No Kasanonatayo nga Iturturong ni Jehova

“Iturongnak iti dana ti kinalinteg.”​—SALMO 27:11, NW.

1, 2. (a) Kasano nga iturturong ni Jehova ti ilina ita? (b) Ania ti ramanen ti panangaprobetsar a naan-anay kadagiti gimong?

NI Jehova ti Gubuayan ti lawag ken kinapudno, kas naadaltayo iti napalabas nga artikulo. Ti Saona ti silaw a mangidalan kadatayo iti dana ti kinalinteg. Iturongnatayo ni Jehova babaen ti panangisurona iti daldalanna kadatayo. (Salmo 119:105) Kas iti salmista idi ugma, siyayaman nga agpapaidalantayo iti Dios ken ikarkararagtayo: “Isurom kaniak ti dalanmo, O Jehova; ket iturongnak iti dana ti kinalinteg.”​—Salmo 27:11.

² Ti maysa a pamay-an ni Jehova a mangisuro ita ket babaen dagiti Nakristianuan a gimong. Ap-aprobetsarentay kadi a naan-anay daytoy a naayat a probision babaen ti (1) regular nga itatabuno, (2) panagimdeng a naimbag iti programa, ken (3) madadaan a panagkomento kadagiti paset a mangkalikagum iti pannakipaset dagiti agdengdengngeg? Maysa pay, siyayaman kadi nga ipangpangagtayo dagiti maaw-awattayo a singasing a makatulong kadatayo nga agtalinaed “iti dana ti kinalinteg”?

Komusta ti Itatabunoyo Kadagiti Gimong?

3. Kasano a naipaugali ti maysa a kabsat nga agserserbi iti amin a tiempo ti regular nga itatabuno kadagiti gimong?

³ Adda dagiti agibumbunannag iti Pagarian a regular a makigimgimong sipud pay iti kinaubingda. Kinuna ti maysa nga amin-tiempo a ministro a Saksi ni Jehova: “Idi dekada 1930, idi ubbingkami pay nga agkakabsat, saanmi a masapul a damagen pay kadagiti dadakkelmi no makigimongkami. Ammomi lattan a makigimongkami malaksid no adda rikriknaenmi. Saan a limmanglangan ti pamiliami kadagiti gimong.” Kas ken propetisa Ana, “saan a pulos a limmanglangan” daytoy a kabsat iti lugar a pagdaydayawan ken Jehova.​—Lucas 2:36, 37.

4-6. (a) Apay a malanganan dagiti dadduma nga agibumbunannag iti Pagarian dagiti gimong? (b) Apay a napateg ti pannakigimong?

⁴ Maysakayo kadi kadagidiay regular a tumabtabuno kadagiti Nakristianuan a gimong, wenno managlangankayo? Dagiti dadduma a Kristiano a mangipagarup a tumabtabunoda inkeddengda a siertuen no talaga met laeng nga ar-aramidenda dayta. Iti sumagmamano a lawas, inrekordda ti amin a gimong a tinabunuanda. Idi repasuendan ti rekordda, naklaatda iti kaadu dagiti gimong a nalangananda.

⁵ ‘Saan a makapasiddaaw dayta,’ nalabit kuna ti dadduma. ‘Nagadu ngamin ti asikasuen dagiti tattao ita ket saan a nalaka kadakuada ti tumabuno a regular kadagiti gimong.’ Pudno nga agbibiagtayo iti panawen nga adu ti pakasikoran. Maysa pay, awan duadua a dumegdegto pay ti kasasaad. (2 Timoteo 3:13) Ngem saan kadi a dayta ti makagapu nga ad-adda pay a nasken ti regular nga itatabuno kadagiti gimong? No saan a regular ti panangipaunegtayo iti makapasalun-at a naespirituan a taraon a mangsustiner kadatayo, ditay masarkedan dagiti pakarigatan iti daytoy a sistema ti bambanag. Kinapudnona, no saan a regular ti pannakitaripnongtayo, mabalin a maisiasitayto a mamimpinsan iti “dana ti nalinteg”! (Proverbio 4:18) Pudno, mabalin a masaduttayon no dadduma a makigimong gapu ta nabambannogtayo a naggapu iti agmalem a trabahotayo. Ngem no tumabunotayo uray no nabannogtayo, magunggonaantayo ken maparegtatayo dagiti padatayo a Kristiano idiay Kingdom Hall.

