Kabaelanyo Kadi ti “Umakar Idiay Macedonia”?
1. Apay a napan ni Pablo ken dagiti kakaduana idiay Macedonia?
1 Idi agarup tawen 49 C.E., pimmanaw ni apostol Pablo idiay Antioquia ti Siria para iti maikadua a panagdaliasatna kas misionero. Panggepna ti bumisita idiay Efeso ken iti dadduma pay a siudad iti Asia Menor. Nupay kasta, babaen ti nasantuan nga espiritu, nasirmatana nga adda mangaw-awis kenkuana nga “umakar idiay Macedonia.” Isu ken dagiti kakaduana siraragsak nga inawatda dayta nga awis, ket naaddaanda iti pribilehio a mangipasdek iti umuna a kongregasion iti dayta a rehion. (Ara. 16:9, 10; 17:1, 2, 4) Iti kaaldawantayo, adda dagiti pagilian nga agkasapulan iti ad-adu a manangaskasaba. (Mat. 9:37, 38) Kabaelam kadi ti tumulong?
2. Apay nga adda dagiti agkedked nga umakar iti sabali a pagilian?
2 Nalabit kayatmo ti agbalin a misionero kas ken Pablo ngem saanmo pay a natingiting ti umakar iti sabali a pagilian. Kas pagarigan, nalabit saanka a kualipikado nga ageskuela iti Gilead gapu iti edadmo wenno gapu ta maysaka a balasang wenno addaanka kadagiti ubbing pay nga annak. Nalabit saanmo pay a pinampanunot ti umakar iti sabali a pagilian gapu ta iti panagriknam ket saanmo a kabaelan ti agsursuro iti sabali a lenguahe. Wenno mabalin nga immakarka iti sabali a pagilian tapno mangged isu a saanmon a kayat ti umakar manen. Ngem no ikararagmo ti maipapan iti daytoy a banag, mabalin a maamirismo a saan a dagita ti makalapped kenka nga umakar iti pagilian nga agkasapulan iti ad-adu a manangaskasaba.
3. Apay a makapagballigika latta a mangasaba iti sabali a pagilian uray no saanka a nasanay kas misionero?
3 Kasapulan Kadi ti Agsanay kas Misionero? Apay a nagballigi ni Pablo ken dagiti kakaduana? Nagpannurayda ken Jehova ken iti nasantuan nga espirituna. (2 Cor. 3:1-5) Gapuna, uray no saan nga ipalubos ti kasasaadmo ti umawat iti naisangsangayan a pannakasanay, agballigika latta a mangasaba iti sabali a pagilian. Laglagipem met nga agtultuloy ti pannakasanaymo babaen ti Teokratiko nga Eskuelaan ti Panagministro ken ti Gimong ti Serbisio. Ken no kalatmo ti ageskuela iti Gilead wenno iti umasping nga eskuelaan, ti iyaakarmo iti sabali a pagilian tapno mapadasam ti biag ti misionero ket mangted kenka iti nagpateg a kapadasan a mausarmonto no maikkanka iti gundaway nga umawat iti kanayonan a pannakasanay.
4. Apay a saan koma nga ipapan dagiti nataengan a saanda a kabaelan ti umakar iti sabali a pagilian tapno mangasaba?
4 Natataengan: Dakkel ti maitulong dagiti nataengan a naregta iti naespirituan ken nasalun-at kadagiti pagilian nga agkasapulan kadagiti manangaskasaba. Nagretirokayo kadin iti trabahoyo? Ti dadduma a bassit laeng ti pensionna ket immakar iti napanglaw a pagilian, a nalaklaka nga amang dagiti paggastuan, a pakairamanan ti panagpaagas, no idilig iti pagilianda.
5. Isalaysaymo ti kapadasan ti maysa a retirado a kabsat nga immakar iti sabali a pagilian.
5 Ti maysa a panglakayen a payunir a naggapu iti pagilian nga Ingles ti pagsasaona ket nagretiron iti trabahona. Isu ket immakar iti maysa a pagilian iti Southeast Asia nga ar-araken dagiti turista tapno tulonganna ti grupo nga Ingles ti pagsasaona a buklen ti siam nga agibumbunannag. Adda 30,000 a ganggannaet a kaskasabaan dayta a grupo. Iti uneg ti dua a tawen, 50 aminen ti tumabtabuno kadagiti gimong. Insurat ti kabsat: “Nagadu ti nagsasayaat a bendision a tinagiragsakko iti iyaakarko ditoy. Kurang ti panawen no estoriaek amin dagita!”
