“Patibkerenyo ti Puspusoyo”
“Kasapulanyo ti panagibtur, tapno iti kasta, kalpasan a naaramidyon ti pagayatan ti Dios, awatenyo ti kaitungpalan ti kari.”—HEBREO 10:36.
1, 2. (a) Ania ti napasamak kadagiti sumagmamano a Kristiano idi umuna a siglo? (b) Apay a nalaka a kumapuy ti pammati?
KADAGITI amin a nagsurat iti Biblia, ni apostol Pablo ti kaaduan iti naisurat no maipapan iti pammati. Masansan a dinakamatna dagidiay kimmapuy wenno natay ti pammatida. Kas pagarigan, ‘napadasan [da Himeneo ken Alejandro] ti pannakarba maipapan iti pammatida.’ (1 Timoteo 1:19, 20) Binaybay-an ni Demas ni Pablo agsipud ta “inayatna ti agdama a sistema ti bambanag.” (2 Timoteo 4:10) Dagiti dadduma, gapu kadagiti di nakristianuan ken minamaag nga aramidda, ‘pinaglikudanda ti pammati.’ Adda dagidiay naallilaw gapu iti saan a pudno a sirib ket “simiasi[da] manipud iti pammati.”—1 Timoteo 5:8; 6:20, 21.
2 Apay a napaay dagidi a napulotan a Kristiano? Bueno, “ti pammati isu ti sigurado a panangsegga kadagiti bambanag a namnamaen, ti nabatad a parangarang dagiti kinapudno nupay saan a nakita.” (Hebreo 11:1) Kasapulantayo ti pammati iti ditay makita. Saantay a kasapulan dayta kadagiti banag a makita. Nalaklaka ti agurnong iti makita a kinabaknang ngem ti di makita a naespirituan a kinabaknang. (Mateo 19:21, 22) Adu dagiti banag a makita—kas “ti derrep ti lasag ken ti derrep dagiti mata”—a makaawis unay iti imperpekto a lasagtayo ken mangpakapuy iti pammatitayo.—1 Juan 2:16.
3. Ania a kita ti pammati ti rebbeng a patanoren koma ti maysa a Kristiano?
3 Kaskasdi, kuna ni Pablo a “ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” Addaan ni Moises iti kasta a pammati. “Kimmita a sipapasnek iti pannakabayad ti gunggona” ken “nagtultuloy a natibker a kasla kitkitaenna daydiay Maysa a di makita.” (Hebreo 11:6, 24, 26, 27) Kasapulan ti maysa a Kristiano ti kastoy a kita ti pammati. Kas nadakamat iti immun-una nga artikulo, nagsayaat a pagwadan ni Abraham iti daytoy a banag.
Ti Mapagulidanan a Pammati ni Abraham
4. Kasano a ti pammati ni Abraham inapektaranna ti panagbiagna?
4 Adda ni Abraham sadi Ur idi inkari ti Dios nga agtaud kenkuana ti bin-i a pakabendisionan dagiti tattao iti amin a nasion. (Genesis 12:1-3; Aramid 7:2, 3) Gapu iti dayta a kari, nagtulnog ni Abraham ken Jehova, a napan nga immuna idiay Haran sa idiay Canaan. Sadiay nga inkari ni Jehova nga itedna ti daga kadagiti kaputotan ni Abraham. (Genesis 12:7; Nehemias 9:7, 8) Nupay kasta, matungpal ti kaaduan iti inkari ni Jehova kalpasan ti ipapatay ni Abraham. Kas pagarigan, awan a pulos ti natagikua ni Abraham a paset ti Canaan—malaksid iti rukib ti Macpela a ginatangna a kas pagitaneman. (Genesis 23:1-20) Kaskasdi, adda pammatina iti sao ni Jehova. Kangrunaan iti amin, adda pammatina iti masanguanan a “siudad nga addaan kadagiti pudpudno a pamuon, a ti nangibangon ken nangaramid iti dayta a siudad isu ti Dios.” (Hebreo 11:10) Ti kasta a pammati ti nangsustiner kenkuana iti intero a panagbiagna.
5, 6. Kadagiti ania a pamay-an a nasubok ti pammati ni Abraham no maipapan kadagiti kari ni Jehova?
