No Kasano a Matulongannatayo ni Jesu-Kristo

NAKASKASDAAW ti panangtulong ni Jesu-Kristo kadagiti tattao idi adda ditoy daga. Pudno unay daytoy ta kalpasan nga insalaysayna ti adu a pasamak iti biag ni Jesus, uray la nakuna ti maysa idi a nakaimatang: “Addada, iti kinapudnona, adu a sabsabali pay a bambanag nga inaramid ni Jesus, a, no naisuratda koma iti naan-anay a detalye, pagarupek, ti lubong a mismo dina kabaelan a laonen dagiti naisurat a lukot.” (Juan 21:25) Gapu ta adu idi ti inaramid ni Jesus ditoy daga, mabalin a maisaludsodtayo: ‘Kasano a katulongantayo ni Jesus idiay langit? Magunggonaantayo kadi ita iti nadungngo nga asina?’

Makaparagsak ken makaliwliwa ti sungbat. Ibaga ti Biblia kadatayo a simrek ni Kristo “idiay langit a mismo, tapno agparang ita iti sanguanan ti persona ti Dios maipaay kadatayo.” (Hebreo 9:24) Ania ti inaramidna agpaay kadatayo? Kuna ni apostol Pablo: “Simrek [ni Kristo], saan, saan a babaen ti dara dagiti kalding ken dagiti urbon a toro, no di ket babaen ti bukodna a dara, a namimpinsan a maipaay iti amin a panawenen idiay nasantuan a disso [“langit a mismo”] ket nagun-odna ti agnanayon a pannakaispal maipaay kadatayo.”​—Hebreo 9:12; 1 Juan 2:2.

Anian a nagimbag a damag! Imbes nga agsardeng ti makagunggona a trabaho ni Jesus agpaay iti tattao idi immuli idiay langit, ad-adu ketdi ti inaramidna para iti sangatauan. Ngamin, iti di kaikarian a kinamanangngaasi ti Dios, dinutokanna ni Jesus nga agserbi kas “publiko nga adipen”​—maysa a nangato a padi​—“iti makannawan ti trono ti Natan-ok idiay langlangit.”​—Hebreo 8:1, 2.

“Publiko nga Adipen”

Agserbi ngarud ni Jesus idiay langit kas publiko nga adipen agpaay iti sangatauan. Ti trabahona ket kas iti inaramid dagiti nangato a padi ti Israel agpaay kadagiti managdayaw ti Dios idi un-unana a panawen. Ania daydi a trabaho? Kuna ni Pablo: “Tunggal nangato a padi madutokan a mangidaton agpadpada kadagiti sagut ken kadagiti sakripisio; gapuna masapul a daytoy [ni napagungar a Jesu-Kristo] adda met idatonna.”​—Hebreo 8:3.

Nasaysayaat nga amang ti indaton ni Jesus ngem iti indaton idi dagiti nangato a padi. “No ti dara dagiti kalding ken dagiti toro” ket mangipaay iti naespirituan a kinadalus iti nagkauna nga Israel, “anianto ketdin nga ad-adda pay a ti dara ni Kristo . . . dalusanna dagiti konsiensiatayo manipud kadagiti natay nga ar-aramid tapno mangipaaytayo iti sagrado a panagserbi iti sibibiag a Dios?”​—Hebreo 9:13, 14.

Naisangsangayan met a publiko nga adipen ni Jesus gapu ta maysan nga imortal. Iti nagkauna nga Israel, “adu ti masapul nga agbalin a papadi nga agsasaruno gapu ta malapdanda nga agtultuloy a kasta babaen ti ipapatay.” Komusta met ni Jesus? Insurat ni Pablo: “Adda kinapadina nga awanan kadagiti asinoman a kasuno. Gapuna kabaelanna met nga isalakan a naan-anay dagidiay umadani iti Dios baeten kenkuana, agsipud ta isu kankanayon a sibibiag tapno agdawat maipaay kadakuada.” (Hebreo 7:23-25; Roma 6:9) Wen, iti makannawan ti Dios idiay langit, adda publiko nga adipen a ‘kankanayon a sibibiag tapno agdawat maipaay kadatayo.’ Panunotenyo no ania ti kaipapanan dayta kadatayo ita!