6. Isalaysayyo ti kapadasan ti maysa nga agtutubo a kabsat nga immakar iti pagilian nga agkasapulan iti ad-adu a manangaskasaba.
6 Kakabsat a Babbai nga Awanan Asawa: Inusar ni Jehova dagiti kakabsat a babbai iti naisangsangayan a pamay-an a mangiwaragawag iti naimbag a damag kadagiti pagilian nga agkasapulan iti ad-adu a manangaskasaba. (Sal. 68:11) Kalat ti maysa nga agtutubo a kabsat a babai a palawaen ti ministeriona iti sabali a pagilian ngem pakadanagan dagiti dadakkelna ti kinatalgedna. Gapuna, nangpili iti pagilian a natalged ti kasasaad ti politika ken ekonomia, nagsurat iti sanga nga opisina, ket naipaayan iti tulong ken espesipiko nga impormasion. Adu a bendision ti tinagiragsakna kabayatan ti innem a tawen a panagnaedna iti dayta a pagilian. Kinunana: “Idiay lugarmi, nalabit bassit laeng ti mayadalak iti Biblia. Ngem gapu iti panagserbik iti lugar nga agkasapulan iti ad-adu a manangaskasaba, naaddaanak iti adu nga iyadalan, ket napasayaatko ti abilidadko a mangisuro.”
7. Isalaysayyo ti kapadasan ti maysa a pamilia nga immakar iti sabali a pagilian.
7 Pamilia: No adda annakyo, daytoy kadi ti manglapped kadakayo nga umakar iti sabali a pagilian tapno ad-adda a maikasabayo ti naimbag a damag? Ti maysa a pamilia nga addaan iti dua nga annak nga agtawen iti walo ken sangapulo pinadasda ti umakar iti sabali a pagilian. Insurat ti ina: “Agyamankami ta iti daytoy a lugar ti nangpadakkelanmi kadagiti annakmi. Ngamin, naaddaanda iti oportunidad a makitimpuyog kadagiti special pioneer ken kadagiti misionero. Nagbalin a makagunggona ti biagmi gapu ta nagserbikami iti lugar nga addaan iti dakdakkel a panagkasapulan.”
8. Posible kadi ti agserbi iti sabali a pagilian uray no saankayo nga agsursuro iti sabali a lenguahe? Ilawlawagyo.
8 Lenguahe: Saanyo kadi a kayat ti umakar iti sabali a pagilian gapu ta iti panagriknayo ket marigatankayo nga agsursuro iti sabali a lenguahe? Ti lenguaheyo ket mabalin a maus-usar met kadagiti dadduma a pagilian nga agkasapulan iti ad-adu a manangaskasaba iti Pagarian. Ti maysa nga agassawa nga Ingles ti pagsasaona ket immakar iti pagilian nga Espaniol ti pagsasaona. Adu nga imigrante iti dayta a pagilian ti agsasao iti Ingles. Idi pinatulodan ida ti sanga nga opisina iti listaan ti sumagmamano nga Ingles a kongregasion nga agkasapulan iti ad-adu nga agibumbunannag, nangpilida iti maysa ken namindua a binisitada dayta. Nagawidda, kinissayanda dagiti binulan a paggastuanda, ken makatawen a nagurnongda. Idi nakasaganadan nga umakar, tinulongan ida dagiti kakabsat sadiay nga agsapul iti nalaka ti abangna a balay.
9, 10. Ania ti mabalin a tingitingen dagiti pimmanaw iti nakayanakanda a pagilian, ken apay?
9 Dagiti Imigrante: Pimmanawkayo kadi iti pagilianyo, nalabit sakbay a naammuanyo ti kinapudno? Mabalin nga adda dakkel a panagkasapulan kadagiti manangikasaba iti Pagarian iti nakayanakanyo a pagilian. Mabalinyo kadi ti agawid tapno tumulongkayo sadiay? Mabalin a nalaklakakayo a makabirok iti trabaho ken pagnaedan sadiay ngem kadagiti ganggannaet. Nalabit makapagsaokayo iti lokal a lenguahe. Maysa pay, mabalin nga ad-adda a dumngeg dagiti tattao iti mensahe maipapan iti Pagarian no dakayo ti mangikasaba imbes a dagiti ganggannaet.