5 Maanninaw daytoy nangruna mainaig iti kari nga agbalinto a maysa a dakkel a nasion dagiti kaputotan ni Abraham. Tapno mapasamak daytoy, nasken a maaddaan ni Abraham iti anak a lalaki, ket sa la naparaburan iti anak kalpasan ti nabayag a panagurayna. Ditay ammo no mano ti tawenna idi damo a nangngegna ti kari ti Dios, ngem iti nawatiwat a panagbiahena a nagturong idiay Haran, saan pay idi a pinaraburan ni Jehova iti anak. (Genesis 11:30) Bayat ti kaaddana idiay Haran, ‘nakaurnong kadagiti sanikua ken nakagun-od kadagiti tattao,’ ket idi immakar idiay Canaan, 75 ti tawenna ket 65 ni Sara. Ngem, awan pay laeng idi ti anakda. (Genesis 12:4, 5) Idi nasurok a 75 ti tawen ni Sara, pinanunotna a baket unayen ket dinan maipaayan ni Abraham iti anak. Gapuna, mayannurot iti kaugalian kadagidi a tiempo, intedna ken Abraham ti tagabuna a babai a ni Agar, ket naaddaan ni Abraham iti anak a lalaki babaen kenkuana. Ngem saan a daytoy ti naikari nga ubing. Idi kamaudiananna, napagtalaw da Agar ken ni Ismael nga anakna. Kaskasdi, idi nagpakpakaasi ni Abraham maipuon kadakuada, inkari ni Jehova a bendisionanna ni Ismael.—Genesis 16:1-4,10; 17:15, 16, 18-20; 21:8-21.
6 Iti tiempo nga intuding ti Dios—naunday a tiempo kalpasan ti damo a pannakangngegda iti kari—naaddaan da 100-anyos nga Abraham ken ni 90-anyos a Sara iti anak a lalaki, ni Isaac. Nalaus la ketdi ti ragsakda! Para kadagitoy lakay ken baketen nga agassawa, arigna panagungar idi nangpataud iti baro a biag dagiti “natayen” a bagida. (Roma 4:19-21) Nabayagda a nagur-uray, ngem idi natungpal kamaudiananna ti kari, saan nga ubbaw ti panagurayda.
7. Kasano a nainaig ti pammati iti panagibtur?
7 Ti ulidan nga impakita ni Abraham ipalagipna kadatayo a ti pammati saan koma nga apagbiit laeng. Innaig ni Pablo ti pammati iti panagibtur idi insuratna: “Kasapulanyo ti panagibtur, tapno iti kasta, kalpasan a naaramidyon ti pagayatan ti Dios, awatenyo ti kaitungpalan ti kari. . . . Saan a datayo ti kita nga agsanud nga agturong iti pannakadadael, no di ket ti kita nga addaan pammati nga agturong iti pannakataginayon a sibibiag ti kararua.” (Hebreo 10:36-39) Adu ti nabayagen nga agur-uray iti pannakatungpal ti kari. Agur-uray dagiti dadduma iti unos ti panagbiagda. Sussustineren ida ti nabileg a pammatida. Ket, kas ken Abraham, awatendanto ti gunggona iti panawen nga intuding ni Jehova.—Habacuc 2:3.
Panagimdeng iti Dios
8. Kasano ti panagimdengtayo iti Dios ita, ket apay a pabilgen dayta ti pammatitayo?
8 Adda uppat a banag a nangpabileg iti pammati ni Abraham, ket dagitoy met laeng ti makatulong kadatayo. Umuna, impakitana ti ‘pammatina nga adda Dios’ babaen ti panangipangagna idi nagsao ni Jehova. Iti kasta, naiduma kadagiti Judio idi kaaldawan ni Jeremias, a mamatida ken Jehova ngem awan pammatida kadagiti saona. (Jeremias 44:15-19) Iti kaaldawantayo, agsasao ni Jehova kadatayo babaen kadagiti binulong ti Biblia, ti naipaltiing a Saona a, kas kuna ni Pedro, kasla maysa a “pagsilawan nga agsilsilnag iti nasipnget a disso . . . kadagiti pusoyo.” (2 Pedro 1:19) No sipapasnek a basaentayo ti Biblia, ‘mataraonantayo kadagiti sasao ti pammati.’ (1 Timoteo 4:6; Roma 10:17) Maysa pay, kadagitoy maudi nga al-aldaw, mangipapaay “ti matalek ken masirib nga adipen” iti naespirituan a ‘taraon iti umiso a tiempo,’ ken pannarabay iti panangyaplikar kadagiti prinsipio ti Biblia ken panangtarus iti padto ti Biblia. (Mateo 24:45-47) Ti panagimdeng ken Jehova babaen kadagitoy a wagas ket nasken unay tapno maaddaantayo iti nabileg a pammati.
