Pakasaritaan ti Biag

Ni Jehova ti Kamang ken Bilegko

KAS INSALAYSAY NI MARCEL FILTEAU

“No isut’ pakikallaysaam, iti pagbaludan ti pagtungpalam.” Kasta ti imbaga dagiti tattao iti babai a panggepko nga ikallaysa. Palubosandak a mangilawlawag no apay a naibagada dayta.

IDI naipasngayak idi 1927, baluarte ti Katolisismo ti Quebec a probinsia ti Canada. Agarup uppat a tawen kalpasanna, ni Cécile Dufour, maysa nga amin-tiempo a ministro dagiti Saksi ni Jehova, rinugianna ti simmarungkar iti balaymi idiay siudad ti Montreal. Gapu itoy, masansan a butbutngen dagiti kaarrubami. Kinapudnona, namin-adu a naaresto ken namaltrato gapu iti panangikasabana iti mensahe ti Biblia. Isu a di nagbayag, naamirismi ti kinapudno ti sasao ni Jesus: “Puntiriakayto ti pananggura dagiti amin a nasnasion maigapu iti naganko.”​—Mateo 24:9.

Adu idi ti mangipagarup nga adayo a mapanunot ti maysa a Pranses-Canadiano a pamilia ti umikkat iti kina-Katolikoda. Nupay saan a pulos a nagbalin a bautisado a Saksi dagiti nagannak kaniak, naamirisda idi agangay a saan a maitunos iti Biblia dagiti isursuro ti Iglesia Katolika. Isu a pinaregtada ti walo nga annakda nga agbasa iti literatura nga impablaak dagiti Saksi, ket sinuportarandakami a nangitandudo iti kinapudno a masarakan iti Biblia.

Kinatured Kadagiti Narikut a Tiempo

Idi 1942, bayat nga ages-eskuelaak, rinugiakon nga impasnek ti agadal iti Biblia. Naipawil idi ditoy Canada ti trabaho dagiti Saksi ni Jehova agsipud ta sursurotenda ti inaramid dagiti immuna a Kristiano ket dida makipaspaset iti panaggugubat dagiti nasion. (Isaias 2:4; Mateo 26:52) Kampo a pagtrabahuan ti nagtungpalan ti inaunaanmi a ni Roland gapu ta nagkitakit nga agsoldado idi madama ti gubat.

Agarup iti daytoy a tiempo, inikkannak ni Tatang iti Pranses a libro a nangdeskribir iti sinagaba dagiti Aleman a Saksi gapu iti dida panangsuportar kadagiti namilitariaan a kampania ni Adolph Hitler.a Naparegtaak a tumulad kadagiti kasta a natured a pagwadan ti kinatarnaw, ket rinugiakon ti tumabuno kadagiti gimong dagiti Saksi ni Jehova a maang-angay idi iti maysa a pribado a pagtaengan. Di nagbayag, naawisak a makipaset iti panangasaba. Inakseptarko ti awis buyogen ti naan-anay a pannakaamiris a mabalin a maaresto ken maibaludak.

Kalpasan a nagkararagak tapno pumigsa ti nakemko, nagtuktokak iti immuna a ridaw a napanak. Rimmuar ti maysa a nasingpet a babai, ket kalpasan a nakiam-ammoak, imbasak kenkuana ti sasao ti 2 Timoteo 3:16: “Amin a Kasuratan impaltiing ti Dios ken makagunggona.”

“Kayatyo kadi a maammuan ti ad-adu pay maipapan iti Biblia?” inyimtuodko.

“Wen,” insungbat ti babai.

Isu nga imbagak nga ikuyogkonto ti maysa a gayyem a nalalaing ngem siak iti Biblia. Kastat’ inaramidko iti simmaganad a lawas. Kalpasan daydi a damo a kapadasak, naturturedakon, ket nautobko a saanmi a maitungpal ti ministeriomi iti bukodmi a pigsa. Kas kinuna ni apostol Pablo, aramidentayo dayta babaen ti tulong ni Jehova. Kinapudnona, masapul a bigbigentayo a ‘ti pannakabalin a nalablabes ngem ti gagangay ket biang ti Dios ket saan nga iti bagbagitayo.’​—2 Corinto 4:7.