10 Adda maysa a lalaki a nagtalaw idiay Albania ket napan idiay Italia. Nakabirok sadiay iti trabaho ken makaipatpatuloden iti kuarta iti pamiliana idiay Albania. Idi naammuanna ti kinapudno, sinuruanna iti Albaniano ti maysa a grupo dagiti Italiano nga special pioneer a mapan idiay Albania tapno agserbida iti lugar nga addaan iti dakdakkel a panagkasapulan. Insurat ti kabsat: “Magagaranda a mapan iti teritoria a pinanawak nupay dida ammo ti agsao iti lenguahemi. Albaniano ti pagsasao ken kulturak. Ania ti ar-aramidek ditoy Italia?” Inkeddeng ti kabsat ti agawid idiay Albania tapno tumulong a mangiwaragawag iti naimbag a damag. Kinunana: “Pinagbabawyak kadi ti panangisakripisiok iti trabaho ken ti matgedak koma idiay Italia? Saan a pulos! Nakasarakak iti makapnek a trabaho iti Albania. Makunak a ti panagserbi ken Jehova iti amin a kabaelak ti kasasayaatan pay laeng a trabaho ken mangyeg iti agpaut a kinaragsak!”
11, 12. Ania ti rumbeng nga aramiden dagiti mayat nga umakar iti sabali a pagilian?
11 No Kasano nga Aramiden: Sakbay a napan idiay Macedonia, ni Pablo ken dagiti kakaduana ket nagdaliasat nga agpalaud, ngem “pinaritan ida ti nasantuan nga espiritu,” isu a nagturongda iti amianan. (Ara. 16:6) Idi asidegdan idiay Bitinia, linapdan ida ni Jesus. (Ara. 16:7) Agtultuloy nga iwanwanwan ni Jehova ti trabaho a panangasaba babaen ken Jesus. (Mat. 28:20) Gapuna, no pampanunotenyo ti umakar iti sabali a pagilian, agkararagkayo ken Jehova tapno dumawatkayo iti panangiwanwanna.—Luc. 14:28-30; Sant. 1:5; kitaenyo ti kahon a “No Kasanoyo a Maammuan no Adda Panagkasapulan iti Pagilian a Planoyo nga Umakaran.”
12 Damagenyo no ania ti makuna dagiti panglakayen iti kongregasionyo wenno iti dadduma a Kristiano a nataengan iti naespirituan. (Prov. 11:14; 15:22) Basaenyo dagiti naipablaak a publikasiontayo maipapan iti panagserbi iti sabali a pagilian ken ammuenyo ti kasasaad ti pagilian a planoyo nga umakaran. Mabalinyo kadi ti bumisita iti pagilian a planoyo nga umakaran, nalabit iti sumagmamano nga aldaw? No talaga a kayatyo ti umakar iti sabali a pagilian, mabalinyo ti agsurat iti sanga nga opisina iti dayta a pagilian tapno agkiddawkayo iti kanayonan nga impormasion. Kitaenyo ti adres iti kaudian a Tinawen a Libro. Nupay kasta, imbes a direkta nga ipatulodyo ti suratyo iti sanga nga opisina, itedyo dayta kadagiti panglakayen iti kongregasionyo ta mangikabilda iti komentoda sakbay nga ipatulodda dayta.—Kitaenyo ti Organisado a Mangaramid iti Pagayatan ni Jehova, panid 111-112.
13. Ania ti maitulong kadakayo ti sanga nga opisina, ngem ania ti masapul nga aramidenyo?
13 Ti sanga nga opisina iti pagilian a kayatyo nga umakaran ket mabalin a mangipatulod kadakayo kadagiti makatulong nga impormasion tapno makapagdesisionkayo, ngem saannakayo nga ipaayan iti sponsorship letter, residency, visa, wenno dadduma pay a legal a porma ken saannakayo met nga ibirokan iti pagnaedanyo. Dagitoy ket personal a bambanag a masapul a tingitingenyo a naimbag sakbay nga umakarkayo. Maysa pay, dakayo ti makaammo nga agdamag kadagiti embahada wenno konsulado no kasano ti mangala iti visa ken work permit. Dagidiay umakar iti sabali a pagilian ket masapul nga adda umdas a gastuenda ken kabaelanda ti mangala kadagiti legal a dokumento.—Gal. 6:5.
