‘O Dios, Ibaonmo ti Silawmo’

“Ibaonmo ti silawmo ken kinapudnom; isuda koma ti mangiturong kaniak.”​—SALMO 43:3.

1. Kasano ti panangipalgak ni Jehova kadagiti panggepna?

NAKAAN-ANNAD ti pamay-an ni Jehova a mangipakaammo iti panggepna kadagiti adipenna. Imbes nga ipalgakna a mamimpinsan ti kinapudno a kas iti panaggilap ti makasisirap a lawag, progresibo ti pananglawagna kadatayo. Ti panagdaliasattayo iti dana ti biag ket mayarig iti pannagna ti maysa a tao iti naunday a desdes. Agrubbuat iti parbangon ket awan pay unay makitana. Bayat nga agin-inut a sumingising ti init, adda sumagmamano a banag a mailasinna iti aglawlawna. Dina mailasin dagiti dadduma. Ngem bayat a tumangtangkayag ti init, makitanan dagiti adda iti adayo. Pudno met dayta no maipapan iti naespirituan a lawag nga ipapaay ti Dios. Saan a mamimpinsan ti panangipaawatna kadagiti bambanag kadatayo. Kasta met laeng ti pamay-an ni Jesu-Kristo nga Anak ti Dios a nangipaay iti naespirituan a lawag. Intay usigen no kasano a linawagan ni Jehova ti ilina idi un-unana a panawen ken no kasanona nga ar-aramiden dayta iti kaaldawantayo.

2. Kasano ti pananglawag ni Jehova sakbay ti panawen dagiti Kristiano?

² Nalabit dagiti annak ni Core ti nangputar iti maika-43 a Salmo. Kas Levita, pribilehioda ti mangisuro iti Linteg ti Dios kadagiti tattao. (Malakias 2:7) Siempre, ni Jehova ti Naindaklan nga Instruktorda, ket isu ti pangnamnamaanda a Gubuayan ti amin a sirib. (Isaias 30:20) “O Dios, . . . ibaonmo ti silawmo ken kinapudnom,” inkararag ti salmista. “Isuda koma ti mangiturong kaniak.” (Salmo 43:1, 3) Idi nagmatalek dagiti Israelita ken Jehova, insurona kadakuada dagiti dalanna. Sinigsiglo kalpasanna, pinaraburan ida ni Jehova iti naisangsangayan unay a lawag ken kinapudno idi imbaonna ti Anakna ditoy daga.

3. Kasano a nasubok dagiti Judio babaen ti pannursuro ni Jesus?

³ Kas ni tao a Jesu-Kristo, ti Anak ti Dios “ti silaw ti lubong.” (Juan 8:12) Insurona dagiti tao iti “adu a bambanag babaen kadagiti pangngarig”​—baro a bambanag. (Marcos 4:2) Kinunana ken Poncio Pilato: “Ti pagariak saan a paset daytoy a lubong.” (Juan 18:36) Baro a kapanunotan dayta para iti maysa a Romano ken awan duadua kadagiti nasionalistiko a Judio, ta impagarupda a parmeken ti Mesias ti Imperio ti Roma ken isublina ti sigud a kinadayag ti Israel. Insilnag ni Jesus ti lawag a naggapu ken Jehova, ngem saan a nagustuan dagiti agtuturay a Judio dagiti imbagana. “Inayatda ti dayag dagiti tattao nga ad-adda pay ngem iti dayag ti Dios.” (Juan 12:42, 43) Kinaykayat ti adu kadagiti tattao a salimetmetan ti aramid-tao a tradisionda imbes nga awatenda ti naespirituan a lawag ken kinapudno a naggapu iti Dios.​—Salmo 43:3; Mateo 13:15.

4. Kasanotay nga ammo nga agtultuloy a rumang-ay ti pannakaawat dagiti adalan ni Jesus?

⁴ Nupay kasta, adda sumagmamano a napudno a tattao a siraragsak a nangawat iti kinapudno nga insuro ni Jesus. Nagtultuloy a rimmang-ay ti pannakaawatda kadagiti panggep ti Dios. Ngem bayat nga umad-adani ti panagpatingga ti biag ti Mannursuroda ditoy daga, adu pay ti nasken a sursuruenda. Kinuna ni Jesus kadakuada: “Adu pay a bambanag ti sawek kadakayo, ngem dikay kabaelan nga awiten ida iti agdama.” (Juan 16:12) Wen, agtultuloy a rumang-ay ti pannakaawat dagiti adalan iti kinapudno nga aggapu iti Dios.