Kalpasanna, nagbalinen a regular a paset ti biagko ti panangasaba agraman ti pannakaaresto ken pannakaibalud. Di pakasdaawan a naibagada iti panggepko idi nga ikallaysa a, “No isut’ pakikallaysaam, iti pagbaludan ti pagtungpalam”! Ngem saan met ketdi a kastat’ karigat dagidi a kapadasan. Kalpasan ti agpatnag a pannakaibalud, masansan nga adda padami a Saksi a mangpiansa kadakami.

Agkakapateg a Desision

Idi Abril 1943, indedikarko ti bagik ken Jehova ket insimbolok dayta babaen ti panagpabautisar iti danum. Kalpasanna, idi Agosto 1944, damok ti timmabuno iti dakkel a kombension, idiay Buffalo, New York, E.U.A., nga asideg iti beddeng ti Canada. Adda 25,000 a timmabuno, ket tinukay ti programa ti tarigagayko nga agbalin a payunir, kas pangawag kadagiti amin-tiempo a ministro dagiti Saksi ni Jehova. Idi Mayo 1945, naipalubosen ti trabaho dagiti Saksi ni Jehova ditoy Canada, ket nangrugiak nga agpayunir iti simmaganad a bulan.

Nupay kasta, bayat a simmansan ti pannakipasetko iti ministerio, simmansan met ti pannakaibaludko. Naminsan, inkabildak iti maysa a selda a kadua ni Mike Miller, maysa a matalek ken nabayagen nga adipen ni Jehova. Nagdalupisakkami iti suelo a semento ket nagtungtongkami. Naparegtaak unay iti makapabileg a naespirituan a tungtonganmi. Ngem kalpasanna, adda saludsod a simmiplot iti panunotko, ‘Kasanon ngay no adda idi ti saanmi a nagkinnaawatan ket saankamin nga agtungtungtong?’ Iti panawen a kaduak daytoy a patpatgen a kabsat iti pagbaludan ti nakasursuruak iti maysa kadagiti kasayaatan a leksion iti biagko​—kasapulantayo dagiti kakabsattayo isu a masapul nga agpipinnakawan ken agiinnanustayo. Ta no saan, kas insurat ni apostol Pablo: “No . . . itultuloyyo ti agkikinnagat ken agiinnalun-on iti maysa ken maysa, kitaenyo ta dikay agtitinnalipupos iti maysa ken maysa.”​—Galacia 5:15.

Idi Setiembre 1945, naawisak nga agserbi iti sanga nga opisina ti Watch Tower Society ditoy Toronto, Canada, nga aw-awaganmi a Bethel. Talaga a makaparegta ken makapabileg iti pammati ti naespirituan a programa ditoy. Iti simmaganad a tawen, natudinganak nga agtrabaho iti talon ti Bethel, 40 a kilometro iti amianan ti sanga nga opisina. Bayat nga agpurpurosak iti strawberry a kadua ti agtutubo a ni Anne Wolynec, saan laeng a ti kinaimnasna ti nadlawko no di ket uray ti panagayat ken regtana nga agserserbi ken Jehova. Naginnayatkami ket nagkallaysakami idi Enero 1947.

Iti simmaganad a dua ket kagudua a tawen, nagpayunirkami idiay London, Ontario, ket kalpasanna, idiay Cape Breton Island. Timmulongkami a nangbuangay iti maysa a kongregasion sadiay. Kalpasanna, idi 1949, naawiskami iti maika-14 a klase ti Watchtower Bible School of Gilead a nakasanayanmi nga agbalin a misionero.

Panagmisionero Idiay Quebec

Naibaon dagiti taga Canada a nagturpos kadagiti napalabas a klase ti Gilead a mangyussuat iti trabaho a panangasaba idiay Quebec. Idi 1950, naibaonkami sadiay agraman ti 25 pay a padami a nagturpos iti maika-14 a klase. Gapu ta immadu dagiti misionero, kimmaro ti pannakaidadanes ken naranggas a panagderraaw, nga insungsong dagiti lider ti Iglesia Romana Katolika.