⁶ Adda pay ipasimudaag ti Hebreo 10:25 a napateg a rason no apay a regular a makigimongtayo. Pinaregta ni apostol Pablo dagiti padana a Kristiano nga agtataripnong a ‘nangnangruna bayat a makitkitada a ti aldaw umas-asidegen.’ Wen, ditay liplipatan nga umad-adanin ti “aldaw ni Jehova.” (2 Pedro 3:12) No ipagaruptayo a mabayag pay nga umay ti panungpalan daytoy a sistema, mabalin a palubosantayo dagiti personal a kalat a mangsallin kadagiti napateg a naespirituan nga aktibidad kas iti pannakigimong. Ket, kas impakdaar ni Jesus, ‘giddato a dayta nga aldaw kellaat nga umay kadatayo.’​—Lucas 21:34.

Agimdeng a Naimbag

7. Apay a nasken nga agimdeng a naimbag dagiti ubbing kadagiti gimong?

⁷ Saan nga umdas ti basta tumabuno kadagiti gimong. Masapul a dumngegtayo a naimbag, nga imdengantayo ti ibagbaga dagiti agpalpalawag. (Proverbio 7:24) Agimdeng met koma dagiti ubbing. No adda ti ubing idiay eskuelaan, nasken nga agimdeng a naimbag iti mannursuro, uray no saan nga interesado wenno kasla dina maawatan ti leksion. Ammo ti mannursuro a no ipasnek ti ubing ti agimdeng, adda latta maadalna uray kaskasano. No kasta, saan kadi a rumbeng laeng a dumngeg a naimbag dagiti ages-eskuelan nga ubbing iti aniaman a maisuro kadagiti gimong ti kongregasion imbes a baybay-an ida a maturog no mangrugin ti gimong? Pudno, ‘narigat a maawatan’ ti dadduma kadagiti napateg a kinapudno a masarakan iti Kasuratan. (2 Pedro 3:16) Ngem kas iti Dios, ditay koma tagibassiten ti abilidad ti ubing nga agsursuro. Idi tiempo ti Biblia, binilin ti Dios dagiti agtutubo nga adipenna a ‘dumngeg ken agsursuro ken agbuteng ken Jehova ken mangaramid iti amin a sasao daytoy a linteg,’ nga awan duadua a narigat a maawatan dagiti ubbing ti dadduma kadagita. (Deuteronomio 31:12; idiligyo ti Levitico 18:1-30.) Saan kadi a kasta met ti namnamaen ni Jehova kadagiti ubbing ita?

8. Ania ti ar-aramiden dagiti dadduma a nagannak tapno matulongan dagiti annakda nga agatension kadagiti gimong?

⁸ Ammo dagiti Kristiano a nagannak nga adu ti masursuro dagiti annakda maipapan iti naespirituan a bambanag kadagiti gimong. Gapuna, adda dagiti nagannak a paturogenda dagiti annakda sakbay a mapanda makigimong tapno inton addada iti Kingdom Hall saandan nga agtuglep ken nakasaganada nga agsursuro. Mabalin a siiinget a limitaran dagiti dadduma a nagannak ti panagbuya dagiti annakda iti telebision wenno nainsiriban a saanda pay ketdi a pagbuyaen ida kadagiti rabii nga adda gimong. (Efeso 5:15, 16) Ket dagiti kasta a nagannak liklikanda dagiti pakasingaan, a paregtaenda dagiti annakda nga agimdeng ken agsursuro, sigun iti edad ken kabaelanda.​—Proverbio 8:32.

9. Ania ti makatulong kadatayo nga agimdeng a naimbag?

⁹ Nataengan dagiti kasarsarita ni Jesus idi kinunana: “Siputanyo no kasano ti panagimdengyo.” (Lucas 8:18) Kadagitoy a tiempo, nalaka nga ibaga daytoy ngem narigat nga aramiden. Pudno, saan a kaskarina ti agimdeng a sipapasnek, ngem masursurotayo dayta. Bayat a dumdumngegkayo iti palawag a naibatay iti Biblia wenno iti aniaman a paset ti gimong, imutektekanyo dagiti kangrunaan nga ideya. Padaananyo ti sumaruno nga ibaga ti agpalpalawag. Tandaananyo dagiti punto a mausaryo iti ministerio wenno mayaplikar iti biagyo. Repasuenyo iti panunotyo dagiti punto a maipalpalawag. Aginotarkayo, ngem ababa laeng.

10, 11. Kasano ti panangtulong dagiti dadduma a nagannak kadagiti annakda a dumngeg a naimbag, ket aniada a pamay-an ti natakuatanyo a makatulong?

