Makapagibturkayo Agingga iti Panungpalan

“Buyogen ti panagibtur tarayentayo koma ti lumba a naikabil iti sanguanantayo.”​—HEBREO 12:1.

1, 2. Ania ti kayat a sawen ti agibtur?

“KASAPULANYO ti panagibtur,” insurat ni apostol Pablo kadagiti Hebreo a Kristiano idi umuna a siglo. (Hebreo 10:36) Kas panangipaganetget iti kinapateg daytoy a galad, indagadag met ni apostol Pedro kadagiti Kristiano: “Inayonyo iti pammatiyo . . . ti panagibtur.” (2 Pedro 1:5, 6) Ngem ania aya a talaga ti panagibtur?

² Sigun iti maysa a Griego-Ingles a diksionario, ti kaipapanan ti Griego a verbo para iti “agibtur” ket “agtalinaed imbes a pumanaw . . . agintek, saan a sumuko.” Maipapan iti Griego a nombre para iti “panagibtur,” kuna ti maysa a reperensia: “Isu dayta ti espiritu a mangitured kadagiti bambanag, saan laeng a basta panangawat iti kasasaad, no di ket buyogen ti nasged a namnama . . . Isu dayta ti kalidad a mamagtalinaed iti maysa a tao a sitatakder a nakasango iti napigsa nga angin. Isu dayta ti galad a mamagbalin iti karigatan a pannubok a pakaidayawan agsipud ta iti labes ti rigat, makitana ti kalat.” No kasta, ti panagibtur tulonganna ti maysa a tao nga agtalinaed a natibker iti sango dagiti tubeng ken pakarigatan ken di maawanan iti namnama. Siasino ti nangnangruna nga agkasapulan iti daytoy a kalidad?

3, 4. (a) Siasino ti nasken nga agibtur? (b) Apay a nasken nga agibturtayo agingga iti panungpalan?

³ Iti piguratibo a pamay-an, makiramraman amin a Kristiano iti lumba a mangkalikagum iti panagibtur. Idi agarup tawen 65 K.P., insurat ni apostol Pablo iti katrabahuan ken matalek a kaduana nga agdaldaliasat a ni Timoteo dagitoy a makaliwliwa a sasao: “Nakirupakak iti nasayaat a dangadang, tinarayko ti tarayen agingga iti pagpatinggaan, tinungpalko ti pammati.” (2 Timoteo 4:7) Iti panangibagana a “tinarayko ti tarayen agingga iti pagpatinggaan,” inyarig ni Pablo ti biagna kas Kristiano iti lumba, nga adda pangrugian ken pagpatinggaanna. Dandani idin a sibaballigi a maturpos ni Pablo ti lumba, ket sitatalek a mangnamnama nga awatenna ti gunggona. “Manipuden itoy a tiempo,” intuloyna a kinuna, “sisasaganan maipaay kaniak ti korona ti kinalinteg, nga itdento kaniak ti Apo, ti nalinteg nga ukom, kas maysa a gunggona iti dayta nga aldaw.” (2 Timoteo 4:8) Masigurado ni Pablo a magun-odna ti gunggona agsipud ta nagibtur agingga iti panungpalan. Datayo met ngay?

⁴ Tapno maparegta dagidiay nakiraman iti lumba, insurat ni Pablo: “Tarayentayo koma ti lumba a naikabil iti sanguanantayo.” (Hebreo 12:1) Kas Kristiano, rinugiantayo ti nakiraman iti daytoy a lumba a mangkalikagum iti panagibtur idi nagdedikartayo ken Jehova a Dios babaen ken Jesu-Kristo. Napateg ti nasayaat a panangrugi kas ad-adalan, ngem ti kapatgan iti amin isu ti panangileppastayo iti inrugitayo. Kinuna ni Jesus: “Ti nakapagibtur agingga iti panungpalan isunto ti maisalakan.” (Mateo 24:13) Biag nga agnanayon ti gunggona nga agur-uray kadagidiay sibaballigi a makaturpos iti lumba! No kasta, bayat a sipapanunottayo iti kalat, masapul nga agibturtayo agingga iti panungpalan. Ania ti tumulong kadatayo a mangragpat iti dayta a kalat?

