Report Dagiti Manangiwaragawag iti Pagarian
Panangparmek Kadagiti Karit iti “Daga Dagiti Di Ninamnama”
INSALUDSOD ni apostol Pablo kadagiti immuna-siglo a Kristiano iti Corinto: “No ti trumpeta mangpaguni iti maysa a di nalawag nga awag, siasinonto ti agsagana a makibakal? Iti kasta met laeng a pamay-an, malaksid no babaen ti pagsasao mangiyebkaskayo iti sasao a nalaka a maawatan, kasanonto a maammuan no ania ti maisasao?”—1 Corinto 14:8, 9.
Idiay Papua New Guinea, no dadduma maaw-awagan iti Daga Dagiti Di Ninamnama, maipaspasango dagiti Saksi ni Jehova kadagiti dadakkel a tubeng iti panangikasaba iti nabatad a mensahe ti Biblia. Mangaskasabada kadagiti tao nga addaan nasurok a 700 a nadumaduma a lenguahe ken addaan nagadu a sabasabali a kaugalian. Sarsarangten met dagiti Saksi dagiti kabambantayan, kinaawan lansangan, ken lumanlanlan a krimen. Malaksid kadagitoy a pakarigatan, adda ibubusor manipud kadagiti relihioso a grupo ken, no dadduma, manipud pay ketdi kadagiti opisial ti eskuelaan.
Nupay kasta, ti nasayaat a naespirituan a pannursuro ken ti dumakdakkel a libraria dagiti katulongan iti panagadal iti Biblia kadagiti lokal a pagsasao kabkabalanna dagiti Saksi a mangidanon iti naimbag a damag kas iti nalawag nga uni ti trumpeta. Masansan a positibo ti resulta, kas ipakita dagiti sumaganad a report:
● Iti rugrugi ti kabbaro a tawen ti panageskuela, kayat a maammuan ti maysa a maestro no apay a saan nga agsaludo iti bandera wenno agkanta iti nailian a kanta ti annak dagiti Saksi ni Jehova. Insaludsodna daytoy ken ni Maiola, maysa a 13 ti tawenna nga estudiante a bautisado a Saksi. Nangipaay ni Maiola iti nabatad, Nainkasuratan a panangilawlawag. Inawat ti maestro ti rasonna tangay nagtaud dayta iti Biblia. Naipakaammo met ti eksplanasionna iti dadduma pay nga staff iti eskuelaan.
Di nagbayag, idi natudingan dagiti estudiante a mangisurat iti salaysay, pinili ni Maiola ti topiko maipapan iti Trinidad. Ti salaysayna ti naipaayan iti kangatuan a marka iti klase, ket sinaludsod kenkuana ti maestro no nangbirokanna ti impormasion. Impakitana kenkuana ti libro a Mabalinyo ti Agbiag nga Agnanayon iti Paraiso a Daga iti Ingles a pagsasao. Imparang ti maestro ti libro iti intero a klase, ket adu ti mayat a maaddaan iti bukodda a kopia. Iti kabigatanna, nakaipaima ni Maiola iti 14 a libro ken 7 a magasin kadagiti kaeskuelaanna, ken nakairugi kadagiti panagadal iti Biblia iti tallo kadakuada. Kalat ni Maiola ti agbalin nga amin-tiempo a ministro.
● Maysa a naiputputong a grupo dagiti Saksi ni Jehova iti maysa a purok iti kosta iti asideg iti Port Moresby ti naipasango iti ibubusor sipud idi rugrugi ti dekada 1970. Nupay kasta, iti di pay nabayag, adda di ninamnama a timmulong kadakuada. Maysa nga aldaw, ti obispo ti United Church sadiay, maysa a katutubo iti Papua New Guinea a nagadal iti sabali a nasion, ginutugotna nga agsaludsod dagiti nakimisa iti simbaan. Insaludsod ti maysa a lalaki: “Adda dua a relihion iti puroktayo—ti United Church ken Dagiti Saksi ni Jehova. Ania ti aramidenmi no umay dagiti Saksi iti pagtaenganmi?” Kalpasan ti napaut a panagsarimadeng, insungbat ti obispo: “Ammoyo, talaga a diak ammo no aniat’ ibagak kadakayo. Itay laeng nabiit, dua nga agkabannuag a Saksi ti immay iti pagtaengak. Sinaludsodandak, ket iti laksid amin a nasursurok iti unibersidad, diak ammo ti sungbat. Ngem silalaka nga impakitada kaniak ti sungbat iti Biblia. Gapuna diak ibaga kadakayo no ania ti aramidenyo—makaammokayon. Dikay dumngeg no madikayo, ngem dikay koma agbalin a naranggas kadakuada.”
Inreport ti maysa nga agdaldaliasat a pannakabagi ti Watch Tower Society nga idi agangay simmarungkar iti daytoy a grupo dagiti Saksi: “Gistay amin a pumurok dimngegda kadagiti Saksi idi napanda nangasaba. Pinastrek pay ketdi ida dagiti dadduma iti pagtaenganda. Maysa daytoy a paraiso a pangasabaan ita.”