9. Ania ti ibungana no pudno a mamatitayo iti namnamatayo kas Kristiano?
9 Naisinggalut ti pammati ni Abraham iti namnamana. “Naibatay iti namnama isu naaddaan iti pammati, tapno agbalin koma nga ama ti adu a nasnasion.” (Roma 4:18) Daytoy ti maikadua a banag a makatulong kadatayo. Pulos a ditay koma liplipatan a ni Jehova ti “mananggunggona kadagidiay sipapasnek a mangsapsapul kenkuana.” Kinuna ni apostol Pablo: “Agtartrabahotayo a sipipinget ken umag-agawatayo, agsipud ta insadagtayo ti namnamatayo iti sibibiag a Dios.” (1 Timoteo 4:10) No pudno a mamatitayo iti namnamatayo kas Kristiano, ti intero a panagbiagtayo ti mangipaneknek nga adda pammatitayo, kas ken Abraham.
Pannakisao iti Dios
10. Ania a kita a kararag ti mangpabileg iti pammatitayo?
10 Nakisao idi ni Abraham iti Dios, ket daytoy ti maikatlo a banag a nangpabileg iti pammatina. Mabalintay met ita ti makisao ken Jehova, a gundawayantayo ti sagut a kararag babaen ken Jesu-Kristo. (Juan 14:6; Efeso 6:18) Kalpasan ti panangisaritana iti pangngarig a mangipagpaganetget iti kinapateg ti naynay a panagkararag, insaludsod ni Jesus: “Inton dumteng ti Anak ti tao, pudno aya a masarakannanto ti pammati ditoy daga?” (Lucas 18:8) Saan a dinarasudos wenno automatiko ti makapabileg pammati a kararag. Napnuan kaipapanan dayta. Kas pagarigan, nasken unay ti naimpusuan a panagkararag no adda napateg a desisionantayo wenno no mariribukantayo unay.—Lucas 6:12, 13; 22:41-44.
11. (a) Kasano a napabileg ni Abraham idi linuktanna ti pusona iti Dios? (b) Ania ti maadaltayo iti kapadasan ni Abraham?
11 Idi lumakayen ni Abraham ket di pay la inted ni Jehova kenkuana ti naikari a bin-i, nakisao iti Dios maipapan iti pakaseknanna. Liniwliwa ni Jehova. Ania ti resultana? ‘Pinati [ni Abraham] ni Jehova ket daytoy imbilangna kenkuana a kinalinteg.’ Kalpasanna, nangted ni Jehova iti tanda a mangpatalged iti makaliwliwa a sasaona. (Genesis 15:1-18) No luktantayo ti pusotayo ken Jehova iti kararag, awatentayo dagiti pammatalged ni Jehova iti Saona, ti Biblia, ken agtulnogtayo kenkuana buyogen ti naan-anay a pammati, pabilgen met ni Jehova ti pammatitayo.—Mateo 21:22; Judas 20, 21.
12, 13. (a) Kasano a nabendisionan ni Abraham idi nagpaidalan ken Jehova? (b) Ania a kapkapadasan ti mangpabileg iti pammatitayo?
12 Ti maikapat a banag a nangpabileg iti pammati ni Abraham isu ti panangtarabay kenkuana ni Jehova gapu iti panagpaidalanna iti Dios. Idi napan sinubbot ni Abraham ni Lot kadagiti rimmaut nga ari, pinagballigi ni Jehova. (Genesis 14:16, 20) Bayat ti temporario a panagtaeng ni Abraham iti daga a tawidento dagiti kaputotanna, binendisionan ni Jehova iti material a pamay-an. (Idiligyo ti Genesis 14:21-23.) Inwanwan ni Jehova ti mayordomona idi napan nagsapul iti maitutop a babai nga asawaen ni Isaac. (Genesis 24:10-27) Wen, ni Jehova “binendisionanna ni Abraham iti isuamin.” (Genesis 24:1) Iti kasta, inawagan ni Jehova ni Abraham kas “gayyemko” gapu iti nabileg a pammatina ken nasinged a relasionna ken Jehova a Dios.—Isaias 41:8; Santiago 2:23.
13 Mabalintay kadi ita ti maaddaan iti kasta a nabileg a pammati? Wen. No, kas ken Abraham, subokentayo ni Jehova babaen ti panangtungpal kadagiti bilinna, bendisionannatayto met, ket pabilgen dayta ti pammatitayo. Kas pagarigan, no sukimatentayo ti Report iti 1998 a Tawen Serbisio, makitatayo nga adu ti naparaburan iti nakaskasdaaw a wagas gapu iti panangtungpalda iti bilinna a pannakaikaskasaba ti naimbag a damag.—Marcos 13:10.
