Apay nga Ar-aramidenda Dayta?

TINAWEN a rinibu a Saksi ni Jehova iti intero a lubong ti agtataripnong kadagiti kombension. Kadagitoy a kombension, tagiragsakenda ti makipulapol ken dumngeg iti nasayaat a pannursuro a naibatay iti Biblia. Dakkel a panangikagumaan ti ar-aramiden ti dadduma tapno maatendaranda dagitoy a kombension. Kas pagarigan, idi napalabas a tawen, maysa a pagassawaan idiay Malawi a ti tawenda ket ag-65, a kaduada ti anakda a lalaki ken ti asawana ken ti maladagada, nagdaliasatda iti 80 kilometro babaen ti bisikleta tapno tumabuno iti maysa a kombension. Pinanawanda ti purokda iti alas sais ti agsapa ket dimtengda iti pagkombensionan kalpasan ti 15 nga oras.

Idiay Mozambique, maysa a grupo ti nagbisikleta iti tallo nga aldaw tapno makadanon iti maysa a kombension. Maysa a rabii, kabayatan a nagkampoda iti kannag, nangngegda dagiti leon a ngumerngernger iti asideg. Nupay nagipuruakda iti sungrod iti direksion dagiti ayup, umasi-asibay dagiti leon agingga iti aglawag. Maysa pay a Saksi nga agdaldaliasat nga agturong iti dayta met laeng a kombension nakisinnangonsango iti maysa a leon iti dalan. Nagtakder a siuulimek a di naggargaraw agingga a pimmanaw ti leon. Iti kombension siraragsak nga impadamag dagitoy a Saksi no kasanoda a ‘naispal manipud iti ngiwat ti leon.’​—2 Timoteo 4:17.

Adu a Saksi ni Jehova ti mangar-aramid iti dakkel a panangikagumaan tapno tumabuno kadagiti kombension wenno uray kadagiti linawas a gimong ti kongregasion maipaay iti panagdayaw. Apay? Dagiti sumaganad nga artikulo tumulong kadakayo a mangtarus no apay a nagpateg ti agtataripnong a sangsangkamaysa.