Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • w98 7/15 pp. 29-31
  • Addaankay Kadi iti “Natulnog a Puso”?

Awan video-na ti napilim.

Pasensiakan, adda problema iti pannakai-load ti video.

  • Addaankay Kadi iti “Natulnog a Puso”?
  • Ti Pagwanawanan Mangibumbunannag iti Pagarian ni Jehova—1998
  • Subtitulo
  • Umasping a Material
  • Addaanda iti Natulnog a Puso
  • Saan nga Umdas ti Di Naan-anay a Panagtulnog
  • Kasano ti Kinanaan-anay ti Panagtulnogmo?
  • Mangyeg Kadagiti Bendision ti Natulnog a Puso
  • Tagipatgen ni Jehova ti Panagtulnogmo
    Ti Pagwanawanan Mangibumbunannag iti Pagarian ni Jehova—2007
  • Tulonganyo Dagiti Sabsabali nga Agbalin a “Natulnog Manipud iti Puso”
    Ti Ministeriotayo iti Pagarian—2005
  • Sursuruenyo ti Agtulnog Babaen ti Panangawat ti Disiplina
    Ti Pagwanawanan Mangibumbunannag iti Pagarian ni Jehova—1992
  • ‘Nasursuro ni Jesus ti Agtulnog’
    Ti Pagwanawanan Mangibumbunannag iti Pagarian ni Jehova (Pagadalan)—2025
Kitaen ti Ad-adu Pay
Ti Pagwanawanan Mangibumbunannag iti Pagarian ni Jehova—1998
w98 7/15 pp. 29-31

Addaankay Kadi iti “Natulnog a Puso”?

IDI nagbalin ni Solomon nga ari iti Israel idi ugma, nariknana a dina kabaelan. Nagkiddaw ngarud iti Dios iti sirib ken pannakaammo. (2 Cronicas 1:10) Inkararag pay ni Solomon: “Ikkam ngarud ti adipenmo iti maysa a natulnog a puso nga agukom iti ilim.” (1 Ar-ari 3:9, NW) No addaan ni Solomon iti “natulnog a puso,” surotenna dagiti nadiosan a linteg ken prinsipio ken sagrapenna ti parabur ni Jehova.

Ti natulnog a puso ket saan a makapadagsen no di ket gubuayan ti rag-o. Insurat ni apostol Juan: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.” (1 Juan 5:3) Wen, masapul nga agtulnogtay iti Dios. Ngamin, ni Jehova ti Naindaklan a Namarsua kadatayo. Kukuana ti daga ken amin nga adda iti dayta, uray pay ti amin a pirak ken ti balitok. Isu nga awan nga agpayso ti aniaman a material a banag a maipaaytayo iti Dios, nupay palpalubosannatayo a mangusar iti sanikuatayo a kas ebkas ti ayattayo kenkuana. (1 Cronicas 29:14) Namnamaen ni Jehova nga isut’ ayatentayo ken sipapakumbaba a makipagnatayo kenkuana, nga aramiden ti pagayatanna.​—Mikias 6:8.

Idi nayimtuod ken Jesu-Kristo no ania ti kangrunaan a bilin iti Linteg, kinunana: “‘Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo.’ Daytoy ti kadakkelan ken umuna a bilin.” (Mateo 22:36-38) Ti panagtulnog iti Dios ti maysa a pamay-an a panangipakita iti dayta nga ayat. Ikararag koma ngarud ti tunggal maysa kadatayo nga ikkannatayo ni Jehova iti natulnog a puso.

