Makapagserbikayo Kadi iti Ganggannaet a Tay-ak?
“ARAPAAPKO pay la idi ti agmisionero. Kas maysa nga agwaywayas, nagserbiak idiay Texas, E.U.A., nga agkasapulan iti adu a manangaskasaba. Kinaduanak ti asawak kalpasan ti panagkallaysami. Idi nayanak ti anakmi a babai, kunak iti unegko, ‘Nalpas dagiti arapaapko.’ Ngem aramiden ni Jehova a pumudno dagiti arapaap, nangnangruna no mainaigda iti pagayatanna.”—Jesse, madama nga agserserbi idiay Ecuador a kaduana ti asawana ken ti tallo nga annakda.
“Diak pulos impagarup a maaramidak dayta uray saanak a nagadal idiay Gilead a pakasanayan dagiti misionero. Naragsakanak idi nakitak ti maysa kadagiti inyadalak iti Biblia nga agpalpalawag wenno mangaskasaba, ket nagyamanak ken Jehova ta intedna kaniak daytoy a gundaway.”—Karen, agwaywayas a babai a nagpayunir iti walo a tawen idiay Abagatan nga America.
“Kalpasan ti 13 a tawen iti amin-tiempo a panangasaba idiay Estados Unidos, nariknami ken baketko a kasapulanmi ti baro a karit. Naragragsakkami ngem idi; pudno a nagsayaat a dalan ti biag.”—Tom, agpaypayunir a kaduana ni Linda nga asawana, iti rehion ti Amazon.
Dagitoy nga ebkas ti apresasion ket naggapu iti tattao a di pinalubosan ti kasasaadda nga umawat iti pannakasanay kas misionero iti Watchtower Bible School of Gilead. Kaskasdi, napasaranda dagiti rag-o ken karit ti panagserbi iti ganggannaet a daga. Kasano a naaramidanda dayta? Para kadi kadakayo ti kasta a serbisio?
Masapul Dagiti Umiso a Motibo
Saan la a gapu iti panagtarigagay a makigasanggasat ti kasapulan tapno agballigi iti ganggannaet a tay-ak. Umiso ti motibo dagidiay nakapagtalinaed. Kas ken apostol Pablo, matmatanda nga adda utangda, saan la nga iti Dios no di pay ket kadagiti tao. (Roma 1:14) Mabalinda koma a tungpalen ti bilin ti Dios a panangasaba babaen ti panagministerioda iti mismo a lugarda. (Mateo 24:14) Ngem mariknada a nakautangda ket kayatda a danonen ken tulongan dagidiay manmano la a makangngeg iti naimbag a damag.
Masansan a ti sabali pay a motibo isu ti tarigagay nga agserbi iti nabungbunga a teritoria—ket umiso met dayta. Asino kadatayo ti saan nga umasideg iti paset ti libtong a nakakitaantayo iti sabali a managdaklis a nakakalap iti adu? Kasta met, dagiti makaparagsak a damag maipapan iti naisangsangayan nga irarang-ay kadagiti dadduma a pagilian ti nangtignay iti adu a mapan iti lugar a yan ti “adu unay nga ikan.”—Lucas 5:4-10.
Kuentaenyo ti Magastos
Saan nga ipalubos ti adu a pagilian a mangged dagiti ganggannaet a nagboluntario gapu iti narelihiosuan a panggep. Masapul ngarud a kabaelanna a suportaran ti bagina iti pinansial ti asinoman nga agtarigagay nga agserbi iti ganggannaet a pagilian. Kasano a napagballigian daytoy a karit iti pinansial? Inlako wenno impaabang ti dadduma dagiti pagtaenganda para iti pinansial a kasapulanda. Inlako ti dadduma ti negosioda. Sumagmamano ti nagurnong iti kuartada para iti dayta a kalat. Dagiti dadduma agserbida iti ganggannaet a pagilian iti maysa wenno dua a tawen sada agawid iti pagilianda tapno agtrabaho ken makaurnongda iti kuarta, sada manen agsubli tapno agserbi.
Ti di mailibak a pagsayaatan ti adda iti napanglaw a pagilian isu ti kinalaka dagiti gagatangen no idilig iti narangrang-ay a pagilian. Gapuna, umanay a pagbiag dagiti dadduma ti kalkalainganna a pension. Siempre, kangrunaan nga agpannuray ti magastos ti maysa iti estandarte ti biag a surotenna. Uray kadagiti napanglaw a pagilian, adda dagiti nagnam-ay a pagyanan ngem nanginngina.
