Makipagnaka iti Dios Bayat Dagitoy Nariribuk a Panawen

“Ni Enoc nagtultuloy a nakipagna iti pudno a Dios. Kalpasanna isu awanen, ta innala ti Dios.”​—GENESIS 5:24.

1. Ania a paspasamak ti mangipakita a napno iti didigra ti panawentayo?

NARIRIBUK a panawen! Maitutop dagita a sasao a mangdeskribir iti tawtawen ti kinaranggas ken kinaawan talna a napasaran ti sangatauan sipud idi naipasdek ti Mesianiko a Pagarian idi 1914. Iti unos dayta a tiempo, agbibiag dagiti tattao ‘iti maudi nga al-aldaw.’ Sinagabada ti awan kaaspingna a didigra kas iti bisin, sakit, ginggined, ken gubat. (2 Timoteo 3:1; Apocalipsis 6:1-8) Uray dagiti agdaydayaw ken ni Jehova mapaspasaranda met dagita. Iti aniaman a tukad, makidangdangadangtay amin kadagiti rigat ken kinaawan ti kinatalged kadagitoy a panawen. Nakarigrigat ti biag gapu kadagiti parikut iti ekonomia, nariribuk a politika, krimen, ken sakit.

2. Aniada a karit ti sinango dagiti adipen ni Jehova?

² Kanayonanna, adu nga adipen ni Jehova ti nangibtur iti agsasaruno a nakaro a pannakaidadanes gapu iti agtultuloy a pananggubat ni Satanas kadagidiay “mangtungtungpal kadagiti bilin ti Dios ken addaan iti trabaho a panangsaksi ken Jesus.” (Apocalipsis 12:17) Ken uray no saan nga amin kadatayo ket nakapasar iti direkta a pannakaidadanes, masapul a makidangadang ti amin a pudno a Kristiano maibusor ken ni Satanas a Diablo ken iti espiritu nga isaksaknapna iti sangatauan. (Efeso 2:2; 6:12) Agkalikagum dayta iti agtultuloy a panagannad tapno saannatayo a maimpluensiaan dayta nga espiritu, nga iparparangarang dagiti katrabahuan, kaeskuelaan, ken siasinoman a makalkalangentayo a saan nga interesado iti nasin-aw a panagdayaw.

Makipagnaka iti Dios, Saan a Kadagiti Nasion

3, 4. Iti ania a pamay-an a naiduma dagiti Kristiano iti lubong?

³ Uray idi umuna a siglo, sipipinget a nakidangadang dagiti Kristiano maibusor iti espiritu daytoy a lubong, ket dayta ti nakaidumaanda kadagidiay adda iti ruar ti kongregasion Kristiano. Dineskribir ni Pablo dayta a nagdumaan idi insuratna: “Ngarud, daytoy ti sawek ken saksiak iti Apo, a saankay nga agtultuloyen a magna a kas iti pannagna met dagiti nasion iti kinaawan magunggona iti pampanunotda, bayat nga addada iti kinasipnget no maipapan iti isip, ken naisina iti biag a kukua ti Dios, gapu iti kinaignorante nga adda kadakuada, gapu iti kinaawan rikna ti puspusoda. Yantangay napukawda ti isuamin a moral a riknada, inyawatda ti bagbagida iti nalulok a kababalin tapno aramidenda ti tunggal kita ti kinarugit buyogen ti kinaagum.”​—Efeso 4:17-19.

⁴ Anian a silalawag nga iladawan dagita a sasao ti nakaro a naespirituan ken moral a kinasipnget daytoy a lubong​—agpadpada idi kaaldawan ni Pablo ken iti kaaldawantayo! Kas idi umuna a siglo, dagiti Kristiano ita ‘dida agtultuloy a magna a kas iti pannagna dagiti nasion.’ Imbes ketdi, tagtagiragsakenda ti nagsayaat a pribilehio a pannakipagna iti Dios. Pudno, adda dagidiay agduadua no nainrasonan met laeng a panunoten a mabalin a makipagna ken ni Jehova dagiti nanumo, imperpekto a tattao. Bueno, ipakita ti Biblia a mabalinanda. Ken talaga a namnamaen ni Jehova nga aramidenda dayta. Idi maikawalo a siglo sakbay ti Kadawyan a Panawentayo, insurat ni mammadto a Mikias dagiti sumaganad a naipaltiing a sasao: “Ania ti kidkiddawen kenka ni Jehova no di ti panangwatwat iti kinahustisia ken panangayat iti kinamanangngaasi ken panagbalin a naemma iti pannakipagna iti Diosmo?”​—Mikias 6:8.

