabes ngem ti gagangay” no kasapulan.​—1 Corinto 10:13; 2 Corinto 4:7.

Kas “mananggunggona kadagidiay sipapasnek a mangsapsapul kenkuana,” paraburanto met ni Jehova dagiti matalek nga adipenna iti biag nga agnanayon. (Hebreo 11:6) Para iti kaaduan kadakuada, daytoy ket biag nga agnanayon iti paraiso a daga. Kas ken Enoc, sapay koma ta situturedtayo a mangiwaragawag iti mensahe ti Dios. Buyogen ti pammati, aramidentay daytoy aniaman ti mapasamak.

[Dagiti Footnote]

[Kahon iti panid 30]

Natabbaawan ti Nagan ti Dios

Agarup uppat a siglo kasakbayan ni Enoc, nayanak ti apoko ni Adan a ni Enos. “Daytoy ti nangrugian dagiti tattao iti panangaw-awagda ti nagan ni Jehova,” kuna ti Genesis 4:26. Patien ti dadduma nga eskolar ti Hebreo a pagsasao a mabasa koma daytoy a bersikulo a “rinugianda [ti immawag] a sitatabbaaw” iti nagan ti Dios wenno, “iti kasta nangrugi ti panagtabbaaw.” Maipanggep iti dayta a periodo iti historia, kuna ti Jerusalem Targum: “Dayta ti kaputotan nga idi al-aldawda nangrugida nga agbasol, ken agaramid kadagiti didiosenda, ket ninagananda dagiti didiosenda iti nagan ti Sao ti Apo.”

Makita idi tiempo ni Enos a nasaknap ti di umiso a panangusar iti nagan ni Jehova. Mabalin nga impanagan dagiti tattao ti nadibinuan a nagan iti bagbagida wenno kadagiti tattao a babaen kadakuada impagarupda a makaadanida ken Jehova a Dios iti panagdayaw. Wenno nalabit impanaganda ti nadibinuan a nagan kadagiti didiosen. Iti aniaman kadagita, imparnged ni Satanas a Diablo ti sangatauan iti silo ti idolatria. Iti daydi pannakayanak ni Enoc, narasay ti pudno a panagdayaw. Kasuronda idi ti asinoman a kas ken Enoc, a nagbiag maitunos iti kinapudno ken inkasabana dayta, ket ngarud isu ti punteria ti pannakaidadanes.​—Idiligyo ti Mateo 5:11, 12.

[Kahon iti panid 31]

Napan Kadi ni Enoc Idiay Langit?

“Babaen iti pammati naiyalis ni Enoc tapno dina makita ni patay.” Iti patarusda iti daytoy a paset ti Hebreo 11:5, ipasimudaag ti dadduma a patarus iti Biblia a talaga a di natay ni Enoc. Kas pagarigan, ti A New Translation of the Bible, ni James Moffatt, kunana: “Babaen ti pammati a naipan ni Enoc idiay langit iti kasta saan a pulos a natay.”

Ngem agarup 3,000 a tawen kalpasan ti kaaldawan ni Enoc, kinuna ni Jesu-Kristo: “Awan ti tao nga immuli sadi langit no di ti bimmaba manipud langit, ti Anak ti tao.” (Juan 3:13) Kuna ti The New English Bible: “Awan immuli idiay langit malaksid iti daydiay bimmaba manipud langit, ti Anak ti Tao.” Idi dinakamat ni Jesus dayta a sasao, isu a mismo ket saan pay nga immuli idiay langit.​—Idiligyo ti Lucas 7:28.

Kuna ni apostol Pablo a ni Enoc ken dagiti dadduma pay a mangbukel iti dakkel nga ulep dagiti saksi sakbay ti panawen Kristiano “natayda amin” ken “dida nagun-od ti kaitungpalan ti kari.” (Hebreo 11:13, 39) Apay? Agsipud ta amin a tattao, a pakairamanan ni Enoc, natawidda ti basol manipud ken Adan. (Salmo 51:5; Roma 5:12) Ti daton a subbot ni Kristo-Jesus ti kakaisuna a pakaisalakanan. (Aramid 4:12; 1 Juan 2:1, 2) Saan pay a nabayadan dayta a subbot idi kaaldawan ni Enoc. No kasta, saan a napan ni Enoc idiay langit, no di ket naturog ken patay nga agur-uray iti pannakapagungar ditoy daga.​—Juan 5:28, 29.

[Picture Credit Line iti panid 29]

Nakopia iti Illustrirte Pracht - Bibel/ Heilige Schrift des Alten und Neuen Testaments, nach der deutschen Uebersetzung D. Martin Luther’s