Agtultuloy ti Panagraniag ti Lawag

5. Ania nga isyu ti rimsua idi umuna a siglo, ket siasino ti addaan responsabilidad a mangrisut iti dayta?

⁵ Kalpasan ti ipapatay ken panagungar ni Jesus, naranraniag ti panagsilnag ti lawag a naggapu iti Dios. Iti sirmata a naited ken Pedro, impalgak ni Jehova a maawaten dagiti di nakugit a Gentil nga agbalin a pasurot ni Kristo. (Aramid 10:9-17) Mamagsiddaaw dayta a palgaak! Nupay kasta, idi agangay adda timmaud nga isyu: Iparebbeng aya ni Jehova kadagita a Gentil nga agpakugitda no nagbalindan a Kristiano? Saan a nasungbatan dayta nga isyu iti sirmata, ket nagsusupiatan dayta dagiti Kristiano. Nasken a marisut daytoy, ta no saan, madadael ti napateg a panagkaykaysada. Gapuna, idiay Jerusalem, “dagiti apostol ken dagiti lallakay naguurnongda a sangsangkamaysa tapno tamingenda daytoy a banag.”​—Aramid 15:1, 2, 6.

6. Ania nga addang ti sinurot dagiti apostol ken lallakay idi inusigda ti isyu maipapan iti panagkugit?

⁶ Kasano a maammuan dagidiay nagtataripnong no ania ti pagayatan ti Dios kadagiti manamati a Gentil? Saan a nangibaon ni Jehova iti anghel a mangimaton iti panagsasaritada, saanna met ida a pinaraburan iti sirmata. Ngem dina impalubos nga awan mangiwanwan kadagiti apostol ken lallakay. Inusigda ti pammaneknek dagiti dadduma a Kristiano a Judio a nakaimatang no kasano nga inawaten ti Dios dagiti Gentil, nga imparukpokna ti nasantuan nga espirituna kadagiti di nakugit a Gentil. Sinukimatda met ti Kasuratan tapno maiwanwanda. Kas resultana, nangted ni adalan a Santiago iti balakad a naibatay iti makaiwanwan a kasuratan. Iti panangut-utobda iti pammaneknek, naawatanda a naimbag ti pagayatan ti Dios. Saanen a masapul nga agpakugit dagiti Gentil tapno awaten ida ni Jehova. Insurat a dagus dagiti apostol ken lallakay ti desisionda tapno malawlawagan dagiti padada a Kristiano.​—Aramid 15:12-29; 16:4.

7. Iti ania a pamay-an a progresibo dagiti Kristiano idi umuna a siglo?

⁷ Saan a kas kadagiti Judio a panguluen ti relihion, a nangsalimetmet kadagiti tradision dagiti kapuonanda, naragsakan ti kaaduan a Judio a Kristiano idi naammuanda daytoy a naisangsangayan a baro a pannakaawat maipapan iti panggep ti Dios mainaig kadagiti Gentil, nupay ti panangawat iti dayta kalikagumanna ti panangbalbaliw iti panangmatmat kadagiti Gentil. Binendisionan ida ni Jehova gapu iti kinapakumbabada, ket “dagiti kongregasion nagtultuloyda a napatibker iti pammati ken immadu iti bilang iti inaldaw-aldaw.”​—Aramid 15:31; 16:5.

8. (a) Kasanotay nga ammo nga ad-adu pay a lawag ti manamnama a maipalgak kalpasan ti umuna a siglo? (b) Aniada a napateg a saludsod ti intay usigen?

⁸ Nagtultuloy a rimmaniag ti naespirituan a lawag idi umuna a siglo. Ngem saan nga impalgak ni Jehova kadagiti nagkauna a Kristiano ti amin a detalye dagiti panggepna. Kinuna ni apostol Pablo kadagiti kapammatianna idi umuna a siglo: “Iti agdama kumitkitatayo iti nakudrep a ladawan babaen ti pagsarmingan a metal.” (1 Corinto 13:12) Nakudrep a ladawan ti makita iti kasta a sarming. No kasta, limitado idi damo ti pannakaawatda iti naespirituan a lawag. Kalpasan ti ipapatay dagiti apostol, adda tiempo a kimmudrep ti lawag, ngem kadagitoy a tiempo immadun ti Nainkasuratan a pannakaammo. (Daniel 12:4) Kasano ti pananglawag ni Jehova iti ilina iti kaaldawantayo? Ket ania ti aramidentayo no paunegenna ti pannakaawattayo iti Kasuratan?