Kasapulan ti Umiso a Taraon

5, 6. (a) Tapno makapagibturtayo iti lumba a maipaay iti biag, ania ti masapul nga ipaayantayo iti atension? (b) Aniada a naespirituan a probision ti masapul nga aprobetsarentayo, ken apay?

⁵ Idi un-unana, maang-angay ti agdindinamag nga Isthmian Games idiay Grecia, iti asideg ti siudad ti Corinto. Awan duadua nga ammo ni Pablo a pamiliar kadagiti kakabsat idiay Corinto dagiti ay-ayam ken dadduma pay a pasalip a maang-angay idi sadiay. Maibatay iti dayta a pannakaammoda, impalagipna kadakuada ti lumba a maipaay iti biag a pakisalipanda: “Dikay aya ammo a dagiti tumataray iti maysa a lumba agtarayda amin, ngem maysa laeng ti umawat iti gunggona? Agtaraykayo iti kasta a wagas tapno magun-odanyo dayta.” Impaganetget ni Pablo ti kinapateg ti panagtultuloy iti lumba ken panagporsegi agingga iti pagturposan. Ngem ania ti tumulong kadakuada tapno maaramidda dayta? Intuloyna a kinuna: “Tunggal tao a makisalsalisal alagadenna ti panagteppel iti isuamin a bambanag.” Wen, nainget ti panagsanay dagiti makisalip kadagidi a nagkauna nga ay-ayam, nga annadanda ti kanen ken inumenda, ken disiplinaenda ti bagida iti amin nga aktibidadda tapno mangabakda.​—1 Corinto 9:24, 25.

⁶ Komusta met ngay ti lumba a nakisalipan dagiti Kristiano? “Masapul nga ipaayam iti atension ti naespirituan a taraonmo tapno makapagtalinaedka iti lumba a maipaay iti biag,” kuna ti maysa a panglakayen iti maysa a kongregasion dagiti Saksi ni Jehova. Usigenyo ti naespirituan a taraon nga ipapaay kadatayo ni Jehova, “ti Dios a mangipaay iti panagibtur.” (Roma 15:5) Ti kangrunaan a gubuayan ti naespirituan a taraontayo isu ti Saona, ti Biblia. Saan kadi a rumbeng a mantenerentayo ti nasayaat nga eskediul iti panagbasa iti Biblia? Babaen ti “matalek ken masirib nga adipen,” ipapaay met ni Jehova dagiti naintiempuan a pagiwarnak a Ti Pagwanawanan ken Agriingkayo! ken dadduma pay a naibatay-Biblia a publikasion. (Mateo 24:45) Ti naanep a panangadal kadagitoy pabilgennatayo iti naespirituan. Wen, masapul nga iwayaantayo ti personal a panagadal, a ‘gatangentayo ti nainggundawayan a tiempo’ para iti dayta.​—Efeso 5:16.

7. (a) Apay a ditay koma mapnek iti basta pannakaammo kadagiti pagdamdamuan a Nakristianuan a doktrina? (b) Kasanotay a ‘rumang-ay iti kinanataengan’?

⁷ Tapno makapagtalinaedtayo kas ad-adalan ni Kristo, saantay nga agpatingga iti “pagdamdamuan a doktrina” no di ket ‘rumang-aytayo iti kinanataengan.’ (Hebreo 6:1) Nasken ngarud a patanorentayo ti panaginteres iti “kaakaba ken kaatiddog ken kangato ken kauneg” ti kinapudno ken mangipaunegtayo iti “nakired a taraon [nga] agpaay kadagiti nataengan a tattao.” (Efeso 3:18; Hebreo 5:12-14) Alaentay a pagarigan ti uppat a mapagtalkan a salaysay maipapan iti panagbiag ni Jesus ditoy daga​—dagiti Ebanghelio da Mateo, Marcos, Lucas, ken Juan. No adalentayo a naimbag dagitoy a salaysay dagiti Ebanghelio, saantay laeng a basta maammuan dagiti inaramid ni Jesus ken ti katataona no di pay ket maawatantayo ti wagas ti panagpampanunot a nangtignay kenkuana. Iti kasta, ‘maadda [kadatayo] ti panunot ni Kristo.’​—1 Corinto 2:16.