Addaanda iti Natulnog a Puso

Naglaon ti Biblia iti adu nga ulidan dagidiay addaan iti natulnog a puso. Kas pagarigan, imbaga ni Jehova ken Noe a mangaramid iti nagdakkel a daong a pakaisalakanan ti biag. Nagdakkelan a trabaho daytoy a nakasapul iti agarup 40 wenno 50 a tawen. Agpapan pay iti amin a moderno a de koriente a remienta ken dadduma nga alikamen a magun-odan itan, nakaskasdaaw a gapuanan iti inhenieria ti pannakaibangon ti kasta a kadakkel nga estruktura a mabalinna ti tumpaw. Kasta met a masapul a pakdaaran idi ni Noe dagiti tattao a sigurado a nanguyaw ken nangumsi kenkuana. Ngem natulnog, nga inaramidna amin a naibilin kenkuana. Kuna ti Biblia: “Kasta ti inaramidna.” (Genesis 6:9, 22; 2 Pedro 2:5) Impakita ni Noe ti panagayatna ken Jehova babaen ti matalek a panagtulnogna iti unos ti adu a tawen. Anian a nagsayaat nga ulidan kadatay amin!

Usigem met ni patriarka nga Abraham. Imbaga ti Dios kenkuana a panawanna ti narang-ay nga Ur dagiti Caldeo ken mapan iti lugar a dina ammo. Nagtulnog ni Abraham a saanen a nagsaludsod pay. (Hebreo 11:8) Iti intero a panagbiagna, nagyanda a sangapamiliaan kadagiti tolda. Kalpasan ti adu a tawen kas ganggannaet iti daga, pinaraburan ni Jehova ni Abraham ken ni Sara nga asawana iti anak a nanaganan iti Isaac. Anian a panangipateg la ketdi ti 100 tawennan a ni Abraham iti daytoy nga anak ti kinalakayna! Sumagmamano a tawen kalpasanna, kiniddaw ni Jehova ken ni Abraham nga idatonna ni Isaac kas daton a mapuoran. (Genesis 22:1, 2) Para ken ni Abraham, nasaem la ketdi a panunoten ti panangaramidna iti dayta. Ngem, nagtulnog latta agsipud ta ay-ayatenna ni Jehova ken adda pammatina nga agtaud ken Isaac ti naikari a bin-i, uray pay no kasapulan a pagungaren ti Dios manipud ken patay. (Hebreo 11:17-19) Nupay kasta, idi patayen koman ni Abraham ti anakna, ginawidan ni Jehova ket kinunana: “Ita mabigbigko a mabutengka iti Dios, yantangay dika impaidam kaniak ti anakmo, ti bugbugtong nga anakmo.” (Genesis 22:12) Gapu iti kinatulnogna, naawagan ni managbuteng-Dios nga Abraham kas “gayyem ni Jehova.”​—Santiago 2:23.

Ni Jesu-Kristo ti kasayaatan nga ulidantayo iti kinatulnog. Sakbay a nagbalin a tao, nagragsakanna ti natulnog a panagserbina ken Amana idiay langit. (Proverbio 8:22-31) Idi nagbalinen a tao, nagtulnog ni Jesus ken Jehova iti amin nga inaramidna, a kanayon a nagragsakanna nga inaramid ti pagayatanna. (Salmo 40:8; Hebreo 10:9) Isu a sipupudno a naikuna ni Jesus: “Awan ti aramidek iti bukodko a nakem; no di ket kas iti insuro kaniak ni Ama sawek dagitoy a bambanag. Ket daydiay nangibaon kaniak adda kaniak; saannak a binaybay-an nga agmaymaysa, agsipud ta kankanayon nga aramidek dagiti bambanag a makaay-ayo kenkuana.” (Juan 8:28, 29) Kamaudiananna, tapno maalangon ti kinasoberano ni Jehova ken masubbot ti natulnog a sangatauan, situtulok nga inted ni Jesus ti biagna, ket napasaranna ti nakababain ken nasaem unay nga ipapatay. Wen, “idi nasarakanna ti bagina iti langa a kas maysa a tao, impakumbabana ti bagina ket nagtulnog agingga iti ipapatay, wen, ipapatay iti kayo a pagtutuokan.” (Filipos 2:8) Anian nga ulidan iti panangiparangarang iti natulnog a puso!