Rekord ti Pammati Ita
14. Kasano a binendisionan ni Jehova ti pannakaiwaras ti Kingdom News Num. 35?
14 Idi Oktubre 1997, naballigi unay ti sangalubongan a panangiwaras iti Kingdom News Num. 35 gapu iti regta ken anep dagiti minilion a Saksi. Alaentay nga ehemplo ti napasamak idiay Ghana. Agarup 2.5 milion a kopia ti naibunong iti uppat a pagsasao, ket kas bungana, ag-2,000 ti nagkiddaw a mayadalan iti Biblia. Idiay Cyprus, nadlaw ti dua a Saksi nga adda maysa a padi a mangsursurot kadakuada bayat nga agiwarwarasda iti Kingdom News. Kalpasan ti sumagmamano a kanito, tinukonanda iti maysa a kopia ti Kingdom News. Addan kopiana ket kinunana: “Magustuak unay ti mensahena ket kayatko a kablaawan dagiti nangipablaak iti dayta.” Idiay Denmark, 1.5 milion a kopia ti Kingdom News ti naibunong ket nasayaat dagiti resultana. Kastoy ti kinuna ti maysa a babai nga agtartrabaho iti public relations sadiay: “Agpaay iti amin a tao ti mensahe a linaon ti polieto. Nalaka a maawatan, ken tignayennaka, paggagarennaka a mangammo iti ad-adu pay. Husto ti ibagbagana!”
15. Aniada a kapadasan ti mangipakita a binendisionan ni Jehova ti panagregget a mangdanon kadagiti tattao iti uray sadinoman?
15 Idi 1998, inkagumaan dagiti Saksi a kasabaan dagiti tattao saan laeng a kadagiti pagtaenganda no di ket iti uray sadinoman. Idiay Côte d’Ivoire, sinarungkaran ti agassawa a misionero ti 322 a barko kadagiti pantalan. Nakaipaimada iti 247 a libro, 2,284 a magasin, 500 a broshur, ken ginasut a tract, agraman video a buyaen dagiti marinero bayat nga addada iti taaw. Idiay Canada, napan ti maysa a Saksi iti talyer. Interesado ti makinkukua, ket nagtalinaed ti kabsat iti uppat ket kagudua nga oras, nupay maysa laeng nga oras wenno nasursurok pay ti nabusbosna a nangasaba no awan ti kustomer. Idi agangay, napagnumuanda ti agadal iti kada alas 10:00 ti rabii. Ngem pasaray tumengngan ti rabii no mangrugida ket alas dos iti parbangonen no malpasda. Narigat ti eskediulda, ngem nasayaat dagiti resultana. Inkeddeng ti lalaki nga irikep ti puestona no iti Domingo tapno makatabuno kadagiti gimong. Napartak ken nasayaat ti irarang-ayna agraman ti pamiliana.
16. Aniada a kapadasan ti mangipakita a nabileg nga alikamen iti panangasaba ken panangisuro ti broshur a Kalikaguman ken ti libro a Pannakaammo?
16 Agtultuloy a nabileg nga instrumento iti panangasaba ken panangisuro ti broshur nga Ania ti Kalikaguman ti Dios Kadatayo? ken ti libro a Pannakaammo a Mangiturong iti Biag nga Agnanayon. Idiay Italia, adda maysa a madre nga agur-uray iti bus a nangala iti Kingdom News. Iti sumuno nga aldaw, adda manen immasideg kenkuana ket nangala iti broshur a Kalikaguman. Manipud idin, inaldaw a makiinnadal iti Biblia iti uneg ti 10 agingga iti 15 a minuto iti pagsardengan ti bus. Kalpasan ti maysa ket kagudua a bulan, pinanawanna ti kombento ket nagawid idiay Guatemala tapno ituloyna ti panagadalna. Idiay Malawi, nakaunget ni Lobina, maysa a napeklan a mannakimisa a babai, idi rinugian dagiti babbalasangna ti nakipagadal iti Biblia kadagiti Saksi ni Jehova. Kaskasdi, gundawayan no kua dagiti annakna nga iranud kenkuana ti kinapudno iti Biblia. Idi Hunio 1997, nakita ni Lobina ti libro a Pannakaammo ket naintriga iti sasao a “Pannakaammo a Mangiturong.” Iti Hulio, immannugot nga agadal iti Biblia. Iti Agosto, timmabuno iti kombension distrito ket dimngeg a naimbag iti intero a programa. Idi agtapus dayta a bulan, immikkat iti relihionna ket nakualipikaran a kas di bautisado nga agibumbunannag. Nabautisaran idi Nobiembre 1997.