8. Kasano a matulongannatayo dagiti Nakristianuan a gimong nga agibtur iti lumba a maipaay iti biag?

⁸ Binagbagaan ni Pablo dagiti kapammatianna: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian dagiti sumagmamano, no di ket agpipinnaregtatayo iti maysa ken maysa, ket nangnangruna a kasta bayat a makitkitayo a ti aldaw umas-asidegen.” (Hebreo 10:24, 25) Anian a gubuayan ti pammaregta dagiti Nakristianuan a gimong! Ken anian a makapabang-ar ti makitimpuyog kadagiti naayat a kakabsat a maseknan ken madadaan a tumulong kadatayo nga agibtur agingga iti panungpalan! Ditay mabalin a laglag-anen daytoy a naayat a probision a naggapu ken Jehova. Babaen ti naanep a personal a panagadal ken regular a pannakigimong, ‘agbalintayo [koma] a nataenganen iti pannakabalin ti pannakaawat.’​—1 Corinto 14:20.

Dagiti Agbuybuya a Manggutugot Kadakayo

9, 10. (a) Kasano a dagiti agbuybuya ket gubuayan ti pammaregta iti lumba a mangkalikagum iti panagibtur? (b) Ania ti ‘dakkel nga ulep dagiti saksi a nanglikmut kadatayo’ a nadakamat iti Hebreo 12:1?

⁹ Ngem uray no nakasagana a naimbag ti maysa a tumataray, mabalin nga adda dagiti mapasamak bayat ti panagtarayna a mangpasardeng kenkuana. “Nagtartaraykayo a naimbag. Siasino ti nanglapped kadakayo iti panagtultuloyyo nga agtulnog iti kinapudno?” insaludsod ni Pablo. (Galacia 5:7) Nakitimpuyog la ketdi dagiti dadduma a Kristiano sadi Galacia kadagiti dakes a kakadua isu a nasingada iti lumba a maipaay iti biag. Iti sabali a bangir, ti pannaranay ken pammaregta dagiti sabsabali pagbalinenna ti lumba a nalaklaka nga ibturan. Mayarig daytoy iti impluensia dagiti agbuybuya kadagiti makisalip iti ay-ayam. Dagiti magagaran a tattao rubrobanda ti gagar a manggutugot kadagiti makisalip manipud rugi agingga iti ngudo. Ti naragsak a panagririaw dagiti agbuybuya, a masansan a mapakuyogan iti napigsa a musika ken palakpak, ikkanna dagiti makisalip iti inspirasion a kasapulanda bayat nga umas-asidegda iti pagpatinggaan. Wen, dagiti mannakipagrikna nga agbuybuya nasayaat ti impluensiada kadagidiay makilumlumba.

¹⁰ Iti lumba a maipaay iti biag a pakisalipan dagiti Kristiano, siasino dagiti agbuybuya? Kalpasan nga innagananna dagiti matalek a saksi ni Jehova sakbay ti panawen dagiti Kristiano, kas nailanad iti maika-11 a kapitulo ti Hebreo, insurat ni Pablo: “No kasta, ngarud, gapu ta addaantayo iti kastoy kadakkel nga ulep dagiti saksi a nanglikmut kadatayo, . . . tarayentayo koma ti lumba a naikabil iti sanguanantayo.” (Hebreo 12:1) Iti panangaramatna iti ulep kas pangyaspingan, saan nga inusar ni Pablo ti Griego a sao a mangdeskribir iti masnup a kadakkel ken porma ti ulep. Imbes ketdi, inaramatna ti maysa a sao a sigun iti leksikograpo a ni W. E. Vine “kaipapananna ti napuskol nga ulep a nangkumot iti tangatang.” Nalawag nga adda iti panunot ni Pablo ti umariwekwek a saksi​—a gapu ta nakaad-aduda, kasda la napuskol nga ulep.