¹⁰ Nalaklaka nga iruam dagiti annak nga agimdeng a naimbag no ubbingda pay. Uray sakbay a masursuroda ti agbasa ken agsurat, adda dagiti di pay ages-eskuela nga ubbing a parparegtaen dagiti dadakkelda nga “aginotar” kadagiti gimong. Agikur-itda iti papel no mangngegda dagiti kabesadoda a sao a kas iti “Jehova,” “Jesus,” wenno “Pagarian.” Iti kastoy a wagas, masursuro dagiti ubbing ti agatension iti aniaman a mangngegda iti plataporma.

¹¹ No dadduma, nasken met a paregtaen nga agimdeng a naimbag dagiti dadakkelen nga ubbing. Idi madlawna nga agkalkallautang ti panunot ti anakna nga agtawen iti 11 kabayatan ti Nakristianuan a kombension, inyawatan ni tatangna iti Biblia ket imbagana kenkuana a basaenna dagiti teksto a dakamaten dagiti agpalpalawag. Bayat nga aginotnotar, palpaliiwen ti ama ti anakna a nakaiggem iti Biblia. Kalpasan dayta, maay-ayatanen ti ubing a nagimdeng iti programa ti kombension.

Mangngeg Koma ti Timekyo

12, 13. Apay a napateg ti makidanggay iti panagkanta ti kongregasion?

¹² Inkanta ni Ari David: “Liklikmutekto ti altarmo, O Jehova; tapno maipangngegko ti timek ti panagyaman.” (Salmo 26:6, 7) Ipaayannatayo dagiti gimong dagiti Saksi ni Jehova kadagiti nagsayaat a gundaway a mangipaduyakyak iti pammatitayo. Ti maysa a pamay-an a maaramidtayo daytoy ket babaen ti pannakidanggay iti panagkanta ti kongregasion. Napateg daytoy a paset ti panagdayawtayo, ngem nalaka a maliwayan.

¹³ Dagiti dadduma a di pay makabasa nga ubbing ikabesada ti liriko dagiti kanta ti Pagarian a mausar kadagiti gimong kada lawas. Maay-ayatanda a makipagkanta kadagiti nataengan. Ngem no medio dadakkelen dagiti ubbing, mabalin a bumaaw ti interesda a makipagkanta kadagiti kanta ti Pagarian. Bumdeng met ti dadduma a nataengan nga agkanta kadagiti gimong. Ngem kas iti panangasaba, ti panagkanta ket paset ti panagdayawtayo. (Efeso 5:19) Aramidentayo ti kabaelantayo a mangidayaw ken Jehova iti tay-ak ti ministerio. Saantay met kadi a maidaydayaw ni Jehova babaen ti naimpusuan a panagkanta iti pammadayaw, nalaingtay man nga agkanta wenno saan?​—Hebreo 13:15.

14. Apay a rumbeng nga isaganatayo a naimbag dagiti maadal kadagiti gimong ti kongregasion?

¹⁴ Maidaydayawtay met ti Dios babaen kadagiti makapabileg a komentotayo kadagiti paset ti gimong a mabalin a makipartisipar dagiti agdengdengngeg. Kalikaguman daytoy ti panagsagana. Nasken nga iwayaantayo nga utoben dagiti nauneg a paset ti Sao ti Dios. Nabigbig daytoy ni apostol Pablo, a naanep idi nga agadal iti Kasuratan. Insuratna: “O nagunegen dagiti kinabaknang ken sirib ken pannakaammo ti Dios!” (Roma 11:33) Dakayo nga ulo ti pamilia, nasken a tulonganyo ti tunggal miembro ti pamiliayo a mangsukimat iti sirib ti Dios a naipalgak iti Kasuratan. Iti sangapamiliaan a panagadalyo iti Biblia, ilawlawagyo dagiti punto a narigat a maawatan ken tulonganyo ti pamiliayo nga agsagana kadagiti gimong.

15. Ania dagiti singasing a makatulong kadatayo nga agkomento kadagiti gimong?

¹⁵ No tarigagayanyo ti agkomento a masansan kadagiti gimong, apay a dikay mangisagana iti kayatyo nga ikomento? Saan a kasapulan ti atiddog a komento. Maapresiar ti maitutop a teksto a napasnek ti pannakaibasana wenno ti sumagmamano a maitutop a sasao a naimpusuan ti pannakayebkasna. Dagiti dadduma nga agibumbunannag ipakpakaunada iti konduktor nga isuda ti damo a pagkomentuenna iti espesipiko a parapo tapno maaddaanda iti gundaway a mangipaduyakyak iti pammatida.