17, 18. Kasano a nakatulong dagiti video ti Sosiedad kadagiti tattao a ‘makakita’ kadagiti naespirituan a banag?
17 Adu ti natulongan dagiti video ti Sosiedad a ‘makakita’ kadagiti naespirituan a banag. Idiay Mauritius, immikkat ti maysa a lalaki iti relihionna gapu ta awan ti panagkaykaysa sadiay. Impakita kenkuana ti maysa a misionero ti panagkaykaysa dagiti Saksi ni Jehova, nga inusarna ti video a United by Divine Teaching. Nagustuan dayta ti lalaki ket kinunana: “Dakayo a Saksi ni Jehova addakayon iti Paraiso!” Immannugot nga agadal iti Biblia. Idiay Japan, impabuya ti maysa a kabsat a babai iti di manamati a lakayna ti video a Jehovah’s Witnesses—The Organization Behind the Name, ket natignay ni lakayna a makipagadal iti Biblia a regular. Idi nabuyana ti United by Divine Teaching, kayatnan ti agbalin a maysa kadagiti Saksi ni Jehova. Ti nagkatlo-paset a serye a napauluan The Bible—A Book of Fact and Prophecy ket nakatulong kenkuana a mangyaplikar kadagiti prinsipio ti Biblia iti biagna. Kamaudiananna, impakita kenkuana ti Jehovah’s Witnesses Stand Firm Against Nazi Assault a pabilgen ni Jehova dagiti adipenna iti sango dagiti pammarigat ni Satanas. Nabautisaran ti lalaki idi Oktubre 1997.
18 Sumagmamano laeng dagitoy kadagiti nagadu a kapadasan a natagiragsak iti napalabas a tawen serbisio. Ipakita dagitoy nga addaan dagiti Saksi ni Jehova iti nabiag a pammati ket pabpabilgen ni Jehova dayta a pammati babaen ti panangbendisionna iti aktibidadda.—Santiago 2:17.
Patanorenyo ti Pammati Ita
19. (a) Kasano a nasaysayaat ti kasasaadtayo ngem ni Abraham? (b) Mano ti nagtataripnong idi napan a tawen a nanglaglagip iti sakripisio nga ipapatay ni Jesus? (c) Kadagiti ania a pagilian a naisangsangayan ti kaadu dagiti timmabuno iti Memorial idi napan a tawen? (Kitaenyo ti tsart iti panid 12 agingga iti 15.)
19 Iti adu a pamay-an, nasaysayaat ti kasasaadtayo ngem ni Abraham. Ammotayo a tinungpal ni Jehova amin a karina ken Abraham. Tinawid dagiti kaputotan ni Abraham ti Canaan, ket nagbalinda a dakkel a nasion. (1 Ar-ari 4:20; Hebreo 11:12) Maysa pay, agarup 1,971 a tawen kalpasan ti ipapanaw ni Abraham idiay Haran, ni Jesus a kaputotanna ket binautisaran ni Juan a Mammautisar iti danum ket kalpasanna babaen ti nasantuan nga espiritu ni Jehova a mismo, nagbalin a Mesias, ti Bin-i ni Abraham iti naan-anay, naespirituan nga anag. (Mateo 3:16, 17; Galacia 3:16) Idi Nisan 14, 33 K.P., indaton ni Jesus ti biagna kas subbot a maipaay kadagidiay mamati kenkuana. (Mateo 20:28; Juan 3:16) Minilion ti mabembendisionan ita babaen kenkuana. Idi napan a tawen, 13,896,312 ti nagtataripnong iti Nisan 14 kas pananglaglagip iti daytoy naisangsangayan nga ebkas ti ayat. Anian a pannakaalangon ni Jehova, ti Naindaklan a Manangtungpal kadagiti kari!
20, 21. (a) Kasano a dagiti tattao manipud iti amin a nasion binendisionanda ti bagbagida babaen ti Bin-i ni Abraham idi umuna a siglo, ken kasanoda a bembendisionan ti bagbagida ita?