Idi adda ni Jesus ditoy daga, nagpatulong kenkuana dagiti tattao. Adda dagiti gundaway a nagdaliasatda iti nakaad-adayo tapno laeng agpatulong kenkuana. (Mateo 4:24, 25) Mabalin nga agpatulong ken Jesus nga adda idiay langit, dagiti tattao manipud iti amin a nasion. Manipud iti nailangitan a saadna, kanayon a sisasagana nga agserbi kas publiko nga adipen.

Ania a Klase a Nangato a Padi ni Jesus?

Iti panangiladawan kenkuana dagiti salaysay ti Ebanghelio, saantay a mapagduaduaan ti kinamanagtulong ken nadungngo nga ayat ni Jesu-Kristo. Anian a kinamanagsakripisiona! Saan la a naminsan a naisturbo idi nga aginanada koma kadagiti adalanna. Imbes a panunotenna a napaidaman iti napateg a gundaway nga aginana, “simnek ti asina” kadagiti tattao a nagpatulong kenkuana. Uray idi nabannog, mabisin, ken mawaw ni Jesus, “inawatna ida a siaasi” ken situtulok a di nangan tapno laeng matulonganna dagiti napudno nga agbabbabawi a managbasol.​—Marcos 6:31-34; Lucas 9:11-17; Juan 4:4-6, 31-34.

Gapu iti asina, nangaramid ni Jesus kadagiti praktikal nga addang tapno mapennekna dagiti pisikal, emosional, ken naespirituan a kasapulan dagiti tattao. (Mateo 9:35-38; Marcos 6:35-44) Kanayonanna, insurona a birokenda ti manayon a bang-ar ken liwliwa. (Juan 4:7-30, 39-42) Anian a makaay-ayo, kas pagarigan, ti awisna: “Umaykayo kaniak, dakayo amin a mabambannogan ken nadagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kaririknak ken napakumbaba ti pusok, ket makasarakkayto ti bang-ar a maipaay kadagiti kararuayo.”​—Mateo 11:28, 29.

Kasta unay ti panagayat ni Jesus iti tattao nga uray la intedna ti biagna agpaay iti managbasol a sangatauan. (Roma 5:6-8) Mainaig iti daytoy, kuna ni apostol Pablo: ‘Dina impaidam uray pay ti bukodna nga Anak no di ket inyawatna a maipaay kadatayo amin, apay saannanto aya a siaasi nga ipaay met kadatayo mairaman kenkuana dagiti amin a dadduma a bambanag? . . . Ni Kristo Jesus isu daydiay natay, wen, isu pay ketdi daydiay napagungar kadagiti natay, isu nga adda iti makannawan nga ima ti Dios, nga agdawat met maipaay kadatayo.’​—Roma 8:32-34.

Mannakipagrikna a Nangato a Padi

Kas maysa idi a tao, napasaran ni Jesus ti bisin, waw, bannog, ladingit, ut-ot, ken ipapatay. Dagiti pakadukotan ken pakarigatan nga inanduranna ti namagbalin kenkuana a maikari nga agserbi iti naisangsangayan a pamay-an kas Nangato a Padi ti agsagsagaba a sangatauan. Insurat ni Pablo: ‘Rebbengen [ni Jesus] ti agbalin a kas kadagiti “kakabsatna” iti amin a bambanag, tapno makapagbalin a naasi ken matalek a nangato a padi kadagiti bambanag maipapan iti Dios, tapno mangidaton iti pangikappia a sakripisio maipaay iti basbasol dagiti tattao. Gapu ta isu a mismo nagsagaba idi masubsubok, kabaelanna ti bumadang kadagidiay masubsubok.’​—Hebreo 2:17, 18; 13:8.

