Tulonganyo Dagiti Sabsabali nga Agbalin a “Natulnog Manipud iti Puso”
1. Ania ti kayat ni Jehova nga aramiden dagiti agdaydayaw kenkuana?
1 Napateg ti panagtulnog tapno makaay-ayo ti panagdayawtayo ken Jehova. (Deut. 12:28; 1 Ped. 1:14-16) Iti din agbayag, dumtengto ti panangukom ti Dios “kadagidiay saan a makaammo iti Dios ken kadagidiay saan nga agtulnog iti naimbag a damag.” (2 Tes. 1:8) Kasanotayo a matulongan dagiti sabsabali nga agbalin a “natulnog manipud iti puso” kadagiti sursuro ti Sao ti Dios?—Roma 6:17.
2. Apay a nasken a tulongantayo dagiti sabsabali a mangpatanor iti nabileg a pammati?
2 Babaen ti Itutulong a Mangpatanor iti Pammati ken Ayat: Iti Kasuratan, ti panagtulnog ket nainaig unay iti pammati. Dinakamat ni apostol Pablo ti “bilin ti agnanayon a Dios tapno itandudo ti kinatulnog babaen ti pammati.” (Roma 16:26) Mabasa iti Hebreo kapitulo 11 ti adu a mapagulidanan iti pammati, nga adu kadakuada ti nagtignay a maitunos iti pagayatan ni Jehova. (Heb. 11:7, 8, 17) Iti kasumbangirna, ti kinasukir ket nainaig iti kinaawan pammati. (Juan 3:36; Heb. 3:18, 19) Nasken nga agbalintayo a nasigo a mangusar iti Sao ti Dios tapno matulongantayo dagiti sabsabali a mangpatanor iti pammati a mangpataud iti kinatulnog.—2 Tim. 2:15; Sant. 2:14, 17.
3. (a) Kasano a nainaig ti panagtulnog iti ayat? (b) Kasanotayo a matulongan dagiti mayad-adalan iti Biblia a mangpatanor iti ayatda ken ni Jehova?
3 Ti panagtulnog ket nainaig met iti ayat iti Dios. (Deut. 5:10; 11:1, 22; 30:16) “Daytoy ti kaipapanan ti ayat ti Dios,” kuna ti 1 Juan 5:3, “a tungpalentayo dagiti bilinna; ket kaskasdi a dagiti bilinna saanda a makapadagsen.” Kasanotayo a matulongan dagiti mayad-adalan iti Biblia a mangpatanor iti ayatda ken Jehova? Bayat ti panagadal, mangbirokkayo kadagiti gundaway a mangparayray iti apresasionda kadagiti galad ni Jehova. Iyebkasyo a mismo ti nauneg a panagyamanyo iti Dios. Tulonganyo ti estudiante a mangpanunot no kasanona a patanoren ti personal a relasionna ken ni Jehova. Kangrunaanna, ti ayat ken ni Jehova ti manggutugot kadatayo ken kadagiti sabsabali nga agtulnog kenkuana a naimpusuan.—Mat. 22:37.
4. (a) Apay a napateg ti ulidantayo? (b) Ania ti masapul nga aramidentayo tapno mapatanor ti “puso a natulnog”?
4 Babaen ti Ulidantayo: Ti maysa a nabileg a pamay-an tapno maallukoytayo dagiti sabsabali nga agtulnog iti naimbag a damag ket babaen ti ulidantayo. Ngem kasapulan ti agtultuloy a panagregget iti biangtayo tapno mapatanor ti “puso a natulnog.” (1 Ar. 3:9; Prov. 4:23) Ania ti ramanen daytoy? Taraonanyo ti pusoyo babaen ti regular a panagadal iti Biblia ken itatabuno kadagiti gimong. (Sal. 1:1, 2; Heb. 10:24, 25) Makilangenkayo kadagidiay naipamaysa ti pusoda iti pudno a panagdayaw. (Prov. 13:20) Makiramankayo a regular iti ministerio iti tay-ak, nga addaan iti napasnek a tarigagay a tumulong kadagiti tattao iti teritoriayo. Ikararagyo ken ni Jehova a tulongannakayo a mangpatanor iti nasayaat a puso. (Sal. 86:11) Liklikanyo dagiti bambanag a mangpadakes iti pusoyo, kas iti imoral wenno naranggas a paglinglingayan. Aramidenyo dagiti bambanag a mangyadani kadakayo iti Dios ken mangpabileg iti relasionyo kenkuana.—Sant. 4:7, 8.
5. Kasano a mabembendisionan dagidiay natulnog?
5 Impasigurado ni Jehova kadagiti nagkauna nga adipenna nga agkakamakam dagiti bendision nga umapay kadakuada no umimdengda iti timekna. (Deut. 28:1, 2) Kasta met ita, sibabaknang a bembendisionan ni Jehova dagidiay “agtultulnog kenkuana kas agturay.” (Ara. 5:32) Ngarud, babaen ti panangisuro ken ulidantayo, matulongantayo dagiti sabsabali nga agtulnog a naimpusuan.