Kasano ken Apay a Makipagna iti Dios?

5. Kasano a ti maysa nga imperpekto a tao mabalinna ti makipagna iti Dios?

⁵ Kasanotay a makipagna iti mannakabalin-amin, di makita a Dios? Sigurado a saan a kas iti pannakipagnatayo kadagiti padatayo a tao. Iti Biblia, ti sao a “magna” mabalin a kaipapananna “panangsurot iti maysa a wagas ti panagbiag.”a Maibatay iti dayta, maawatantayo a daydiay makipagna iti Dios surotenna ti wagas ti panagbiag nga ibalabala ti Dios ken makaay-ayo kenkuana. Ti panangsurot iti kasta a panagbiag idumanatayo kadagiti kaaduan a tattao iti aglawlawtayo. Dayta a dana ti rumbeng a pilien ti Kristiano. Apay? Adu ti makagapu.

6, 7. Apay a ti pannakipagna iti Dios ti kasayaatan a dana?

⁶ Umuna, ni Jehova ti Namarsua kadatayo, ti Gubuayan ti biagtayo, ken ti Mangipapaay kadagiti amin a kasapulantayo a mangsustiner iti biag. (Apocalipsis 4:11) Gapuna, isuna laeng ti addaan iti karbengan a mangibaga no kasano ti pannagnatayo. Maysa pay, ti pannakipagna iti Dios ti kasayaatan a dana a mabalintayo a suroten. Nangipaay ni Jehova iti probision agpaay iti pannakapakawan ti basol dagidiay makipagna kenkuana, ken ituktukonna kadakuada ti natalged a namnama a biag nga agnanayon. Ti naayat a nailangitan nga Amatayo mangipapaay met iti nainsiriban a balakad a tumulong kadagidiay makipagna kenkuana a maaddaan iti naballigi a biag ita, nupay imperpektoda ken agbibiagda iti lubong nga adda iti sidong ti pannakabalin ni Satanas. (Juan 3:16; 2 Timoteo 3:15, 16; 1 Juan 1:8; 2:25; 5:19) Ti sidadaan a pannakipagnatayo iti Dios mangyeg met iti talna ken panagkaykaysa iti kongregasion.​—Colosas 3:15, 16.

⁷ Kangrunaan iti amin, no makipagnatayo iti Dios, ipakpakitatayo no ania a dasig ti ayantayo mainaig iti isyu a timmaud idiay minuyongan ti Eden​—ti isyu ti kinasoberano. (Genesis 3:1-6) Maipakitatayo babaen ti wagas ti panagbiagtayo a naan-anay nga addatayo iti dasig ni Jehova, ket simamaingel nga iwaragawagtayo nga isu laeng ti maikari a Soberano. (Salmo 83:18) Gapuna, agtignaytayo maitunos iti kararagtayo a masantipikar koma ti nagan ti Dios ken maaramid ti pagayatanna. (Mateo 6:9, 10) Masirib dagidiay mangikeddeng a makipagna iti Dios! Masiguradoda nga umiso ti turturongenda gapu ta ni Jehova daydiay “maymaysa a masirib.” Saan pulos nga agkamali ti Dios.​—Roma 16:27.

8. Kasano nga umasping iti kaaldawantayo ti panawen da Enoc ken Noe?

⁸ Ngem kasano koma ti agbiag kas Kristiano no nariribuk unay ti panawen ken saan nga interesado nga agserbi ken ni Jehova ti kaaduan a tattao? Masungbatan dayta bayat nga usigentayo dagiti nagkauna a matalek a tattao a nangsalimetmet iti kinatarnawda iti laksid dagiti narigat a panawen. Da Enoc ken Noe ti dua kadagitoy. Agpadada a nagbiag iti tiempo nga umasping iti kaaldawantayo. Nasaknap ti kinadakes. Idi kaaldawan ni Noe, napno ti daga iti kinaranggas ken imoralidad. Kaskasdi, sinaranget da Enoc ken Noe ti espiritu ti lubong idi panawenda ket nakipagnada ken ni Jehova. Kasanoda a nabaelan dayta? Tapno masungbatan dayta a saludsod, usigentayo iti daytoy nga artikulo ti ulidan ni Enoc. Iti sumaganad nga artikulo, usigentayto ti ulidan ni Noe.