11, 12. (a) Kasano a dagiti matalek a saksi sakbay ti panawen dagiti Kristiano magutugotdatayo, no ar-arigen, nga agibtur iti lumba a nakisalipantayo? (b) Kasanotay a magunggonaan a naan-anay iti ‘dakkel nga ulep dagiti saksi’?

¹¹ Mabalin kadi a literal nga agbuya ita dagiti matalek a saksi sakbay ti panawen dagiti Kristiano? Imposible dayta. Matmaturogda aminen ken patay, nga agur-urayda iti panagungar. Nupay kasta, isuda a mismo ket naballigi a tumataray idi sibibiagda pay, ket nailanad ti ulidanda kadagiti binulong ti Biblia. Bayat nga ad-adalentayo ti Kasuratan, silalawag a mailadawantayo iti panunottayo dagitoy a matalek a tattao ken no ar-arigen, magutugotdatayo nga agtaray iti lumba agingga a makagtengtayo iti pagpatinggaan.​—Roma 15:4.a

¹² Kas pagarigan, no gargariendatayo dagiti nailubongan nga oportunidad, saan kadi a magutugottayo nga agtalinaed iti lumba no mapanunottayo ti panangiwaksi ni Moises iti kinadayag ti Egipto? No kasla nakaro ti suot a pakaipasanguantayo, ti pananglaglagip iti narigat a pannubok a nakaipasanguan ni Abraham idi naibilin nga idatonna ni Isaac nga anakna sigurado a paregtaennatayo a di sumuko iti pannakidangadangtayo a maipaay iti pammati. Ti kadakkel ti impluensia kadatayo dagitoy a saksi a kasla ‘dakkel nga ulep’ ket agpannuray no kasano kalawag ti pannakakitatayo kadakuada babaen dagiti mata ti pannakaawattayo.

13. Kasano a dagiti Saksi ni Jehova iti moderno a panawen magutugotdatayo nga agtultuloy iti lumba a maipaay iti biag?

¹³ Nalikmuttayo met iti nakaad-adu a Saksi ni Jehova iti moderno a panawen. Anian a nagsayaat nga ulidan iti pammati ti impaay dagiti napulotan a Kristiano agraman dagiti lallaki ken babbai a kameng ti “dakkel a bunggoy”! (Apocalipsis 7:9) Pasaray mabasatayo ti pakasaritaanda iti daytoy a magasin ken dadduma pay a publikasion ti Watch Tower.b No utobentayo ti pammatida, maparegtatayo nga agibtur agingga iti panungpalan. Ken anian a makaliwliwa ti panangsaranay dagiti nasinged a gagayyem ken kakabagian nga agserserbi met a simamatalek ken Jehova! Wen, adu ti manggutugot kadatayo nga agtultuloy iti lumba a maipaay iti biag.

Nainsiriban nga Ikeddengyo ti Kapartak ti Panagtarayyo

14, 15. (a) Apay a nainsiriban nga ikeddengtayo ti kapartak ti panagtaraytayo? (b) Apay a rasonable koma dagiti aramidentayo a kalat?

¹⁴ No naunday ti tarayen, kas iti maraton, masapul a nainsiriban nga ikeddeng ti tumataray ti kapartak ti panagtarayna. “No napartak unay ti rubbuatmo, mabalin a maabakka,” kuna ti magasin a New York Runner. “Mabalin a marigatanka iti maudi a sumagmamano a kilometro wenno sumardengkan.” Malagip ti maysa a tumataray iti maraton: “Nalawag nga impakpakauna ti ispiker iti maysa a taripnong a dinar-ayak kas panagsagana iti lumba: ‘Dikay makigiddan kadagiti naparpartak a tumataray. Agtaraykayo iti kapartak a kabaelanyo. Ta no saan, mapaksuyankayo ket nalabit sumardengkayon.’ Naturposko ti lumba agsipud ta sinurotko daytoy a balakad.”