Sumirib ti Awan Padasna

16, 17. Ania ti imbalakad ti maysa a panglakayen iti maysa a ministerial nga adipen, ket apay nga epektibo dayta?

¹⁶ Kadagiti gimong dagiti Saksi ni Jehova, masansan a mapalagipantayo nga agbasa nga inaldaw iti Sao ti Dios. Makapabang-ar ti panangaramid iti dayta. Tulongannatay met dayta a mangaramid kadagiti nainsiriban a pangngeddeng, mangilinteg kadagiti pakapilawantayo, mangsaranget kadagiti sulisog, ken mangisubli iti naespirituan a kinatimbengtayo no adda di umiso a naaramidtayo.​—Salmo 19:7.

¹⁷ Sisasagana dagiti aduan kapadasan a panglakayen iti kongregasion a mangipaay iti Nainkasuratan a balakad a maitutop iti kasasaadtayo. Kasapulan laeng nga ‘aonentay’ dayta babaen ti panangkiddaw iti naibatay-Biblia a balakadda. (Proverbio 20:5) Naminsan, nagkiddaw ti maysa a naregta nga agtutubo a ministerial nga adipen kadagiti singasing iti maysa a panglakayen no kasano nga ad-adda a makatulong iti kongregasion. Gapu ta am-ammona unay dayta nga agtutubo, inukag ti panglakayen ti Bibliana iti 1 Timoteo 3:3, nga agkuna a masapul a “nainkalintegan” dagiti nadutokan a lallaki. Siaayat a dinakamatna dagiti pamay-an no kasano nga agbalin a nainkalintegan ti agtutubo iti pannakilangenna kadagiti dadduma. Nasair kadi dayta nga agtutubo a kabsat iti prangka a balakad a naipaay kenkuana? Saan a pulos! Kinunana: “Ti Biblia ti inusar ti panglakayen, isu a nautobko a ni Jehova ti naggapuan ti balakad.” Siyayaman nga inyaplikar ti ministerial nga adipen dayta a balakad ket nasayaat ti panagrang-ayna.

18. (a) Ania ti nakatulong iti maysa nga agtutubo a Kristiano a mangsaranget iti sulisog idiay eskuelaan? (b) Aniada a teksto ti Biblia ti malagipyo no maipasangokayo iti sulisog?

¹⁸ Makatulong met ti Sao ti Dios kadagiti agtutubo nga ‘umadayo kadagiti tarigagay a naikasigudan iti kina-agtutubo.’ (2 Timoteo 2:22) Gapu iti panangut-utob ken panangyaplikarna kadagiti teksto ti Biblia, nabaelan ti maysa nga agtutubo a Saksi ni Jehova, a nabiit pay a nagturpos iti haiskul, a sinaranget ti sulisog kabayatan ti panageskuelana. Masansan a mapanunotna ti balakad a nailanad iti Proverbio 13:20: “Makikuyogka kadagiti masirib a tattao, ket masiribkanto.” Dagidiay laeng ngarud addaan nauneg a panagraem kadagiti Nainkasuratan a prinsipio ti nakigayyemanna. Kinunana: “Kaslaak met la kadagiti dadduma. No dakes dagiti pakikaduaak, diak mapagkedkedan dagiti gagayyemko, ket mabalin a dakes ti pagbanagak.” Nakatulong met kenkuana ti balakad ni Pablo a nailanad iti 2 Timoteo 1:8. Insuratna: “Dika ibain ti pangsaksi maipapan iti Apotayo, . . .  no di ket makipasetka iti panagsagaba iti dakes maipaay iti naimbag a damag.” Maitunos iti dayta a balakad, situtured nga inranudna ti naibatay-Biblia a pammatina kadagiti kaklasena iti amin a maitutop a gundaway. Tunggal matudingan a mangted iti oral a report iti klase, mangpili iti topiko a mangted kenkuana iti gundaway a mangpaneknek a sitataktika maipapan iti Pagarian ti Dios.

19. Apay a di napagkedkedan ti maysa nga agtutubo a lalaki dagiti pannulisog ti lubong, ngem ania ti nangted kenkuana iti naespirituan a kired?