20 Idi umuna a siglo, adu manipud kadagiti amin a nasion—nangrugi iti natural nga Israel—ti nangipakita iti pammati iti daytoy a Bin-i ni Abraham ken nagbalin a napulotan nga annak ti Dios, miembro ti baro, naespirituan nga “Israel ti Dios.” (Galacia 3:26-29; 6:16; Aramid 3:25, 26) Addaanda iti natalged a namnama a gumun-od iti imortal nga espiritu a biag sadi langit kas makipagturay iti Pagarian ti Dios. Agdagup laeng iti 144,000 ti mabendisionan iti kastoy a pamay-an, ket manmano laengen kadakuada ti natda. (Apocalipsis 5:9, 10; 7:4) Idi napan a tawen, 8,756 ti nangipaneknek iti pammatida a mairamanda iti daytoy a bilang babaen ti pannakipasetda kadagiti emblema iti pannakarambak ti Memorial.
21 Paset ti “dakkel a bunggoy” a naipadto iti Apocalipsis 7:9-17 ti gistay amin a Saksi ni Jehova ita. Gapu ta mabembendisionanda baeten ken Jesus, adda namnamada nga agbiag nga agnanayon iti paraiso a daga. (Apocalipsis 21:3-5) Ti 5,888,650 a nakiraman iti trabaho a panangasaba idi 1998 ket pammaneknek a pudno a “dakkel” daytoy a bunggoy. Nangnangruna a makaparagsak a maammuan nga iti kaunaan a gundaway, agpada a nakaireport ti Russia ken Ukraine iti nasurok a 100,000 nga agibumbunannag. Nagsayaat met ti report ti Estados Unidos—1,040,283 nga agibumbunannag idi Agosto! Tallo laeng dagitoy kadagiti 19 a pagilian a nakaireport iti nasurok a 100,000 nga agibumbunannag idi napan a tawen.
Namnama a Dandanin Matungpal
22, 23. (a) Apay a rebbeng a patibkerentayo ti pusotayo ita? (b) Kasanotay nga agbalin a kas ken Abraham, saan a kas kadagiti awanan pammati a dinakamat ni Pablo?
22 Napalagipan dagiti timmabuno iti Memorial no sadino ti yantayon iti kaitungpalan dagiti kari ni Jehova. Idi 1914, naisaad ni Jesus kas Ari ti nailangitan a Pagarian ti Dios, a nangrugin ti kaaddana iti pannakabalin ti Pagarian. (Mateo 24:3; Apocalipsis 11:15) Wen, agturturayen sadi langit ti Bin-i ni Abraham! Kinuna ni Santiago kadagiti Kristiano idi kaaldawanna: “Alagadenyo met ti kinaanus; patibkerenyo ti puspusoyo, agsipud ta ti kaadda ti Apo ket immasidegen.” (Santiago 5:8) Bueno, nangrugin dayta a kaadda! Ad-adda ngarud a rebbeng a patibkerentayo ti pusotayo!
23 Sapay koma ta kanayon a mapabaro ti panagtalektayo kadagiti kari ti Dios babaen ti regular a panagadal iti Biblia ken nabagas a panagkararag. Sapay koma ta kankanayon a masagraptayo ti pammendision ni Jehova bayat a tungtungpalentayo ti Saona. Iti kasta agbalintayto a kas ken Abraham, saan a kas kadagidiay a kimmapuy ken natay ti pammatida, kas dinakamat ni Pablo. Awan ti makaisina kadatayo iti nasantuan unay a pammatitayo. (Judas 20) Ikararagtayo a pudno koma daytoy kadagiti amin nga adipen ni Jehova kabayatan ti 1999 a tawen serbisio ken agingga iti agnanayon a masanguanan.
Ammoyo Kadi?
◻ Kasano ti panagimdengtayo iti Dios ita?
◻ Ania dagiti gunggona nga itden dagiti nabagas a kararag iti Dios?
◻ No sitatallugod nga agpaidalantayo ken Jehova, kasano a mapabileg ti pammatitayo?
◻ Aniada a benneg ti tinawen a report (panid 12 agingga iti 15) ti nangnangruna a paginteresanyo?
[Tsart iti panid 12-15]
REPORT TI 1998 A TAWEN SERBISIO DAGITI SAKSI NI JEHOVA ITI SANGALUBONGAN
(Kitaem ti bound volume)
[Ladawan iti panid 16]
No ipangagtayo ti Sao ni Jehova, mapabaro ti panagtalektayo kadagiti karina
[Ladawan iti panid 18]
Bumileg ti pammatitayo no makiramantayo iti ministerio