Impakita ni Jesus nga isut’ kualipikado ken sidadaan a tumulong a mangyadani kadagiti tattao iti Dios. Nupay kasta, kayat kadi a sawen daytoy a nauyong ken di manangngaasi ti Dios ket masapul a kombinsiren pay la ni Jesus tapno mamakawan? Saan a pulos, ta ipasigurado kadatayo ti Biblia a ‘ni Jehova naimbag ken sidadaan a mangpakawan.’ Kunana pay: “No ipudnotayo dagiti basoltayo, isu matalek ken nalinteg tapno pakawanennatayo kadagiti basoltayo ken tapno dalusannatayo manipud iti amin a kinakillo.” (Salmo 86:5; 1 Juan 1:9) Kinapudnona, iparangarang dagiti nadungngo a sao ken aramid ni Jesus ti pannakipagrikna, asi, ken ayat ni Amana.​—Juan 5:19; 8:28; 14:9, 10.

Kasano a pabang-aran ni Jesus dagiti agbabbabawi a managbasol? Babaen ti panangtulongna kadakuada a maaddaan iti rag-o ken pannakapnek bayat a sipapasnek nga ikagkagumaanda a paragsaken ti Dios. Idi sinuratanna dagiti padana a napulotan a Kristiano, ginupgop ni Pablo ti kasasaad kadagitoy a sasao: “Idinto, ngarud, ta addaantayo iti naindaklan a nangato a padi a limmasat iti langlangit, ni Jesus nga Anak ti Dios, kumpettayo koma iti panangipudno[tayo kenkuana]. Ta addaantayo kas nangato a padi, saan a ti maysa a dina mabalin ti makipagrikna kadagiti kinakapuytayo, no di ket ti maysa a nasuboken kadagiti amin a banag kas kadatayo, ngem awanan basol. Ngarud, buyogen ti wayawaya iti panagsao umadanitay koma iti trono ti di kaikarian a kinamanangaasi, tapno makagun-odtayo iti asi ken makasaraktayo iti di kaikarian a kinamanangaasi a kas tulong iti umiso a tiempo.”​—Hebreo 4:14-16.

“Tulong iti Umiso a Tiempo”

Ngem ania ti mabalintay nga aramiden no maipasangotayo kadagiti parikut a kasla ditay kabaelan​—nakaro a sakit, maburibor a konsiensia, nakaro a pannakaupay, ken panagleddaang? Mabalintay nga aprobetsaren ti kanayon a nagpannurayan idi ni Jesus​—ti kararag, a maysa a nagpateg a pribilehio. Kas pagarigan, iti rabii sakbay a natay maigapu kadatayo, “intultuloyna ti agkarkararag nga ad-adda a sipapasnek; ket ti ling-etna nagbalin a kas kadagiti tedted ti dara nga agtintinnag iti daga.” (Lucas 22:44) Wen, ammo ni Jesus ti rikna ti napasnek a panagkararag iti Dios. “Nangidaton kadagiti araraw ken kasta met kadagiti dawdawat iti daydiay Maysa a makabalin a mangisalakan kenkuana manipud iti ipapatay, buyogen dagiti napigsa nga ikkis ken lulua, ket isu naimdengan buyogen ti pannakaanamong gapu iti nadiosan a butengna.”​—Hebreo 5:7.

Ammo ni Jesus no kasano kapateg kadagiti tattao ti ‘maipangag’ ken mapabileg. (Lucas 22:43, PBS Edition) Inkarina pay: “No dumawatkayo iti Ama iti aniaman a banag itednanto dayta kadakayo iti naganko. . . . Dumawatkayo ket umawatkayto, tapno ti rag-oyo maan-anay koma.” (Juan 16:23, 24) Mabalintay ngarud ti umararaw iti Dios buyogen ti panagtalek nga ipalubosna nga usaren ti Anakna ti autoridad a naited kenkuana ken ti pateg ti pangsubbot a datonna agpaay kadatayo.​—Mateo 28:18.