Rumaniag a Rumaniag ti Lawag

9. Ania a naidumduma ken epektibo a pamay-an ti panagadal iti Biblia ti inusar dagiti immuna nga Estudiante ti Biblia?

⁹ Iti moderno a panawen, nangrugi nga agparang ti damo a napaypayso nga aranaar ti lawag iti maudi a kakapat ti maika-19 a siglo idi inrugi ti maysa a grupo dagiti Kristiano a lallaki ken babbai nga inadal a sipapasnek dagiti Kasuratan. Epektibo ti pamay-an ti panagadalda iti Biblia. Adda agsaludsod; kalpasanna, usigen ti grupo ti amin a nainaig a teksto iti Biblia. No kasla agsupadi ti dua a teksto ti Biblia, ikagumaan dagitoy a napasnek a Kristiano a pagtunosen dagita. Saan a kas kadagiti panguluen ti relihion kadagidi a tiempo, ti Nasantuan a Kasuratan, saan a ti tradision wenno inaramid-tao a doktrina, ti inaramat dagiti Estudiante ti Biblia (kas pannakaawag idi dagiti Saksi ni Jehova) a mangiwanwan kadakuada. Kalpasan a mausigda amin a Nainkasuratan a pammaneknek, irekordda dagiti konklusionda. Iti kasta, adu a napateg a doktrina ti Biblia ti naawatanda a naimbag.

10. Aniada a katulongan iti panagadal iti Biblia ti insurat ni Charles Taze Russell?

¹⁰ Ni Charles Taze Russell ti naisangsangayan idi kadagiti Estudiante ti Biblia. Isu ti nangisurat iti maysa a serye dagiti katulongan iti panagadal iti Biblia a buklen ti innem a tomo a napauluan Studies in the Scriptures. Panggep idi ni Kabsat Russell ti mangputar iti maikapito a tomo a mangilawlawag kadagiti libro ti Biblia nga Ezequiel ken Apocalipsis. “No mabirokak ti tulbek (kayatna a sawen, pannakaawat), isuratkonto ti Maikapito a Tomo,” kinunana. Ngem innayonna: “No sabali a tao ti pangtedan ti Apo iti tulbek, mabalin nga isunto ti agsurat.”

11. Ania ti pakainaigan ti tiempo iti pannakaawattayo kadagiti panggep ti Dios?

¹¹ Adda napateg a banag nga ipasimudaag dayta nga imbaga ni C. T. Russell maipapan iti pannakaawattayo kadagiti teksto ti Biblia​—tiempo. Ammo ni Kabsat Russell a dina mapilit ti lawag nga agsilnag iti libro nga Apocalipsis, no kasano a ti maysa a tao a magagaran nga agpasiar dina mapilit ti init a lumgak no dina pay oras.

Maipalgak​—Ngem iti Panawen nga Inkeddeng ti Dios

12. (a) Kaano a naan-anay a maipaawat ti kaipapanan ti padto ti Biblia? (b) Ania nga ehemplo ti mangipakita a ti pannakaawattayo iti padto ti Biblia ket agpannuray iti panawen nga inkeddeng ti Dios? (Kitaenyo ti footnote.)

¹² Kas kadagiti apostol nga idi laeng kalpasan ti ipapatay ken panagungar ni Jesus a naawatanda ti adu a padto maipapan iti Mesias, sa la maawatan dagiti Kristiano ita ti amin a detalye ti padto ti Biblia no natungpalen dayta. (Lucas 24:15, 27; Aramid 1:15-21; 4:26, 27) Maysa a libro a napnuan padto ti Apocalipsis, isu a namnamaentayo a maawatantayo a naan-anay dayta bayat a matungtungpal dagiti pasamak nga iladladawanna. Kas pagarigan, mabalin a saan pay idi nga umiso ti pannakaawat ni C. T. Russell iti kaipapanan ti simboliko nga eskarlata ti marisna nga atap nga animal a nadakamat iti Apocalipsis 17:9-11, yantangay sa la nagparang dagiti organisasion nga iladladawan ti animal​—ti Liga de Naciones ken Naciones Unidas​—kalpasan ti ipapatayna.a