Nabatad a masapul a kuentaen pay ti magastos sakbay nga agtignay. Ngem saan la a ti pinansial a gastos ti tingitingen. Mabalin a makaiwanwan dagiti komento ti sumagmamano a nagserbi idiay Abagatan nga America.
Ti Kadakkelan a Karit
“Talaga a karit ti panagadal iti pagsasao nga Español,” kuna ni Markku a taga Finland. “Gapu ta diak ammo dayta a pagsasao, impagarupko a mabayag pay sakbay nga agbalinak a ministerial nga adipen. Anian a pannakaklaatko idi nadutokanak a mangidaulo iti panagadal iti libro ti kongregasion kalpasan laeng ti dua a bulan! Siempre, adda dagiti nakababain a gundaway. Marigatanak nga agimemoria iti nagnagan. Naminsan inawagak ni Kabsat Sancho iti ‘Kabsat Chancho (baboy),’ ket pulos diak malipatan nga inawagak ni Kabsat Salamea iti ‘Malasea (nadangkes).’ Imbag laengen ta nakaan-anus dagiti kakabsat.” Nagserbi kamaudiananna ni Markku kas manangaywan ti sirkito iti dayta a pagilian iti walo a tawen a kaduana ni Celine nga asawana.
Kuna ni Chris, ti asawa ni Jesse a nadakamat itay: “Malagipko ti umuna a panagbisita ti manangaywan ti sirkitomi, idi a tallo a bulanmi pay laeng ditoy. Ammok nga ilustrasion ti us-usarenna ken ikagkagumaanna a danonen ti pusomi kadagiti nasayaat nga ibagbagana, ngem diak matarusan. Nagsangitak iti mismo a Kingdom Hall. Saan la a panaglua dayta; nagsasaibbekak. Inlawlawagko iti manangaywan ti sirkito ti rason kalpasan ti gimong. Isut’ nakasaysayaat ket imbagana ti kanayon nga ibagbaga ti isuamin kaniak, ‘Ten paciencia, hermana’ (‘Aganuska, kabsat’). Kalpasan ti dua wenno tallo a tawen, nagkitakami manen ken nagsaritakami iti 45 a minuto, ket makaparagsak ta makapagkinnaawatankamin.”
“Napateg ti panagadal,” kuna ti maysa a kabsat. “Ad-adda a mapasayaat ti abilidadtayo a makisarita no ad-adda ti panagreggettayo a mangadal iti pagsasao.”
Umanamong ti amin a ti kasta a panagregget mangyeg iti adu a gunggona. Masursuro ti maysa ti kinapakumbaba, kinaanus, ken kinapinget no ikagumaanna ti agadal iti baro a pagsasao. Luktanna ti adu a gundaway a mangikasaba iti naimbag a damag iti sabsabali. Kas pagarigan, ti panagsursuro iti pagsasao nga Español tulonganna ti maysa a makisarita iti pagsasao nga ar-aramaten ti nasurok nga 400 a milion a tattao iti intero a lubong. Nausar latta ti adu a nagsubli iti pagilianda ti nasursuroda a pagsasao a timmulong kadagiti tattao nga Español ti pagsasaoda.
Ti met Ngay Panagil-iliw?
“Idi damdamomi ti umay iti Ecuador idi 1989,” kuna ni Deborah, a nakipagserbi ken ni Gary a lakayna iti rehion ti Amazon, “kanayonak a mailiw. Nasursurok ti agpannuray kadagiti kakabsat iti kongregasion. Nagbalinda a kas pamiliak.”
Kastoy ti kuna ni Karen, a nadakamat iti pangrugian: “Mangasabaak nga inaldaw tapno diak mailiw. Iti kastoy a pamay-an diak mapampanunot idiay balay. Silalagipak met a maragragsakan dagiti dadakkelko iti trabahok iti ganggannaet a pagilian. Kanayonnak a paregtaen ni nanang babaen kadagitoy a sasao: ‘Ad-adda a maaywanannaka ni Jehova no idilig kaniak.’”