Masiguradotayo nga iti saadna idiay langit, ipaay ni Jesus ti maitutop a tulong iti umiso a tiempo. Kas pagarigan, no nakabasoltayo ket pudpudno a pagbabawiantayo, maliwliwatayo iti pammasiguro nga “addaantayo iti katulongan iti Ama, ni Jesu-Kristo, daydiay nalinteg.” (1 Juan 2:1, 2) Ti Katulongan ken Manangliwliwa kadatayo nga adda sadi langit ti umararaw para kadatayo tapno maipangag dagiti kararagtayo babaen ti naganna ken maitunos iti Kasuratan.​—Juan 14:13, 14; 1 Juan 5:14, 15.

Panangipateg iti Tulong ni Kristo

Saan la a basta umararaw iti Dios babaen ti Anakna ti nasken nga aramiden. Gapu iti ‘pananggatang ni Kristo,’ maikuna nga isu ti “makinkukua a nanggatang” iti sangatauan babaen ti pateg ti pangsubbot a datonna. (Galacia 3:13; 4:5; 2 Pedro 2:1) Maipakitatay ti panagyamantayo iti amin nga inaramid ni Kristo agpaay kadatayo babaen ti panangbigbig a kukuanatayo ken siraragsak nga awatentayo ti awisna: “No ti asinoman kayatna ti sumurot kaniak, paglikudanna koma ti bagina ket ibaklayna ti kayona a pagtutuokan iti inaldaw-aldaw ket agtultuloy a surotennak.” (Lucas 9:23) Ti ‘panangtallikud iti bagi’ ket saan la a basta panangibaga a sabalin ti makinkukua kadatayo. Wen, ta ni Kristo “natay maipaay iti isuamin tapno dagidiay nga agbiag saanda koman nga agbiag nga agpaay iti bagbagida, no di ket agpaay kenkuana a natay maipaay kadakuada.” (2 Corinto 5:14, 15) No kasta, ti panangipateg iti subbot dakkel ti epektona iti panangmatmat, kalat, ken estilo ti panagbiagtayo. Ti agnanayon nga utangtayo ken “Kristo Jesus, a nangiyawat iti bagina maipaay kadatayo,” ti mangtignay koma kadatayo a mangammo iti ad-adu pay maipapan kenkuana ken iti naayat nga Amana, ni Jehova a Dios. Tarigagayantay met koma a pabilgen ti pammatitayo, nga agbiag maitunos kadagiti makagunggona a pagalagadan ti Dios, ken agbalin a “naregta iti nasayaat nga ar-aramid.”​—Tito 2:13, 14; Juan 17:3.

Magun-odtayo ti naintiempuan a naespirituan a taraon, pammaregta, ken panangiwanwan iti uneg ti kongregasion Kristiano. (Mateo 24:45-47; Hebreo 10:21-25) Kas pagarigan, no adda masakit iti naespirituan, mabalinda nga ‘ayaban dagiti lallakay [nadutokan a papanglakayen] iti kongregasion.’ Innayon nga impanamnama ni Santiago: “Ket ti kararag ti pammati paimbagennanto ti addaan sagubanit, ket isu ibangonto ni Jehova. Kasta met, no isu nakaaramid kadagiti basol, mapakawanto dayta kenkuana.”​—Santiago 5:13-15.

Kas panangyilustrar: Maysa a balud idiay South Africa ti nagsurat iti maysa a panglakayen ti kongregasion ket agyamyaman iti “amin a Saksi ni Jehova a mangitungtungpal iti nasayaat a trabaho nga inyussuat ni Jesu-Kristo a mangiturong kadagiti tattao iti Pagarian ti Dios.” Sa innayonna: “Napalaus ti ragsakko a nakaawat iti suratyo. Kasta unay ti pannakatukay ti riknak gapu iti pannakaseknanyo iti naespirituan a pannakapaimbagko. Dayta ti ad-adda a panggapuak nga agbabawi kas iyaw-awis ni Jehova a Dios. Duapulo ket pito a tawenen a naisagmak ken nagallaallaak iti biag a napnuan basol, panangallilaw, imoral a pannakirelasion, nalulok a kababalin, ken di umiso a relihion. Kalpasan a naam-ammok dagiti Saksi ni Jehova, makunak a nasarakak met laengen ti dalan​—ti umiso a dalan! Ti laeng aramidek isu ti panangsurot iti dayta.”