Dua nga aldaw kalpasan a simmangpetmi iti immuna a nakaidestinuanmi kas misionero iti siudad ti Rouyn, naaresto ni Anne ket inluganda iti kotse dagiti polis. Damona idi a napasaran ti kasta, tangay naggapu iti bassit a bario iti probinsia ti Manitoba, Canada, a sadiay manmano a makakita iti polis. Natural a napabutngan ket nalagipna dagiti imbagada idi kenkuana a “No isut’ pakikallaysaam, iti pagbaludan ti pagtungpalam.” Nupay kasta, sakbay a pimmanaw dagiti polis, nasalamaandak met isu nga inlugandak iti kotse a kadua ni Anne. “Maragsakanak a makakita kenka!” kinunana. Ngem nakakalkalma, sana kinuna, “Sabagay, kasta met la idi ti napasamak kadagiti apostol gapu iti panangasabada maipapan ken Jesus.” (Aramid 4:1-3; 5:17, 18) Kamalmanna, napiansaankami.

Agarup makatawen kalpasan daydi nga insidente, bayat nga agbalaybalaykami iti baro a nakaidestinuanmi idiay Montreal, adda nangngegko nga ariwawa iti kalsada ket nakitak nga agub-ubor ti maysa a grupo dagiti makaunget a managderraaw. Idi mapanko tulongan ni Anne ken ti kaduana, simmangpet dagiti polis. Imbes a dagiti managderraaw ti arestuenda, ni Anne ken ti kaduana ketdi ti inarestoda! Bayat nga addada iti pagbaludan, impalagip ni Anne iti kabarbaro a Saksi a matungtungpal kadakuada ti kinuna ni Jesus: “Puntiriakayto ti pananggura dagiti amin a tattao maigapu iti naganko.”​—Mateo 10:22.

Naminsan, 1,700 a kaso maibusor kadagiti Saksi ni Jehova ti agur-uray a mabista idiay Quebec. Kaaduanna, naidarumkami gapu iti panagiwarasmi iti literatura a kontra kano iti gobierno wenno gapu ta awan lisensiami nga agiwarwaras iti literatura. Gapuna, nagtignay ti Legal Deparment ti Watch Tower Society maibusor iti gobierno ti Quebec. Kalpasan ti adu a tawen ti legal a pannakidangadang, dua a dadakkel a balligi ti impaay ni Jehova kadakami iti saklang ti Korte Suprema ti Canada. Idi Disiembre 1950, naabsueltokami iti darum a kontra iti gobierno ti literaturami, ket idi Oktubre 1953, naitandudo ti kalinteganmi nga agiwaras iti literatura a naibasar iti Biblia uray awan lisensia. Isu a nakabatbatad a naimatanganmi no kasano a ni Jehova ket pudno a “kamang ken bilegtayo, sisisibay unay a saranay iti panagdukot.”​—Salmo 46:1.

Nakadkadlaw ti iyaadu dagiti Saksi iti Quebec. Idi 1945, idi nangrugiak nga agpayunir, 356 laeng ngem ita nasuroken a 24,000! Talaga a pimmayso ti padto ti Biblia: “Awan ti igam a naaramid a maibusor kenka a rumang-ayto; ken tunggal dila a bumusorto kenka iti panangukom kondenaremto.”​—Isaias 54:17.

Ti Trabahomi Sadi Francia

Idi Setiembre 1959, naawiskami ken ni Anne nga agserbi iti Bethel idiay Paris, Francia, ket nadutokanak a mangaywan iti panagimprenta. Sakbay ti isasangpetmi idi Enero 1960, komersial nga establisimiento ti agim-imprenta. Tangay maiparit idi Ti Pagwanawanan idiay Francia, 64-panid a bokleta ti porma ti iyim-imprentami a magasin iti kada bulan. Naawagan ti bokleta iti The Interior Bulletin of Jehovah’s Witnesses, ket naglaon kadagiti artikulo a maadal kadagiti kongregasion iti kada bulan. Nanipud 1960 agingga iti 1967, immadu manipud 15,439 agingga iti 26,250 dagiti nakipaset iti panangasaba a trabaho idiay Francia.

