Apay a Nasken a Makigimongtayo?

NI Christine ket kellaat a pinanawan ni lakayna kalpasan ti 20 a tawen a panagasawada. Agsolsolon a mangpadakkel iti pito nga annakna a lallaki ken maysa a babai. Agtawen iti 7 ti buridek ken agtawen iti 18 ti inauna. “Agmaymaysaakon a mangaramid kadagiti napateg a desision,” kunana. “Madagdagsenanak iti annongek ket kasapulak unay ti tulong ken panangiwanwan.” Nakasarakanna iti kasapulanna a tulong?

“Dagiti Nakristianuan a gimong ti gubuayan ti pigsami nga agiina,” kuna ni Christine. “ Kadagiti gimong, parparegtaendakami dagiti gagayyemmi ken iwanwanwandakami ti Sao ti Dios. Ti regular a pannakigimong tinulongandakami iti tunggal napateg nga aspeto ti biagmi nga agiina.”

Bayat dagitoy “napeggad a tiempo a narigat a pakilangenan,” mapasarantayo amin ti nagduduma a pakasuotan. (2 Timoteo 3:1) Kas ken ni Christine, nalabit ibilangyo a napateg dagiti gimong dagiti Saksi ni Jehova iti pannakasalbar ti espiritualidadyo, a napategda a paset ti panagdayawyo ken Jehova. Ti lima a gimong iti kongregasion a maang-angay iti linawas parayrayenda la ketdi ti ayatyo iti Dios, pabilgenda ti namnamayo agpaay iti masanguanan, ken mangipaay iti panangiwanwan a naibasar iti Biblia no kasano a daeran dagiti pakasuotan.

Nupay kasta, adda dagiti marigatan a makigimong a regular. Napaksuyandan iti ngudo ti aldaw, ket mariknada a makabannog uray laeng ti agisagana iti maitutop a kawes ken agdaliasat a mapan makigimong. Para iti dadduma, kanayon a dida makagimong gapu iti eskediul ti trabahoda. No tabunuanda amin a gimong, basbassit ti maawatda a sueldo wenno baka masesanteda. Adda met dadduma a mangliway iti gimong agsipud ta mariknada nga ad-adda a makapabang-ar ti maysa a panaglinglingay ngem ti makitimpuyog iti kongregasion.

Ania ngarud dagiti rason a nasken a tumabunotayo kadagiti Nakristianuan a gimong? Ania dagiti rumbeng nga aramidentayo tapno personal a makapabang-ar kadatayo dagita nga okasion? Tapno matulongantayo a mangsungbat kadagita a saludsod, usigentayo ti naayat nga awis ni Jesus a mabasa iti Mateo 11:28-30. Kinunana: “Umaykayo kaniak, dakayo amin a mabambannogan ken madagdagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo. Ta ti sangolko nalanay ken ti awitko nalag-an.”

“Umaykayo Kaniak”

Kinuna ni Jesus: “Umaykayo kaniak.” Maysa a pamay-an a maipangagtayo dayta nga awis ket ti regular a pannakigimongtayo. Adda nasayaat a rason tapno tumabunotayo, ta kinuna ni Jesus iti sabali a gundaway: “No sadino nga adda dua wenno tallo a naguurnong iti naganko, sadiay addaak iti nagtengngaanda.”​—Mateo 18:20.

Idi umuna a siglo, personal nga inawis ni Jesus ti nadumaduma a tattao tapno sumurotda kenkuana. Impaayanna ngarud ida iti gundaway tapno matagiragsakda ti nasinged a pannakilangen kenkuana. Dagus a simmurot ti dadduma. (Mateo 4:18-22) Saan nga inawat ti dadduma dayta nga awis agsipud ta ad-adda nga impategda dagiti namaterialan a pagimbaganda. (Marcos 10:21, 22; Lucas 9:57-62) Kadagidiay nangsurot ken Jesus, kastoy ti impanamnamana kadakuada: “Saandak a pinili, no di ket pinilikayo.”​—Juan 15:16.

Kalpasan ti ipapatay ken panagungar ni Kristo, dinan makadua dagiti adalanna iti pisikal a wagas. Ngem isu ket adda latta kadakuada iti anag nga inturongna ti aktibidadda ken pinaliiwna ti panangtungpalda iti balakadna. Kas pagarigan, agarup 70 a tawen kalpasan ti panagungarna, binalakadan ken pinaregta ni Jesus ti pito a kongregasion iti Asia Menor. Impakita dagiti komentona a naan-anay nga ammona dagiti nasayaat a galad ken pagkapuyan dagiti indibidual kadagidiay a kongregasion.​—Apocalipsis 2:1–3:22.