14. Ania dagiti rumbeng a pagannadanyo no bumisita wenno umakarkayo iti pagilian a maiparit ti trabahotayo?
14 Dagiti Pagilian a Maiparit ti Trabahotayo: Iti dadduma a pagilian, nakaan-annad dagiti kakabsat no maipapan iti panagdaydayawda. (Mat. 10:16) Dagiti agibumbunannag a bumisita wenno umakar kadagita a pagilian ket mabalin a di inggagara a mangawis iti atension iti aktibidadtayo ket agpeggad dagiti kakabsattayo iti dayta a lugar. No kayatyo ti umakar kadagita a pagilian, pangngaasiyo ta agsuratkayo iti sanga nga opisina iti lugaryo babaen iti bagi dagiti panglakayen iti kongregasionyo sakbay nga umakarkayo.
15. Ania ti mabalin nga aramiden dagiti saan a makabael nga umakar iti sabali a pagilian tapno mapalawada ti ministerioda iti lugarda?
15 No Saanyo a Kabaelan ti Umakar: Saankayo a maupay no saanyo a kabaelan ti umakar iti sabali a pagilian. Nalabit adda sabali a “dakkel a ruangan a mangiturong iti panagaramid” a silulukat kadakayo. (1 Cor. 16:8, 9) Mabalin nga adda ammo ti manangaywan iti sirkito a lugar a saan unay nga adayo iti pagnanaedanyo a mabalinyo a pagserbian. Nalabit, kabaelanyo ti tumulong iti kongregasion wenno grupo a ganggannaet ti lenguahena nga asideg laeng iti lugaryo. Wenno mabalinyo a palawaen ti ministerioyo iti agdama a kongregasionyo. Aniaman ti kasasaadyo, ti napateg ket agdaydayawkayo iti amin a kararuayo.—Col. 3:23.
16. Ania ti aramidentayo no adda mayat nga umakar iti sabali a pagilian?
16 Adda kadi am-ammoyo a Kristiano a nataengan iti naespirituan a kalatna ti agserbi iti sabali a pagilian? No adda, suportaran ken paregtaenyo ida! Idi pimmanaw ni Pablo iti Antioquia iti Siria, daytoy ti maikatlo a kadadakkelan a siudad iti Imperio ti Roma (Roma ti umuna, maikadua ti Alejandria). Gapu ta nagdakkel a teritoria dayta, mabalin a kasapulan ti kongregasion ti Antioquia ti tulong ni Pablo ken kailiwdanto la ketdi unay no pumanaw. Kaskasdi, saan a nadakamat iti Biblia nga inggawid dagiti kakabsat ni Pablo. Agparang a saan nga akikid ti panagpampanunotda no di ket ammoda a “ti talon isu ti lubong.”—Mat. 13:38.
17. Apay nga ikabilanganyo ti “umakar idiay Macedonia”?
17 Adu a bendision ti inawat ni Pablo ken dagiti kakaduana gapu iti panangipangagda iti awis nga umakar idiay Macedonia. Bayat ti kaaddada idiay Filipos a maysa a siudad iti Macedonia, naam-ammoda ni Lidia ket “ti pusona linuktan a silalawa ni Jehova tapno imdenganna ti bambanag a sasawen ni Pablo.” (Ara. 16:14) Panunotenyo ti rag-o ni Pablo ken dagiti kakaduana a misionero idi nabautisaran ni Lidia ken ti intero a sangakabbalayanna! Iti adu a pagilian, adda dagiti tattao a kas ken Lidia a napudno ti panagpuspusona ngem saan pay a nakangngeg iti mensahe maipapan iti Pagarian. No ‘umakarkayo idiay Macedonia’ mabalin a makariknakayo iti rag-o no makasabaan ken matulonganyo ida.