Inaramidda ti Pagayatan ni Jehova

Nagunggonaan ti Kinatarnaw ni Job

NI Job ket naasi a lalaki, manangisakit kadagiti balo, ulila, ken dagiti agsagsagaba. (Job 29:12-17; 31:16-21) Ngem idin, kellaat a dimteng ti didigra, napukawna ti kinabaknangna, dagiti annakna, ken kimmapuy ti salun-atna. Nakalkaldaang ta daytoy natan-ok a tao a sadiri idi dagiti mairurrurumen bassit laeng ti nagun-odanna a tulong idi tiempo a kasapulanna. Imbaga kenkuana uray ti asawana nga ‘ilunodna ti Dios ket matay!’ Ket dagiti “gagayyemna” a da Elifaz, Bildad, ken Sofar saanda a nakaipaay iti liwliwa. Imbes ketdi, imparipiripda a nagbasol ni Job ket maikari ngarud iti panagtuokna.​—Job 2:9, NW; Job 4:7, 8; 8:5, 6; 11:13-15.

Nupay nakaro ti panagsagabana, nagmatalek ni Job. Gapu iti daytoy, kinaasian ni Jehova ni Job kamaudiananna ken binendisionanna. Ti salaysay maipapan iti panangaramidna iti kasta ipasiguradona kadagiti amin a natarnaw nga adipen ti Dios nga inton tiempona magunggonaandanto met.

Naabsuelto ken Naimbagan

Umuna, tinubngar ni Jehova da Elifaz, Bildad, ken Sofar. Iti pannakisaritana ken Elifaz, a nabatad nga inaunaan, kinunana: “Ti ungetko bumara a maibusor kenka, ken iti dua a gayyemmo; ta dikay insao ti pudno maipapan kaniak, kas insao ni adipenko a Job. Ita ngarud mangalakayo iti pito a baka, ken pito a karnero, ket inkayo ken adipenko a Job, ket idatagyo gapu kadakayo ti daton a mapuoran; ket ni adipenko a Job ikararagannakayonto.” (Job 42:7, 8, NW) Panunotenyo no ania ti ipamatmat daytoy!

Kinalikaguman ni Jehova a mangidatag da Elifaz, Bildad, ken Sofar iti adu a daton, nalabit tapno ipabigbigna kadakuada ti kinadagsen ti basolda. Kinapudnona, inggagara man wenno di inggagara, tinabbaawanda ti Dios babaen ti panagkunada nga ‘awan ti panagtalekna kadagiti adipenna’ ket awan aniamanna kenkuana no matalek wenno saan ni Job. Kinuna pay ni Elifaz nga iti imatang ti Dios saan a napateg ni Job a kas iti simotsimot! (Job 4:18, 19; 22:2, 3) Di pakasdaawan a kinuna ni Jehova: “Dikayo insao ti pudno maipapan kaniak”!

Ngem saan la a dayta. Personal met a nakabasol da Elifaz, Bildad ken Sofar ken Job babaen ti panangibagada kenkuana nga isu a mismo ti nakaigapuan dagiti parikutna. Dagiti awan nakaibatayanna a pammabasolda pinagsakitda ti nakem ken pinagleddaangda ni Job, isut’ gapuna nga inyasugna: “Kasano kapaut ti panangpaungetyo iti kararuak, ken panangdudugyo kaniak kadagiti sasao?” (Job 10:1; 19:2) Panunotenyo dagiti napabainan a langa dagitoy tallo a lallaki bayat nga idatagda itan ken Job ti datonda a maigapu kadagiti basolda!