Uray ita, interesado ni Jesus iti tunggal adalanna. Inkarina: “Adtoy! Addaak kadakayo iti amin nga al-aldaw agingga iti panungpalan ti sistema ti bambanag.” (Mateo 28:20) Agbibiagtayo itan iti tiempo ti panungpalan, isu a masapul nga agtignaytayo maitunos iti awis ni Jesus a sumurottayo kenkuana. Maysa a pamay-an a maipangagtayo dayta nga awis ket ti regular a pannakigimongtayo. Kayat ni Jesus nga umimdengtayo kenkuana ken ‘agpaisurotayo kenkuana’ babaen kadagiti naibasar iti Biblia a panagadal ken palawag a regular a paset dagiti gimong. (Efeso 4:20, 21) Patpatganyo kadi ti awis ni Jesus nga: “Umaykayo kaniak”?

“Dakayo Amin a Mabambannogan ken Madagdagsenan”

Ti maysa a napateg a rason iti itatabunotayo kadagiti Nakristianuan a gimong ket tapno maparegtatayo. (Hebreo 10:24, 25) Adu la ketdi kadatayo ti “mabambannogan ken madagdagsenan” gapu iti nadumaduma a rason. Mabalin nga agtutupatop dagiti personal a pakadanaganyo, kas iti parikut iti salun-at. Kadagiti Nakristianuan a gimong, mabalinyo a tagiragsaken ti makipinnaregta. (Roma 1:11, 12) Kas pagarigan, makangngegkayo kadagiti komento a mangpabileg iti espiritualidadyo, maipalagip kadakayo ti naibasar iti Biblia a namnamayo, ken mapaliiwyo ti pammati ti dadduma a mangib-ibtur kadagiti pakasuotan. Amin dagitoy ket makatulong kadakayo nga agibtur ken mangtaginayon iti balanse a panangmatmat kadagiti parikutyo.

Usigenyo ti kinuna ti maysa a Kristiano a babai a malaplapdan gapu iti nakaro a sakit. “Adda dagiti gundaway a mayospitalak gapu iti sakitko,” inlawlawagna. “Nagrigat no dadduma ti makigimong kalpasan ti pannakayospitalko, ngem makagunggona kaniak dagiti gimong. Ti kinasinged ken ayat dagiti kakabsat ti mangpabpabaro iti rag-ok, ken makapnek ti panagbiagko gapu kadagiti pannursuro ken panangiwanwan nga ipapaay da Jehova ken ni Jesus.”

“Ti Sangolko Nalanay ken ti Awitko Nalag-an”

Paliiwenyo ta iti teksto nga us-usigentayo, kinuna ni Jesus: “Agsursurokayo kaniak.” No agpaisurotayo ken ni Jesus, agbalintayo nga adalanna, ken alaentayo ti sangolna no agdedikartayo iti Dios ken agpabautisartayo. (Mateo 28:19, 20) Tapno makapagtultuloytayo nga adalan ni Jesus, nasken a regular a makipasettayo kadagiti gimong. Apay? Agsipud ta kadagiti Nakristianuan a gimong a makasursurotayo maipapan ken Jesus, kadagiti pannursurona, ken kadagiti wagasna.

Ania ti awit a kayat ni Kristo nga ibaklaytayo? Isu met laeng ti awit nga imbaklayna​—ti pribilehio a mangaramid iti pagayatan ti Dios. (Juan 4:34; 15:8) Masapul ti panagregget tapno makapagtulnogtayo kadagiti bilin ti Dios, ngem kabaelantayo nga ibaklay dayta nga awit. Mabalin a nadagsen dayta no awitentayo a bukbukod. Ngem no ikararagtayo nga ipaay koma ti Dios ti espirituna ken mangantayo iti naespirituan a taraon a naidasar kadagiti gimong, makaawattayo iti inted-Dios a “pannakabalin a nalablabes ngem ti gagangay.” (2 Corinto 4:7) No agsagana ken makipasettayo kadagiti gimong, bumileg ti panagayattayo ken Jehova. Ket no ayat ti mangtigtignay kadatayo, ‘saan a makapadagsen’ dagiti bilin ti Dios.​—1 Juan 5:3.

Maipaspasango ti kaaduan a tattao kadagiti karit a kas iti panangisakad iti panagbiag, panangtaming kadagiti isyu a nainaig iti salun-at, ken panangrisut kadagiti personal a parikut. Ngem tapno matamingtayo dagita a sibaballigi, saantayo nga agpannuray iti sirib laeng ti tao. Tulongandatayo dagiti gimong iti kongregasion nga ‘agsardeng a maringgoran,’ agsipud ta ipaay ni Jehova dagiti kasapulantayo ken tulongannatayo a mangdaer kadagiti parikuttayo. (Mateo 6:25-33) Pudno unay a dagiti Nakristianuan a gimong ket maysa a pakakitaan iti panagayat ti Dios kadatayo.