¹⁹ No kas pagarigan ta maisiasitayo iti “dana ti nalinteg,” matulongannatayo ti Sao ti Dios a mangilinteg kadagiti addangtayo. (Proverbio 4:18) Nasursuro a mismo daytoy ti maysa nga agtutubo a lalaki nga agnanaed idiay Africa. Idi sinarungkaran ti maysa kadagiti Saksi ni Jehova, immannugot nga agadal iti Biblia. Nagustuanna ti maad-adalna ngem di nagbayag nakitimpuyog kadagiti dakes a kakadua idiay eskuelaan. Idi agangay, nagbalin nga imoral ti panagbiagna. “Tinutuoknak ti konsiensiak, isut’ gapuna nga insardengkon ti makigimong,” inaminna. Idi bumaybayag, makigimgimong manen. Impudno daytoy nga agtutubo: “Natakuatak a ti panangbaybay-ak iti espiritualidadko ti kangrunaan a makagapu a kastoy ti nagbanagak. Awan ti personal a panagadalko. Dayta ti gapuna a diak mapagkedkedan ti sulisog. Inrugik ngarud ti agbasa iti Pagwanawanan ken Agriingkayo! Nagin-inut manen a kimmiredak iti naespirituan ket nangabaruanak. Maysa daytoy a nasayaat a pammaneknek kadagidiay nakadlaw iti panagbalbaliwko. Nagpabautisarak, ket naragsakak itan.” Ania ti nangted iti daytoy nga agtutubo iti bileg a mangparmek kadagiti nainlasagan a pagkapuyanna? Kimmired iti naespirituan babaen ti regular ken personal a panagadal iti Biblia.

20. Kasano a masarkedan ti maysa nga agtutubo ti panangatakar ni Satanas?

²⁰ Dakayo a Kristiano nga agtutubo, maat-atakarkayo ita! Tapno masarkedanyo ti panangatakar ni Satanas, masapul a regular a mangipaunegkayo iti naespirituan a taraon. Naawatan daytoy ti salmista a nalabit maysa met nga agtutubo. Nagyaman ken ni Jehova gapu iti panangipaayna iti Saona, tapno ‘madalusan ti agtutubo ti dalanna.’​—Salmo 119:9.

Agpaidalantayo iti Dios iti Sadinoman a Pangituronganna Kadatayo

21, 22. Apay a ditay koma panunoten a narigat unay ti dalan ti kinapudno?

²¹ Inruar ni Jehova ti nasion ti Israel idiay Egipto sana inturong iti Naikari a Daga. Iti panangmatmat ti tao, kasla narigat ti ruta a pinilina. Imbes nga iti nanamnam-ay ken diretso a ruta iti igid ti Baybay Mediteraneo ti pagnaanda, inturong ni Jehova ti ilina iti narigat a ruta iti let-ang. Ngem iti kinapudnona, pakakitaan daytoy ti kinaimbag ti Dios. Nupay as-asideg, madalanan koma dagiti Israelita ti daga dagiti naranggas a Filisteo no sinurotda ti ruta iti igid ti baybay. Iti panangpilina iti sabali a ruta, inlisi ni Jehova ti ilina iti nasapa a pannakiengkuentro kadagiti Filisteo.

²² Umasping iti dayta, mabalin a kasla narigat no dadduma ti dalan a pangiturturongan ni Jehova kadatayo. Kada lawas, napno ti eskediultayo kadagiti Nakristianuan nga aktibidad, a pakairamanan ti pannakigimong, personal a panagadal, ken panagserbi iti tay-ak. Mabalin a kasla nanamnam-ay dagiti sabali a dalan. Ngem makagtengtayo laeng iti destinasiontayo nga ikagkagumaantayo a danonen no agpaidalantayo iti Dios. Itultuloytay ngarud ti gumun-od iti napateg a pannursuro nga aggapu ken Jehova ket agtalinaedtayo iti “dana ti kinalinteg” iti agnanayon!​—Salmo 27:11.

Mailawlawagyo Kadi?

• Apay a nasken a tumabunotayo a regular kadagiti Nakristianuan a gimong?

• Ania ti maaramidan dagiti nagannak tapno matulonganda ti annakda nga agimdeng a naimbag kadagiti gimong?

• Ania ti ramanen ti panagimdeng a naimbag?

• Ania ti makatulong kadatayo nga agkomento kadagiti gimong?

[Ladawan iti panid 16, 17]

Ti itatabuno kadagiti Nakristianuan a gimong tulongannatayo a manglaglagip iti aldaw ni Jehova

[Dagiti Ladawan iti panid 18]

Nadumaduma dagiti wagas a maidaydayawtayo ni Jehova kadagiti Nakristianuan a gimong