Idi agangay, naidestino manen ti kaaduan a misionero iti dadduma a lugar. Adda dagiti naibaon kadagiti Pranses ti pagsasaoda a pagilian idiay Africa ken adda met dagiti napagsubli idiay Quebec. Tangay adda an-annayen ni Anne ket masapul a maopera, nagsublikami idiay Quebec. Kalpasan ti tallo a tawen a panagpaagas, kimmaradkad ni Anne. Kalpasanna, nadutokanak a manangaywan ti sirkito, a mangbisita iti nadumaduma a kongregasion iti kada lawas tapno mangipaay iti naespirituan a pammaregta.

Panagmisionero Idiay Africa

Sumagmamano a tawen kalpasanna, idi 1981, naragsakankami nga immawat iti baro a pakaidestinuanmi kas misionero idiay Zaire, a Democratic Republic of Congo itan. Nakurapay dagiti umili, ken nagsagabada iti adu a pakarigatan. Idi simmangpetkami, adda 25,753 a Saksi, ngem ita, immadun dayta a bilang iti nasurok a 113,000, ket 446,362 ti timmabuno iti Pananglaglagip iti ipapatay ni Kristo idi 1999!

Idi 1984, gimmatangkami iti 200 nga ektaria a daga a kukua ti gobierno a pagibangonanmi iti baro a sanga nga opisina. Kalpasanna, idi Disiembre 1985, naangay ti maysa nga internasional a kombension iti kabesera a siudad ti Kinshasa, a tinabunuan ti 32,000 a delegado a naggapu iti nadumaduma a paset ti lubong. Kalpasanna, nariribuk ti trabahomi idiay Zaire gapu iti ibubusor nga insungsong dagiti klero. Idi Marso 12, 1986, adda surat a naited kadagiti responsable a kakabsat a lallaki a mangibagbaga a maipariten ti asosasion dagiti Saksi ni Jehova idiay Zaire. Daytoy a panangipawil iti amin nga aktibidadmi ket pinirmaan ti agdama idi a presidente ti pagilian, ti pimmusayen a ni Mobutu Sese Seko.

Gapu kadagidiay kellaat a pagteng, masapul idi nga iyaplikarmi ti pammagbaga ti Biblia: “Ti manakem a tao madlawna ti dakes, ket aglemmeng.” (Proverbio 22:3) Inremediomi ti manggun-od iti papel, tinta, film, printing plate, ken kemikal, manipud iti sabali a pagilian tapno mayimprentami dagiti publikasionmi idiay Kinshasa. Nangaramidkami met iti bukodmi a sistema ti panagiwaras. Idi organisadokamin, nasaysayaat nga amang ti sistemami ngem iti serbisio ti koreo nga imatmatonan ti gobierno!

Rinibu a Saksi ti naaresto, ket adu ti siraranggas a natutuok. Malaksid iti sumagmamano laeng, inan-anusanda dagita a pannakatrato ken nagtalinaedda a matalek. Naarestoak met ket nakitak ti nakaro a kasasaad dagiti kakabsat kadagiti pagbaludan. Pinarparigatdakami dagiti sekreta ken autoridad, ngem kanayon a tinulongannakami ni Jehova.​—2 Corinto 4:8.

Agarup 3,000 a karton ti literatura ti inlemmengmi iti bodega ti maysa a negosiante. Ngem idi agangay, maysa kadagiti trabahadorna ti nagipulong iti sekreta, ket inarestoda ti negosiante. Iti dalanda nga agturong iti pagbaludan, naiparna a nasabatda ti kotsek. Imbaga ti negosiante a siak ti nagpaidulin kenkuana iti literatura. Pinasardengdak dagiti polis ket pinalutpotdak maipapan iti dayta. Inakusardak a mangiduldulin iti maiparit a literatura iti bodega daytoy a lalaki.

“Adda kadi awityo a maysa kadagiti libro?” insaludsodko.

“Siempre adda,” insungbatda.

“Mabalin kadi a kitaek?” inyimtuodko.