Nakipagna ni Enoc iti Dios Bayat ti Nariribuk a Panawen

9. Ania nga impormasion ti adda maipapan ken ni Enoc?

⁹ Ni Enoc ti kaunaan a tao a nadakamat iti Kasuratan a nakipagna iti Dios. Kuna ti salaysay ti Biblia: “Kalpasan ti panangputotna ken Matusalem nagtultuloy ni Enoc a nakipagna iti pudno a Dios.” (Genesis 5:22) Sa kalpasan ti panangdakamatna iti kapaut ti biag ni Enoc​—nga atiddog no idilig iti kapaut ti biagtayo ita ngem ababa no idilig kadagidi a panawen​—kuna ti salaysay: “Ni Enoc nagtultuloy a nakipagna iti pudno a Dios. Kalpasanna isu awanen, ta innala ti Dios.” (Genesis 5:24) Nalawag a ni Jehova pinaginanana ni Enoc ken patay sakbay a dangran dagiti kabusor. (Hebreo 11:5, 13) Malaksid kadagita nga ababa a bersikulo, manmano ti pannakadakamat ni Enoc iti Biblia. Nupay kasta, maibatay kadagiti adda nga impormasion ken dadduma pay a pangripiripan, maikunatayo a nariribuk ti kaaldawan ni Enoc.

10, 11. (a) Kasano a nagsaknap ti kinadakes kalpasan ti iyaalsa da Adan ken Eva? (b) Ania a naimpadtuan a mensahe ti inkasaba ni Enoc, ken ania a reaksion ti sigurado a nakaipasanguanna?

¹⁰ Usigenyo, kas pagarigan, no kasano kapartak ti panagsaknap ti kinadakes ditoy daga kalpasan ti panagbasol ni Adan. Ibaga kadatayo ti Biblia a ni Cain, ti inauna nga anak ni Adan, isu ti kaunaan a tao a mammapatay idi inuyosna ti biag ti kabsatna a ni Abel. (Genesis 4:8-10) Kalpasan ti naranggas nga ipapatay ni Abel, naaddaan manen iti anak da Adan ken Eva, ket pinanagananda iti Set. Kastoy ti mabasatayo maipapan kenkuana: “Kasta met ken Set nayanak ti maysa nga anak a lalaki ket pinanagananna iti Enos. Iti dayta a tiempo narugian ti iyaawag iti nagan ni Jehova.” (Genesis 4:25, 26) Nakalkaldaang ta inaapostata dayta nga “iyaawag iti nagan ni Jehova.”b Adu a tawen kalpasan ti pannakaipasngay ni Enos, maysa a kaputotan ni Cain, nga agnagan iti Lamec, ti nangputar iti maysa a kanta agpaay iti dua nga asawana ket kunana a pinapatayna ti maysa nga agtutubo a lalaki a nangdangran kenkuana. Imballaagna met: “No mamimpito a maibalesan ni Cain, ngarud ni Lamec mamimpitopulo ken pito.”​—Genesis 4:10, 19, 23, 24.

¹¹ Dagiti ababa nga impormasion kas iti kadakdakamat ket mangipamatmat no kasano kapartak a nagsaknap kadagiti kaputotan ni Adan ti kinadakes a rinugian ni Satanas idiay minuyongan ti Eden. Iti kasta a lubong, nagserbi ni Enoc kas maysa a mammadto ni Jehova nga addaan iti nabileg ken naipaltiing a mensahe nga agaplikar uray ita. Kastoy ti kuna ni Judas nga impadto ni Enoc: “Adtoy! Immay ni Jehova a kaduana ti nasantuan a linaklaksana, tapno mangipakat iti panangukom maibusor iti isuamin, ken tapno ipaneknekna a nakabasol dagiti amin a di nadiosan maipapan iti amin a di nadiosan nga ar-aramidda nga inaramidda iti di nadiosan a pamay-an, ken maipapan iti amin a makapakigtot a bambanag a sinao dagiti di nadiosan a managbasol maibusor kenkuana.” (Judas 14, 15) Naan-anay a matungpal dayta a padto inton Armagedon. (Apocalipsis 16:14, 16) Kaskasdi, masiguradotayo nga uray idi kaaldawan ni Enoc, adu a “di nadiosan a managbasol” ti narurod idi nangngegda ti padto ni Enoc. Anian a kinamanagayat iti biang ni Jehova nga inyadayona kadakuada ti mammadto!