“Naalumamay ti Kababalinko ken Napakumbaba ti Pusok”

Ugali idi ni Jesus ti mapan iti sinagoga, a sadiay a mapagsasaritaan ti Sao ti Dios. Iti naminsan a kaaddana sadiay, innala ni Jesus ti lukot ni Isaias ket binasana: “Ti espiritu ni Jehova adda kaniak, agsipud ta pinulotannak a mangideklara ti naimbag a damag kadagiti napanglaw, imbaonnak tapno ikasaba ti pannakaluk-at kadagiti kautibo ken ti pannakaisubli ti panagkita kadagiti bulsek, tapno dagidiay nailupitlupit papanenna buyogen ti panangluk-at, tapno ikasaba ti naparaburan a tawen ni Jehova.” (Lucas 4:16, 18, 19) Makaparag-o la ketdi a mangngeg ti panangyaplikar ni Jesus kadagita a sasao a kunkunana: “Ita nga aldaw daytoy a kasuratan a kangkangngegyo natungpalen”!​—Lucas 4:21.

Agingga ita, ni Jesus, ti naalumamay a “panguluen a pastor,” tartarawidwidanna pay laeng ti naespirituan a pannakaipastor dagiti adalanna. (1 Pedro 5:1-4) Iti sidong ti panangiwanwanna, nangdutok “ti matalek ken masirib nga adipen” kadagiti lallaki kas papastor kadagiti kongregasion dagiti Saksi ni Jehova iti intero a lubong. (Mateo 24:45-47; Tito 1:5-9) Dagitoy a lallaki siaalumamay nga ‘ipaspastoranda ti kongregasion ti Dios’ ken mangipakpakitada iti nasayaat nga ulidan babaen ti regular a pannakigimongda. Maipakitayo ti panangapresiaryo kadagitoy a “sagut a tattao” babaen ti pannakigimongyo, ket mabalinyo a pabilgen ti sabsabali babaen ti itatabuno ken pannakipasetyo.​—Aramid 15:30-33; 20:28; Efeso 4:8, 11, 12.

“Makasarakkayto ti Gin-awa a Maipaay Kadagiti Kararuayo”

No tumabunokayo kadagiti Nakristianuan a gimong, ania ti aramidenyo tapno sigurado a makapabang-ar dagita nga okasion? Ti maysa a pamay-an ket ti panangyaplikaryo iti daytoy a balakad ni Jesus: “Siputanyo no kasano ti panagimdengyo.” (Lucas 8:18) Naan-anay a nagimdeng ken Jesus dagiti tattao nga addaan nasged a tarigagay nga agsursuro. Kiniddawda nga ilawlawagna dagiti pangngarigna isu a nagunggonaanda iti naun-uneg a pannakaawat.​—Mateo 13:10-16.

Mabalinyo met a tuladen dagita a tattao a mabisin iti naespirituan babaen ti panagimdengyo a naimbag kadagiti palawag kadagiti gimongtayo. (Mateo 5:3, 6) Tapno maipamaysayo ti panunotyo, ikagumaanyo a suroten ti agsasaruno a kapanunotan ken argumento ti agpalpalawag. Iyimtuodyo iti bagiyo dagiti saludsod a kas kadagitoy: ‘Kasano a mayaplikarko iti biagko dayta nga impormasion? Iti ania a pamay-an a mausarko dayta iti panangtulongko iti sabsabali? Kasano a mailawlawagko dayta a punto?’ Kitaenyo met dagiti teksto nga inusar ti ispiker a pangsuporta kadagiti inusarna a kangrunaan a punto. Bayat nga agim-imdengkayo a naimbag, agbalin nga ad-adda a makapabang-ar kadakayo dagiti gimong.

Kalpasan ti gimong, pagsasaritaanyo dagiti nadakamat iti gimong. Ipamaysayo ti panunotyo iti material ken no kasanoyo a mayaplikar dayta. Dagiti makapabileg a panagsasarita pagbalinenda dagiti gimong a makapabang-ar unay.

Awan duadua nga addaantayo kadagiti nasayaat a rason tapno aggigimong. Kalpasan ti panangrepasom kadagiti pagimbagan a nausig, apay a dimo iyimtuod iti bagim, ‘Ania ti sungbatko iti awis ni Jesus nga: “Umaykayo kaniak”?’

[Dagiti Ladawan iti panid 11]

Adda kadi dagiti aktibidad a manglaplapped kenka a makigimong?