13. Ania ti mapasamak no dadduma no adda lawag a maipalgak maipapan iti partikular a topiko iti Biblia?

¹³ Idi naammuan dagiti nagkauna a Kristiano a maawaten nga agbalin a kapammatianda dagiti di nakugit a Gentil, nangpataud dayta a panagbalbaliw iti maysa pay nga isyu no masapul nga agpakugit dagiti Gentil. Daytoy ti gapuna nga inusig manen dagiti apostol ken lallakay ti isyu maipapan iti panagkugit. Kasta met ti maar-aramid ita. Gapu iti naraniag a lawag nga agsilnag iti maysa a topiko iti Biblia, no dadduma nasken nga usigen manen dagiti napulotan nga adipen ti Dios, “ti matalek ken masirib nga adipen,” dagiti nainaig a topiko, kas ipakita dagiti sumaganad a kallabes nga ehemplo.​—Mateo 24:45.

14-16. Kasano a ti panagbalbaliw ti panangmatmattayo maipapan iti naespirituan a templo inapektaranna ti pannakaawattayo iti Ezequiel kapitulo 40 agingga iti 48?

¹⁴ Idi 1971, naipablaak ti libro a “The Nations Shall Know That I Am Jehovah”​—How? a nangilawlawag iti padto ni Ezequiel. Ababa laeng ti panangsalaysay ti maysa a kapitulo dayta a libro iti sirmata ni Ezequiel maipapan iti templo. (Ezequiel, kapitulo 40-48) Iti daydi a tiempo, nailawlawag kangrunaanna no kasano a matungpal iti baro a lubong ti sirmata ni Ezequiel maipapan iti templo.​—2 Pedro 3:13.

¹⁵ Nupay kasta, adda dua nga artikulo a naipablaak iti Pagwanawanan a Hunio 1, 1973, a nangapektar iti pannakaawattayo iti sirmata ni Ezequiel. Sinalaysayda ti naindaklan a naespirituan a templo a dineskribir ni apostol Pablo iti Hebreo kapitulo 10. Inlawlawag ti Pagwanawanan a ti Nasantuan a siled ken ti makin-uneg a paraangan ti naespirituan a templo ket mainaig iti kasasaad dagiti napulotan bayat nga addada ditoy daga. Idi narepaso ti Ezequiel kapitulo 40 agingga iti 48 sumagmamano a tawen kalpasanna, naawatan a no kasano a matungtungpal ita ti kaipapanan ti naespirituan a templo, kasta met ti templo a nasirmata ni Ezequiel. Kasano a kasta?

¹⁶ Iti sirmata ni Ezequiel, adda dagiti papadi nga agan-annong kadagiti paraangan ti templo bayat a pagserserbianda dagiti tribu a saan a papadi. Nalawag a ti “naarian a kinapadi,” dagiti napulotan nga adipen ni Jehova, ti iladladawan dagitoy a papadi. (1 Pedro 2:9) Nupay kasta, saanda nga agserbi iti naindagaan a paraangan ti templo iti las-ud ti Sangaribu a Tawen a Panagturay ni Kristo. (Apocalipsis 20:4) Iti kadakkelan a paset dayta a panawen, no saan man nga iti las-ud dayta a panawen, dagiti napulotan agserbidanto iti Dios iti Kasasantuan a siled ti naespirituan a templo, idiay “langit a mismo.” (Hebreo 9:24) Yantangay adda dagiti papadi nga agan-annong kadagiti paraangan ti templo a nasirmata ni Ezequiel, matungtungpal la ketdi itan dayta a sirmata, bayat nga adda pay la ditoy daga ti dadduma kadagiti napulotan. Gapuna, iti Marso 1, 1999, a ruar daytoy a magasin, adda naaramid a panagbalbaliw iti pannakailawlawag daytoy a topiko. No kasta, nagsilnag ti naespirituan a lawag iti padto ni Ezequiel agingga iti tartaraudi ti maika-20 a siglo.

Madadaankay Koma a Mangbalbaliw iti Panangmatmatyo

17. Aniada a personal a panangmatmat ti binalbaliwanyo manipud idi naammuanyo ti kinapudno, ket kasanokayo a nagunggonaan?