Ania ti Nangpabileg ken ni Enoc a Makipagna iti Dios?

12. Ania ti nakaidumaan ni Enoc kadagiti kasadaranna?

¹² No sublianantayo ti minuyongan ti Eden, impangag da Adan ken Eva ni Satanas, ket immalsa ni Adan maibusor ken ni Jehova. (Genesis 3:1-6) Saan a kasta ti inaramid ti anakda a ni Abel, ket naay-ayo kenkuana ni Jehova. (Genesis 4:3, 4) Makapaladingit ta saan a kas ken ni Abel ti kaaduan kadagiti kaputotan ni Adan. Ngem kasta ni Enoc, a nayanak ginasgasut a tawen kalpasanna. Ania ti nakaidumaan ni Enoc kadagiti nagadu a kaputotan ni Adan? Sinungbatan ni apostol Pablo dayta a saludsod idi insuratna: “Babaen iti pammati nayalis ni Enoc tapno saanna a makita ni patay, ket saan a nasarakan iti sadinoman agsipud ta isu inyalis ti Dios; ta sakbay ti pannakayalisna isu addaan iti pangsaksi a naay-ayona a naan-anay ti Dios.” (Hebreo 11:5) Ni Enoc ket karaman iti dakkel nga “ulep dagiti saksi” sakbay ti panawen Kristiano, a nagsayaat nga ulidan ti pammati. (Hebreo 12:1) Gapu iti pammati a nakapagibtur ni Enoc bayat a sinalimetmetanna ti nasayaat a kondukta iti las-ud ti nasurok a 300 a tawen a panagbiagna​—nasurok a tallo a daras a kapaut ti panagbiag ti kaaduan kadatayo ita!

13. Ania a kita ti pammati ti adda ken ni Enoc?

¹³ Dineskribir ni Pablo ti pammati ni Enoc ken ti dadduma a saksi idi insuratna: “Ti pammati isu ti sigurado a panangsegsegga iti bambanag nga in-inanamaen, ti nabatad a parangarang dagiti kinapudno nupay saan a makita.” (Hebreo 11:1) Wen, ti pammati ket natibker a panagtalek a matungpal dagiti bambanag a ninamnamatayo maibatay kadagiti pammatalged. Nakabilbileg dayta a panagtalek nga uray la apektaranna ti panangmatmattayo no ania ti kapatgan iti biagtayo. Gapu iti kasta a kita ti pammati, nabaelan ni Enoc ti makipagna iti Dios uray saan a kasta ti inaramid dagiti tattao iti aglikmutna.

14. Iti ania nga umiso a pannakaammo ti mabalin a nakaibatayan ti pammati ni Enoc?

¹⁴ Ti pudno a pammati ket naibatay iti umiso a pannakaammo. Ania a pannakaammo ti adda ken ni Enoc? (Roma 10:14, 17; 1 Timoteo 2:4) Awan duadua nga ammona dagiti napasamak idiay Eden. Mabalin a nangngegna met no ania a klase a biag ti adda iti minuyongan ti Eden​—a nalabit adda pay la idi, nupay napawilan dagiti tattao a sumrek iti dayta. (Genesis 3:23, 24) Ken ammona ti panggep ti Dios a dagiti kaputotan ni Adan punuenda ti daga ken isaknapda ti orihinal a Paraiso iti intero a planeta. (Genesis 1:28) Kanayonanna, sigurado nga impateg ni Enoc ti inkari ni Jehova a panangipaayna iti Bin-i a mangrumek iti ulo ni Satanas ken mangikkat kadagiti dakes nga epekto ti panangallilaw ni Satanas. (Genesis 3:15) Kinapudnona, ti mismo a naipaltiing a padto ni Enoc, a nailanad iti libro a Judas, impakpakaunana ti pannakadadael ti bin-i ni Satanas. Gapu ta adda pammati ni Enoc, masiguradotayo nga indaydayawna ni Jehova kas daydiay “mananggunggona kadagidiay sipapasnek a mangsapsapul kenkuana.” (Hebreo 11:6) Gapuna, nupay saan nga amin nga ammotayo ita ket ammo ni Enoc, umdasen ti adda kenkuana a pannakaammo tapno agserbi a pundasion ti natibker a pammatina. Buyogen ti kasta a pammati, sinalimetmetanna ti kinatarnawna kabayatan ti nariribuk a panawen.