¹⁵ Iti lumba a maipaay iti biag, masapul nga agtaray a sipipinget dagiti adipen ti Dios. (Lucas 13:24) Nupay kasta, insurat ni adalan a Santiago: “Ti sirib manipud ngato [ket] . . . nainkalintegan.” (Santiago 3:17) Nupay gutugotennatayo nga umagawa ti nasayaat nga ulidan dagiti sabsabali, ti kinarasonable tulongannatayo a mangaramid kadagiti realistiko a kalat sigun iti kabaelan ken kasasaadtayo. Palagipannatayo ti Kasuratan: “Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o unay maipapan iti bagina met laeng, ket saan nga iti panangipadis iti sabali a tao. Ta ti tunggal maysa awitennanto ti bukodna nga awit.”​—Galacia 6:4, 5.

16. Kasano a matulongannatayo ti kinapakumbaba a mangikeddeng iti kapartak ti panagtaraytayo?

¹⁶ Iti Mikias 6:8, naidatag kadatayo daytoy mamagpanunot a saludsod: “Ania aya ti iparebbeng ni Jehova kenka, no di laeng ti . . . pannagna a sipapakumbaba iti Diosmo?” Ti kinapakumbaba iramanna ti panangbigbig iti limitasiontayo. Limitado kadin ti maaramidantayo iti panagserbitayo iti Dios gapu iti kumapkapuyen a salun-at wenno kinalakay? Ditay koma maupay. Awaten ni Jehova ti panagregget ken panagsakripisiotayo ‘sigun iti adda kadatayo, saan a sigun iti awan kadatayo.’​—2 Corinto 8:12; idiligyo ti Lucas 21:1-4.

Matmatanyo a Kankanayon ti Gunggona

17, 18. Ti panangmatmatna iti ania ti nakatulong ken Jesus a mangibtur iti kayo a pagtutuokan?

¹⁷ Idi inlawlawagna kadagiti Kristiano sadi Corinto a nasken nga agibturda iti lumba a maipaay iti biag, adda dinakamat ni Pablo a maysa pay a banag maipapan iti Isthmian Games a rumbeng nga imutektekanda. Maipanggep kadagiti makisalip kadagidi nga ay-ayam, insurat ni Pablo: “Ita, pudno unay, [agtarayda] tapno magun-odda ti maysa nga agrupsa a korona, ngem datayo maysa a di agrupsa. Gapuna, ti wagas a panagtarayko ket di mapagduaduaan; ti wagas a panangiturongko kadagiti danogko ket saan a kasla panangkabkabil iti angin.” (1 Corinto 9:25, 26) Ti premio ti mangabak kadagidi nga ay-ayam ket maysa a korona, wenno balangat, a naaramid iti bulong ti saleng wenno dadduma pay a mula, wenno napagango pay ketdi nga atap a kinsay​—talaga nga “agrupsa a korona.” Ngem ania ti agur-uray kadagiti Kristiano nga agibtur agingga iti panungpalan?

¹⁸ Maipapan ken Jesu-Kristo a Pagwadantayo, insurat ni apostol Pablo: “Gapu iti rag-o a naikabil iti sanguananna inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.” (Hebreo 12:2) Nakapagibtur ni Jesus agingga iti panungpalan ti biagna kas tao babaen ti panangmatmatna iti gunggonana iti laksid ti panagsagabana iti kayo a pagtutuokan. Karaman iti gunggonana ti rag-ona a nangsantipikar iti nagan ni Jehova, nangsubbot iti sangatauan ken patay, ken iti panagturayna kas Ari ken Nangato a Padi bayat nga isublina ti biag nga awan inggana kadagiti natulnog a tattao iti paraiso a daga.​—Mateo 6:9, 10; 20:28; Hebreo 7:23-26.