Saan nga Umdas ti Di Naan-anay a Panagtulnog

Saan nga amin a nagkuna a natulnogda iti Dios ket aktual a nagtulnogda kenkuana. Usigem ni Ari Saul iti Israel idi ugma. Binilin ti Dios a talipuposenna dagiti nadangkes nga Amalekita. (1 Samuel 15:1-3) Nupay inkisap ida ni Saul kas maysa a nasion, inispalna ti arida ken ti sumagmamano kadagiti karnero ken bakada. Inyimtuod ni Samuel: “Apay-apay ngarud a dika tinungpal ti timek ni Jehova?” Kas sungbat, kinuna ni Saul: “Wen, nagtulnogak iti timek ni Jehova . . . Dagiti tattao [ti Israel] innalada a naggapu iti samsam, dagiti karkarnero ken bakbaka, ti kangrunaan kadagiti bambanag . . . , tapno idatonda ken Jehova.” Iti panangyunay-unayna iti kinapateg ti naan-anay a panagtulnog, kinuna ni Samuel: “Addaan aya ni Jehova iti dakdakkel a ragsak kadagiti daton a mapuoran ken sakripisio, ngem iti panagtulnog iti timek ni Jehova? Adtoy, ti panagtulnog naim-imbag ngem iti sakripisio, ken ti panangipangag ngem iti kinalukmeg dagiti karkarnero a lallaki. Ta ti kinasukir isu ti kas iti basol a panangkukulam, ket ti kinasungit isu ti kas panagrukbab kadagiti ladladawan ken didios. Agsipud ta sika binaybay-am ti sao ni Jehova, isu binaybay-annaka met manipud iti kinaarim.” (1 Samuel 15:17-23) Nagdakkel la ketdin ti napukaw ni Saul gapu ta saan a naaddaan iti natulnog a puso!

Saan a nagtultuloy a nagtulnog ken Jehova uray ni masirib nga Ari Solomon, a nangikararag idi a maaddaan iti natulnog a puso. Maibusor iti nadiosan a bilin, inasawana dagiti ganggannaet a babbai a namagbasol kenkuana iti Dios. (Nehemias 13:23, 26) Napukaw ni Solomon ti anamong ti Dios agsipud ta saan a nagtultuloy a naaddaan iti natulnog a puso. Anian a pakdaar daytoy kadatay amin!

Di kaipapanan daytoy a kalikaguman ni Jehova ti kinaperpekto kadagiti adipenna a tattao. ‘Malagipna a tapoktayo.’ (Salmo 103:14) Sigurado a pasaray agkamalitay amin, ngem makita ti Dios no agpayso a naimpusuan ti tarigagaytayo a mangparagsak kenkuana. (2 Cronicas 16:9) No agbasoltayo gapu iti natauan a kinaimperpekto ngem agbabbabawitayo, mabalintay ti agpakawan gapu iti daton a pannubbot ni Kristo, nga agtalektayo a ni Jehova ‘mamakawan a siwawadwad.’ (Isaias 55:7; 1 Juan 2:1, 2) Nalabit a kasapulan met ti tulong dagiti naayat a Kristiano a panglakayen tapno umimbagtayo iti naespirituan ken maaddaantay manen iti nasalun-at a pammati ken natulnog a puso.​—Tito 2:2; Santiago 5:13-15;

Kasano ti Kinanaan-anay ti Panagtulnogmo?

Kas ad-adipen ni Jehova, sigurado a patien ti kaaduan kadatayo nga addaantayo iti natulnog a puso. Nalabit irasontayo, Saan aya a makipaspasetak iti trabaho a panangikasaba iti Pagarian? Saan aya a natibker ti takderko no rumsua dagiti dadakkel nga isyu a kas iti neutralidad? Ken saan aya a regular a tabtabunuak dagiti Nakristianuan a gimong, a kas indagadag ni apostol Pablo? (Mateo 24:14; 28:19, 20; Juan 17:16; Hebreo 10:24, 25) Pudno, ti intero nga ili ni Jehova ket mangipakpakita iti naimpusuan a panagtulnog iti kakasta nga agkakapateg a benneg.

Ngem ti ngay mismo a kababalintayo iti inaldaw nga aramidtayo, nalabit uray kadagiti kasla babassit a banag? Kinuna ni Jesus: “Ti tao a matalek iti kabassitan matalek met iti adu, ket ti tao a nakillo iti kabassitan nakillo met iti adu.” (Lucas 16:10) Ngarud, tunggal maysa kadatayo nasayaat no iyimtuodna iti bagina, Addaanak aya iti natulnog a puso no maipapan iti babassit a banag a di man la ammo dagiti sabsabali?