¹⁷ Masapul a madadaan a ‘mangkayaw iti tunggal panunot tapno pagbalinen a natulnog ken Kristo’ ti asinoman a mayat a makaammo iti kinapudno. (2 Corinto 10:5) Saan a kanayon a nalaka nga aramiden dayta, nangruna no nauneg ti pannakairamut dagiti kapanunotan. Kas pagarigan, sakbay a naammuanyo ti kinapudno maipapan iti Dios, mabalin a maay-ayatankayo idi a sangapamiliaan a nangrambak kadagiti narelihiosuan nga okasion. Idi inrugiyo ti agadal iti Biblia, nautobyo a namunganay kadagiti pagano dagitoy a selebrasion. Idi damo, mabalin a bimdengkayo a mangyaplikar iti maad-adalyo. Ngem idi kamaudiananna, insardengyon ti makiraman kadagiti selebrasion a di makaay-ayo iti Dios agsipud ta ad-adda ti panagayatyo iti Dios ngem iti nabangonanyo a relihion. Saan aya a binendisionan ni Jehova ti desisionyo?​—Idiligyo ti Hebreo 11:25.

18. Ania koma ti panagriknatayo no lumawag ti pannakaawattayo iti kinapudno a masarakan iti Biblia?

¹⁸ Kanayon a pagimbagantayo ti panangaramid iti pagayatan ti Dios. (Isaias 48:17, 18) Isu a no lumawag ti pannakaawattayo iti maysa a teksto ti Biblia, pagrag-oantay koma ti rumanraniag a kinapudno! Ti agtultuloy a pannakalawagtayo pasingkedanna nga addatayo a talaga iti umiso a dalan. Dayta ti “dana ti nalinteg,” a “kas iti anaraar ti agsapa, a rumaniag a rumaniag agingga iti napaypayso nga aldaw.” (Proverbio 4:18) Pudno, adda dagiti banag maipapan iti panggep ti Dios a ditay unay maawatan ita, a kasda la “nakudrep a ladawan.” Ngem inton dumteng ti panawen nga inkeddeng ti Dios, makitatayto ti naan-anay a pintas ti kinapudno, no la ket ta agtalinaedtayo a di maisin iti “dana.” Kabayatanna, pagrag-oantay koma dagiti kinapudno nga imbatad ni Jehova, ket urayentayo ti pannakailawlawag dagidiay ditay pay maawatan a naimbag.

19. Ania ti maysa a pamay-an a maipakita ti panagayattayo iti kinapudno?

¹⁹ Kasanotay a maipakita ti panagayattayo iti lawag iti praktikal a pamay-an? Ti maysa a pamay-an ket babaen ti regular a panagbasa iti Sao ti Dios​—inaldaw aginggat’ mabalin. Regular met laeng kadi a basbasaenyo ti Biblia? Ipapaayandatay met ti magasin a Pagwanawanan ken Agriingkayo! iti nawadwad a nasayaat a naespirituan a taraon. Basaenyo met dagiti libro, broshur, ken dadduma pay a publikasion a naisagana a pakagunggonaantayo. Ken dagiti met ngay makaparegta a report maipapan iti pannakaikaskasaba ti Pagarian a maipabpablaak iti Yearbook of Jehovah’s Witnesses?

20. Ania ti pakainaigan ti lawag ken kinapudno nga aggapu ken Jehova iti itatabunotayo kadagiti Nakristianuan a gimong?

²⁰ Wen, nagsayaat ti panangsungbat ni Jehova iti kararag a nayebkas iti Salmo 43:3. Iti ngudo dayta a bersikulo, mabasatayo: “Iturongdak kadi [ti silawmo ken kinapudnom] kadagita nasantuan a turodmo, ken kadagiti tabernakulom.” Magagarankay kadi nga agdaydayaw ken Jehova, a kaduayo dagiti umariwekwek a dadduma pay? Ti naespirituan nga instruksion a maipapaay kadagiti gimongtayo ket maysa a napateg a pamay-an ni Jehova a manglawag kadatayo ita. Ania ti mabalintay nga aramiden tapno rumayray ti panangipategtayo kadagiti Nakristianuan a gimong? Awisendakayo a mangusig a sipapasnek iti daytoy a banag iti sumaganad nga artikulo.

[Footnote]

Masungbatanyo Kadi?

• Apay a progresibo ti panangipalgak ni Jehova kadagiti panggepna?

• Kasano a rinisut dagiti apostol ken lallakay sadi Jerusalem ti isyu maipapan iti panagkugit?

• Ania a pamay-an ti panagadal iti Biblia ti inusar dagiti immuna nga Estudiante ti Biblia, ket apay a naidumduma dayta?

• Iyilustraryo no kasano a maipalgak ti naespirituan a lawag iti panawen nga inkeddeng ti Dios.

[Ladawan iti panid 12]

Ammo ni Charles Taze Russell a mailawlawagto ti libro nga Apocalipsis iti panawen nga inkeddeng ti Dios