Inyangaw ni Makiko a taga Japan: “Nabannogakon no malpas ti agmalmalem a serbisio iti tay-ak. Isu a no agawidak ket rugiak ti mailiw, masansan a makaturogak. Iti kasta, saan nga agbayag ti marikriknak.”
Kasano met Dagiti Annak?
No adda annakyo, maikonsiderar koma dagiti kasapulanda, kas iti edukasion. Iti daytoy a banag, dadduma ti nangpili iti panagadal iti pagtaengan bayat a dagiti dadduma inserrekda ti annakda kadagiti eskuelaan.
Immakar ni Al idiay Abagatan nga America a kaduana ti asawana, ti dua nga annakda, ken ti inana. Kunana: “Nadlawmi a nabibiit a masursuro dagiti ubbing ti pagsasao no ageskuelada. Medio nasayuddan iti uneg ti tallo a bulan.” Iti sabali a bangir, pinagadal da Mike ken Carrie ti dua a baroda iti autorisado a correspondence school. Kinuna dagiti nagannak: “Saan gayam a basta baybay-am dagiti ubbing iti kasta a panagadal. Masapul a tumulongkami iti panagadal ket siertuenmi nga ammoda ti kabaruan nga impormasion mainaig iti naited nga adalenda.”
Inyebkas da David ken Janita, a taga Australia, ti riknada maipapan iti dua a babbaritoda. “Kayatmi a makita a mismo dagiti ubbingmi ti panagbiag ti dadduma. Naglaka nga ipapan a gagangay ti nakairuamanmi a klase ti panagbiag, ngem kinapudnona manmano laeng ti adda iti kasta. Nakitada met no kasano a maipakpakat dagiti nateokratikuan a prinsipio iti intero a lubong, aniaman ti pagilian wenno kultura.”
“Uppat la ti tawenko idi pinanawan ti pamiliami ti Inglatera idi 1969,” malagip pay ni Ken. “Nupay madi ti riknak a dikam nagnaed iti balay a naaramid iti pitak ken naatepan iti pan-aw, kas ninamnamak, makunak a kararagsakanen a pannakapadakkel ti maysa nga ubing ti napasarak. Maasianak kadagiti dadduma nga ubbing a di nakapadas iti kasta nga oportunidad! Rinugiak ti nag-auxiliary pioneer idi agtawenak iti siam gapu iti nasayaat a pannakikadkaduak kadagiti misionero ken special pioneer.” Maysa itan nga agdaldaliasat a manangaywan ni Ken.
“Ti Ecuador ti talaga a pagtaenganmin,” kuna ni Gabriella, anak a babai ni Jesse. “Agyamanak ta inkeddeng dagiti dadakkelko ti umay ditoy.”
Iti sabali a bangir, adda dagiti annak a dida mairuam ti bagida gapu iti nagduduma a rason, isu a masapul nga agawid ti pamiliada iti pagilianda. Isu a nasaysayaat ti isasarungkar iti ganggannaet a pagilian sakbay ti iyaakar. Iti kastoy a pamay-an, maibatay dagiti pangngeddeng iti mismo a kapaliiwan.
Dagiti Gunggona iti Iyaakar
Pudno nga adu ti karit ken sakripisio ti iyaakar iti ganggannaet a tay-ak. Nakagunggona kadi kadagidiay immakar? Palubosantay ida a mangibaga kadatayo.
Jesse: “Iti sangapulo a tawenmi iti siudad ti Ambato, nakitami ti iyaadu ti kongregasion manipud 2 agingga iti 11. Naaddaankami iti pribilehio a timmulong iti panangrugi ti lima kadagidiay a kongregasion, ken iti pannakaipatakder ti dua a Kingdom Hall. Naragsakkami met a makatultulong iti agarup dua nga estudiante iti Biblia kada tawen tapno maikarida nga agpabautisar. Adda laeng maysa a pagbabawyak—ti saan nga iyaakar ditoy sangapulo a tawen a nasaksakbay.”
Linda: “Dakkel a pammabileg kadakami ti panangipateg dagiti tattao iti naimbag a damag ken iti panagbannogmi. Kas pagarigan, iti maysa a bassit nga ili iti kabakiran, nabigbig ti maysa nga agad-adal iti Biblia nga agnagan Alfonso a makagunggona no adda dagiti maangay a palawag publiko iti lugarda. Kaak-akarna iti baro a kaipatpatakder a balayna a naaramid iti kayo. Manmano laeng ti kasta iti dayta a purok. Yantangay ti balayna laeng ti makitana iti ili a maikari ken Jehova, nagsubli iti kalapawna ket intedna ti balayna tapno usaren dagiti kakabsat kas Kingdom Hall.”