Ngem saan a pagragsakan ni Job ti pannakaibabainda. Kinapudnona, kinalikaguman ni Jehova nga ikararaganna dagiti nangakusar kenkuana. Inaramid ni Job ti naibilin kenkuana, ket gapu iti daytoy nabendisionan. Umuna, inagasan ni Jehova ti nakaam-amak a sakitna. Kalpasanna, dagiti kakabsat ni Job a lallaki ken babbai ken dagiti kakaduana idi immayda a nangliwliwa kenkuana, ‘ket tunggal tao nangted kenkuana iti sangkapisi a kuarta, ken tunggal maysa ti maysa a singsing a balitok.’a Kasta met, ni Job “naaddaan iti sangapulo ket uppat a ribu a karkarnero, ken innem a ribu a kamkamelio, ken sangaribu a kasangolan a bakbaka, ken sangaribu nga as-asna.”b Ket nabatad a nagsubli ti asawa ni Job kenkuana. Idi agangay, naparaburan ni Job iti pito nga annak a lallaki ken tallo nga annak a babbai, ket nagbiag a nakakita kadagiti kaputotan dagiti annakna agingga iti maikapat a kaputotan.​—Job 42:10-17.

Dagiti Maadaltayo

Nangipaay ni Job iti naisangsangayan a pagwadan kadagiti moderno-aldaw nga adipen ti Dios. Isu ket “napalungdo ken nalinteg,” maysa a lalaki a maipagpannakkel ni Jehova nga awagan nga “adipenko.” (Job 1:8; 42:7, 8) Nupay kasta, di kayat a sawen daytoy a perpekto ni Job. Iti naminsan bayat dagiti pannakasuotna, sibibiddut nga impagarupna a ti Dios ti nangparigat kenkuana. Binabalawna pay ti pamay-an ti pannakilangen ti Dios iti tao. (Job 27:2; 30:20, 21) Ket indeklarana ti kinalintegna met laeng imbes a ti kinalinteg ti Dios. (Job 32:2) Ngem saan a timmallikud ni Job iti Namarsua, ket sipapakumbaba nga inawatna ti panangkorehir ti Dios. “Binalikasko ti diak naawatan,” inannugotna. “Agbabawiak iti tapok ken dapdapo.”​—Job 42:3, 6.

No masusuottayo, mabalin nga agpanunot, agsao, wenno agtignaytayo met iti di umiso. (Idiligyo ti Eclesiastes 7:7.) Nupay kasta, no nauneg ti panagayattayo iti Dios, ditay umalsa kenkuana wenno agsakit ti nakemtayo gapu ta pinalubosanna nga agrigattayo. Imbes ketdi, salimetmetantayo ti kinatarnawtayo ket iti kasta apitentayto kamaudiananna ti dakkel a bendision. Kinuna ti salmista maipapan ken Jehova: “Kadagiti nasungdo agtignayka a sisusungdo.”​—Salmo 18:25, NW.

Sakbay a naisubli ti kinasalun-at ni Job, kinalikaguman ni Jehova nga ikararaganna dagidiay nakabasol kenkuana. Anian a nagsayaat a pagwadantayo! Kalikaguman ni Jehova a pakawanentayo dagidiay makabasol kadatayo sakbay a pakawanenna dagiti basoltayo. (Mateo 6:12; Efeso 4:32) No ditay situtulok a mangpakawan kadagiti sabsabali no adda nainkalintegan a pakaibatayan ti panangaramid iti kasta, siuumiso kadi a mainanamatayo a kaasiannatay ni Jehova?​—Mateo 18:21-35.

Adda dagiti tiempo a maipasangotayo amin kadagiti pakasuotan. (2 Timoteo 3:12) Ngem, kas ken Job masalimetmetantayo ti kinatarnawtayo. Babaen ti panangaramid iti kasta, agapittayto iti dakkel a gunggona. Insurat ni Santiago: “Adtoy! Kunaentayo a naragsak dagidiay nakapagibtur. Nangngegyo ti panagibtur ni Job ket nakitayo ti nagbanagan nga impaay ni Jehova, a ni Jehova nadungngo unay iti panagayat ken naasi.”​—Santiago 5:11.

[Dagiti Footnote]