Tuladenyo ti Ulidan ni Enoc

15, 16. Kasanotayo a matulad ti ulidan ni Enoc?

¹⁵ Kas ken Enoc, kayattayo a maay-ayo ni Jehova kabayatan daytoy nariribuk a panawen. Gapuna, nasken a tuladentayo ti ulidan ni Enoc. Masapul a gun-oden ken salimetmetantayo ti umiso a pannakaammo maipapan ken ni Jehova ken iti panggepna. Ngem saan laeng a dayta. Nasken nga ikagumaantayo a dayta nga umiso a pannakaammo ti mangiturong iti danatayo. (Salmo 119:101; 2 Pedro 1:19) Kasapulan nga agpaiwanwantayo iti pampanunot ni Jehova, a kanayon nga ikagumaantayo nga ay-aywen ti Dios babaen ti amin nga isip ken aramidtayo.

¹⁶ Ditay ammo no adda pay sabali nga agserserbi ken ni Jehova idi panawen ni Enoc. Posible nga isuna laeng wenno adda laeng sumagmamano a kakaduana. Uray kadatayo ita, manmanotayo laeng no idilig iti lubong, ngem saan a dayta ti mangupay kadatayo. Saranayennatayo ni Jehova asinoman ti bumusor kadatayo. (Roma 8:31) Situtured nga impakdaar ni Enoc ti umad-adani idi a pannakadadael dagiti nadangkes. Naturedtayo met bayat nga ikaskasabatayo “daytoy naimbag a damag ti pagarian” iti laksid ti pannakaumsi, ibubusor, ken pannakaidadanes. (Mateo 24:14) Ab-ababa ti panagbiag ni Enoc ngem kadagiti dadduma a kasadaranna. Nupay kasta, saan nga iti dayta a lubong ti ayan ti namnamana. Naipamaysa ti atensionna iti banag nga adayo a natantan-ok. (Hebreo 11:10, 35) Naipamaysa met ti atensiontayo iti pannakatungpal ti panggep ni Jehova. Gapuna, saantayo nga usaren a naan-anay daytoy a lubong. (1 Corinto 7:31) Imbes ketdi, usarentayo ti bileg ken ik-ikutantayo kangrunaanna iti panagserbi ken ni Jehova.

17. Ania a pannakaammo ti adda kadatayo nga awan idi ken ni Enoc, gapuna ania ti nasken nga aramidentayo?

¹⁷ Mamati ni Enoc nga agparang ti Bin-i nga inkari ti Dios iti tiempo nga inkeddeng ni Jehova. Agarup 2,000 a tawenen ti naglabas idi a dayta a Bin-i​—ni Jesu-Kristo​—ket nagparang, nagserbi a subbot, ken nanglukat iti dana agpaay kadatayo ken kadagiti matalek a nagkauna a Saksi a kas ken ni Enoc, tapno tawidentayo ti biag nga agnanayon. Dayta a Bin-i, a naitrono itan kas Ari iti Pagarian ti Dios, inggarangugongna ni Satanas ditoy daga manipud langit, ket makitatayo ti imbungana a rigat iti sadinoman. (Apocalipsis 12:12) Wen, ad-adu nga amang ti pannakaammo a magun-odtayo ita ngem idi kaaldawan ni Enoc. Sapay koma ngarud ta maaddaantayo iti natibker a pammati a kas iti adda kenkuana. Ti koma panagtalektayo iti pannakatungpal dagiti kari ti Dios apektaranna ti amin nga aramidentayo. Kas ken Enoc, makipagnatayo koma iti Dios nupay agbibiagtayo iti nariribuk a panawen.

[Footnotes]

Ania ti Sungbatyo?

• Ania ti kaipapanan ti pannakipagna iti Dios?

• Apay a kasayaatan a dana ti pannakipagna iti Dios?

• Kasano a nabaelan ni Enoc ti makipagna iti Dios iti laksid ti nariribuk a panawen?

• Kasano a matuladtayo ni Enoc?

[Ladawan iti panid 15]

Babaen ti pammati, “ni Enoc nagtultuloy a nakipagna iti pudno a Dios”

[Ladawan iti panid 17]

Sititibker nga agtalektayo a matungpal dagiti kari ni Jehova

[Picture Credit Lines iti panid 13]

Babai, adayo a kannawan: rinetrato ti FAO /B. Imevbore; marmarpuog a patakder: San Hong R-C Picture Company