Inikkandak iti maysa a kopia, ket impakitak kadakuada ti makin-uneg a panid a nasuratan iti: “Inyimprenta ti Watch Tower Bible & Tract Society idiay Estados Unidos ti America.”

“Ti ig-iggamanyo ket kukua ti America ken saan a kukua ti Zaire,” impalagipko kadakuada. “Ti legal a korporasion ken asosasion dagiti Saksi ni Jehova ditoy Zaire ti pinawilan ti gobiernoyo saan a ti Watch Tower Bible & Tract Society ti Estados Unidos. Isu a rumbeng nga agan-annadkayo iti aramidenyo kadagitoy a publikasion.”

Pinalubosandak a pumanaw agsipud ta awan pammalubos ti korte nga arestuendak. Iti daydi a rabii, nangalakami iti dua a trak sakam napan iti bodega ket kinayuskosmi amin a literatura. Idi immay dagiti autoridad iti kabigatanna, kasta unay ti pungtotda idi nakitada nga awanen ti nagyan ti bodega. Birbirokendakon, tangay addaandan iti pammalubos ti korte a mangaresto kaniak. Nasarakandak, ket gapu ta awan kotseda, ti kotsek ti nagluganak a nagturong idiay pagbaludan! Kinuyognak ti maysa a padak a Saksi tapno mayawidna ti kotsek sakbay a makompiskarda.

Kalpasan ti walo nga oras a panangpalutpot, inkeddengda nga ideportadak. Ngem pinakitaak ida iti maysa a kopia ti surat a naggapu iti gobierno a mangpaspasingked iti pannakadutokko a manglikida iti amin a sanikua ti naiparit idin nga asosasion dagiti Saksi ni Jehova iti Zaire. Napalubosanak ngarud a mangitultuloy iti trabahok iti Bethel.

Kalpasan ti uppat a tawen a panagserbi iti sidong dagiti pakarigatan gapu iti pannakaipawil ti trabaho idiay Zaire, nagpadaraak gapu iti ulcer iti tian a namagpeggad iti biagko. Naikeddeng a masapul nga agpaagasak idiay South Africa. Ti sanga nga opisina ti nangasikaso a naimbag kaniak, isu nga immimbagak. Kalpasan ti walo a tawen a panagserbi idiay Zaire, a talaga a nakallalagip ken naragsak a kapadasan, immakarkami iti sanga nga opisina ti South Africa idi 1989. Idi 1998, nagsublikami iti pagilianmi ket nanipud idin, agserserbikami manen iti Bethel ditoy Canada.

Siyayaman nga Agserserbi

No lagipek ti 54 a tawenko iti amin-tiempo a ministerio, agyamanak unay ta inusarko ti pigsak kas agtutubo iti napateg a panagserbi ken Jehova. Nupay masapul idi nga ibturan ni Anne ti nagadu a naririgat a kasasaad, pulos a saan a nagreklamo no di ket mannakitinnulong unay iti amin nga aktibidadmi. Agpadakami a naaddaan iti pribilehio a timmulong iti adu a nangammo iti maipapan ken Jehova, ket adu kadakuada ti agserserbi itan iti amin-tiempo a ministerio. Makaparagsak a makita nga agserserbi ti dadduma kadagiti annakda ken uray payen dagiti appokoda iti naindaklan a Diostayo a ni Jehova!

Kombinsidoak nga awan ti aniaman a maitukon ti lubong a mabalin nga ipadis kadagiti pribilehio ken bendision nga impaay ni Jehova kadakami. Pudno nga adu a pakasuotan ti inibturanmin, ngem amin dagitoy ti nangpabileg iti pammati ken panagtalekmi ken Jehova. Talaga nga isu ti gubuayan ti bileg, maysa a pagkamangan, ken sidadaan a tumulong no panawen ti pakarigatan.

[Footnote]

[Dagiti Ladawan iti panid 26]

Panagpayunirmi a dua idi 1947; ken dakami ken Anne ita

[Ladawan iti panid 29]

Ipatpateg dagiti tattao a naam-ammomi idiay Zaire ti kinapudno a masarakan iti Biblia