Asidegen ti Kanayonan a Tulong

Dagiti lumanlanlan a kasasaad ti lubong ket nalawag a pammaneknek nga agbibiagtayon iti kritikal a panawen a sarunuen ti panagbettak “ti dakkel a rigat.” Adda itan ti dakkel a bunggoy manipud iti amin a nasion, tribo, ili, ken pagsasao a ‘manglablaba kadagiti pagan-anayda ket pinapudawda iti dara ti Kordero.’ (Apocalipsis 7:9, 13, 14; 2 Timoteo 3:1-5) Babaen ti panangipakitada a mamatida iti pangsubbot a daton ni Jesus, mapakawan dagiti basolda ken matultulongan ida a suminged iti Dios​—kinapudnona, kas gagayyemna.​—Santiago 2:23.

Ni Jesu-Kristo a Kordero “ipastorannanto [dagiti makalasat iti dakkel a rigat] ket idalannanto ida kadagiti ubbog ti dandanum ti biag. Ket ti Dios punasennanto ti amin a lua kadagiti matada.” (Apocalipsis 7:17) Iti kasta, naan-anayton nga akmen ni Kristo dagiti rebbengenna kas Nangato a Padi. Tulongannanto ti amin a gayyem ti Dios a magunggonaan a naan-anay iti “ubbog ti dandanum ti biag”​—iti naespirituan, pisikal, mental, ken emosional a pamay-an. Naan-anayton a maibanag ti inrugi ni Jesus idi 33 K.P. ken ti intultuloyna nga inaramid manipud idi immuli idiay langit.

Ditay ngarud koma mauma a mangipakita iti dakkel a panangipateg iti amin nga inaramid ken ar-aramiden ti Dios ken ni Kristo agpaay kadatayo. Indagadag ni apostol Pablo: “Kankanayon nga agrag-okayo iti Apo. . . . Dikay maringgoran iti aniaman, no di ket iti amin a banag babaen ti kararag ken araraw agraman panagyaman maipakaammo koma dagiti dawdawatyo iti Dios; ket ti talna ti Dios a mangringbaw iti amin a panunot aywanannanto dagiti pusoyo ken dagiti pannakabalin ti isipyo babaen ken Kristo Jesus.”​—Filipos 4:4, 6, 7.

Adda ti naisangsangayan a pamay-an tapno maipakita ti panagyamanyo ken Jesu-Kristo, ti Katulongantayo idiay langit. Kalpasan ti ilelennek ti init inton Mierkoles, Abril 19, 2000, agtataripnong dagiti Saksi ni Jehova iti intero a lubong tapno rambakanda ti Panglaglagip iti ipapatay ni Kristo. (Lucas 22:19) Ikkannakayo daytoy iti gundaway a mangparayray iti panangipategyo iti pangsubbot a daton ni Kristo. Sibabara nga awisendakayo a tumabuno ken agimdeng no kasano nga agnanayon a magunggonaankayo iti nakaskasdaaw nga urnos ti Dios maipapan iti pannakaisalakan babaen ken Kristo. Pangngaasiyo ta damagenyo kadagiti Saksi ni Jehova iti lugaryo maipapan iti eksakto nga oras ken pakaangayan daytoy naisangsangayan a taripnong.

[Ladawan iti panid 7]

Ammo ni Jesus ti rikna ti napasnek a panagkararag iti Dios

[Dagiti Ladawan iti panid 8]

Matulongannatayo ni Kristo a mangdaer kadagiti parikut a ditay kabaelan nga ibaklay

[Ladawan iti panid 9]

Tulongannatayo ni Kristo babaen kadagiti naayat a panglakayen