Jim: “Maminsangapulo nga ad-adu ti panawen a mabusbosmi iti aktual a pannakisarita kadagiti tattao ngem idiay Estados Unidos. Mainayon pay, saan a naapura ti biag ditoy. Di mailibak nga ad-adu ti panawen para iti panagadal ken serbisio iti tay-ak.”
Sandra: “Makapnek unay ti pannakakitak no kasano a ti kinapudno iti Biblia pasayaatenna dagiti tattao. Inyadalak idi iti Biblia ti 69 ti tawenna a ni Amada, ti makinkukua iti bassit a groseria. Tibnokanna a kanayon iti dua a kapaset ti danum ti kada sangapulo a kapaset ti gatas. Malaksid iti kastoy a panangsuitik iti kustomerna, ilakona daytoy natibnokan a gatas iti saan nga umiso a sukat. Ngem kalpasan a naadalna ti material iti subtitulo a ‘Ti Kinamapagtalkan Agresulta iti Kinaragsak’ iti kapitulo 13 ti libro a Pannakaammo a Mangiturong iti Biag nga Agnanayon, insardeng ni Amada dagitoy di umiso nga aramid. Anian a rag-o ti pannakakita kenkuana a mabautisaran di nagbayag kalpasan dayta!”
Karen: “Ad-adda a nagpannurayak ken Jehova ken ad-adda nga inusarnak idi addaak ditoy. Ad-adda a simminged ken timmibker ti pannakigayyemko ken Jehova.”
Dakayo Ngay?
Kadagiti naglabas a tawen, rinibu a Saksi ti immakar tapno agserbi iti sabali a pagilian. Maysa wenno dua a tawen nga agtalinaed ti dadduma sadiay, di nakedngan ti dadduma. Awitda ti kapadasan, kinanataengan iti naespirituan, ken kuartada, a kalatda nga iyadelantar ti intereses ti Pagarian iti ganggannaet a tay-ak. Nabaelanda ti nagserbi kadagiti lugar a sadiay marigatan dagiti kakabsat nga agibumbunannag iti Pagarian gapu ta manmano laeng ti sekular a pagtrabahuan. Adu ti gimmatang kadagiti de-dual a lugan tapno mawanas dagiti teritoria a narigat a madanon. Dadduma a mangayat iti biag iti siudad ti nakatulong kadagiti dadakkel a kongregasion a manmano ti panglakayenna. Ngem isuda amin ti agkuna nga ad-adu nga amang ti naawatda a naespirituan a gunggona ngem ti impaayda.
Mabalinyo kadi ti makiraman iti pribilehio nga agserbi iti ganggannaet a tay-ak? No ipalubos ti kasasaadyo, apay a dikay usigen no mabalinanyo ti umakar? Ti umuna ken napateg nga addang isu ti panagsuratyo iti sanga nga opisina ti Sosiedad iti pagilian a pampanunotenyo a pagserbian. Dagiti espesipiko nga impormasion a maawatyo ti tumulongto kadakayo a mangusig no kabaelanyo. Kanayonanna, adu a praktikal a singasing ti masarakan iti artikulo a “Pumanawka iti Dagam ken Kadagiti Kakabagiam,” iti Agosto 15, 1988 a ruar Ti Pagwanawanan. Babaen ti umiso a panagplano ken panangbendision ni Jehova, mabalin a matagiragsakyo met ti rag-o iti panagserbi iti ganggannaet a tay-ak.
[Ladawan iti panid 24]
DA TOM KEN LINDA ITI NASULINEK A DESDES, NGA AGTURONG ITI KOMUNIDAD DAGITI INDIAN A SHUAR
[Ladawan iti panid 25]
ADU TI AGSERSERBI ITI QUITO, TI KABESERA A SIUDAD TI ECUADOR
[Ladawan iti panid 25]
MANGASKASABA NI MAKIKO IDIAY ANDES MOUNTAINS
[Ladawan iti panid 26]
LIMA A TAWENEN NGA AGSERSERBI IDIAY ECUADOR TI PAMILIA HILBIG