Impakita ti salmista nga uray iti uneg ti balayna, iti lugar a saan a makitkita dagiti sabsabali, ‘nagna a natarnaw ti pusona.’ (Salmo 101:2) Bayat nga agtugtugawka iti balaymo, mabalin a lukatam ti telebision ket mangrugikan nga agbuya iti pelikula. Sadiay a mismo a masubok ti kinatulnogmo. Nalabit nga agbalin nga imoral ti linaon ti pelikula. Itultuloymo aya ti agbuya, nga irasonmo a kastoy ngaminen a kita ti pelikula ti maipabpabuyan kadagitoy nga aldaw? Wenno tignayennaka ti natulnog a pusom nga agtulnog iti Nainkasuratan a bilin a ‘ti pannakiabig ken kinarugit saan koma a pulos madakamat iti nagtetengngaanyo’? (Efeso 5:3-5) Iddepem aya ti telebision, uray no kasla makaallukoy ti estoriana? Wenno iyakarmo iti sabali a channel no agbalinen a naranggas ti programa? “Sukimaten ni Jehova ti nalinteg agraman ti nadangkes,” inkanta ti salmista, “ken asinoman nga agayat iti kinaranggas guraen ti kararuana.”​—Salmo 11:5, NW.

Mangyeg Kadagiti Bendision ti Natulnog a Puso

Siempre, adu a benneg iti biag ti makagunggona a pangusigantayo iti bagbagitayo tapno maammuantayo no agpayso a naimpusuan nga agtultulnogtayo ken Jehova. Ti panagayattayo ken Jehova ti mangtignay koma kadatayo a mangparagsak kenkuana ken mangaramid iti ibagbagana kadatayo iti Saona, ti Biblia. Ti natulnog a puso tulongannatayo a mangtaginayon iti nasayaat a relasion ken Jehova. Wen, no naan-anay ti kinatulnogtayo, ‘dagiti sasao ti ngiwattayo ken ti panagmennamenna ti pusotayo, makaay-ayodanto iti saklang ni Jehova.’​—Salmo 19:14, NW.

Agsipud ta ay-ayatennatayo ni Jehova, sursuruannatayo nga agtulnog agpaay a pagimbagantayo. Ket magunggonaantayo unay no naimpusuan nga ipangagtayo ti nadiosan a pannursuro. (Isaias 48:17, 18) Siraragsak nga awatentayo ngarud ti tulong nga ipapaay ti nailangitan nga Amatayo babaen ti Saona, ti espirituna, ken ti organisasionna. Nagsayaat unay ti pannakaisurotayo a kas man la mangmangngegtayo ti timek manipud iti likudantayo a kunkunana: “Isu daytoy ti dalan, magnakayo kenkuana.” (Isaias 30:21) Bayat nga isursuronatayo ni Jehova babaen ti Biblia, dagiti Nakristianuan a publikasion, ken dagiti gimong iti kongregasion, sapay koma ta ipangagtayo, iyaplikartayo ti maad-adaltayo, ken ‘agtulnogtayo iti isuamin a bambanag.’​—2 Corinto 2:9.

Dakkel a rag-o ken adu a bendision ti ibunga ti natulnog a puso. Ikkannatayo iti natalna a panunot, ta ammotayo a makaay-ayotayo unay ken Jehova a Dios ken maparparagsaktayo ti pusona. (Proverbio 27:11) Ti puso a natulnog ket salaknib kadatayo no masulisogtayo a mangaramid iti dakes. Wen, masapul ngarud nga agtulnogtayo iti nailangitan nga Amatayo ken ikararagtayo: “Ikkam ti adipenmo iti maysa a natulnog a puso.”

[Picture Credit Line iti panid 29]

Manipud iti Self-Pronouncing Edition of the Holy Bible, a naglaon iti King James ken ti Revised version

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share