19. Ania ti ipamaysatayo koma a panunoten kas ad-adalan ni Kristo?

¹⁹ Panunotenyo ti rag-o nga agur-uray kadatayo no agtalinaedtayo a kas ad-adalan ni Kristo. Inted ni Jehova kadatayo ti makapnek unay a trabaho a panangikasaba iti naimbag a damag ti Pagarian ken ti panangiranud iti makaispal-biag a pannakaammo iti Biblia kadagiti sabsabali. (Mateo 28:19, 20) Anian a makaparagsak ti makasarak iti tao nga interesado iti pudno a Dios ken tumulong kenkuana a makiraman iti lumba a maipaay iti biag! Ket aniaman ti reaksion dagiti tattao a kasabaantayo, maysa a pribilehio ti makiraman iti trabaho a mainaig iti pannakasantipikar ti nagan ni Jehova. No agibturtayo iti ministerio iti baet ti kinaawan interes wenno ibubusor dagidiay kasabaantayo, mangyeg rag-o kadatayo ti panangparagsak iti puso ni Jehova. (Proverbio 27:11) Ket biag nga agnanayon ti naindaklan a gunggona nga inkarina kadatayo. Anian a makaparagsak dayta! Matmatantayo a kankanayon dagitoy a bendision ket itultuloytayo ti agtaray.

Bayat nga Umad-adani ti Panungpalan

20. Kasano a mabalin a rumigat ti lumba a maipaay iti biag bayat nga umad-adani ti panungpalan?

²⁰ Iti lumba a maipaay iti biag, masapul a makidangadangtayo iti kangrunaan a kabusortayo, ni Satanas a Diablo. Bayat nga umad-adanitayo iti panungpalan, awan sarday nga ikagkagumaannatay nga itibkol wenno pabuntogen. (Apocalipsis 12:12, 17) Ken saan a nalaka ti agtalinaed a matalek, dedikado a manangiwaragawag iti Pagarian gapu kadagiti gubat, bisin, angol, ken amin a dadduma pay a pakarigatan a tanda ti “panawen ti panungpalan.” (Daniel 12:4; Mateo 24:3-14; Lucas 21:11; 2 Timoteo 3:1-5) Maysa pay, mabalin a no dadduma kasla mabayag pay a dumteng ti panungpalan a maisupadi iti ninamnamatayo, nangruna no adun a dekada nga addatayo iti lumba. Nupay kasta, ipanamnama kadatayo ti Sao ti Dios nga umay ti panungpalan. Kuna ni Jehova a dinto maladaw. Mapaspasungadanen ti panungpalan.​—Habacuc 2:3; 2 Pedro 3:9, 10.

21. (a) Ania ti mangpabileg kadatayo bayat nga itultuloytayo ti agtaray iti lumba a maipaay iti biag? (b) Ania koma ti determinasiontayo bayat nga umad-adani ti panungpalan?

²¹ No kasta, tapno agballigitayo iti lumba a maipaay iti biag, masapul a gumun-odtayo iti bileg manipud iti siaayat nga ipapaay ni Jehova a mangpasalun-at kadatayo iti naespirituan. Kasapulantayo met ti amin a pammaregta a magun-odtayo iti regular a pannakitimpuyog kadagiti kapammatiantayo, a makilumlumba met. Uray no rumigat ti tarayentayo gapu iti nakaro a pannakaidadanes ken di mapakpakadaan a pasamak, makapagibturtayo agingga iti panungpalan agsipud ta ipaay ni Jehova “ti pannakabalin a nalablabes ngem ti gagangay.” (2 Corinto 4:7) Anian a makaliwliwa a maammuan a kayat ni Jehova a maturpostayo a sibaballigi ti tarayentayo! Buyogen ti natibker a determinasion, “tarayentayo koma ti lumba a naikabil iti sanguanantayo,” a naan-anay nga agtalektayo nga “iti naikeddeng a panawen agapittayto no ditay mabannog.”​—Hebreo 12:1; Galacia 6:9.

[Dagiti Footnote]

Malagipyo Kadi?

◻ Apay a masapul nga agibturtayo agingga iti panungpalan?

◻ Aniada a probision ni Jehova ti ditay koma liwayan?

◻ Apay a nasken a nainsiriban nga ikeddengtayo ti kapartak ti panagtaraytayo?

◻ Ania a rag-o ti agur-uray kadatayo bayat nga itultuloytayo ti makilumba?

[Ladawan iti panid 18]

Gumun-odkayo iti pammaregta kadagiti Nakristianuan a gimong